Dú suͤsse minne svͤssen solt

Dú suͤsse minne svͤssen solt·
ir dienest manne git·
ir lon ist besser danne golt·
dc wissent âne strit·
sit vndertenig minne werden leigen·
si kan wol froͤide in sendú herzen heijen·
vil grôssen kvmber balde drvs verseijen·

Dú minne túret werden man·
vnd hoͤhet senden mv̊t·
ir lon ich niht gelichen kan·
erst besser danne gůt·
div minne iamer vnd leit verdringet·
min sendes herze nach ir lône ringet·
ich mv̊s verderben ob er mich verswinget·

Vil svͤsse minne hilfe enzit·
min froͤide ist leider kranc·
min trost min leben an dir lit·
twinc die dú mich ie twanc·
dc si mich noch genade lâsse vinden·
wil si mich niht von herzeleide· enbinden·
dc kan ich ane tot niht yb̾winden·

Der welte gv̊t ist mir ein wiht·
wan dc vil reine wib·
min stetes herze des vergiht·
vnd ǒch min sender lib·
si ist mir lieb vnd lieb vor allem gv̊te·
si wont mir zallen ziten in dem mv̊te·
min sendes herze ie nach ir minne wůte·

Der boͤsen has vnd ǒch ir nît·
ich gerne dvlden wil·
dvr die dú mir so nahe lit·
sist miner froͤiden spil·
vil grôssen kvmber dvlde ich von ir schvlden·
swas mir von ir geschiht dc mv̊s ich dvlden·
ich ranc vnd ringe ǒch iemer nach ir hvlden·

Wil si so bin ich sorgen bar·
wil si so bin ich tot·
si ist mines herzen wunne gar·
si kan wol wenden not·
si kan dvr gantzen lib wol herze wunden·
an si mv̊s ich gedenken zallen stvnden·
ir minne hat mich senden man gebunden·