Der cleinen vogel freude ist gros

Der cleinen vogel freude ist gros·
si freuwent sich der liehten tage·
die al der welte bringent hohgemv̊te·
dar vnder sten ich freuden blos·
swas ich singe alder ich sage·
mich troͤstet niht eis reinen wibes guͤte·
mih helfent niht die blůmen vf der heide·
mich troste bas ein reine wip·
dú hat betwngen mir den lip·
das ich vnsanfte von ir minnen scheide·

Got weis wol das ich stete bin·
vnd iemer stete wesen wil·
an der vil minneklichen frowen reine·
minen mv̊t vnd al min sin·
hat si bi ir das niht ein spil·
des mv̊s ich dike sten an freuden eine·
mich hilfet niht swas ich der gv̊ten singe·
si tůt als si sich niht verste·
das tv̊t mir wol von schulden we·
vnd ich mit stete nah ir minne ringe·

Swas ich der gv̊ten ie gesanc·
das hat mih noch veruangen niht·
si lat mich leben in sorgen alzelange·
wurde mir ir habe dank·
so het ich noch ze freuden pfliht·
vnd diend ir gerne wol mit minem sange·
in mac der wol getanen niht vergessen·
si hat das herze min verwnt·
si vnd ir roseuarwer mvnt·
svs hat dú minnekliche mich besessen·

Jch minne ein wib nv manige tage·
vnd diene ir ǒch swas mir geschiht·
nv merkent ob es si ein herze swere·
dis ist das ich iv allen clage·
si weis es vnd engiht es niht·
ich fúrhte des ich si gar vnmere·
doch wil ich ir zedienste gerne singen·
wan seit es si ze froͤiden gůt·
swer habe vf minne steten mv̊t·
der mvͤsse ouch mir noch stete freude bringen·

Schiere wurde miner sorgen rat·
nach der vil lieben frowen min·
wolde si bas bedenken mine swere·
ich diende ir minne vf dinen rat·
vnd wart noch nie der helfe din·
gewar dc si mir deheine froͤide bere·
des mv̊s ich seneliche swere dvlden·
nach ir vil svͤssen mv́ndel rot·
noch hilf mir minne vs der not·
sit es so gar alles kvmt von dinen schvlden·