Des leiden winters· vberlast

Des leiden winters· vberlast·
der si verwâssen vnd sin rǒb·
der hat enpherwet manegen ast·
dem húre schoͤne stůnt sin lǒp·
in hoher wirde gar gewalteklichen·
do můste mangem herzen sorge entwichen·
dv́ nu betruͤbent sint als· ê·
mirst wirs danne we·
nach der vil minneklichen·

Mich wundert· das ich in den herz·
min so rehte werde trage·
ein wib dv́ mir so mangen smerz·
fuͤget vnd sende klage·
trut vrǒwe mines herzen keiserinne·
got weis wol das ich dich von herzen minne·
wilt dv mir lange sin gehas·
so wissent das·
das es mir nimt die sinne·

Es ist ein iemer wernder rú·
dv́ mich vnder gangen hat·
min leit ist alle tage nú·
sit so kleine mich vervat·
das ich ir eigen bin· vnd ir gesinde·
mich hilfet nicht min dienest her von kinde·
den ich ir willenkliche tet·
nu ist min bet·
das mir ir trost enbinde·