Der ich diene vnd al da her gedientet han

Der ich diene vnd al da her gedientet han·
sit ich von kinde alrerst dienen kvnde·
dú ist so lieb so gv̊t vnd ǒch so wolgetan·
dc man den allen niht geliches vunde·
si liebet sich von tage zetage·
dest ir sitte der ich so holdes herze trage·
dc si so svͤzer svͤze went·
dc man sich noͤte nach so svͤzer liebe sent·

Dehte ich iemer ine verdehte ir guͤte niht·
die man an der vil minneklichen vindet·
er mv̊s lachen swer ir vnder ǒgen siht·
des si sich nach ir selden vnderwindet·
den tút si froͤide vnd ere schin·
wol mich des so selig ist dú frowe min·
dem si mit liebe froͤiden wert·
dem git si froͤiden swc er ir zerwerlte gert·

Was div werde minneklicher froͤide git·
dem der si nach ir werde kan geminnen·
da bi vil der minneklichen froͤide lit·
dc sich des nieman zende kan versinnen·
wie kvnde ich iemer werden hohgemv̊t·
an ir trost wan si so gar nach wunsche tv̊t·
dvr das han ich mich ir ergeben·
wan si so wol gelieben kan dem man sin leben·