Dem krúze zimt wol reiner mv̊t (Mit aufgelösten Abbreviaturen)

Dem krúze zimt wol reiner mv̊t·
vnd kv́sche sitte·
so mag man selde vnd alles gůt·
erwerben da mitte·
ǒch ist es niht ein kleiner haft·
dem tvmben man·
der sime libe meisterschaft·
niht halten kan·
es wil niht dc man si·
der werke darvnder fri·
wc tǒgt es vf der wat·
der sin an den herzen niene hat·

Nv zinsent ritter úwer leben·
vnd ǒch den mv̊t·
dvrh in der iv da hat gegeben·
beide lip vnd gůt·
swes schilt ie wc zer werlte bereit·
vf hohen pris·
ob er den gotte nv verseit·
der ist niht wis·
wan swem dc ist beschert·
dc er da wol gevert·
dc giltet beidú teil·
der welte lob der sele heil·

Der hacchen han ich manigen tac·
gelǒfen nach·
da niemen stete vinden mac·
dar was mir gach·
dv́ werlt lachet mich triegende an·
vnd winket mir·
nv han ich als ein tvmber man·
gevolget ir·
nv hilf mir herre krist·
der min da varende ist·
dc ich mich dem entsage·
mit dinem zeichen dc ich hie trage·

Sit mich der tot berǒbet hat·
des herren min·
swie nv dú werlt nach im gestat·
dc lâsse ich sin·
der froͤide min den besten teil·
hat er dahin·
schvͤfe ich nv der sele heil·
dc wer ein sin·
mag ich ime zehelfe komen·
min vart die ich han genomen·
ich wil ime ir halber iehen·
vor gotte mvͤsse ich in gesehen·