Benutzer:Jonas kork/MartinaP3

Div sol die argen spisen

Geruoche herre wisen

Dines gewaltes die veigen

Und ir hofart geneigen

15

Wan dv bist der gesegnot

Uatter almehtic got

Ich gihe dir lobis gelt

Dur alle kvnftic welt

Von menschen samen

20

Die ir lebin hie namen

Zerehtem gelovben kamen

Dar vber amen amen

Do div vil suoziv maget

Martina hette diz gesaget

25

Unde ir gebet gesprach

Ein gehis wunder geschach

Ez kamen mit grozer bewege

Michel starke dunre slege

159b,29

Vber si geflozzin

30

Mit fures blicschozzin

Die kamen also dicke

Mit liehtis fiures blicke

Und vielin also nivwelich

Vffen si so griuwelich

35

Mit so grozim gesturme

Uf die helle wurme

Ir svnden do zestiure

Von himel starke fiure

Uielin vf die verworhten

40

Die got so cleine vorhten

Von dez tunren schal

Der so vorhteclich erhal

Wart ir frovde gar erbellet

So grimmeclich erschellet

45

Wurden in div hirne

Div valschin sivnden virne

Ir trost was do verlorn

Der gediende gottes zorn

Kam vf si so gesliffen

50

Dez wurden siv begriffen

Mit svnden in ir herzin

Ane rivwe smerzen

In bosem willen beclæwet

Uon dem tievil gebræwet

55

Vf der svnden luoder

Dez wart ir iamers fuoder

159c,57

Mit tusent valtem messe

Bi der tievil argen presse

Mit rehten wage

60

Zvo iemer wernder plage

Mit dem rehten lot gewegen

Gottes fluoch wart ir segen

Der wirt in niemer gewandelt

Siv wurden da gehandelt

65

Uil vnzartecliche

In dez tievils riche

Da sint siv vber laden

Mit spotte vnd mit schaden

Der sol in niht zerrinnen

70

Ane nivtze in rivwe brinnen

Svz kan der dunre schallende

Von himel fiure wallende

Uf dez tievils ewarten

Ir gotte ir gewalt sparten

75

Vnd kamen gar zespate

Ir pfaffen mit ir rate

Die wurden vber fruoget

Mit dem fiure verbrvoget

Die gotte ir helfe svnden

80

Den tempil siv selbe runden

Und wurden heime gesuochit

Ir gewalt gar verfluochit

Die pfaffen wurden verbrant

Zvo der helle fiur gesant

159d,85

Also svnden warme

Under dez tievils armen

Der wil si iemer truten

Vnd in da betiuten

Daz siv hie hant gelesin

90

In sol da offen wesen

Ir schrift vnd ir lere

Mit iemer werndem sere

In der tiefen helle schuole

In dem verflvochten pfule

95

Dez tievils schulere

Vernement die rehten mere

Der werdent siv bewiset

Ein wort in niht entriset

Noch ein einic buochstabe

100

Dez ich wol gelovben habe

Dez vngelovben cappelan

Die wil der bi im han

Die im bi gestuonden

Der git er volle pfruonden

105

In siner eigenen stifte

Mit leider hant gifte

Dez hant die eigen geste

Vil stete vnd guot hantveste

Noch wart dez tievils stat

110

Mit den gesten baz gesat

An michel schar der heiden

Die wurden da gescheiden

160,1

Von frivnden vnd von guote

Daz fiur si gar verbrvote

Mengen heidenschen turkoppel

Den viel da an den toppel

5

Fur ein sez ein ezze

Dez wart ir iamer wezze

Dez wil ich baz antwurten

Siv besazin da ein vrten

Div galt lip guot sel ere

10

Ane trostes wider kere

Wan da was kivuers niht

Dekeiner frode het man pfliht

Dem tievil vil daz toppel wol

Molit dv helle werden vol

15

So were im an den allen

Guotiv stiure da gevallen

Nv kan daz verfluochte loch

Nieman erfullen noch

Der wirt ist so gitic

20

Daz er also stritic

Wirbet vil geswinde

Umbe grozis ingesinde

Vnd het der arge tumber

Doch beste merren kvmber

25

Wan so ie menger fiur

So grozer hitze vnd vngehiur

Daz wil der arge liden

Die marter niht vermiden

160b,29

Vnd wil geruowen niemer

30

Dur daz die selen iemer

Dez himilrichis ane sin

Und mit im liden den pin

Wan der engelschen schar

Heter sich verwegen gar

35

Und gan nieman der wunne

Die er vnd sin kvnne

Verwurket hant mit schulde

Daz ist div gottes hulde

Dem er sich gelichen

40

Wolde do muoz er wichen

In daz abgründe

Diz was div erste sünde

Div och ie geschach

Dez het er stetes vngemach

45

Und die im vnerbolgen

Wellent niht volgen

Als die heiden taten

Die sieden vnde braten

Muozen mit dem tievil

50

Dar an ist kein zwivil

Der keiser hoh geborne

Wart och gottes zorne

Gewar an eime teile

Uon siner svnden meile

55

Die er doch iemer arnet

Er wart vast gewarnet

160c,57

Daz doch luzel vervienc

Der mantel der an im hienc

Unde ander sin gewant

60

Wart im do verbrant

Bi den selben ziten

Swaz an der selben ziten

Kleider an im was

Uor tode er doch genas

65

Daz geschach dur bezerunge

Daz alt vnde iunge

Gotis wunder sahin

Vnd im gewaltes iahin

Und daz div maget reine

70

Martina fri vor meine

Hie gediende grozen lon

Vnd ein wunnecliche kron

Dv niemer ende neme

Und daz och menger keme

75

Zegot mit ir helfe groz

Dort in abrahamis schoz

Do menger ie genoz

Wirt aller swere bloz

Hœrint wie dem abgotte

80

Geschehe von gotis gebotte

Daz artemia was genemmet

Der craft wart erlemmet

Die man mit vestem sinne

Erte fur eine guttinne

160d,85

Div wart da vil tovbe

Zebulvir vnd zestovbe

Uon gotis fiure verswendet

Vnd ir gewalt verendet

Uz dem der tievil trovck

90

Vnd den liuten ofte lovck

Ir lip ir sele er schante

Dez rehten gelovben pfante

Do got diz wunder getet

Dur sant Martinvn gebet

95

Dez wart div maget vil fro

Und sprach zvhteclich also

Lob daz die engel svngen

Div loblich erclungen

Do got wart geborn

100

Von der maget vz erkorn

Daz lob sprach disiv maget

Martina vil vnverzaget

Dez lobis sin wir gewis

Ez sprichit Gloria in excelsis

105

Lob si in der hohe got

Dur siner milte gebot

Vnd fride vf der erde

Allen livten vil werde

Di da guotes willen sint

110

Wan div sin gottes kint

Diz was der engelsche sanc

Der an cristes geburte erklanc

161,1

Diz lob also rehte guot

Sprach diu maget wol behuot

Und wunste gottes fride hie

Gemeinlich allen liuten die

5

Guotes willen waren

Vnd den vnfride verbaren

Und den die gottes namen

Mit gelovben ane schamen

An rufent mit warheit

10

Den si cristes fride geseit

Ich wil wol gelovben

Daz dem keiser tovben

Vnd dem heidenschen liut

Der reine fride wurde nivt

15

Der keiser alexander

Cleine got erkander

Sin herze was versteinet

Verhertit vnd vermeinet

Sin wisheit was erblendet

20

Dez waren liehtis gepfendet

Wafen iemer wafen

Wie was er suz entslafen

Daz er niht wart erwecket

Uon dem wunder vnverdecket

25

Daz er niht envorhte

Div wunder div got worhte

Da wider er niht mohte

Getuon als ez dohte

161b,29

Im was der kvnst zerrunnen

30

Uon leide vnversunnen

Doch was sin herze grimme

Vnd sprach mit luter stimme

Zeinem rihter alsus

Der was geheizin jvstinus

35

Nim die wider wertigen

Martinan die vnvertigen

Die vngenemen schanden

Hin zvo dinen banden

Diu vns mit ir zovber

40

Machet tovber danne tovber

Und vnser gotte schinpfet

Dez si sich noch berinpfet

Ist daz mir niht geswichet

Min gewalt noch entwichet

45

Vnd sol ich daz lebin han

Ich ovge ir einen grifzan

Und tuon si frovden ane

Von dem tumben wane

Ich si schiere bringe

50

Und bringe ir gedinge

Die si het ze criste

Vnd ir zoberliste

Ich tuon ir froden mat

Unde slahe ir ein pfat

55

Dez ir frovde hinket

Ir wirt von mir gewinket

161c,57

Dez si sich niemer gefrovwet

Svz wart der megde gedrovwet

Uon dem romschen keiser

60

An frovden wart er heiser

Vnde sprach mit grozer dro

Zvo dem rihter ivstino

Uon zorne luzel mohter

Nim hie dez tievils tohter

65

Vnd herze si zerspennen

Ir aderan zerdennen

Und heize die valschen frowen

Mit swerten gar zerhowen

Vnd heize mit guoter witze

70

Haggen nemen spitze

Gemachet vzser ysen

Und heize die veigen wisen

Abder frovden straze

Bi miner hulde niht laze

75

Dv heizest ir lip rizzen

Mit menger hande wizzen

Zerren vnd zerkretzen

Ir lebin also letzen

Mit marterlichim gebende

80

Vntze si ir leben ende

Sihet mich so besweret

An frovden gar erveret

Min keiserlich gemuote

Daz ie in froden blvote

161d,85

Het vntz her geblvoget

Daz het si vber fruoget

Mit ir zobers geluppe

Daz ich in leides wuppe

Gehis bin gevallen

90

Mir tuot so we ir schallen

Dar an si stete belibet

Daz si von mir vertribet

Aller froden kvrzwile

Und bin mit iamers bile

95

So mengewis bestanden

Daz ich in disen landen

Han so grozen gewalt

Vnd ein ivncfrovwe balt

Mich da von het gedrvngen

100

Wan ir ist wol gelungen

An minen goten vnd an mir

Daz ist geschehen wol zvvir

Mit ir zovber lere

Si het miner ere

105

Gar zenahe geramet

Dez ist mir gesamet

Beidiv stille vnd vberlut

Menges leides vnkrut

In miner frovden garte

110

Der ist ergraben harte

Uon swere menger distel

Darzvo iamers mistel

161,1

Verwustet mine frovde hat

Und miner froden gruone sat

Owe ach vnd abir ach

Daz ich die valschen ie gesach

5

Dez wirt mir niemer leides buoz

Ich bin der truren muoz

Und in leide swellen

Die wile man wider bellen

Hie die vngenemen siht

10

Mit ir zovbirs iamers pfliht

Mir vnd minen gotten

Der wil si spotten

Die keiser vnde kvnge groz

Menic furste der genoz

15

Hant geeret vnd gehohit

In ir gewalt geflohit

Ere lip vnde guot

Diu wan fridelich behuot

In den landen witen

20

In sturmen vnd in striten

Unde swes siv gerten

Die gotte si dez werten

Mit loberichir crone

Nach ir dienste zelone

25

Nv bin ich eine versmahet

Lieb von mir hin gahet

Mich het vngelucke

In vil mengem stucke

162b,29

Under sich gedrucket

30

Min frovde het sich versmuckit

Ich bin iamers ingesinde

Mich het zvo einem kinde

Der vntrost genomen

Den het min herze vollekomen

35

Vnd het zvo mir gehuset

Div selde ab mir gruset

So gar bin ich verdorben

Und an muote erstorben

Ach ach vnd owe

40

Waz sol ich sprechen me

Sit ein krankes frowelin

Krenkit suz die ere min

Si het min frovde begraben

Mines gewaltis honec waben

45

Sint mir worden bitter

Der schanden vngewitter

Het miner frovden gepflegen

Den fluoch fur selde gewegen

Waz tovge ich me zemanne

50

Min gelucke ist zebanne

Min frovde in der ahte

Swaz ich liebis mir gedahte

Daz ist ze leide mir gedigen

Jamir wil an mir gesigen

55

Owe waz ich nv tuon

Wan min keiserlich ruon

16c,57

Ist zespotte worden

Und mines gewaltes orden

Ich han gezettet den rogen

60

Min trost ist versmogen

Min lieb enwec geflogen

Vaste min ere gebogen

DIV SIBENDE MARTER

Nv ratent friunde mage

Ez stat vf der wage

65

Fursten vnde dienstman

Unde swer mir guotes gan

Wie ich die frowen tovbe

Ir zovberliste berovbe

Und ir schalkeit wider gange

70

Mit dez todes zange

Er sprach zvo dem rihter svz

Der da hiez ivstinus

Tvo als ich dir han geseit

Riche mines herzin leit

75

Daz ich dich iemer ere

Min truren daz verkere

Daz ich vor disem wibe

Bi frovden noch belibe

Div mich nv zemale

80

Mit zovberlicher quale

Gemvget het so dicke

Vil wolflich schehe blicke

Tet er gein der frigen

Martinun gottes amygen

162d,85

Als wir e doch lazen

Div gar ane mazen

Crist hatte gewihet

Der helfe niht verzihet

Swer siner genaden gert

90

Der wirt ir balde gewert

Justinus nam div maget

Martinam die vnverzaget

Alles cristus kampf hielt

Dekein not ir herze wielt

95

Ez kvnde nieman gebiegen

Noch mich zarte betriegen

Alder mit herten sachen

Linder doch gemachen

Man furte si vf vngewin

100

Zvo dem rihtere hin

Der saz zvo dem gerihte

Noch gewalteclicher pflihte

Justinus der vil herte

Und sprach mit hoferte

105

Furent her die bœsen

Ich wil den keiser lœsen

Von der vngehiuren

Ir zovber nv ersvren

Diu vns het getœrit

110

Und den tempel zerstœrit

Mit ir zovberlicher truge

Lat sehen waz ir nv tuge

163,1

Ir gogillichiu fuor

Bi sinen götten er do swuor

Ir schaden vnd ir laster

Vnde zvrnde ie vaster

5

Wen ez die gotte ruochen

Wir muozen hie versuochen

Waz si welle schaffen

Si wenet an vns affen

Unde toren lihte han

10

Heizint balde her gan

Svz wart ir vil gedrowet

Daz der keiser wart gefrowet

Martina gottes dirne

Div suoze tugenden virne

15

Div kivsche div schöne

Der lip lob ich gerne krone

Diu reiniv diu zarte

Blvogender meigen garte

Wizer lilie mazen fri

20

Hoh gebluomtes meigen zwi

Rehter bette ein tempel

Der kivscheit exempel

Grozer marter ein leitstap

Dez dir crist craft gap

25

Rose ane svnden dorn

Den got selbe het erkorn

Reines herzin ein bluome

Ein gespil vnd ein muome

163b,29

An kivscheit ein engel

30

Aller tugende bluomen stengel

Werdez gottes opfir

Svnder valsch ane kopfer

Ane gallen turtel tube

Honec suzer himel trube

35

Div clare diu wol behuote

Mit vestem kivschim muote

Kam fur den rihtere

Gegangen ane swere

Mit selden diu gezierte

40

Gein dem rihter smierte

Smehelich mit fuoge

Div vnverzagte cluoge

Gottes erweltiu gimme

Dez wart jvstinus grimme

45

Zornlichen er do sprach

Do er sich smieren sach

Hestu dez keisers gebot

Und och mines für spot

Diu verfluochte zovbererin

50

Hestu nv gespottet min

Dv bist gar an eren lame

Freidic frovwe ane schame

Vnfertic wib ane gelinpf

Bin ich worden din schinpf

55

Daz wil ich den götten clagen

Doch wil ich dir sagen

163c,57

Die warheit mit eiden

Mich muoz der tot scheiden

Uon gotte vnd von libe

60

Von kinden vnd von wibe

Uon witzen vnd von sinnen

Ald ich bringe dich innen

Waz ich mac vnde kan

Ich wolde vngerne ein man

65

Für disen tac heizin

In dez riches kreisen

Darzvo mich iemer schamen

Daz ich trüege mannez namen

Uor allen minen genozen

70

Cleinen vade grozen

Mohte ich dich veigen

Diner kalle niht gesweigen

Und din zovber gelegen

Sin hovbet begunder wegen

75

Vnd sprach merke vil eben

Ich wolde vngerne leben

Kvnde ich dir niht vergelten

Er begunde sere schelten

Die maget mit fluoche bern

80

Ich wil dir frowe swern

Bi der lihten svnnen

Und ir glastes wunnen

Der so rehte reine

Schinet vnd gemeine

85

Daz ich din tumbes herzen

Mit der marter smerze

Uz dinem libe snide

Vnd dez niht vermide

Ich heiz ez zestunden

90

Werfen den hunden

Darzvo din ingeweide

Da mit heize ich beide

Hunde spisen vnd tiere

Ob du niht vil schiere

95

Den götten opfir bringest

Vnd din gemuote twingest

Daz ez vnarcwenic

Den gotten si vndertenic

Obdv seiden dir niht ganst

100

So versuoche ich waz dv kanst

Waz du mugest geschaffen

Ich wene din claffen

Unde dinen argen list

Vnde waz din herre crist

105

Dir helfen muge

Mit siner valschen truge

Uf den dv gar verwazen

Dinen trost hest verlazen

Daz wirt hie versuchet

110

Obez nv geruchet

Miner gotte werdekeit

Daz si dir fur war geseit

164,1

So wirt dir ein strick geleit

Der dine schande machet breit

Do sprach der vnverzagte lip

Martina magt niht ein wip

5

Dv vnmilter valant

Uon dem tievil gebant

Daz mac dich wol berinpfen

Sol ich din niht schinpfen

Vnd haben och zespotte

10

Dines herren vnd diner götte

Der solhes gewaltes pfliget

Unde sich selben wiget

Fur alle lute mit gewalt

Daz dez craft ist gevalt

15

Uon einer cranken frowen

Daz mahtu selbe schowen

Do ez im niht entohte

Daz er mich twingen mohte

Do gab er mich do dir

20

Daz dv nach diner gir

Mich betwingen soltest

Als du och gerne woltest

Ist daz niht spottes wert

Daz din herze dich begert

25

Daz der keiser niht getuon

Mohte wollest dv den ruon

An mir cranken nv beiagen

Daz wil ich dir niht wider sagen

164b,29

Dv gelebst daz niemer

30

Daz dv min herze iemer

Uon ihesu cristo gescheidest

Swie vil dv mirn geleidest

Dv maht den herze liebin

Von miner sele niht gecliebin

35

Der zarte der milde

Het miner sele bilde

Gedrucket in sin ingesigel

Der die vesten helle rigel

Nach sinen lieben zerbrach

40

Die vil langes vngemach

Dur schulde hatten erlitten

Unde kvme sin erbitten

Die loste der vil guote

Mit sinem menschlichen blvote

45

Dur den bin ich hie bereit

Liden not vnd arbeit

Mit willen vnerschrocken

Uon zorne begonder rocken

Der rihtere Jvstinus

50

Der rede antwurte er sus

Din herre der dich mir gab

Dem sol volgen in sin grab

Gelucke selde vnd ere

Vnd allis liebis mere

55

Denne ich kvnne gesprechen

Den wil ich an dir rechen

164c,57

Dez gewalt hestv versmahet

Da von dir kvmber nahet

Der dich von froden ledigot

60

Den dv best gepredigot

Crist der mac din niht bewarn

Dv muzest eine vart varn

Div dich von selden keret

Und dich bekennen leret

65

Daz der keiser gewaltiger ist

Danne din vil valscher crist

Mit dem dv gesigen wilt

Div muvz mit der katzen spilt

Wiltu dich dem gelichen

70

Mit kampfe niht entwichen

So wirstu balde geschant

Dv hest den habch angerant

Ja mohte dine kœse

Din claffen also bose

75

Daz dv niht woltest miden

Den keiser niht lange liden

Als siner wirdi wol gezam

Vnd wart dir vil gram

Er hiez mich dich wisen

80

Mit fiure vnd mit ysen

Uil kvmberlichen nœten

Vnd lasterlichen tœten

Ob dv cristes gedæhtest

Und den gotten niht bræhtest

164d,85

Opfir nach ir werde

Und si vf der erde

Vnd in himel gewaltic

Gelovbtest gar einvaltic

Wiltu dez niht vermiden

90

So muozen wir hie liden

Waz din lip dez genieze

So man div bad vz gieze

Do sprach div reine guote

Der gottes engel huote

95

Zvo dem rihter ivstino

Din herze sol niemer fro

Werden fur disen tac

Daz er mich niht en mac

Mit sinem gewalte twingen

100

Noch zvo sinem gelovben bringen

Ich ahte in harte cleine

Uon siner svnden meine

Och wirstu niht gefrovwet

Swie vil dv hest gedrovwet

105

An mir dines willen

Din vientliches villen

Ist mir als din zarten

Wan ich wil gar erwarten

Aller diner froidekeit

110

Daz si dir fur war geseit

Sit dv wenest wiser sin

Danne alexander der herre din

165,1

Crist min helfer der mich hat

Behuot vor aller missetat

An dem wil ich beliben

Dv kanst mich niht vertriben

5

Uon im mit keiner marter

Ja wil ich dich harter

Pinen vnd och letzin

In not in kvmber setzin

Mit miner grozen gedulde

10

Die ich an alle schulde

Willeclichen hie nime

Dez ich criste wol gezime

Ein opfir ane meile

Dur miner selen heile

15

Da von tuo swaz du wellest

Swaz diu noten mir gezellest

Die sint mir als als ein spel

Min muot ist niht sinwel

Uon criste ez niht welzit

20

Sin minne het versmelzit

Mine liplichen vorhte

Die dv gar verworhte

Doch niht wil erkennen

Dv maht niht entrennen

25

Mich von siner minne

Noch herze noch mine sinne

Si gab im weder vor noch nach

Vnd tet siner frovden schach

165b,29

Vnd gewalteclichen mat

30

Mit cristes helfe an der stat

Swaz er drowete vnde bat

Daz was ir als ein blat

Jvstinus wart vnmuotic

Uon zorne vnde brvotic

35

Elliu frovde im enpfiel

Sin herze von zorne wiel

Er hete gerne vil getan

Mohters vollebraht han

Dez willen im niht gebrast

40

Daz si als einen fulen bast

In vnd den keiser ahte

Sin herze ez sere wahte

Grisgramende er do grein

Als ein hovewart ein bein

45

Alles grinende naget

Svz grein er gein der maget

Vbils willen was er vol

Unde leit vil grozer dol

Danne div gottis dirn

50

Wan div was in cristes schirn

In siner minne si bran

Si hiez der rihter freisan

Spannen an einen schragen

Hore ich daz buoch sagen

55

Der guten ane missewende

Wurden fuze vnd hende

165c,57

Mit seilen zerzogen

Als an einem bogen

Diu senwe ist gespannen

60

Als wart ir lip zerdannen

Und iamerlich gehandelt

An ir wart gar gewandelt

Div groze ere vnd diu zvht

Die man ie mit genuht

65

In hovelicher wunne

Bot wiplichem kvnne

Dez div welt ist geeret

Zehimel wirt gemeret

Gotes liehtes ingesinde

70

Dez vert ir lob so swinde

Beide berc vnde tal

Dvr die welt vber al

Siv hant hoher wirde pris

Got zierte sin paradys

75

Mit der ersten frowen lip

Div wart darnach adames wip

Und was im nahe sippe

Wan si vz sinem rippe

Gemachet wart ein maget

80

Dez ir lob iemer taget

Got liez vns grozer schulde

Komen zvo siner hulde

Dvr einer frowen reinekeit

Div ir lobes spiegel treit

165d,85

Da inne siv sich besehint

Dez ir eren sternen prehint

Mit hohir wirde glaste

Iemer mere vaste

Der alle frowen geniezint

90

In ir kivsche siu sich besliezint

Als der glanz in dem karvunkel

Gen ir schin ist tunkel

Aller clarheit luter glanz

Si ist crone vnde cranz

95

Aller reinen frowen

Sit treit vnverhovwen

Den schilt allen wiben enbor

Si het frowen lobes tor

Mit ir kivsche beslozzen

100

Dez kvnt ir lob gedozzen

Dvr die siben climata

Der erde hie vnde da

Lat ivch baz bewisen

Wie mohte si got geprisen

105

Furbaz vf der erde

Danne daz der vil werde

Uon einer geborn wurde

Vnd aller sivnden burde

Dvr eine frowen trüege

110

Vnd den tot zetode slüege

Der von svnden gelte

Gegebin was der welte

166,1

Vnd sich och stete gruonde

Daz den ein sunde ruonde

Waz mohte lobis mere sin

Dez hant siv der eren schrin

5

Uersigelt mit ir wirde

Vnd mit ir kivschin girde

Wannan sint die starken

Die drie patriarchen

Kamen man von wiben

10

Da von ir lobis schiben

Vf erde iemer lovfent

Der eren si sich strovfent

Die in tragent dekeinen haz

Noch horent aber furbaz

15

Wannan komen die wissagen

Und die botten bi den tagen

Die got selbe vz koz

Der aldiv welt hie genoz

Von frowen allis lasters bar

20

Wannan kam der megde schar

Und elliv reinen gottes kint

Die ze himel komen sint

Got selbe zierte den himel

Mit den engeln ane schimel

25

Vnd ane svnde gemachet

Da von div menscheit bewachet

Wirt vnd och befristet

In himel doch niht gebristet

166b,29

Uon in hohes lobe sanges

30

Vnd selden riches clanges

So het er hie gezieret

Die welt vnd och geflorieret

Mit dem reinen samen

Uon dem alle heiligen kamen

35

Der same het lobez ruome

Daz ist der wiplich blvome

Der die welt het gestet

Vnd vnverborgen glestet

Zwene bluomen treit ein stengel

40

Reinv wip vnd gotes engel

Die engel het er selbe dort

Div welt hie wiplichen hort

Frowen lob stat iemer

Man volle lobt si niemer

45

Dez genoz doch cleine

Disiv maget vil reine

Martina diu gedennet wart

An einen schragen vngespart

Als die heiden gerten

50

Ir lip wart mit swerten

Zerhovwen vngefuoge

Div blanke maget cluoge

Div als ein rose bluote

Swie vil man si gemuote

55

Do siv ir lip versnitten

Niht nach menschen sitten

166c,57

Ez waren hertiu herzin

Diu so bitterlichen smerzin

Butten also vnmilde

60

Einem so claren bilde

Ir kvschir lip sunderbar

Nach rosen vnde lilien var

Do man ir lip serte

Ir tiures bluote rerte

65

Do schrei du gotes drvte

Mit svzir stimme lute

Cristes cruce hilfe mir

Ich han geflohin zvo dir

Mit rehtem gelovbin

70

Dez la mich niht betovben

Ich han mit ganzer pfliht

Alle mine zvoversiht

Vf dich herre gesetzit

Och hest dv mich wol ergetzit

75

Mines cranken libes plage

Mit dinem heilawage

Din menscheit vns zemage

Wart hie geborn vntrage

Jvstinus wande daz du maget

80

An der marter were verzaget

Do der selben friste

Nach helfe rufte criste

Zornlich er do wuofte

Den metzieren do ruofte

166d,85

In vil boser akvste

Daz si der megde brvste

Mit den kreweln zerfuorten

Vnd sich och baz ruorten

Zvo der megde kvmber

90

Wafen daz er tumber

Niht dar an gedahte

Daz er daz versmahte

Daz er selbe hatte gesogen

An siner muoter vmbetrogen

95

Daz der gar verfluochte

Dekeiner eren ruochte

Der tievil in dez wiste

Daz in so lieplich spiste

Daz er daz hiez hœnen

100

An der megde schonen

Elliv tugent was im wider

Daz er du wiplichen lider

Diu in hatten gesovget

Und liebis vil erzovget

105

Svnderlichen furbaz pinen

Vor alden sarrazinen

Wan er sich dez wol versach

Daz si grozer vngemach

An den brvsten dolte

110

Da von der arge wolte

Daz man si pinde da

Furbaz danne anderswa

167,1

Es tuot och niender wirs

Hore ich sagen gelovbit mirs

Unde sprach in spotte gar

Crist der neme din war

5

Dem dv holden muot treist

Vnd im getruwest aller meist

Der helfe dir vz aller not

Wan dir nahet nv der tot

Din crist het din vergessen

10

Dv bist mit torheit besessen

Din crist ist da heime niht

Er en weiz waz dir geschiht

Er ist gevarn zeholtze

Uil lihte nach einem boltze

15

Er kvmit so er muozic wirt

Vnd er siniv schaf geschirt

Din crist ist entslafen

Sus begonder si strafen

Und treib sines spottes vil

20

Vf der megde marter spil

Dez im niht antwurte

Div maget von hoher geburte

Swaz man si mit spotte

Und mit kreweln kestegotte

25

So was si doch erfult

Mit der vil reinen gedult

Togenlich ir herze neic

Dem süezen criste vnde sweic

167b,29

Die vnverschulten buoze

30

Wac si zvo einem gruze

Uon ir vil liebin amise

Dem zehohim prise

Ir sele wolde bereiten

Mit ir libes arbeiten

35

Ich wil die schrift entschieben

Got pinet sine lieben

Daz siv niht vergezzen sin

Noch si der welte valscher schin

Mit zarte hie betriege

40

Vf dirre kvrzen welte stiege

Der geist mit horwe ist becleit

Daz machet och div crankeit

Daz er gottes vergizzet

Und diz kvrz gemach mizzet

45

Fur daz iemir lebin

Daz got dort wil gebin

Der ohse luzil zvhet

So in der gart schuhet

Der gart div rinder schupfet

50

So er siv dicke stupfet

Lasheit den rossen were erkorn

Vorhten siv niht die sporn

Ros dicke furen vz dem wege

Uber zvne vnde stege

55

Liezin siv die zovme

Vnd och die sweren sovme

167c,57

Rehte liebi machet stæte

Die zivne vor der sæte

Schirment wol vor vihe

60

Gelicher wiz ich dez gihe

Got nam der megde abe

Alle zerganclichen habe

Und der welte varnde guot

Daz der sele schaden tuot

65

Daz wolder daz siv vermitte

Vnd daz erbe hie erstritte

Daz er vor hatte ervohten

Dar vnser vordern niht mohten

Komen e ers hie ervaht

70

Mit siner menschlichen maht

Dez gunder och der megde

Daz si dez kanpfes geiegde

Uf sinem spor nach iagete

Daz tet si och vnverzagete

75

In der marter sweic si stille

Wan ez was wol ir wille

Daz si gelœset wurde

Uon der welle burde

Vnd div vngetruwe welt

80

Ir zins vnde och ir gelt

Uon ir kivschim libe neme

Daz si lidic vnd fri keme

Fur den rehten rihtere

Aller crumber slihtere

167d,85

Swigende si do lac

Dekeiner rede si pflac

Vf mit der sele ovgen

Sach si zegotte tovgen

Der ir och zetroste kam

90

Und alle ir swere vernam

Ir lip do zestunden

Bluotender wunden

Enpfie da vs gesundert

Ahtovwe vnde hundert

95

Die alle frische bluoten

Und der megde guoten

Von den swerten waren komen

Ald von kreweln genomen

Die wac si harte lihte

100

In dez gelovbin bihte

Wan si vil gedihte

Crist si im selben wihte

Wafen der kestegunge

Daz ein maget iunge

105

So zart vnd also murwe

Ane sünde schimels hurwe

Also grozen kvmber dolt

Daz geschach vf minnen solt

Uon der schribet och alsus

110

Der hohe lerer Paulus

Daz div minne vertribet

Alle vorhte swa si belibet

168,1

Diu minne ist och milde

Nach crist ist ir bilde

Der mit milte ist behuot

Und mit ganzir demuot

5

Minne treit dekeinen haz

Ze bœsen dingen ist si laz

Div minne keiner rache gert

Vbir wille ist ir vnwert

Div minne ist vor hofart

10

Ellv zit wol bewart

Der vnreinen gitekeit

Ist von der minne wider seit

Div minne ane vrdrutz

Suozchit niht ir selbis nvtz

15

Und begert an allen pin

Guoten dingen nvtze sin

Div minne ist mit truwe

Zallen ziten gerne nivwe

Si kan niht erwinden

20

An den gottes kinden

Minne niht vbil gedenkit

Mit vbil si nieman crenkit

Minne ist ane bœse tucke

Und frowet sich niemans vngelucke

25

Si wil sich mit den frovwen

Die da svnder drowen

Die ganzen warheit minnent

Noch wanc daran gewinnent

168b,29

Si ist aller tugende ein sarch

30

Uon der disv maget starch

Also vaste was enzvnt

Swie ir lib vvere wunt

Daz si dez niht enahte

Ir sele ovgen si stahte

35

In dez lebinden svnnen prehin

Do ir so we was geschehin

Do wande der rihtere

Daz si verscheiden were

Und hiez horen der marter

40

Die der megde so zarter

Was gebotten vber maze

Uf der frien straze

An dem schragen si hienc

Jvstinus do zvo ir gienc

45

Vnd fragte die vil heren

Ob si noch wider keren

Wolte von ir gelovben

Dem valschen vnde tovben

Und der gotte helfe dingen

50

Vnd ir opfir bringen

Nach ir hohen wirde

Mit willeclicher girde

Den werden gotten bistan

Und ir zoberunge lan

55

Vnd in ir dienste wesen

So mohte si wol genesen

168c,57

Vor dem tode grimme

Do sprach diu edel gimme

Mit ir süezen munde

60

Swie si doch were wunde

Ich han den geweren crist

Der min herze alle frist

Mit siner helfe sterkit

Daz wol min sele merkit

65

An den gelovbe ich wol

Ich enwil noch ensol

Opfir bringen den gotten

Als ir tumben hant gebotten.

Wan swer ir helfe ruochit

70

Der ist mit in verfluochit

Dine marter ich versmahe

Swie vil ich der enpfahe

Der wirt ich niht gewar

Mich het min herre gar

75

Behuot ihesus cristus

Der rihter ivstinus

Wart von leide ane sin

Uf sines heilis vngewin

Eine lange wile vnfro

80

Mit iamer vberladen do

Im tet so we div stete

Daz alle sine rete

Niht verwahen mohten

Noch die marter tohten

168d,85

Daz er die wol gemuote

Mit vbil noch mit guote

Bringen mohte von criste

Mit dekeinem liste

Er was ein martere

90

Uon sines herzin swere

Im was swerer vnde wirs

Danne ir gelovbint mirs

Er hiez in grozim sere

Die kivschin maget here

95

Nemen von dem schragen

Und an ein bette tragen

Si duhte in so vil crank

Daz si von ir selbir gank

Niender mohte gekriechen

100

Vnd hiez si also siechen

Tragen von der selben stete

In den kerker an ein bete

Als ein mensche daz ane craft

Mit dem tode ist behaft

105

Si duhte in verdorbin

An creften vnd erstorben

Er wande si han ertotit

Si was so sere genotit

Und hatte so vil erlitten

110

Wider menschlichen sitten

Ir lip mit swerten entrant

Daz si dez todis pfant

169,1

Von rehte gewesen solte

Wan daz got da wolte

Sinv wunder erzeigen

Und den vngelobin neigen

5

Daz svnt ir selbe merken

Crist der begunde sterken

An dem libe die maget

Daz ich schribe vnverzaget

Die man getragen solte han

10

Die sach man selbe vf stan

Als ir me lide erswuore

Noch kein leit wider fuore

Daz was als ich wol wene

Wunderlich vnd selzene

15

Div kvsche maget wol gereit

Gurte zvo ir div cleit

Div minnecliche clare

Ir goltvarwis hare

Si zesamen do gevienc

20

Daz vbir die ahsil hienc

Diu kvsche himel tockel

Ir golt reiden lockel

Getrungen als ein trube

Die namm die turtel tube

25

Unde streich si balde nider

Nach der megde sitte wider

Wan got tet si sigehaft

Unde gap ir nivwe craft

169b,29

Daz si in kvrzir wile

30

Komen was mit ile

Zvo dem vinstern kerkere

E daz die metziere

Die buben vngenemen

Zvo dem kerker kamen

35

Die siv solden dar braht

Haben als ez was gedaht

Und an ein bette han geleit

Dur ir grozin crankeit

Dez waren die verwazen

40

Uon der megde entlazen

Wan si was selbe dar

Komen mit der engel schar

Si furte der hohe adelar

Den du maget hie gebar

45

In den kerker hin vnder

Dez nam der rihter wunder

Er wande daz si halb tot

Were von der grozen not

Er wart truric vnd vnfro

50

Ufe ein ros sazzer do

Vnd reit mit sinem gesinde

Zvo dem kerker geswinde

Un vant die vil guoten

Kivschen wol gemuoten

55

In gotlichen witzen

Vf einem stule sitzen

169c,57

Harte friliche

Mit koste riliche

Do er si an blihte

60

Uil sere er irschrihte

Ir antlute so vaste

Sam diu sunne glaste

Daz er si muoze miden

Vnd mohte niht erliden

65

Die hirnelschen schine

Die von der megde fine

So wunneclichen brachin

Und also sere stachin

Justinum in diu ovgen

70

Daz er ane lovgen

Muoze von dan entwichen

Mit zorne lasterlichen

In muote also gar sere

Daz er der megde ere

75

Mit niht kvnde erwenden

Daz begonde in pfenden

Frovden vnd der sinne

Er lie die maget da inne

Vnd gie mit zorne her für

80

Uesteclichen wart div tür

Mit sinem vingerlin versigelt

Vnde also vaste verrigelt

Als do ir sitte was

Noch behuot er si baz

169d,85

Er lie alda gesundert

Knappen vil nach hundert

Die der megde iungen

Huoten da betwungen

Daz si niht entrunne

90

Swie si doch niht gewunne

Dekeinem muot zefluhte

In der minne zvhte

Was ir herze genestit

Mit tugenden vber lestit

95

Daz ez von dekeinen leiden

Sich von criste wolte scheiden

Der was ir alle stunde

In herzin vnd in munde

Süezer danne ein honec sein

100

Ir herze was sin gemein

Und och anders nieman me

Stete was ir nach im we

Der rihter jvstinus

Schiet von dem kerker svz

105

Vnde saz vf sin ros

Mit dez steten zornes schos

Was sin herze verwunt

Uaste vntz vf den grunt

Daz si stete doch merte

110

Zvo dem keiser erkerte

Da wider was div maget

Martina vil vnverzaget

170,1

Daz si ane swere lac

In dem kerker vnde pflac

Loblicher süeze done

Div kivsche vnd div schone

5

Begonde ir gebet lesin

Criste daz si was genesin

Uor alexander vnd ivstino

Dez stuont ir gemuote ho

Si seite vnde sanc

10

Got lob vnde danc

Daz si billich och duhte

In dem kerker erluhte

Grozer glast mit wunne

Als div lihte svnne

15

Dez enpfie si grozen trost

Lip vnd sele wart erlost

Uon aller hande kvmber

Die jvstinus vil tumber

An ir reinen lip leite

20

Mit langer swerer arbeite

Der was da hin komen

Truric als ich han vernomen

Vf dez keisers palast

Dem richer koste nie gebrast

25

Den vant er ob dem tische

Mit fleische vnd mit vische

Keiserlichen wol beraten

Als ie die kvnge taten

170b,29

Dez mengen armen gebristet

30

Vor kvmber vngefristet

Och was martinen vergezzen

In dem kerker waz si ezzen

Oder trinken solde

Nieman si besorgen wolde

35

Doch hatte si nach prise

Die lebindigen spise

Der ist si nv gesattet

Dort da div süeze wattet

In der liehten megde schar

40

Uon ir kivschi lilien var

Von roselohter varwe

Uon ir bluote garwe

Daz si hat gegozzin

Dur crist vnverdrozzin

45

Justinus alexandern

Ob dem tische vandern

Den wunderte vil drate

Waz er also spate

Wolde alder svochte

50

Alder waz er geruochte

Dez wart er gefraget

Do antwurte vmbe traget

Justinus vnde sprach

Als din gewalt mir iach

55

Lieber herre vnde hiez

Daz ich dur niht enliez

170c,57

Und vngerne hatte gelazin

Daz ich die verwazin

Martinam die zovbererin

60

Der tumber muot vnde sin

le vnrehte doch lepte

Wider dinem gebot strebte

Der lip wart gespennet

An einen schragen gedennet

65

Zerhacket mit einem swerte

Als din wille och gerte

Unde mit kreweln zern

Ir lip mit marter bern

Vnd iamerliches villen

70

Daz ist nach dinem willen

Er gangen mit grozer müege

Uon hute morgen früege

Vntz an disen abent

Daz die metzier gabent

75

Der vnhulden mengen stoz

Slege vnde wunden groz

Swaz du hieze dast geschehen

Daz mahtu herre sehen

An minem gewande wol

80

Wan daz was vil vol

Menger bluotiger mazen

Als wir die warheit lazen

Die wan an in gesprungen

Uon der megde ivngen

170d,85

Und von ir turen bluote

Daz div vil kivsche guote

Willeclichen rerte

Die man so grimme serte

Daz man ez kvme mohte

90

Geloben als ez dohte

Si was so gar verhovwen

Daz hiez ivstinus schowen

Den keiser an sinem kleide

Wan siu trugen ir beide

95

Ane schulde vientschaft

Daz ir herze was gehaft

Ze criste also gar vaste

Dez waren siu mit laste

Grozez leides beswæret

100

An frovden gar erværet

Mit iamer och verdruckit

Uf schanden wart geluckit

Ir selden segel verruckit

Ir hoher muot versmuckit

105

Ivstinus begonde trosten

Den keiser mit dem bosten

Und seite wie ez ergangen

Was vnd vf gehangen

Div maget dur sin gebot

110

Wie si was gekestegot

Und doch niht erstorben

Von der marter noch verdorben

171,1

Dekeine not si schuhte

Daz vns dez niht duhte

Daz si niht enpfunde

Der marter an der stunde

5

Uns was wirser danne ir

Herre daz gelovbe dv mir

Bi dinen hulden romscher vogt

Div veigiv schande kan gezogt

In den kerker mit gehe

10

Als ir ie leit geschehe

Ich wande si were ertœtit

So vil waz si genœtit

Ich han gar erfullit hie

Dez ich din gebot enpfie

15

Keiser aller tugende stan

Nv horit dich daz wol an

Daz dv selbe nv gedenkest

Wie dv die tumben krenkest

Do sprach der helle reiser

20

Alexander der keiser

Wafen wie ist du bœse

Unholde so rehte lœse

So veste an ir gelovben

Daz si von dem tovben

25

Nieman kan bringen

Mit dekeinen dingen

Si kan zovbirs so gar vil

Da mitte si vns wil

171b,29

Alle stunde toren

30

Wil si dez niht horen

So svn wir si vil schiere

Mit einem grimmen tiere

Heizen gar zerzvcken

Zevil deinen stucken

35

Daz si als ir wol gezeme

Ein schantliches ende neme

Zvo der rede do gesweic

Iustinus vnde neic

Dem keiser vnde gerte

40

Urlobis dez er in werte

Morgen fruo do rihte

Sin buoben die bosen wihte

Iustinus der vil mere

Hin zvo dem kerkere

45

Von zorne begonder hœnen

Und sprach zvo der schœnen

Der keiser riche het gebotten

Daz dv werden gotten

Din opfir bringest balde

50

Vnd dine menicvalde

Zoberere lazest hin

Und dinen tumplichen sin

Den dv vil lange tribest

Dar an dv stete belibest

55

Ald din lebin wirt dir versperret

Din schoner lip vil gar verzerret

171c,57

Von tieren smehelich

Ane zwivil gehelich

Do sprach diu suoze maget

60

Martina gar vnverzaget

Swie we ir was geschehen

Reht alse dez svnnen prehen

Was ir antliute var

Und durluhteclichen gar

65

Getempert mit lihter varwe

Daz ez dem rihter garwe

Stal alliv sine werden lieb

Vz sinem herzen als ein dieb

Ivstine ich wil dir sagen

70

Ich han bi minen tagen

Mines libes not erlitten

Niht nach menschen sitten

Svnder ich han mine sinne

Uf cristes svoze minne

75

Mit ganzer zvoversiht geleit

Mit dez craft vbir streit

Ich allen din gewalt

Vnd dez keisers menicvalt

Drowen vnde marter

80

Cristes lip vil zarter

Dvr mich menic not enpfie

Willeclich der werde gie

An daz cruce mit gedulde

Fur alder welte schvlde

171d,85

Nam er einen scharpfen tot

Als diu minne im gebot

In dez crefte richem namen

Svozem vnde lobsamen

Gelovbe ich vberwinden

90

Dich gesehinden blinden

Der mit liehter ovgen gesiht

Gottes wunder erkennet niht

Ich han mit cristes creften

Vnd engelslicher ritterscheften

95

Die bi mir hie beliben

Und mit grozer ertbiben

Vwirn got appollen

Uerderbit gar zevollen

Vnd sinen gewalt geschant

100

Ze bulver gar vnd gar verbrant

Mit cristes helfe darzvo nach

Tet ich einen grozen schach

Der valschin guttinne

Diu och solhe gewinne

105

An dem topel da erwarb

Artemia diu gar verdarb

An gewalte vnd an eren

Div mvozen sich verkeren

Uon ole menic lieht vas

110

Da mitte si gezieret was

Vnd ir da von getrostet

Div wart mit fivre gerostet

172,1

Ze eschin gar verbrennet

Ivwir ewarten vbir rennet

Mit dez todis reise

Och wart menic weise

5

Uon gottes zorne gemachet

Dez der tievil sere lachet

Dez volkis ane zellen

Wart do zvo der hellen

Gesendet menic geschoch

10

In daz verfluochte loch

Nieman kan erlosen

Da die argen bosen

Wan die armen veigen

Sint dez tievils eigen

15

Und ander michel wunder

Daz och geschach hie vnder

Daz went ir blinden toben

Von gotte niht geloben

Wan daz ir hant geiehen

20

Ez si mit zober geschehen

Uon ivwer svnden laste

Sint ir verhertet vaste

Vnde went dar vz niht komen

Swaz ir zeichen hant vernomen

25

Der went ir niht wizzin

Sint ir alles geflizzin

Der grosten vbeltæte

Mit werken mit tæte

172b,29

Dez tievils menicvalter rat

30

Ivwirn sin verkeret hat

Daz ir niht genaden ruochet

Ir sint mit im verfluchit

Vnd eweclich verdampnot

Ivch het der lebinde got

35

Uon siner frovde gescheiden

Iiv verfluochten heiden

Mit dem tievil verrigelt

In die helle versigelt

Die nieman kan erfullin

40

In der helle gullin

Wan daz verworhte hol

Nimet so vngefuogen zol

Unde wirt doch niemer vol

Daz man gerne schuhen sol

45

Do dise rede erhorte

Iustinus do storte

Si siner frovden gemuote

Daz wart mit vnguote

Und mit zorne verseret

50

Daz er svz enteret

Was von der maget

Div doch war hat gesaget

Und hiez da vil schiere

Also gar grimme tiere

55

Offenlich bereit wesen

Von den solde si niht genesen

172c,57

Vnd hiez sin doch biten

Wan er wolde balde riten

Zvo dem keiser mit gehe

60

Daz er selbe da sehe

Wie div maget vermezzin

Uon dem lowen wurde gezzin

Der rihter jvstinus

Kan fur den keiser svs

65

Dem er holdes herze truoc

Siner rede er do gewuoc

Herre min la dich erbitten

Nach dinen keiserlichen sitten

Daz dv ruochest komen hin

70

Vf der vnhulden vngewin

Div vns svz vmbe tribet

Und so stete belibet

In ir grozen irrekeit

Dem wirt nv ende geleit

75

Vil liebir herre nv kvme

Ez ist diner selden frume

Wirt div veige vbir wunden

Uor dir niht zestunden

Der keiser sprach ich tuon

80

Hie wirt fride noch svon

Si bringe ir opfir balde

Den gotten vnd ir gewalde

Mit willen vndertenic

Vnd niht me widerspenic

172d,85

Sus kamen siv do beide

Der megde da zeleide

In den anphiteatrum

Der keiser hiez Limenium

Die maget fur leiten

90

Zegrozen arbeiten

Anphiteatrum daz betiutet

Als div schrift gebutet

Ein hof da man vf spilt

Dez iunge liute niht bevilt

95

Vnd was gemuret zeringe

Sinwel mit richem dinge

Und heiset och ein frithof

Ewarten vnd och bischof

Schriber vnde pfaffen gar

100

Kamen hin mit ganzer schar

Fursten vnde herren

Minder vnde merren

Unde romsche ritterschaft

Kamen dar mit grozer craft

105

Vnd daz volk algemeine

Daz povel groz vnd cleine

Svz kamen siv zebeider sit

Vf den vngeteilten strit

Er was gar vngeteilit

110

Gevangen vnd geseilit

Wart div maget dar braht

Martina als ez was gedaht

173,1

Daz wil ich bescheiden baz

Dur hofart vf grozin haz

Kam keiser alexander

Und swaz ir was der ander

5

Do kam div iunge maget

Dar alleine vnverzaget

Div svoze vnd div zarte

Div hatte an ir parte

Nieman da ir mage

10

Siv hulfen ir alle trage

Swaz si ie friunde gewan

Der sach si da nieman

Si kam ein vf den kanpf

Dez etslicher sich beranpf

15

Dez wart vil groze clage

Als ich harnach wol sage

Div maget ane fleckin

Stuont ane schreckin

Si hatte dar gesoldet

20

Obirs hœren woldet

Der alleine in siner hant

Erde vnde himel lant

Gewalteclich besluzit

Gein dem sich menger struzit

25

Im selben zegrozim vnheile

Der was da an ir teile

Zehelfe an ir siten

Der half ir vbir striten

173c,29

Ir vigent nach ir willen

30

Vnd ir hofart gestillen

Der keiser sere wuofte

Der megde er do ruofte

Daz si sich noch bedæhte

Den gotten opfir bræhte

35

Do sprach diu reine frovwe

Swer nv welle der schovwe

Daz opfir daz ich wil

Bringen nv an disem zil

Si meinde lip vnde guot

40

Und ir reine tures bluot

Do sprach der rihtere

Sich wa du lasterbere

Div vnser werden hohen götte

In schinpf in spotte

45

Mit ir zovber het geschant

Und zebulver het verbrant

Darzvo vf groz verluste

Dez richin tempils geruste

Gar zergenget vnd verwuoste

50

Daz grozes guot kosten muoste

Dez tempils pfaffen ermurdet

Zerknivstet vnd geburdet

Vil lute mit dem gemuore

Und mit ir zovber fiure

55

Het si ez gar geswendet

Der göte lop erblendet

173c,57

Man sol ir lip brechin

Der gotte laster rechin

Nv was da vf gedrovwe

60

Ein vngefuger lovwe

Der meiste den man ie gesach

Dez menic man da iach

Der nach dez buochis sage

Muoze haben alle tage

65

Zerehter spise ane gevære

Fleischis vierzic pfunde swere

Darzvo brotes daz och wac

Dez er zerehte spise pflac

Ahtowe vnd zwenzic pfunde

70

Dez man dem löwen gunde

Der was ane spise beliben

Etwie mengen tac vertriben

Ane trinken vnd ane ezzin

Daz er solde frezzin

75

Martinam die maget

Diu was doch vnverzaget

Ich wil dez Lowen nature

Und sines libes figure

Iv bescheidenlichen sagen

80

Der warheit niht verdagen

Der in den selben tagen

Die maget solte nagen

Der edel lowe frie

Het och nature drie

VON DEZ LÖWEN NATVRE

173d,85

Die het im got gegebin

Die betiutent och vil ebin

Got mit bezeichenunge

Daz merkint alt vnd iunge

Swenne so der lovwe liget

90

Unde sines slafes pfliget

So sint im ane lovgen

Stete offen div ovgen

Ein ander nature er hat

Swar so der lovwe gat

95

Daz er nach im zvhet

Den sweiz so er fluhet

Die ieger vnd ir liste

Daz er den lip gefriste

Und verstrichit der fuoze spor

100

Swar so er lovfet vor

Daz er niht werde vermeldet

Swa er sich veldet

Alder gat in holtze

So kvndic ist der stoltze

105

Nv hœrint wie div dritte

Nature sinem sitte

Mit bezeichenuge lit

Swenne der lovwin div zit

Kvmit daz si ir welfe

110

Gebirt von der nature helfe

So sint siv gar ane lebin

Da wirt in wunderlich gegebin

174,1

Als sin nature im giht

So si der Lovwe tot siht

Uon leide wirt er grimme

Mit einer luter stimme

5

Er in ir ore schriget

Div mit tode sint gebliget

Daz div lebin gewinnent

Von dem ruofe sich besinnent

Svz machet er sine kint

10

Lebindic diu tot sint

Der Lowe ab niht erschricket

Swaz er an blicket

So kvne ist sin gemuote

Und bezeichint cristes guote

15

Der nach der warheit vrhabe

Dur vns lac in dem grabe

Do was div menscheit entslafen

Div mit dez todis wafen

Dur vns was versnitten

20

Nach menschlichen sitten

Diu gotheit do wachete

Mit warheit vnverswachete

Svz svn wir och slafes pflegen

Bose werc lan vnderwegen

25

Vnd der welte vnmuoze

Und nach gottis gruoze

Bœse begirde stillen

Wachen mit guoten willen

174b,29

So der lip niht me müge

30

Daz diu sele mit ir flüge

Vf hohe zegotte fliege

Und wider dem fleische criege

Vnd habe dez vil gefugen ruoch

Div sele in der minne buoch

35

Div da heizet gottes brvot

Sprichet svs vber lut

Ich slafe aber min herze wachet

Daz ist zetiure gemachet

Daz der lip slafen sol

40

Uor allen werken nvtzis hol

Der wille ane vnderlaze

Wachen vf gottes straze

Der lowe sin spor och deckit

So er die ieger erschreckit

45

Suz dahte crist die gotheit

Mit menschlicher menscheit

Daz in an siner geburte

Der tievil niht enspurte

Daz hinderste teil daz ist der sweif

50

Alsus der gotheit ein reif

Was cristes menschlicher lip

Den div maget niht ein wip

Gebar an alle swere

Disen sweif so lobebere

55

Der der gotheit spor dahte

Den sach der vil geslahte

174c,57

Moyses an der selben stat

Do er got selbe bat

Daz er sich in lieze sehin

60

Daz mac niht geschehin

Wan er muoze sterbin

Swer mich sehe vnd verderbin

Doch so nime dv dez war

So ich schiere fur dich var

65

Gotte er do nach blichte

Ruggen halb von der geschihte

Wart sin antlut so clare

Daz in nieman offenbere

Wol mohte gesehin do

70

So mac er wol wesin fro

Der in iemer sol schovwen

In dez himels ovwen

Ovch sprichit sant paulus

Uon cristes menscheit alsus

75

Hetten die iuden gewizzen

Siv werin gar vngeflizzen

Cristes tode gewesen

Vnd were vil wol genesen

Do was der wol geslaht

80

Mit der menscheit verdaht

Och ist daz ane zwivel

Hette in erkant der tievel

Er hette siner marter not

Niht gefurdert noch den tot

174d,85

Alsus svn wir verstricken

Mit dem sweife steteclichen

Der sunden fuozstepfen

Swa wir die erkepfen

Mit dez todis vorhte

90

Der ie iamer worhte

Der tot ist dez lebins sweif

Der vnser vordern ie begreif

Mit dem svn wir vertuschin

Der svnden spor vnd verwuschin

95

Daz vns niht der helle ieger

Mit sinen banden mache mæger

Der lowe mit der stimme sin

Erkicket sine welfelin

Alsus kickte cristes ruof

100

Den im diu bitter marter schuof

Vmbe der welte schulde

Daz er vns zehulde

Sinem vatter brahte

Und vns half vz der ahte

105

Vnde von dem banne

Den frowen vnde manne

Uon alten schulden truogen

Die siv zeschulden slvogen

Do ruofte crist der trute

110

An dem cruce so lute

Daz wir lebinde wurden

Uon dez lebinden todes burden

175,1

Alsus svn wir och wuofen

Zegotte vnde ruofen

Mit demuotigen sachen

Vnser werk lebinde machen

5

Div wir selbe han geborn

Sint anders tot vnd verlorn

Wir vnser geist gekestgot

Daz ist ein opfir vor got

Und werdent vnser werc guot

10

Mit frovde vnd mit demuot

Vnde machent reinen muot

Alle tugende wol behuot

DIV .VIII. MARTER

Alsus der starke lowe ist

Betiutet an den suozen crist

15

Mit dem diu maget Martina

Verderbit solde werden da

Der keiser alexander

Wolde sehin vnd och ander

Der lovwe was von hunger scharf

20

Unmilteclichen er do warf

Siner lihter ovgen gesiune

Reht als sin werin nivne

In sinem starken huse

Dez wart da michel gruse

25

Im det der hunger we

Lüegende er lute schre

Der keiser trureclichen saz

Der megde truoc er haz

175b,29

Die hiez er balde do gan

30

In dez frithovis plan

Dar in si frolichen gie

Trost ir herze do enpfie

Uon dem suozen criste

Wan an der selbe friste

35

Kan von himel ein doz

Also michil vnde groz

Der so vorhteclich erhal

Daz die liute vber al

Begreif ein michil zitter

40

Uon dem grozen vngewitter

Wurden siv do er schreckit

Zesorgen gar erweckit

Der keiser alexander sprach

Do er die maget ansach

45

Und ir muot so vesten

Ir lip so schone glesten

Swie dicke er was verseret

Daz wart doch verkeret

Nach der selben arbeit

50

Als si ie gewunne leit

So edil arzenige

Gap ir der himel frige

Der tugende riche arzat

Ir lip ir sele tet er rat

55

Jvncfrovwe hœre mich

Dvr dine zvht bedenke dich

175c,57

Lege dine torheit nider

Kere zvo den götten wider

Mich erbarmet din iugent

60

Din frovde bernde tugent

Ich wil dir machen nivwe

Vatterlich varwe truwe

Bi minen götten swer ich dir

Daz ich mit ganzer liebi gir

65

Dich von herzin minne

Von dinem wisen sinne

Hoherborne reiniv fruht

Dvr din hoh gelobten zvht

Kere diz vngelucke

70

Daz nv in mengem stucke

Kvnftic vf dir lit

Und die iamerlich zit

Daz dir gegewurtic ist

La dinen herren ihesum crist

75

Dez die wisen schinpfent

Und dir vngelinpfent

Daz du haltest einen got

Den die fursten hant verspot

Daz dv doch dines libes

80

Dez alreschonsten wibes

Wiltu einen got verwegen

Dez nieman wiser hat gepflegen

Daz ist mir an truwen leit

Dez swer ich dir einen eit

175d,85

Beker dich frowe bekere

Dur diner iugende ere

Ich wil dich selbe erweln

Und fur alle frowen zeln

Daz dv ein keiserinne wesest

90

Vnd vor aller not genesest

Dich hoher frovden nietest

Und swaz du wilt gebietest

Daz dinem muote gevalle

Daz muoz alhie betalle

95

Geschehin ane twale

Nach dinem willen zemale

Ich wil dir ere schaffen

Ewarten vnde pfaffen

Svn dir frowe nigen

100

Gein dinen, gruozen sigen

Kvnge vnde fursten kint

Die vnder romscher krone sint

Herren vnde ritter gar

Darzvo diu gemeine schar

105

Burge vnd alle stete

Und elliv dorfer in wete

Muzen dienen diner hant

Vnde darzvo elliv lant

Svn dir vndertenic sin

110

Daz bedenke frowe min

Hohgelobte Martina

Sprich mit einem worte ia

176,1

Als dinen selden fuoge

Daz eht der diet genuoge

Und la allis opfir ligen

Gen dem volke vnd dem gedigen

5

Sprich niht wan ein wort

Daz ez werde hie erhort

Liebv frowe sprich alsus

Daz der hohe werde zeus

Ein gewaltic got si

10

Vnd im craft wone bi

So hestu mit gedult

Aller gotte gebot erfult

Und hest allen wernden gotten

Zvht vnd ere hie gebotten

15

So hoh vnd so werde

Ist zeus vf der erde

Vnd hest sine hulde verschult

Erfullit swaz dv tuon svlt

Und wirt dir ein frolich lebin

20

Mit hohin eren hie gegebin

Dv la dich doch erbarmen

Frowe mich vil armen

Der dir gerne gunde

Swaz er gutes kvnde

25

Unde tuo dez ich dich bitte

Dur dine tugentrichen sitte

Svz wart mit gelichsunge

Diu reine maget iunge

176b,29

Bestanden in mengewis

30

Dar an leite er sinen flis

Mit dro er ir smeichte

Daz si do cleine weichte

Div kivsch ane svnden schimel

Sach vf da zehimel

35

Ir wizen hende si zertet

Got sprach si ir gebet

Ane der vorhten smerzen

Lebindes lieht minem herzen

Mit aller guote gar gemischet

40

Daz niemer mer erlischet

Wolkenloser svnnen glanz

Ane maztn megde cranz

Ane flecken reiniv minne

Ane verlust steten gewinne

45

Kvnic gotlicher ewekeit

Din vmbefunden wisheit

Mich dine dirnen witzet

Der gewalteclichen sitzet

Uf dem vntodemigen trone

50

Mit eweclicher selden crone

Der siner gotheit wunder

Mit ir kantnvsse besunder

Offenlichen hie erzeiget

Div doch kein sin erveiget

55

Vnd doch offenlichen donet

Und sine kenpfen cronet

176c,57

Hohir got Emanuel

Minen lip vnd mine sel

Behuote in disem strite

60

Nv vnd zaller zite

Diner genaden ich bite

In dirre welte wite

Den keiser si an sach

Mit vestem muote si sprach

65

Ach dv valschir wisage

Mich verdruzit alle tage

Diner oden claffe

Wenestu torscher affe

Mit falsche mich betriegen

70

Swaz dv maht geliegen

Uon dinen gotten vnd der e

Daz tuot minem herzen we

Och ist mir din suzer zart

Alse dem ohsen der gart

75

Der in dicke mennet

Da bi er erkennet

Daz er muoz vaste ziehin

Dem garte niht enpfliehin

Wenestu och mit diner dro

80

Min herze machen vnfro

Und mit vbel crenken

Daz ez muge wenken

Von cristo minem gemahel

Noch herter danne der stahel

176d,85

Ist gein dem blige linde

Noch minder ich enpfinde

Diner suozen worte

Swaz ich der ie gehorte

Div gant mir als dem toren

90

Wisheit in diu oren

Cleine dv mich reizest

Swaz du guotes geheizest

Drowen vnd velsches gelichzen

Und din kvrzes richzen

95

Ir reht gelich wige

Dekeiner valscheit ich pflige

Ich sage dir daz schiere

Uon dem grimmen tiere

Wil ich den lip verliesen

100

Den kvrzen tot kiesen

Daz ich mit criste dort

Den vngezalten himel hort

Eweclich besitze

Siner froden glitze

105

Vil gerner danne ich dir

Uolge nach diner gir

Vnde dines rates pflege

Daz ich zeiungest lege

In dem helle drvhe

110

Bi dem igel vil ruhe

In dez todes se versovfet

Der wernden not verkovfet

177,1

Der dir vnd dinen genozen

Mit mengem kvmber grozen

Ze erbe ist gevallen

Mit dez todis gallen

5

Der keiser hoh geborne

Wart mit grozim zorne

Uon der rede besweret

Gar an froden erferet

Sin herze was verwazin

10

Den lowen hiez er lazin

Daz er mit gewalde

Die maget tote balde

Der Lowe lac mit gruze

Dannoch in sinem huze

15

Den der hunger muote

Grimeclich er luote

Daz er die liute erschrachte

Und si zesorgen erwachte

Diu vngehiure stimme

20

Hal so rehte grimme

Der meister der mit spise

Dez lewen pflac mit prise

Und in hatte erzogen

Mit meisterschaft vnbetrogen

25

Der tet vf hohe den laden

Der Lewe runde daz gaden

Lüegende er do lief

Ich wene vnmenger da slief

177b,29

Wan eines hungerigen lovwen

30

Darf sich nieman frovwen

Der im niht mac entwichen

Und er ane suchen

Vf in balde gahet

Waz dem sorgen nahet

35

Sus kam er gein der megde

In hungerigem geiegde

In den frithof geswinde

Zvo dem gotis kinde

Diu sich hatte verwegen

40

Dur den himelschen degen

Swaz ir mohte geschehin

Do si hatte ersehin

Den Lowen vnde er si

Zehant do wart er fri

45

Sines grimmen willen

Der begunde stillen

Der so rehte sure

Ist von angeborner nature

Der wart do als ein lamp

50

Der von zorne sinen camp

Hatte vor geruhit

Dez menic tier in schuhit

Daz er vil vbil handelt

Dez grimme wart gewandelt

55

In lieblich geberde

Von gotte ane geverde

177c,57

Sinv brinnenden ovgen wilde

Und sines antliutes bilde

Vnd din hertes gemuote

60

Wart in rehte guote

Minneclichen gekeret

Er tet als er verseret

Und och betruobet were

Von der megde swere

65

Er lie sich fur ir fuoze

Als er der megde gruoze

Und och ir hulde suochte

Vnd ir genaden ruochte

Solich geberde er do hette

70

Als er si dur helfe an bette

Und och ir trostes gerte

Do diz alsus gewerte

Vnd der groze Lowe gelf

Reht als ein iunges welf

75

Mit der megde spilte

Dez sich doch niht bevilte

Sine minne er bewarte

Mit liebir vorhte er geharte

Als gen dem meister der iunger

80

Er lie allen sinen hunger

Mit dem er e was geladen

Vf der reinen megde schaden

Daz er si ezzin solde

Als der keiser wolde

177d,85

Dez wille lac inegerdon

Dez was er doch vil vngewon

Daz ieman solte genesen

Dem er wolde vient wesen

Liebin kint nv trahtent

90

Gottes wunder vnd ahtent

Daz ein vnvernunstic tier

Gottes hohen gewalt so schier

Unde sine craft verstuont

Dez die lute niht entuont

95

Wa wart ie wilder tier doch

Danne der mensche ist noch

Daz so menic zeichen

Den keiser niht erweichen

Kvnde in siner herte

100

Daz er inwiderwerte

Sinen schepfer an vaht

Der in vz horwe hatte gemaht

Aller tiere was er tovber

Er wande daz mit zovber

105

Der Lowe were da gezamet

An rehten witzen was erlamet

Elliv siner selden lider

Der arme was in selbe wider

Wan er wolde niht verstan

110

Daz ez got hatte getan

Wan er was gebunden

Mit svnden zallen stunden

178,1

Vnd mit dez tievils bande

Der Lowe baz erkande

Die vil gotlichen tugent

Sine craft sine mugent

5

Danne keiser alexander

Minder got erkander

Danne der wilde lowe scharf

Der so lieblichen warf

Ovgen vnd antliute

10

In minneclicher tiute

Als er si erte da mitte

Siner alten grimmen sitte

Vergaz der lowe alda

Diu reine maget Martina

15

Diu hohgelobte gimme

Mit lobelicher stimme

Do si diu wunder gesach

Ir brinnender minne sprach

Herre aller tugende cranz

20

Din craft hie luhtet glanz

Schepfer himels vnd erde

Uon dinem gewalte werde

Schowe ich engilsche scharn

Vmbe dine dirnen varn

25

Ze helfe miner marter

Engel furste zarter

Uil helfeclich geswinde

Sich ich din hove gesinde

178b,29

Vor hinden vnd en neben

30

Mir zehohim troste streben

Die mine sele spisent

Und lobelichen prisent

Din hoh gelobten gotheit

Der ewic lob wirt geseit

35

Von allen lebinden zvngen

Din guete het betwungen

Diu dir ist iemer angehaft

Dez vil grimmen tieres craft

Und sin vngehures luogen

40

Daz mich hie solde muogen

Daz mich hestu senfte gemachet

Vnd sinen zorn geswachet

Dem keiser ze vor bilde

Daz der schalk vnmilde

45

Da an bezerunge neme

Und noch zehulden kæme

Dez er dekeinen willen hat

Da von ich dine trinitat

Flehen wil vnd dinen gewalt

50

Daz dv ir truge menicvalt

Blendest vnde torest

Ir valschen wisheit storest

Ir tovben frovde letzest

Vnd die in truren setzest

55

Die dir steten haz tragent

Und dinem gewalte widersagent

178c,57

Vnd ir gelovben vnreinde

La mich in ir gemeinde

Herre niht werden funden

60

Bi den vnreinen hunden

Vnd mengem helle wurme

In miner marter sturme

Und mines libes strite

In disem zerganclichem zite

65

Hilf mir engel fiurste

Der craft vnd der getiurste

Daz ich gesunt belibe

An sele vnd an libe

Niht dur mine blodekeit

70

Wan ich bin gar bereit

Dur dich zallen nœten

Dur dich laz ich mich tœten

Und swaz mir geschehin mac

Daz ist miner frovden tac

75

Niht wan dur die veigen

Daz dv geruchest zeigen

In dine grozen sterke

Die ich vil dicke merke

Diz sprach diu suoze maget

80

Vesteclichen vnverzaget

Wan si was wol verhaget

Mit selden so man saget

Vnd sprach zedem keiser

Dem heiden helle reiser

178d,85

Vnmilter valscher rihtere

Nv sich swaz dv swere

Gen mir hest getihtet

Und die sint vernihtet

Vnd zespotte worden

90

Und der naturlich orden

Dez der grimme löwe pfliget

Wie dem ist an gesiget

Der doch ist ane vernunste

Und aller diner kvnste

95

Von minem herren criste

Dez hohen wisen liste

Himel vnd erde hant gezinbert

Die liehten svnnen vnvertinbert

Und der vil schœne mane

100

Der dicke liehtes ane

Von siner wandelunge stet

Als im crist geordent het

Siner hohen wisheit kernen

Mahtv an den sternen

105

Kiesen vnd hestu witze

Und in ir liehtes glitze

Wie daz firmament nah mazen

Umbe swenkende ist an gelazen

Wie gein den ane triegen

110

Die siben planeten criegen

Sine wisheit werde

Mahtv an der erde

179,1

Merken och vil garwe

In wie menger varwe

Diu den sumer lachet

Und hohe frovde machet

5

Wie menge suoze fruhte

Si bringet mit genuhte

Abent vnde morgen

Wa daz lige verborgen

Den vil kalten winder

10

Daz ist der welte kinder

Fromede vnde tiure

Div sprache aller creature

Er alleine wol merkit

Der die erde het gesterkit

15

Daz si vf dem wazzir stat

Da inne menic wunder gat

Der groze visch cetus

Den diu schrift nemmit sus

Und menic mer wunder

20

Daz in dem wazzir besunder

Kriuchit vnde fluzit

Dez der mensche geniuzit

Got ist ez allis vndertenic

Wan der mensche widerspenic

25

Den er nach im machte

Der do sich selben swachte

Mit vil grozir siunde

Daz er der helle grunde

179b,29

Gegebin was mit rehte

30

Dem tievil zeinem knehte

Der herre het mich wol behuot

Dur sine grozen demuot

Der keiser sprach sage mir

Frowe nv daz ist min gir

35

Wie het sich gefuoget daz

Daz dez grimmen Lowen haz

Und sin hertes gemuote

In vngewonlich guote

Sich het also verkeret

40

Daz dv gar vnverseret

Gist von sinem zorne

Do sprach diu hoh geborne

Martina gottes kenpferin

Der beidiv herze vnde sin

45

Zecriste was geflizzen

Keiser dv solt wizzen

Daz diz ane geværde

Mit gotlicher bewerde

Ist geschehin ane var

50

Und ane zovber fur war

Da von ich dir rate

Beide fruo vnd spate

Daz dv dich wol versinnest

Und den svozen crist minnest

55

Mit ganzem gelovben zevollen

Der dinen got appollen

179c,57

Zepulver gar verbrande

Und sine craft wande

Vnd der guttinne darnach

60

Beide mat vnde schach

Sprach an ir gewalte

Artemiam die ervalte

Ewarten vnde pfaffen

Den ir odes claffen

65

Vergolten wart geswinde

Darzvo michel gesinde

Daz allis wart verbrennit

Als din herze wol erkennit

Darzvo die argen tivel

70

Die er an allen zwivel

In daz abgriunde het verclusit

Die e waren gehusit

In den abgotten tovben

Dem soltu gelovben

75

Daz ist der gewere got

Dez gewalt vnd gebot

Die alten vinster het entliuhtit

Mit siner genade erfuhtit

Und die verirt waren

80

Da her von alten iaren

An dem vil geweren stege

Die braht er zerehtem wege

Vnd swer noch geruochet

Siner genade vnd die suochet

179d,85

Dem wirt si gehes geteilit

Der svnden wunden geheilit

Und aller siner schulden buoz

Er wil daz sinen werden gruoz

Der sunder hie erwerbe

90

Vnd niht in sunden sterbe

Dar vmbe het er den lowen

Und sin hertes drowen

Vnd sin grimmen nature

Sin vientlichen figure

95

Gesenftet als ein schephelin

Daz er die vesten herte din

Da mitte machte linde

Daz dv gesehinder blinde

Den vngelovben liezist

100

Und bezerunge gehiezist

Swie vil div maget seite

Ald guter dinge für leite

Daz was im als gerazet

Vnd rehte als der blazet

105

Dur hitze in einen oven kalt

Niht me disiv rede galt

Und swaz im wart gepredigot

Sin herze was geledigot

Gar von aller tugende

110

Mit siner ganzen mugende

Er wider got strebte

Nach dem tievil er lebte

180,1

Do er dez lowen grimme

Und sine luegenden stimme

Sach so gar gelegin

So guter geberde pflegin

5

Gein der megde clare

Vnd da vil offenbare

Die gottes dirnen erte

Und sine nature verkerte

Vnd och der megde gemuote

10

In gedulteclicher guote

Uest vnd vngewandelot

Swie vbil si was gehandelot

Mit menger grozin marter

Da mit ir lip so zarter

15

Daz kvsche erwelte gotis vaz

So mengewis verseret was

An aller slahte schulde

Der selden vber gulde

Die got selbe erfulde

20

Mit der hohin gedulde

Do sprach dez tievils ritter

Mit beswertem muote bitter

Alexander der keiser herte

Der sich gottes genaden werte

25

Martina noch bedenke

Frowe vnde wenke

Uon dinem valschin gelovben

Vil œden vnd och tovben

180b,29

Den ich allis ander sihe

30

Dvr dine werdekeit vergihe

Den vil hohen got dyan

So mahtu vil selden han

Der ist dez hoher wiser rat

Dir von not geholfen hat

35

Vnd von dem Lowen ræze

Daz er dich niht æze

Do sprach div maget reine

Behuot vor allim meine

Uon svnden vnbewollin

40

Dinen werden got appollin

Den dv rehte liebe hast

Vf dez trost dv dich last

Der alle dine selde

Mit totlicher gemelde

45

Het gemalet vnd geverwet

Zvo der helle gemerwet

Wan diu valsche guttinne

Artemia diu dine sinne

Het berobit vnd geschant

50

Dez rehten geloben gepfant

Und dich het verwiset

Sich wie der gewalt riset

Vnd wie siu sint geschendet

Gewaltes vnd eren gepfendet

55

Und mohten in selben niht

Gehelfen in der geschiht

180c,57

Als dv vil valscher spehin

Mit dinen ovgen sehe

Wie siu wurden verbrennet

60

Mit gewalt vberrennet

Die verfluochten helle welfe

Waz dohte mir der helfe

Die min lieber herre crist

In so gar kvrzir frist

65

Pfante alle ir crefte

Mit siner meisterschefte

Dur minen magetlichen kanpf

Dez sich din frovde beranpf

Vnde dur die marter min

70

Wart der goltvarwe schin

Diner gotte gesmelzit

Der so kosteclich gevelzit

Mit edilm gesteine erblihte

Wie schier den crist verrihte

75

Do der keiser hat erhort

Der süezen megde wisen wort

Dez kam er gar von witze

In sines zornes hitze

Wart er gar verbrüeget

80

Aller froden vberfrüeget

Daz sin vil arger wille

Offenbar noch stille

An der megde niht vervienc

Und sin gewalt vnder gienc

180d,85

Von einem kranken wibe

Und siner selden schibe

Gie so rehte trage

Vnd er so menge lage

Der iungen megde leite

90

Ir lip ir sele er spreite

Menge totlichen stricke

Die wac si sam ein wicke

Uon der grozen wisheit

So got hat an si geleit

95

Vnde hiez den löwen schier

Daz vil grimme tier

In siner gaden wider tuon

In duhte er hete cleinen ruon

Mit dem lowen erworben

100

Dez was sin frovde erstorben

Er was im ein swer tac

Der do dez lowen pflac

Mit einer stimme lute

Dem lovwen do betiute

105

Als er in ofte lerte

Daz er wider kerte

In sin hus als da vor

Er wolde nach im daz tor

Nach gewonheit han beslozzen

110

Der lowe vnverdrozzen

Der e was sin iunger

Dem wart er do ein vnger

181,1

Swie wol er in erkande

Der starke hunger in mande

Daz er vergaz der zvhte

Wan der spise genuhte

5

Was im lange versaget

Dur daz er eze die maget

Der lowe wart vngehorsame

Sinem meister ane schame

Wan er was hungers vol

10

Da von er sinen priol

Wart der gebote trege

Swie lange er sin e pflege

Lat iv der warheit iehin

Ez mohte noch gesehin

15

Wan svnde lihte ein fuoder

Noch der selben brvoder

Beide iunge vnd grise

Der si lieze lange ane spise

Daz si wurde vngedultic

20

Und lihte als der lowe schuldic

Vnd vil lihte von sinem apte

In vngehorsami drapte

Und von dez hungers burde

Dem orden abtrunnic wurde

25

Ez were vil lihte zeswere

Einen guten closenere

Solder ane ezzen beliben

Vnd guten betten wiben

181b,29

Der hunger vil vngehiure

30

Twinget menge creature

Als och dem lowen geschach

Der sine zvht och zerbrach

Uon dez hungers reise

Dez witwe vnde weise

35

Von dem lowen wart gemachet

Und an froden gar geswachet

An dez lowen wider sweif

Er einen fiursten begreif

Der was geheizin alsus

40

Bi sinem namen Limenius

Alexanders ratgeber

Dem er lunggen vnde leber

In dem libe do verruhte

Darzvo er im zvhte

45

Sin vngetruwes herze

Dez was dez keisers smerze

Wan dem gap er ofte rat

Uffen menge missetat

Der rete wart do ende

50

Der lowe ane gebende

Tet im do dez huosten buoz

Dez man mengen lonen muoz

Den buzte er im vergebin

In zorne begonder streben

55

Und minneclichen er zarte

Beide har vnd swarte

181c,57

Dur ovgen dur brawen

Mit sinen wezzen clawen

Er sin niht enfalte

60

Ane twahen er im stralte

Zeberge vf der vil vnguoter

Alsam ein stiefmuoter

Strelte ir stief kinde

Der siv ze ingesinde

65

Zaller zit verdruzit

Dez ez luzil genuzit

Swie ez doch vnschuldic si

Der lowe was erbermede fri

Wan er hatte niht stræle

70

Sine clawen waren hæle

Und stralten wol zegrunde

Als er do best kvnde

Er hates niht baz gelernet

Dez wart alda geschernet

75

Sin vngetovfter hirne schedel

Im was vnkvnt dez manen wedel

Er wolde im niht entwichen

E daz er im daz kichen

Buozte vnd daz kallen

80

Uor den liuten allen

Von dem grozen wunder

Wart daz volk allis munder

Gemeinlich siv schrivwen

Mit vil guoten truwen

181d,85

Mit ernste vil pinliche

Gein dem keiser riche

Dem taten siv vil geliche

Siu ruoften siv gar vesteclich

Herre keiser la genesen

90

Und in dinen hulden wesen

Martinam die vil guoten

Die reinen wol gemuoten

Die got mit truwen meinet

Als er wol hat bescheinet

95

Und die der lovwe ræze

Och vil vngerne æze

Der evmenivm verderbet

Het vnd och ersterbet

Der lowe sich nach gruoze

100

Martinun lie zefuoze

Wider der nature sin

Wart er als ein schæfelin

Sin herte er gar verkerte

Die maget er sus erte

105

Dez la si nv geniezin

La dinen zorn verfliezin

Dur die magt sint geschant

Vnser gotte vnd verbrant

An die wir helfe suohten

110

Und ir genaden ruochten

Got der gewere crist

Der aller dinge schepfer ist

182,1

Vnd der hohen himel pfliget

Dez craft für alle götte wiget

Der ist dur dise maget

Mit siner guote vns betaget

5

Und diu wunder kvnt getan

Div wir niht me vernomen han

Wir sehen nv die warheit

Die Martina het geseit

Daz in dem abgötte sint

10

Div tievillichen helle kint

Die vns lange hant betrogen

Den wir dicke han gebogen

In zedienste vnser knie

Die div reine maget hie

15

Gewalteclichen het verstovbet

Und ir eren gar berovbet

Die rede vngerne horte

Der keiser wan si storte

Im siner eren gelimpf

20

Vnde wart dez volkis schimpf

Daz in ein wip sus schante

Und div abgot verbrante

Vnd sinen gewalt leite nider

So daz er niht da wider

25

Uon siner kvnste mohte

Getuon daz ez iht tohte

Dez was sin herze vnfro

Zvo der megde sprach er do

182b,29

Martina noch bekere dich

30

Uon diner tumpheit vnde sprich

Daz dian ein gewerer got

Si vnd daz sin hoh gebot

Ob aller dinge wirde wege

Vnd gotliches gewaltes pflege

35

So enpfahestu sinen trost

Daz din iunger lip erlost

Wirt von kvnftiger not

Dir nahet der grimme tot

Der dir nv ist bereitet

40

Und dines endes beitet

Do sprach div gottes brvt

Martina maget vber lut

Swaz mir ioh hie geschiht

So ist niht anders min vergiht

45

Wan an ihesum cristum

Dez gewalt ane drvm

Ist vnd och ie was

Der dur vns starb vnd genas

Und mit hohim werde

50

Geschuof himel vnd erde

Vnde sternen vnngezalt

Der mir gab den gewalt

Und allen den die sinen namen

Hie veriehint ane schamen

55

Die valschen gotte stœrint

Und alle ir wirde tœrint

182c,57

Vnd ir gewaltes pfenden

Zvo der helle senden

Abir din valscher got dyan

60

Dem dv govch bist vndertan

Dem vergihe ich hie gar

Uor dirre romschen schar

Wesin ein erin bilde

Uz dem der tievil wilde

65

Dich vnd die liute triuget

Als der stoc bezivget

Der ist ane gehorde hol

Als ein stoc zerehte fol

Darzvo blint ane gesehin

70

Als mengem stocke ist geschehin

Den ich mit minem gebete wil

Machen zvo eime toren spil

Als dinen got appollen

Der balde muoze zollen

75

Sin ere vnd sin selde

Sin golt vnd sin gemelde

Und riches gesteines glast

Wart der bose wiht ein gast

Wan er wart gehœnit

80

Mit warheit vmbe schœnit

Ich verhiuge mich alsus

Wie der botte paulus

Mit vil hohir volleiste

Sprach in gottes geiste

182d,85

Div cristen e ist komen her

Ein gezivg vnd ein gewer

Daz si die warheit kivnde

Wie div welt in siunde

Mengiu iar het vertriben

90

An ir kantnisse beliben

Daz ist nv rehte worden kvnt

Mit ganzer warheit alle stunt

Da e mort vnde mein

Und menic svnde vnrein

95

Vnzvhteclichen offen lebte

Ane vorhte wider got strebte

Mit svntlicher genuht

Ane trivwe vnd ane fruht

Da wonet in tugenden bluote

100

Dez heiligen geistis guote

In cristenlichem rvome

Als ein frodericher bluome

Der mit wunderlichen sorgen

Der vnder lac verborgen

105

Und nv die liute frœwet

Vnd altes truren strœwet

Der genaden svmer ist komen

Als wir alle han vernomen

Den die reinen wisagen

110

Kvnten vor mengen tagen

Und den nv cristes botten

Offenliche ane spotten

183,1

Der welte hant gepredigot

Uon alten svnden geledigot

In den wir alle waren

Da het von langen iaren

5

Keiser nv het genuhteclich

Elliv svnde vnzvhteclich

Gewurzit in dines herzin wert

Div gar vnverdrozzin vert

In dinem argen willen

10

Den nieman kan gestillen

Der dich an selden letzit

Lip vnd sele versetzit

Dem tievil dort zepfande

In dem vinster helle lande

15

Da diu frovde wirt verœset

Und dich nieman lœset

Wan din hugde verwaset

In diner siunde vnd vergraset

Wider diner groze missetat

20

So din gewalt begangen hat

Ist cristes genade groz

Div von siner güete floz

Komen vnd het erliuhtet

Genadeclichen erfiuhtet

25

Siniv kint diu herzeliebin

Und het iv valschen diebin

Zerstorit ivwir opfir

Daz valsch ist vnde kopfir

183b

DIV NIVNDE MARTER

Vnd der tievil het erdaht

30

Ir mit sivnden vollebraht

Daz got von himel versmaht

Wan ez ist in siner ach

Dez keisers muot wart scharf

Gein der megde er warf

35

Sinv ovgen harte dicke

In wolves schæhim blicke

Ir rede begunde in verdriezin

Und hiez si do besliezin

In einen kerker vf verlust

40

In vientlicher akvst

Da man si hin fuorte

Gottes genade si ruorte

In der selben kvrzen stunde

Vnd sprach mit svzim munde

45

Herre ich minnv diniv gezelt

Uf dines hohin lones gelt

Vnd wil der welte frovde miden

Ir haz vil gerne liden

Vnd waz si kvmbers biutet

50

Wan swen si hie trutet

Und mit ir zarte weichet

Waz der kvmbers reichet

Und eweclicher schulde

Gein der gottes hulde

5

Da von begert min sel

Mit dir vil suzer emanuel

183c,57

Beliben iemer alliv zit

Der lebindige frovde git

Behuote vor dem stricke

60

Und vil mengem ricke

Den si mit grozim meile

Hant gespannen minem heile

Behuote mine sele so

Daz mine vigent iemer fro

65

Mines valles werden

Uf dirre breiten erden

Habe mich in diner pflege

Dine straze dine wege

Mich herre vatter lere

70

Dur diner muoter ere

Mit dirre bette si gie

In den kerker vnde vie

Gottes lob mit frovden an

Nach dem ir herze bran

75

Der ir zetroste sande

Sin gesinde daz ir wande

Allen liplichen smerzin

An sele vnd an herzin

Div himelsche ritterschaft

80

Div ir menge groze craft

Uon gottes ordenunge bot

Si hette weder win noch brot

Da mitte si sich spiste

Als mich daz buoch wiste

183d,85

Weder do noch da vor

Ir herze vil hoh enbor

Himelscher spise gerte

Der er si schone werte

Dez seite si im danc

90

Mit mengem lobe sanc

Willeclichen vnverdrozzen

In dem kerker beslozzen

Uon allir ir sele maht

Ane vnderlaz die naht

95

Begie diu wandel frige

Mit der himelschen kvnpanie

Gotte div siben gezit

Vnd bevalh im ir alten strit

Wan nach zwein tagen

100

Als ich hœre sagen

Wolt ein grozes opfir tuon

Alexander dur hohen run

Mit gewalte friliche

Uon starker koste riche

105

In einem tempil nahe bi

Da inne waren selden fri

Gehuset zwelf abgotte

Nach vil richer keiser gebotte

Als si der tievil lerte

110

Da mitte er si verkerte

Unde hiez die reinen maget

Martinam div was vnverzaget

184,1

In daz tempil fuoren

Sinen alten criec ruoren

Div kam in lihter wunne

Livhtende als diu svnne

5

Uon gottis genade si schein

Als der edil karfunkilstein

Fur ander gesteine tuot

Ir herze vnd ir muot

Was so rehte luter

10

Crist ir gemahel truter

Hatte si so gar geschonit

Uber menschlich nature gekronit

Daz doch niht enwolde

Erkennen als er solde

15

Der gesehinde blinde

Daz er iht wolde linde

Werden von keinem zeichen

In kvnde niht erweichen

So menic gottes wunder

20

Siner svnden durriv zvnder

Was von dez tievils fiure

Enbrant vil vngehiure

Und sprach in hazze alda

Liebiv frowe Martina

25

Noch la dinen tovben wan

Den helferichen got dyan

Dez hoher trost vnde rat

Mengem hie geholfen hat

184b,29

Als ich weiz vnd wol sihe

30

Liebiv frovwe den vergihe

Zegotte als dir gezimet

Der dich gerne och vernimet

So mahtu wol selic wesen

Uor aller not hie genese

35

Vnd mac dir schonem wibe

Diner seldes geluckis schibe

Wol nach heile lovfen

Wirde vnd ere kovfen

So vil vnd dv selbe wilt

40

Und wirt din lob vzgezilt

Vf der erde vil witen

Nv vnd zallen ziten

Do sprach div muotes reine

Martina fri vor meine

45

Ich vergihe dinem govgel stock

Wesen nv der helle bock

Und den verfluochten tievil

Der an allen zwivil

Von dem himel wart vertriben

50

Da er vnlange was beliben

Dvr sine vnrehte hofart

Div von erste funden wart

Uon dem selbin lugenære

Dez wart der vngewære

55

Gestozin in daz abgriunde

Dvr die ersten fiunde

184d,57

Solte ich nv gelovben

Dem lugenere tovben

So were ich do witzen fri

60

Owe pfuh vnde pfi

Wie were mir denne geschehin

Solte ich dez zegotte iehin

Der den himel muoze rumen

Dur sine hofart ane sumen

65

Ich gihe nv vnd zallir frist

An den vil süezin crist

Der lit minem herzin nahe

Dur den ich gar versmahe

Swaz du mir torheit zellest

70

Da von tuo swaz dv wellest

Daz wil ich gerne liden

Wan ich wil niht vermiden

Die cristenlichen waren straze

Die mir in rehter maze

75

Crist het erzeiget

Sine gute gein mir gezeiget

Und gesant sinen trost

Der mich vorhten het erlost

Und alle liplichen vnkrefte

80

Mit siner hohin meisterschefte

Da von ich mine sele hefte

Zvo der himelschen rittschefte

Do hiez der keiser riche

Die maget vil zornliche

184d,85

Vf henkin ane die hende

In gar ruhim gebende

Daz kvnde nieman erwerren

Und mit kreweln zerren

Ir lylien wizen zarten hut

90

Die minneclichen zarten brvt

Der herze so luhter was

Als ein durliuhtic spiegel glas

Dez wir die warheit lazin

So was gar ane mazen

95

Diu selbe turtel tube

Dar abe ich och niht clube

Wan kvnde ich wol gemeren

Ir lob vol hoher eren

Daz tete ich harte gerne

100

Hvre vil lieber danne verne

Wan ich vnwiser tumber

Nie so mengen kvmber

Uernomen han von frowen

Dez wir die warheit schowen

105

Unverborgen in ir legende

Und ir marterlichen sende

Daz wart och da beweret

Ir reiner lip besweret

Wart vnd gar geletzit

110

Die krewel wol gewetzit

Ir murwen lip rissen

Dez sich die metzier flizsen

185,1

Vnd in gebot der keiser

Der grimme helle reiser

Dez herze sich do frowete

Do man so nitlich strowete

5

Der megde fleisch vnde bluot

Da inne do vil menger wuot

Daz bluotic gemelde

Brahte do vil selde

Der megde wol gemuoten

10

Genvhteclichen bluoten

Ir vnzallichen wunden

Die da vil vnverbunden

In tures bluot guzzin

Vnd seleclichen fluzzin

15

An aller sivnden meile

Uns armen och zeheile

In vil reiner gedulde

Wan si was ane schulde

Dez si och niht anders tet

20

Wan daz si got ir gebet

Mit reinem willen sprach

Den si togen ane sach

Mit dem inren herzin

Und sprach in ir smerzin

25

Vil andehteclich also

Dv hest mich gemachit fro

Crist in dinem willen

Daz ich diz swere villen

185b,29

Lide in dinem namen

30

Ich frovwe mich svnden schamen

Hie an diner hende wec

Daz hie schinet ane gebrec

An allir menschen bilde

Swie siv doch sin wilde

35

Dv het mir gemachit kvnt

Nv vnd zemenger stunt

Dinv hohin wunder

Diu hant gemachit munder

Mich dich armen dirnen

40

Daz ich muoz erkirnen

Dinen hohen gewalt

Vmbe svnden menicvalt

Din rehte gerehtekeit

Lob dur alle himel treit

45

Diner güeti guot gerihte

Sint in wernder pflihte

Uolleclichen iemer

Din erbermede doch niemer

Mit worten wirt ergrundet

50

Als der wisheit het gekvndet

Daz din erbermede mit lobe

Dinen werkin allen obe

Uon gotlichir güete swebet

Dez och elliv menscheit lebet

55

Dez la mich och geniezin

Vnd la mir gar zerfliezin

185c,57

Die liplichin vorhte min

Wan diu gottes kenpferin

Was so sere versnitten

60

Wider naturlichen sitten

Daz man ir heilic gebeine

Groz vnd och cleine

Unverborgenlichen kos

Svnder daz fleisch vnd blos

65

Div waren da gescheiden

Daz man an den beiden

Nach der warheit sage

Koz vil iamerliche clage

Als ich han gesprochin

70

Daz fleisch was gebrochin

Von dem gebeine vaste

We dem fromeden gaste

Daz man einer frowen lip

Einer megde niht ein wip

75

So vnverdiente marter bot

Ir kvschir lip vf den tot

Ergrabet als ein quader

Daz man menic ader

Vnverborgen prvofte

80

Daz der gebuttel ruofte

Martina frowe bekere dich

Din marter div erbarmet mich

Vnd vergihe svnder spot

Dyan fur einen rehten got

185d,85

Daz dv den lip behaltest

Und noch in frovden altest

Daz von der sweren marter

Din iunger lip so zarter

Werde noch geledigot

90

Swaz ir wart gepredigot

Daz wac si harte lihte

In vollekomener bihte

Sprach si ane fristen

Ich bin dur crist cristen

95

Dem begihe ich ane lovgen

Offenlich vnd tovgen

Den div maget sovgte

Vnd sich menschlichen ovgte

Daz er den tievil betruge

100

Und vz sinem gewalte zvge

Sine liebin hantgetat

Die er nach im gebildet hat

Der er lange wart entwert

Verwustet vnde gar verhert

105

Was daz menschlich gedigen

Elliv wer was im verzigen

Daz het nv crist enpflœhit

Gefriget vnd gehohit

Ubir allir engil kvnne

110

In vnzallicher wunne

Den vergihe ich vil reine

Mit drin namen eine

186,1

Nach dirre vergihte wart

Der lip der reinen megde zart

Furbaz me verseret

Ir tures bluot gereret

5

Ir brivstel vnd ir lanke

Und ir hut so blanke

Wurden gar zerfuoret

Unminneclich geruret

Mit der krewel haggen

10

Die hatten spitze zaggen

Die si vaste wazten

Ir kivschin lip zerkrazten

Do sprach div maget here

Nach ir herzin lere

15

Ein lieht ist den rehten

Ich meine gottis knehten

Nv hie offen worden

Und nach cristes orden

Den div rehte herzin hant

20

Vnd dem rehten bi gestant

Ein frode der niht geliche

Gein der elliv frode weiche

Und niht von alter zersliche

Vnd lip vnd sele riche

25

Nach disen reinen worten

Div siu alle wol horten

Tet got ein zeichen wunderlich

An den schurpferen svnderlich

186b,29

Die do ir lip vilten

30

Und vnminneclich spilten

Mit ir dez todis nit spil

Wan in an dem selben zil

Ir aderan gar erstapten

Daz siv niht crefte hapten

35

Ir wart och ir gebeine

Allen sament gemeine

Verseret untz in daz marke

Mit fromeder siecheit starke

Die in von gotte kamen

40

Und in ir craft benamen

Da von ir slege wurden weiche

Ir arme vz dem geleiche

Vz den ahziln slichen

Da von in frovde entwichen

45

Wan siv waren erbuoget

Als ir sivnde hatte gefuoget

Swie si ez doch betwungen

Taten der megde iungen

Und riefen also grimme

50

Mit clagelicher stimme

Genade keiser riche

Wir sin kvmberliche

Mit noten hie besezzin

Der wir niht mvn vergezzin

55

Uon pinlichem laste

Wir sin also vaste

186c,57

Verkrenkit von nœten

Die vns wellent tœten

Daz la dich erbarmen

60

An henden vnd an armen

Sin wir erlamet harte

Daz schowe vnde warte

Wie wir sin verdorben

Unser lider sint erstorben

65

An dirre iungen maget

Vnd ist si vnverzaget

Darzvo aller sorgen fri

Gottis engel sint ir bi

In wunneclichem schine

70

Die vns menge pine

Tuont vnd groze plage

Untz vf dez todis wage

Daz clagen wir vil verre

Dir richer keiser herre

75

Daz dv vns losest balde

Von noten menicvalde

Dirre fromeden mere

Gewan vil grozim swere

Der riche keiser freidic

80

Uil truric vnde leidic

Wart sin tumbes herze

So vngefuger smerze

In mit creften hinder greif

Daz sin witze gar zersleif

186d,85

Wan sweles ende er kerte

Als in der tievil lerte

So brach im ie der kruoc

Und gelac der vnfuoc

Aller vf sinem nacke

90

Der vngetovfter helle bracke

Der zeichen niht erkande

Da mit in got mande

Daz er keme von schulden

Zvo sinen werden hulden

95

Daz wac er harte cleine

Dez himelriches gebeine

Was nu vz dem muote

Er zvrnde vnde wuote

Gein der megde claren

100

Sin tievillich gebaren

Und allis sin getusche

Wac diu reine kivsche

Reht alsam ein durres stro

Crist hat ir herze so

105

Erliuhtet vnd gevestet

Mit genaden vberlestet

Da von der keiser tumber

Hie vnd dort kvmber

Uon siner genade vnpfentic

110

Gottis rache vbir in gentic

Als ich her nach tihte

Vnd sin strenges gerihte

187,1

Wan daz ist grimme gar

Swer sin rehte nimet war

Ez sprichit sant Jeronimus

Uon gottis gerihte alsus

5

Ich slafe oder wache

Mit senfte mit vngemache

Mit tranke oder mit spise

Oder in swelher wise

In singe in dem kore

10

So donet mir in dem ore

Div gottis vier her horne

Diu mit grozim zorne

Fur aldie welt wuofent

Und den toten ruofent

15

Daz siv zvo gerihte komen

Da wart allis daz vernomen

Daz vf erde ie geschach

Swer gottis gebot ie gebrach

Daz wirt da allis nivwe

20

Daz mit bihte noh mit triuwe

Hie niht gelutert ist

Daz rihtet danne ihesus crist

Allis nach dem rehte

Dem herren als dem knehte

25

Da vindet nieman veile

Frivntliches vrteile

Ich wil ein teil machen kvnt

Uon der schrifte nv zestunt

187b,29

Wie daz iungest gerihte erge

30

Und dez iamerlich geschre

Daz die verlornen schrigent

Die hie ir lebin frigent

Vor liplicher swere

Und geistlich lebin vnmere

35

Darzvo cristes marter hant

Wie trureclichen die gestant

E doch erge daz iungste zil

So geschiht e zeichen vil

Driv doch svnderlich geschehint

40

Dez die wisen pfaffen iehint

Daz erste zeichen besvnder

Daz ist daz menic wunder

Ergat mit grozim leide

Als ich harnach bescheide

45

Daz ander zeichen wunderlich

Daz och beschiht svnderlich

Ist an dem ende criste

Dez wisen trugeliste

Machent so grozen irrot

50

Und den tievillichen spot

Der nie me wart gehœrit

Vnd och vil nach tœrit

Gemeinlichen aldie welt

Als hernach wirt gemelt

55

Daz dritte zeichen vngehure

Kvmit mit gehim fiure

187c,57

Alle die e waren tot

Die stant vf todis not

Div fiunfzehin zeichin sus

60

Uant sante Jeronimus

Geschriben ander iuden buoch

Den svn wir gerne haben ruoch

Als ich iv e doch seite

Uon menger arbeite

65

Div vor gottis gerihte kvnt

Die ir gerne wizzen munt

Als div heilic schrift giht

Ein volk daz ander viht

Mit vrluge mit brande

70

Mit freise menger hande

Harte vientliche

Darzvo vil kvnicriche

Sich vrluges nietent

Grozin haz siv bietent

75

Ein ander mit manslaht

Da mit diu welt ie vaht

Daz lut vnzallich stirbit

Uon tode vnd verdirbit

Der ir so vil nider vellet

80

Daz es wirt vngezellet

Von hunger michil arbeit

Wirt der welte angeleit

Der si zeiamer twinget

Und ir vil kvmbers bringet

187d,85

In disem iamerlichem zil

Kvnnt ertbiben so vil

Daz ez den liuten frovde wert

Und ir trost so gar verhert

Darnach in kurzir frist

90

So kvmit der ende crist

Doch wirt e romsch rich erlan

Keisers vnde kvnges an

Vnde och der romsche hof

Ane babstlichen bischof

95

Der ende crist enpfangen wirt

Uon einem wibe div in gebirt

Mit mannis helfe als ez ie

Von anegenge her ergie

Nach der enpfancnisse

100

So kvmit vil gewisse

Der tievil zvo dem wibe

Der daz kint in ir libe

Fuoret mit siner crefte

Und nach siner meisterschefte

105

Wirt ez erzogen vnd geborn

Zebabilonj vf gotis zorn

Uon dem iudenschen geslehte

Daz da heizit dan zerehte

Als wir von schrift erkennen mvn

110

Vnd heizit der verlust ein svn

Er ist och wol dez namen wert

Sin herze allir bosheit gert

188,1

Darnach wirt er besnitten

Zehierusalem nach alten sitten

Vnd giht er si mesias

Der den ivden geheizen was

5

Uon gotte in der alten e

Als wir han vernomen me

Dez volget sinem rate

Div iudensche diet vil drate

Als meister heime bescheiden hat

10

Die ivden haltent sinen rat

Vntz daz elias wirt gesant

Und enoch von gotis hant

Die daz volk hie lerent

Vnd die iuden bekerent

15

Swaz ir von gotte ist erwelt

Daz wirt bekerit vnd gezelt

Och wirt dem endecrist gegebin

Ein guoter engel der sin lebin

Nach gotte rihten solde

20

Ob er im volgen wolde

So er danne versteinet

Wirt vnd och vermeinet

In allen hobt sivnden

Die nieman kan ergriunden

25

So lat den verfluochten barn

Der guot engel von im varn

Mit alle er von im scheidet

Zegotte er in verleidet

188b,29

Er wirt och gar vnkivsche

30

Daz er doch mit getiusche

Uor den liuten bergen kan

Als ein vals murdic man

Vnd als die gelichsere

Pflegent dur gefere

35

Daz er die tumben giegen

Da mitte muge betriegen

Der sich der velsche wol entsebet

Der lugenær so hohe hebet

Daz herze sin mit hofart

40

Daz mit sivnden der verschart

Sich gen gotte blæget

Mit valschir lere er kræget

Gein aller engel fiurste

Valschlich mit grozer getiurste

45

Daz er der e gesetze

Mit valschir lere letze

Uon grozer hofart vngezalt

Wirt er so küene so balt

Wan got dem tievils kneht

50

So lange vertreit sin vnreht

Daz er ez niht enrichet

Wan der arge brichet

Den cristen gelovben

Und heizit sich vil tovben

55

An betten hie fur got

Vnd heizit danne mit gebot

188c,57

Daz nie me wart erkennet

Und himel vnd erde brennet

Doch vor dem iungsten geriht

60

Fiunf hande zeichen geschiht

Die sant Lucas schribet

Der doch dekeines belibet

Stant in dem ewangelio

Die zelle ich iv also

65

Crist wac si selbe ho

Vnde ist ein sweriv dro

EIVNF ZEICHEIN SCRIBET SANTE LVCAS

Siv sunt svz erkvnnun

Daz erste an der sunnun

Daz ander an dem mane

70

Daz wizzint svnder wane

Daz dritte svn wir lernen

Daz geschiht an den sternen

So ergat der vierde kvmber

An menschlichem volke tunber

75

Der ane zal vf si vellet

Als harnach wirt gezellet

Der fiunfte kvmber ane were

Der geschiht och an dem mere

Und an sinem gewille

80

Daz niemer belibet stille

Div fiunf zeichen svn ergan

Uor cristes gerihte ane wan

Div lihte svnne fine

Verliusit so gar ir schine

188d,85

Daz diu welt sere erschrickit

Swer si denne an blickit

Der wirt aller frovden bar

So iamerlichen ist si var

Unde als man sprechin mac

90

So angstlichen ist der tac

So got selbe rihtet

Vnd dekeiner erbermede pflihtet

Och wirt der mane guot

Rehte var als ein bluot

95

Gein der gottis reise

Div mit angstlicher freise

Alder welte kvmet

Gein dem kein gewalt frumet

Och werdent danne gevalt

100

Die schonen sternen vngezalt

Reht als ein turres lovp

Riset ab dem bovmen tovp

Man siht fures schine komen

Die nie me wurden vernomen

105

Uon den sternen allen

Die man denne siht vallen

Daz si die sunder erschrecken

Vnd si zesorgen wecken

Och vallet vil der liute

110

Nach den sternen zetiute

Den so vollekomen lebin

Uor der welte was gegebin

189,1

Vnd alse sternen glizzen

Als wir von schrift wizzen

Der vallet danne vil nider

Die niemer koment wider

5

Under dez endecristes fuoze

Daz got erbarmen muoze

So ist daz vierde zeichen

Daz vns wol mohte weichen

Als sant Matheus het geseit

10

Ez wirt so groz iamerkeit

Vf die welt vnd ir kint

Div niht me vernomen sint

Uon anegenge der welt her

Der ich zeschowen niht beger

15

Daz fiunfte zeichen ergat alhie

Als ich iv bescheide wie

Daz mer mit solhe grimme vert

Als im von gotte ist beschert

Man siht die tobenden wellen

20

So vngefuoge danne quellen

Als die pfaffen kvndent

Die die schrift ergrundent

Von tobheit ez die varwe

Verliuset also rehte garwe

25

Daz sin craft erstirbet

Und sin nature verdirbet

Daz ez die lute twinget

Vnd si ze iamer bringet

189b,29

Mit dem vngehiuren doz

30

Den ez machet also groz

Dem svnder zeplage

Und sinen froden zelage

DIV FIVNFZEHEN ZEICHEN VOR DEM IUNGESTEN GERIHT

Sant Jeronimus och vant

Fiunfzehin zeichin vz genant

35

Diu noch kvnftic sint beliben

An der iuden buoch geschriben

Div lesint dur daz iar

Div noch geschehin svn fur war

E gottis geriht erge

40

Ob abir du geschehin e

Nach ein ander samenthaft

Daz het sin hohiv meisterschaft

Vns bescheiden niht nach reht

Sus schribet der gottis kneht

45

Nach siner warheit sage

Daz an dem ersten tage

Sich daz mer vf rihte

Uber sich nach einer slihte

Fur alle berge vber vierzic eln

50

Der lufte hohe im erweln

Wider siner rehten nature

Stat ez als ein mure

Daz ez niender fluzit

Noch die berge beguzit

55

Dez andern tages da wider

Lat daz mer sich nider

189c,57

Vierzic eln tief zetal

Rehte nach der erren zal

Daz man als man giht

60

Uil kvme daz mer gesiht

Dez dritten tages besunder

Ellv div mer wunder

Div da wonent in dem mer

Hebent sich vf mit her

65

Vber daz mer ruofende

Liugende vnde wuofende

Mit angstlicher stimme

Und mit iamers grimme

Daz an den himel hillet

70

Vnd si sere villet

Ir sprache nieman verstat

Wan der si geschaffen hat

Dez vierden tages alzehant

Mer vnd elliv wazzer verbrant

75

Werdent so gar mit fiure

Daz si der welt sint tiure

Dez fiunften tages vberlut

Elliv bovme vnd elliv crut

Blvotigen tovwe towent

80

Den elliv liute schowent

Als och ander meister iehint

Me dez selben tages geschehint

Daz alle vogel in der welt

Sich sament vf div velt

189d,85

Ieglich geslehte svnderlich

Nach sinem orden wunderlich

Als in got het gemessin

Ane trinken vnd ane essin

Sint siv von der sweren not

90

Daz vf in vil nahe lit der tot

Daz got selbe rihten wil

Der welte machen ein zil

Dez sehzten tages so vellet

Der welte bv gezellet

95

Dvrne burge vnd stette

Die vallent danne enwette

Dez selbin tagis so man seit

Hebit sich michel arbeit

Uber alder welte sloz

100

Komint fiures blic schoz

Die fiures flammes giezint

So vorhteclich erschiezint

Gen her himel firmament

Die angest vnde vorhte gent

105

Mit ir iamerlichen brvnst

Von der svnnen vf runst

Untz an ir vnder ganc

Dez alle liute werdent cranc

Dez sibenden tages gemeine

110

Velse vnd och steine

Sich vf ein ander blivwent

Kvnftige not siv nivwent

190,1

Wan siv in vieriu brechint

Und gotis zorn rechint

An den armen sivnderen

Die vil man froden erweren

5

Darnach ieglich stucke sich

Zersleht daz ander vientlich

Der steine doz vnde schal

Vnd ir gedone vber al

Dekein mensche vernimet

10

Wan got dem ez gezimet

Dez ahtoden tages wirt

Ein not diu angest birt

In kvmberlichem werde

Gemeinlich aldie erde

15

Erschuttit wirt so vaste

Mit ertbibens laste

So balde vnd so schiere

Daz menschen vnd och tiere

Niht mun der crefte han

20

Daz si danne mugen gestan

Selbe vf ir fuozin

Wan daz giv vallen muozen

Uf die erde gestreckit

Mit angest gar bedeckit

25

Daz in vnsuoze smeckit

Vnd si zesorgen weckit

Dez nivnden tagis wirt geswachet

Div erde vnd gemachet

190b,29

Beidiv ebin vnde sleht

30

Als div schrift het erspeht

Die grozin berge vngezalt

Und buhel werden gevalt

Vnd och zeinem stovbe

An allen creften vil tovbe

35

Dez zehinden tages vil offen

Koment die liute gesloffen

Uon der erde vz mengem hol

Angestlicher vorhte vol

Da siv lagen verborgen

40

Mit vngezalten sorgen

Vnd werdent danne ane sin

Uon grozir bloede vnder in

Vnde sehint ein ander an

Beide frowen vnde man

45

Als liute die zerstœrit

Sint vnd och ertœrit

Siv sint so rehte blœde

An creftin vnd so œde

Daz siv niht reden mugent

50

Ir zvngen zenihte tugent

An dem einloften tage

So stant vf nach sage

Gemeinlich alle toten

Den daz lebin was verschroten

55

Uon dez ersten menschen vrhab

Vnde stant vf diu grab

190c,57

Div werdent alle danne

Frowen vnde manne

Offen vnde vf getan

60

Dez siv e waren erlan

Uon da div svnne vf gat

Vntz daz si sich nider lat

Dur daz alle toten sa

Uz den grebirn komen da

65

Dez zwelften tages zit

An dem groz iamer lit

Als wir von schrift erlernen

Wan so vallent die sternen

Uon dem himel her nider

70

Abir alle sternen da wider

Die vns dunkint stille stan

Siht man fromede sitte han

Man siht siv danne sprægen

Fiures flammen vnd lægen

75

Mit grimme fiures schine

Dem svnder hie zepine

Och sagent etsliche

Dez selbin tages sicherliche

Daz elliv tier mit melde

80

Danne komen zevelde

Mit starkem vnmuote

Brüelende mit grozem luote

Und werdent von noten crank

So daz si spise noch tranc

190d,85

Uon rehter angest niezint

Sorge ir frovde besliezint

Des drizehinden tages schin

Hebt sich iamers pin

Wan alle liute sterbint

90

Danne vnd verderbint

Die in der welte sint

Man frowen vnde kint

Die muozen habin ende

Mit dez todis gebende

95

Dur daz si erstanden

Uon dez todis banden

Mit den die e waren

Tot vor mengen iaren

Unde von dez todis craft

100

Alle erstanden samenthaft

Dez vierzehinden tagis kvnft

Von der gottes sigenunft

Brinnet danne der himel

Div erde vnd och ir schimel

105

Daz ist der himel den wir sehin

Als ich hore pfaffen iehin

Der brinnet vnd du erde gar

Die wir nv bvwen offenbar

Dez fiunzehinden tages zit

110

Groze wandelunge git

So wirt in lihten werde

Nivwir himel vnd erde

191,1

Alle die e waren tot

Die stant vf von todis not

Die fivnfzehin zeichen sus

Vant sant Jeronimus

5

Geschribe an der iuden buoch

Der svn wir gerne haben ruoch

Als ich iv e doch seite

Uon menger arbeite

Die vor gotes gerihte kvnt

10

Die er gerne wizzen munt

Als div heilic schrift giht

Ein volk an daz ander viht

Mit vrluge mit brande

Mit freise menger hande

15

Harte vientliche

Darzvo vil kvnicriche

Sich vrluges nietent

Grozen haz siv bietent

Ein ander mit manslaht

20

Da mit div welt ie vaht

Daz livt vnzallich stirbet

Von tode vnd verdirbet

Der ir so vil nider vellet

Daz ez wirt vngezellet

25

Uon hunger michel arbeit

Wirt der welt an geleit

Daz siv ze iamer twinget

Und ir vil kvmbers bringet

In disem iamerlichem zil

30

Kvmit ertbiben so vil

191b,31

Daz ez den liuten frovde wert

Und ir trost so gar verhert

VON DEM ENDEKRIST.

Darnach in kvrzir frist

So kvmit der endecrist

35

Doch wirt e romsch rich erlan

Keisers vnde kvnges an

Vnd och der romsche hof

Ane babstlichen bischof

Der endecrist enpfangen wirt

40

Uon einem wibe div in gebirt

Mit mannis helfe als ez ie

Von anegenge her ergie

Nach der enpfancnisse

So kvmit vil gewisse

45

Der tievil zvo dem wibe

Der daz kint in ir libe

Furet mit siner crefte

Und nach siner meisterschefte

Wirt es erzogen vnd geborn

50

Ze babiloni vf gotes zorn

Uon dem indeschen geslehte

Daz da heizit dan von rehte

Als wir von schritt erkennen mvn

Vnd heizit der verlust ein svn

55

Er ist och wol dez namen wert

Sin herze aller bosheit gert

Darnach wirt er besnitten

Ze hierusalem nach alten sitten

Und giht er si Messias

60

Der den iuden geheizin was

191c,61

Von gote in der alten e

Als wir han vernomen me

Dez volget sinem rate

Die iudensche diet vil drate

65

Als meister heime bescheiden hat

Die iuden haltent sinen rat

Untz daz helyas wirt gesant

Vnd enoch von gotes hant

Die daz volk hie lerent

70

Und die iuden bekerent

Swaz ir von gotte ist erwelt

Daz wirt bekerit vnd gezelt

Och wirt dem endecrist gegeben

Ein guoter engel der sin leben

75

Nach gote rihten solde

Ob er im volgen wolde

So er danne versteinet

Wirt vnd och vermeinet

In allen hovbt sivnden

80

Die nieman kan ergriunden

So lat den verfluochten barn

Der guot engel von im varn

Mit alle er von im scheidet

Zegote er in verleidet

85

Er wirt och gar vnkvsche

Daz er doch mit getiusche

Vor den liuten bergen kan

Als ein valsch murdic man

Und als die gelichzere

191d,90

Pflegent dur gevere

Daz er die tumben giegen

Da mit muge betriegen

Der sich der velsche wol entsebet

Der lugener so hohe hebet

95

Daz herze sin mit hofart

Daz mit sunden der verschart

Sich gein gote bleget

Mit valscher lere er creget

Gein aller engel fiurste

100

Valschelicher mit grozer getiurste

Daz er der e gesetze

Mit valschir letze

Uon grozer hofart vngezalt

Wirt er so küene so balt

105

Wan got dem tievils knehte

So lange vertreit sin vnrehte

Daz er ez niht enrichet

Wan der arge brichet

Den cristen gelovben

110

Und heizit sich vil toben

An betten hie fur got

Und hett danne mit gebot

Sine nach volger zeichen

Die er mac erweichen

115

An der rehten hende

Mit sinis zeichens gebende

Und vor an die stirne

Der valsche sivnden virne

192,1

Der endecrist giht er si gottes kint

Von hofart wirt er blint

Und och von vnwitzin

Daz der arge gat sitzin

5

In gottis tempil als er si

Gewere got svnden fri

Vnd bosheit swerc als ein bli

Aller vals wont im bi

Die ivden bvwent danne wider

10

Daz tempil daz die romer nider

Hatten vor gebrochin

Vnd ihesum christum gerochin

Der endecrist noch mere giht

Daz vor im si gewesin niht

15

Rehte cristen liute

Wan daz si nach tiute

Sin gewesen alle sament trieger

Uerkerer vnde lieger

Wan als div schrift kvndet

20

Und die si hant dur ergrundet

Als do aller selden fruht

Vnd alle tugent mit genvht

Erfullit was an ihesu crist

Also wirt der selben frist

25

Der endecrist erfullit gar

Uon der tievillichin schar

Aller hovbt sivnden meil

Der wirt er zevollem teil

192b,29

Hvoben man in in alle wis

30

Dez hetter den hohsten pris

Wan er füeret ein gezog

Daz heizit gog vnd magog

Als etsliche hant gelesin

Svn div zehin gesleht wesin

35

Div von iacob kamen

Und vrhab von im namen

Div alexander der wunderlich

Hie vor besloz svnderlich

In caspios dem gebirde groz

40

Da er die iuden in besloz

Doch kamen siv wol dannen

Die frowen zvo den mannen

Der in die statte lieze

Und siv niht beliben hieze

45

So twinget si ein kvneginne

Daz muozen beliben inne

Div der amazonvn pfliget

Der gewalt so hohe wiget

In der gebot die iuden lebent

50

Und in grozen zins gebent

Och hant die iuden guoten wan

Daz siv werden vz verlan

Bi dez endecristis zit

Der danne grozin kvmber git

55

Mit dem div iudesche scharn

Zehierusalem koment gevarn

192c,57

Die cristenheit zerstœren

Vnd ir gelovbin tœrin

Der danne sere wichit

60

Da von der endecrist gelichit

Cerasti dem vbil wurme

Uon sines gewaltis sturme

Dem wurme sint vier horn

Von nature angeborn

65

Alsus wirt der helle hunt

Hie gewefint zaller stunt

Der endecrist daz helle tier

Het nach tiute horn vier

Div menge wunden machent

70

Und den gelovbin swachent

Daz erste horn daz er hat

Ist sin kvndiger rat

Der tuot mengem herzin we

Er prediet ein nivwen e

75

Vnd storit cristenlichiv dinc

So verre vnde sin getwinc

Ez iemer vollebringen mac

Beidiv naht vnd och tac

Der arge vil gar gevere

80

Sendet sine valschen prediere

In menge teil der welte

Die mit sinem gelte

Die cristenheit verkerent

Die schrift siv wider lerent

192d,85

Mit vnrehter valscher betiute

Und lant die cristen liute

Lerent niht die warheit

Als si von gotte ist geseit

Si erzeigent sich gar guot

90

Vnd tragent doch valschen muot

Daz ander horn vil vngehiure

Machet mengem witze tiure

Daz sint div valschen zeichin

Da mitte kan er weichin

95

Die cranken vn gemuoten

Der herze in zwivel wuoten

Wan mac sich kvme gefristen

Uon sinen zovberlisten

Die sint aller warheit ful

100

Er machet daz ein dvrre svl

Vor den liuten reden kan

Daz ez wip vnd och man

Offenlich wol hœrint

Div wort ir sinne stœrint

105

Wan div svl da besvnder

Uil kvnftiger wunder

Den lvten kvnftige wissaget

Daz den geloben veriaget

Vil liuten vz dem sinne

110

Uf ewige vngewinne

Der valsch vnreiner tovber

Machet och mit zovber

193,1

Daz si fiur von himel lat

Vf erde her dur missetat

Daz ist der vil bœser geist

Der kvmit danne mit volleist

5

Uf sine valschen iunger

In totlicher svnden hunger

Da von siv da betwungen

Redent alle zvngen

In sint alle sprache erkant

10

Von dem helle valant

Der het ir ganzen gewalt

Uon ir svnden menicvalt

Der bœse geist selden fri

Kvmit offenlichen vffen si

15

Geslichen mit siner craft

Und mit luge meisterschaft

Vor den liuten vnd ir rotten

Als vf cristes zwelfbotten

Der heilic geist sich liez

20

Als in sin munt vor gehiez

Do er von in zehimel fuor

In der engelschen ruor

Die valschen botten tievillich

Rvment verre furbaz sich

25

Genaden vnd guotete

Truwen vnd rehter stete

Danne gottis botten ie

Gewunnen vf der erde hie

193b,29

Die doch von gotte kamen

30

Und den heiligen geist namen

In dem huse do beslozzin

Mit genaden gar dur gozzin

Er tuot mit zovber mere

Nach dez tievils lere

35

Tuot er als er si tot

Vnd erstorbin von todis not

Der tievil mit zobers giufte

Fuorent vf in die lufte

Den verfluochten helle barn

40

Als er zehimel si gevarn

So wenent die tumben liute

Mit rehter warheit zetiute

Daz er si erstanden

Uon dez todis banden

45

Den man fur tot wande han

Drie tage an allen wan

Von dem valschen wunder

Wirt daz volk allis munder

Und bettent in an fur got

50

Divr den zoberlichen spot

Vnd lobent in allegemeine

Die liute groz vnd cleine

Besezzin gar mit meine

Uon bosem geist vnreine

55

Div cristenheit tuot zeiche niht

Noch het dekeine zeichen pfliht

193c,57

Wan si wirt wider predigot

Uon dez endecristes gebot

Von dez zober si wichet

60

Und als er sich het gelichet

Mit sinem valschin schine

Daz er von todes pine

Erstanden si mit crefte

Von zobers meisterschefte

65

Als ich iv e vor seite

Uon siner trugeheite

Sam tut der valsche wæhe

Mit zoberlisten vil spehe

Dez tievils herre geselle

70

Als er zehimel varn welle

Sam ihesus crist tet hie vor

In die liufte vil hoh enbor

Fuort in der tievil schar

Div sin stete nimet war

75

Svz truget er der lute sin

Vf kvnftigen vngewin

Daz siu an in so gar eraffent

Sine zovberliste schaffent

Daz die bome bluogent balde

80

Mit lihter bluote menicvalde

Reht als in dem meigen

Uor plaffen vnde leigen

Mit zober der gar verworren

Heizit och die bovme dorren

193d,85

Vor der liute ovgen

Och ist ez ane lovgen

Der verfluochte helle ritter

Heize och mit vngewitter

Daz mer mit gewille tovben

90

Beidiv vnde vnd och oben

Und wider der nature

In menger hande figure

Sich div dinc scheffen

Die liute mit ir clepfen

95

So er diu dinc bildet

Vnd von ir forme wildet

Mit ir geschepfede gar

Und si machet anders var

Danne si got habe geschaffen

100

Dez machet er mengen affen

So er div naturlichen dinc

Die mit wislichem vrsprinc

Sint von gotte worden

Daz er alhie der orden

105

In ander gescheppfede wandelt

Da mit wirt vbil gehandelt

Der lute cranc gemuote

Da vor vns got behuote

Daz tuot sin zoberlichiv truge

110

Horint waz er me muge

Er heizit och die toten

Den daz lebin was verschroten

194,1

Balde lebindic vf stan

Und gesunt von dannen gan

Daz ez alle liute sehint

Die gelobent vnde iehint

5

Daz er si gottis kint

So im vndertenic sint

Mit zobir aller nature craft

Svz wirt der valsche sigehaft

Daz dritte horn daz och treit

10

Der endecrist dur trugeheit

Daz stichit vnde snidet

Lvzil liute ez midet

Ez het mengen geleret

Und von gotte gekeret

15

Daz ist gitekeit genant

Alder welte wol erkant

Daz die lute blendit

Vnd rehter sinne pfendit

Dem endecrist werdent offen

20

Alle horde die versloffen

Sint vnd nv verborgen

Mit vil grozen sorgen

Die bringet im der tievil here

Gen der cristenheit zewere

25

Er hohit der welte fursten

Die hosten vnd die wursten

Die werdent vil geswinde

Dur guot sin ingesinde

195b,29

Wan er si algeliche

30

Mit guote machet riche

Und wiget ir valsches gelucke

Vnd ir vil bosen tucke

Uil groze selde vor der welt

Doch wirt in vil tiures gelt

35

Vmbe ir gelucke gegebin

Daz merkint alle vil ebin

Daz vierde horn daz er hat

Fuoget groze missetat

Daz vebit er mit flize

40

Daz ist div groziv wize

Die er hie ane fristen

Bvtet den reinen cristen

Beidv naht vnde tac

Die er niht anders mac

45

Uersniden noch verhowen

Beidv man vnd frowen

Als ich iv seite hie vornen

Die er mit den drin hornen

Niht kvnde verwunden

50

Die wil er sa zestunden

Mit den vigenden letzin

Daz er beginnet wetzin

Daz ist div marter groz

Der wart och nie genoz

55

Als got selbe sprach

Der kvmber vnd daz vngemach

194c,57

Wirt danne so rehte swere

Ob ez mugelich were

Daz och die guoten erwelten

60

Zvo dem himel die gezelten

Uielin in grozen irrot

Vnde in dez tievils spot

Nv ist ez mugelich niht

Da von ez och niht geschiht

65

Daz die erwelten vallen

In der tievil spotlich schallen

Och vebter alle die marter

Und noch furbaz vil harter

So die rihter waren gewon

70

Hie vor an den heiligon

Die siv dur got hie litten

Wider menschlichen sitten

Mit marter vnd mit banden

Aller meist doch in den landen

75

Da ihesus crist die marter leit

Mit vngezalter bitterkeit

Und alse meister heimelin

Vber daz buoch apocalipsin

Bescheidet vnde machet kvnt

80

So wirt div not sa zestunt

Niht in den landen hie vnd da

Noch in den richen anderswa

So wirt gemeinlich vber al

Der welte breite lengi swal

194d,85

Dekeinen winkel si verbirt

Wan da dv marter inne lit

Gebotten vnd versuochit

Als der endecrist geruochit

Och werdent vz gelazin

90

Die tievil gar verwazin

Die nv sint gevangen

Uon mengen iaren langen

Die nv niht geschaffen mugent

Noch zesolhem schaden tugent

95

Als siv gerne doch tæten

Mit werken vnd mit ræten

Die werdent lidic alle

Der welte hie zevalle

Die cristen liute danne

100

Reht alsiv sin zebanne

Uor den liuten schinent

Siv hazzent vnde pinent

Die cristenlichen lere

Die danne nieman mere

105

Getar den liuten kvnden

Siv hant zegrozen sivnden

Elliv cristenlichiv dinc

Dez endecristes groz getwinc

Gewalteclichen lœset

110

Uon den cristen nieman kœset

Dekeiner slahte kovfschatz

Vnd wirt daz gemeiner satz

195,1

Umbe kovf in nieman git

Tranc noch spise bi der zit

Noch geschuohe noch wat

Wan der daz rehte zeichen hat

5

Uon dem endecrist genomen

An die stirnen vollekomen

Vnde an der rehten hant

Da bi die sinen sint bekant

Swer ane daz selbe zeichen ist

10

Oder giht an ihesum crist

Der het verlorn den lip

Ez si man oder wip

So stark ist sin gewalt

So listic so menicvalt

15

Dez menger wirt gevalt

Beidiv iunge vnd och alt

Von dirre not schricket svs

Der heilic Gregorius

Trahtent vmbe die marterere

20

Ist du marter niht swere

So sich mit guotem willen

Der marterer lat villen

Daz danne der in da tœte

Unde marter nœtet

25

Von im groziv zeichen tuot

Wer sol da bi vesten muot

Ane gottis helfe han

Doch svnt ir eines verstan

195b,29

Als dez endecristes haz

30

Scherpfir wirt vnd furbaz

An der herten marter burde

Danne vor im ie wurde

Geborn dekein durehter ie

Den div welt her enpfie

35

Als wirt vf himelschen gewin

Der marterer muot vnd sin

Gesterkit vnd wol gevestet

Mit genaden vber lestet

An gedulteclichen sitten

40

Danne alle die ie erlitten

Uor im marter vnde not

Vnd och liplichen tot

Svz wurkit gotis wunder

An sinen heiligen besunder

45

Und och an den erwelten

Mit marter die gequelten

Diz ist dez endecristes zorn

Vnd och daz vierde herhorn

Daz hie der eiter slange

50

Doch vber niht zelange

Mit den herhornen vieren

Der endecrist wil zieren

Dem tievil siner helle sal

So vngefuge wirt der val

55

Wan die nv schinent gotis kint

Und guoter geberde sint

195c,57

Vnd heilic vor den liuten

Uil guter werke tuten

Die siht man danne nach volgen

60

Dem endecrist vil vnerbolgen

Dvr daz si ir muot gelust

Haben mit vil boser akvst

Unde nach ir willen lebin

Dem fleische sin begirde geben

65

Svz wirt ir muot vil linde

Dez endecristes gesinde

Sint siv vnd vil kvnge groz

Hohe fursten vnd der genoz

Graven frigen dienstman

70

Darzvo mengen cappelan

Der sich der schrift enzihet

Und sin sele entwihet

Die ihesus crist der guote

Wihte mit sinem bluote

75

Eines sunt ir merkin baz

Und fur war wizzin daz

E dez endecristes vart

Offenlich wert enbart

Gen got mit siner versmehte

80

Vnd dur cristenheit durehte

Mit offenlicher plage

Ich meine dez todis wage

So kvmit elias vnd enoch

Mit gotlicher lere hoch

195d,85

Daz siv die iuden leren

Und siv zegotte keren

Vnd zecristenlichem gelovben

Dez siv sich liezin rovben

Ir altvatter vntz her

90

Nach ir muotwillen ger

Uon disen zwein wirt vzgeleit

Div gotlichiv warheit

Vnd wirt div schrift entslozzin

Uon den wizsagen vnverdrozzin

95

Vnd swaz got dur ir munt

Ie getet von alter kvnt

Daz wirt in da bescheiden

Uor cristen vnde heiden

Vnd gelovbit danne ir aller sin

100

An got vil rehte nach in

Danne werdent ane fristen

Beide ivden vnde cristen

Die rehten warheit sehinde

Und gemeinlichen iehinde

105

An ihesum den gotis degin

Der himel vnd erde het gepflegin

Vnd predigont danne dri iar

Die gottis schrift fur war

Alse si ane missetat

110

Jhesus crist geleret hat

Ir meister vnde ir herre

Als wirt si danne vil verre

196,1

Uon in zwein gekvndet

Div warheit gar ergrundet

Der sint siv meister beider

Vnde tragent och cleider

5

Swaches tuoch von seckin

Daz siv die lute erweckin

Zerehter warer riuwe

Wie si cristes miltiu truwe

Mit noten het erarnet

10

Und da mitte gewarnet

Gen den endecristen mugen

Vnd gen sinen valschen lugen

Wan der wirt so freisam

Und den wisagen so gram

15

Daz er siv kvmbers notet

Vnd zeierusalem totet

Da ligent der heiligen libe

Uor mannen vnd vor wibe

Nach der warheit sage

20

Drie naht vnd drie tage

Vnd einen halben nach maze

Umbegraben an der straze

Daz die reinen gotis knabe

Nieman getar begraben

25

Von dez endecriste vorhte groz

Und ligent danne also bloz

In grozim vnwerde

Vor den liuten vf der erde

196b,29

Die aber die reinen wissagen

30

Mit gewalte hant erslagen

Die frowent sich danne sere

Und wenent michel ere

An ir tode han beiaget

So aber vierdehalb tac betaget

35

So erstant die gotis kneht

Als ez billich ist vnd reht

Von dez todis banden

Fri vor allen schanden

Die aber siv erslagen hant

40

Den wirt ein stimme erkant

Die siv zesorgen stuofent

Wan div stimme ruofet

Als ich ez las

Enoch vnd elias

45

Ir svnt her vf komen

Als daz wirt vernomen

So varnt siv mit gottis craft

Vf zehimel sigehaft

Eine wolken siv da enpfahent

50

Daz balde mit in gahent

Unde git in gut geleit

Zegotte mit sicherheit

Daz er si da bereit

Ze menger selden breit

55

Nach ir tode sicherlich

Wert dez endecristes rich

196c,57

Fiunfezehin tage vnd niht me

Sin gewalt vnd sin geschre

Den der valsche hie vobit

60

Der aldie welt betruobet

Mit siner durehtunge

Beidiv alt vnd iunge

Darzvo sin govgel spil

Wert vierdehalbis iares zil

65

Als Daniel och bezivget

Dez prophetie niht geluget

Sin schrift war belibet

Sant Matheus schribet

Von dem gotlichen munde

70

Als im der süeze gunde

Und waren niht geschiurzit

Die tage noch gekivrzit

Die der endecrist sol lebin

Vnde vbir die welt gegebin

75

So wurde nieman danne behalten

Und waren gar verschalten

Dez himelrichez wunne

Nv siht der lebinde brvnne

Die menscheit so blœde

80

Vnd von hofart so œde

Daz er hie der tage zit

Div der welt zeplage lit

Erbermeclich gekvrzit hat

Uon siner svzin milte rat

196d,85

So die tage sint erfult

Dez endecristes vngedult

Als ich vor han gezalt

So ovget sinen hohin gewalt

Got an dem valschen diebe

90

Siner welte hie zeliebe

Als du schrift het gezellit

So wirt der endecrist gevellit

Uon dem engel Michahele

Erslagen an libe vnd an sele

95

Vf dem berge oliveti

Da er wande wesen fri

In sin selbis hove gezelt

Uf sinem stuole vor der welt

Bi der stat da ihesus crist

100

Zehimel vf gevarn ist

Nach dez endecristes tode

Den sant Michahel enbot

Kvmit danne gotis geriht

Sa zestunde balde niht

105

Svnder fivnf vnd vierzic tage

Nach hern Danielis sage

Werdent verliuhen der welte

Zeruowe vnd och zegelte

Dvr zweier hande sache

110

Den heiligen zegemache

Die von dez endiscristis burden

Jemerliche gepinet wurden

197,1

Daz die gemaches walden

Und sich zegotte halden

Darzvo den vier wisten

Die e die lere pristen

5

Vnd die honic süezin gift

Ich meine dez endcristis scrift

Die er valschlich gloste

Und wider got koste

Daz der svnder iunger

10

Zegotte wider hunger

Vnd sich gein den slihten

Und warer lere pflihten

Zesteter vnmuoze

Mit ruwe vnd mit buoze

15

Vnd alle sivnde schuhen

Wie vil aber werde verluhen

Zites nach der tage zal

Hie der welte vber al

So daz si neme ein ende

20

Daz stat in gotis hende

Und ist gar verborgen

Der welte zegrozen sorgen

Abir dez endcristes amptliute

Wegent gar zenivte

25

Ir herren tot vnd sinen slac

Als och diu welt ie pflac

Siv nement wib vnd sint fro

Und sprechint zvo zenander so

197b,29

Swie vnser herre verdorbin

30

Si vnd och erstorbin

Doch so han wir frode vnd gemach

Und sitzin vnder ruowe tach

Vnd so siv also claffent

Und in selbin gemach schaffent

35

So kvmit div gottis rache

Vf siv mit gahin schache

Die ivden danne gahent

Alle vnd enpfahent

Dez endecristes gelovbin

40

Und lant si niht betovbin

Siv vnd die cristen alle

Sint vor vnfrides valle

Fri vnd werdent niht bekort

Me vntz an der welte port

45

Dez tievils rat vnd vientschaft

Hant furbaz me dekeine craft

Sin argen liste sint gelegen

Niht me gewaltis mac er pflegen

Darnach e daz der rihter

50

Kome vnd och der slihter

Aller svntlichen brvche

Vnd der hohfertigen spruche

Die nieman mac gesweigen

Kan vnd gescheiden

DIZ IST DAZ FIVRE VOR GOTTES GERIHTE

55

Uor dem kvmit so vngehiure

Vnd och daz alregroste fiure

197c,57

Dem von grimme nie genoz

Wart vnd och so rehte groz

Doch alleine daz fiure niht

60

Daz ob dem lufte sine pfliht

Het in siner spere

Der fiure wirt niht mere

Swaz fures in der erde lit

Und da gebrvnnen lange zit

65

Vnd och daz vf der erde

Daz kvmit mit vnwerde

Zvo einander samenthaft

Und brennent die welt mit craft

Diz fiur üebit vnverschampt

70

Vier fiur craft vnd ampt

Dez helschen fiures craft ez üebit

Daz die verlornen gar betrüebit

Und het ir dekeine schone

Ir grozen sivnden zelone

75

Dez vecfiures ampt ez hat

Daz ez die cleinen missetat

An den guoten hie reine

Swie siv doch sin cleine

Die muozen schone vnde ganz

80

Werden als der svnnen glanz

Dez irdeschen fiures ampt ez hie

Vobit merkint rehte wie

Daz ez die bovme vnd div criuter

Uerbrenne vnd och liuter

197d,85

Die vogel fihe vnde tier

Daz ez div verswende schier

Vnde swem vf erde lebin

Und lebinder geist ist gegeben

Die sol ez schon hie erweschen

90

Vnd machen zeiner eschen

Die libe alle der luten

Daz svnt ir merken hiute

Die machit ez zeniute

Nach der schrift zetiute

95

Dez vierden fiures ampt ez pfliget

Daz da swebit vnd liget

Ob dem lufte als ich han

Iv da vor kvnt getan

Daz er div andern element

100

Div craft vnde lebin gent

Aller menschen kvnne

Darzvo frovde vnd wunne

Daz ez div luter mache

An menger hande sache

105

Und si mit solicher arbeite

Bilde schone vnd bereite

Zvo einener nvwerunge

Als iv hernach min zvnge

Mit gottes craft bescheiden sol

110

Ane dez helfe bin ich hol

Aller slahte guter kvnste

An sinnen vnd an vernvnste

198,1

Von dem fiure wazzir vnde luft

Div erde craft vnd ir kruft

Die werdent also hie gebrant

Und ir gescheppfede verswant

5

Die si het von nature

Vnd alder welte figure

Als ez hie vor geschach

Uon der sintfluot vngemach

Daz erst geriht von reht ergie

10

Daz da mit wazzir ane vie

Gen der welte vnkivschekeit

Als vns dicke ist geseit

Daz der vnkivsche fiures burde

Mit dem wazzer erlösche wurde

15

Wan hitze vnkivsche maste

Die man mit wazzer erlaste

Daz iungst geriht hie mit fiure

Ergat noch vil vngehiure

Gen der waren minne roste

20

Div von kelte vnd svnden froste

An den luten erstirbet

Und von alter hie verdirbet

Wan so diu welt hie altet

So wissent daz siv kaltet

25

An der waren minne brvnst

Unde hat niht ganze gunst

Die liute als in hie vor got

Gab der suzen minne gebot

198b,29

Da von so wirt mit fiure

30

Div minne vil gehiure

An der welte gerochin

Als ich vor han gesprochin

Daz selbe fiur viervaltic

Daz het och vil gewaltic

35

Ane vanc mitel vnd ende

Sin anevanc vil behende

Kvmit vor gotis geriht

Unde het och solhe pfliht

Die guten ez lutern kan

40

Beidiv frowen vnde man

Vnd die svnder pinen

Die man hie sit grinen

Und werbin wider gotte

Mit werkin vnd mit spotte

45

Vnd puluern aller liute lip

Beidiv man vnde wip

Uihe vogel swenden

Bovme vnd krut verenden

Vnde swaz div welt treit

50

Dem wirt ein ende geleit

Mit dem fiure da zestunt

Als ich vor machte kvnt

Svz ist dez fures anevanc

Darnach der mitel ane wanc

55

Kvmit in dem der rihtere

Der rihte vnd der gewere

198c,57

Kvmit mit ordenunge

Uor dem alt vnd iunge

Erstant in lipliches lebin

60

Als in vor was gegebin

Vnd als diu schrift kvndet

So wirt och gar enzivndet

Aldiv welt mit fiures craft

Daz wirt an ir sigehaft

65

So daz gerihte ende nimet

Als gotte wol gezimet

So kvmit dez fiures ende hie

Daz svnt ir rehte merken wie

Uon der gotlichen witze

70

So wirt div brinnende hitze

Gescheiden von dem fure gar

Vnd wirt daz lieht svnderbar

Och von dem fiure gescheiden

Div schidunge an in beiden

75

Wirt dem sivnder vil svre

Wan dez fiures brinnende nature

Uolle fuoret mit grozim meile

Dez rehten rihtes vrteile

Daz och die verfluochten

80

Mit ir svnden hie suochten

Svz nimet dv hitze menicvalt

Die armen svnder mit gewalt

Und fuotert siv mit scharpfem pine

Hin in die heischen sentine

85

Wan also got mit werdekeit

An dem gewalte crone treit

Aller nature gabe groz

Dez im nieman ist genoz

Als ist er och in hoher kvr

90

An miltekeit geschalten fur

Daz er giht vnd och lihet

Genade vnd der niht verzihet

Vnd och gar der slehtest

Uollekomen vnd gerehtest

95

An gelte ane lone

So groz alsam ein bone

Er niht vngelonet lat

Guotis alder missetat

Ez wirt von den gotis degen

100

Volleclichen wider wegen

Mit der rehten wage

Zefroden oder ze plage

Wan man mit sivnden vngedult

Svnden lon hie verschult

105

Ald aber froden lon enpfahet

Der niemer me vergahet

Mit sele vnd mit libe

Der man zvo dem wibe

Als sol er lon mit genuht

110

Enpfahin von der svnden fruht

Ald froden lon der iemer wert

Me danne kein herze gert

199,1

An libe an sele samenthaft

Uon der gotlichen craft

Da von so muozen och erstan

Mit ein ander svnder wan

5

Vor dem hohin emanuele

Der lip mit der sele

Und da ane smæhen

Von dem rihter enpfæhin

Lon vnd in froden wesin

10

Ald iemer sterbin ane genesin

Gen der stimme der herhorne

Die behalten vnd die verlorne

Muozin erstan vil geswinde

Gen der suzen megde kinde

15

Gemeinlich alle toten

Den daz lebin was verschroten

Der her horne stimme

Swie si helle grimme

Verstat man in zweier wis

20

Etslich dur kvnste pris

Jehint div stimme si von got

Niht anders wan cristes gebot

Daz die toten erstanden

Vf geriht von allen landen

25

Svmlich sagent abir snelle

Daz div stimme vil helle

Si cristes offenunge

Dez alte vnd och iunge

199^b,29

In gewaltic rihter sehen

30

Vnd dez mit warheit veriehen

Alsus erstant die toten sa

Beidv hie vnd och da

Uon ir betten vnd von ir rvme

An allen slahte sume

35

Vnd anderscheit der zit

Nieman da dez anders bit

Doch so ist groz vnderscheit

An die toten da geleit

Als iv hie nv wirt geseit

40

Div bescheidenunge treit

VON DER VRSTENDE

Von ir vnglichem orden

Ist div vnderscheit worden

Nach der warheit der pfaffen

Vngeschalt vnd vngeschaffen

45

Erstant die armen svnder so

Beidv truric vnd vnfro

Und alle frode zemidenne

Die wernden not zelidenne

So erstant die reinen guoten

50

Die sich vor svnden huoten

Mit frolicher figure

Ane gebresten der nature

Doch so erstant si da gar

Die guoten vnd der svnder schar

55

Mit ir ganzen liben

Die man zvo den wiben

199c,57

In vollekomener genge

Vnd in der selbin lenge

Als in div nature verlech

60

Div me menschen dez verzech

Nieman wirt dort lenger niht

Nach der warheit vergiht

Danne im got hatte gebin

Hie vf erde ir lebin

65

Und daz alter daz vf erde

Hatte ihesus crist der werde

Div vrstende vnd ir getwinc

An dem menschen buozit driv dinc

An den kinden div niht waren

70

Uolle wahsen an ir iaren

Vnd allen gebresten buozen

An henden vnd an fuozen

Als ie div nature gap

Daz büezit der vrstende vrhap

75

Ablidirn abluten gehovwen

Als wir wol dicke schowen

Und sus gebresten an ir lider

Daz git div vrstende allis wider

Daz anderswa diu frige

80

Naturlich kvnpanige

Sich an den liuten geilit

Vnd vberigiv lider teilit

Den kinden als wir dicke sehen

Und vil liuten ist geschehen

199d,85

An har an nageln vber flus

Uon der gudigen nature dvs

Vnd swaz man vbriger hat

Daz den luten vbil an stat

Daz buozit diu vrstende

90

Dem menschen an ein ende

Och wirt der dritte gebreste

Dem menschen in dem neste

Uon der nature clamme

In siner muoter wamme

95

Diu in also entschicket

Daz vatter vnd muoter erschricket

Von dez kindes bilde

Daz als ein merwunder wilde

Ist vor in missestellet

100

Daz ez nieman wol gevellet

Diz buozit allis vil balde

Diu vrstende mit gewalde

Doch erstant si vber al

Rehte nach der erren zal

105

E daz siv ersturben

Und an dem lebin verdurbin

Vnd och gar nach gelovbe

Uz dem selbin stovbe

In den siu e waren braht

110

Als ich vor han gedaht

So daz fivr si also verswachte

Vnd zepuluer machte

200,1

Doch ane alle geluppe

Swar daz puluer vnd daz gestuppe

In die welt wirt gesæget

Ald von dem winde gewæget

5

In swelhe gegin oder lant

Daz kvmit alles zehant

Zvo der selben sele hin

Div im lebin vnde sin

Gap die wile er lepte

10

Und vf der erde strepte

Alsus erstant siv gemeine

Mit dem hovbt lidern niht alleine

Als hobit hende vnd füeze

Von der milten gottes süeze

15

Ein hares lock in niht engat

Unde swaz in vvol an stat

Daz eht der lip han sol

Dez wirt er danne gevvert wol

Vnd erstant in ir besten maht

20

Nach der gotlichen pfaht

Ich meine die gotis kneht

Die im dienten hie nach reht

Die svnder froden arme

Daz ez got iemer erbarme

25

Erstant in iamers schine

Und och im wernden pine

Doch nach der warheit plane

Sint siu gebresten ane

200b,29

Dez libes lidern vbir al

30

Doch so ist ir varwe sal

Und och sus entschepfet

Wan si sint erclepfet

Uon ir grozen sunden

Lat iv ein maze kvnden

35

Swie schone doch ein mensche si

Ist im grozis truren bi

Darzvo iamer vngezalt

Er werde ein teil missestalt

Als sint die svnder garwe

40

Ane frode vnd ane varwe

Ez ist ein zwivalter tot

Als daz reht hie gebot

Daz ist der sele schulde

Div verlos hie vor gotis hulde

45

Daz ist div an geborne svnde

Dez libes tot ich also kvnde

Daz ist der groz kvmber hie

Der vns von adame an gie

Do er von sunden vnruoch

50

Uon got enpfie den fluoch

Der vf alle mensche sleich

Vnd in sit nie entweich

So der lip hinnan vert

So ist der tot im beschert

55

Als ist der tot zwivaltic

Der lip vnd sele vil gewaltic

200c,57

Uon erbe svnden tœtet

Vnd werndes kvmbers nœtet

Gein dem zwivalten tode bloz

60

Han wir zwo genade groz

Enpfangen von gotis menscheit

Div het den schaden sus widerleit

Div sele fur den tot nimet

Genade als ir da gezimet

65

Uon der nieman kan gesagen

Da von wil ich dez gedagen

Fur den tot der lip enpfahet

Ere vnd frovde div im nahet

Die man hie bedenkit selten

70

Die nieman kan vergelten

Der lip liuhtet mit hoher wunne

Als diu durluhtic svnne

Uz dem libe mit hoher kivr

Div sele luhtet doch her fiur

75

Siben valtic schoner gar

Vz dem libe svnderbar

Sam daz lieht vz der laterne

Und dur den luft der sterne

Als div schulde den tot brahte

80

Den gotis ban vnd die ahte

Euen vnd och adames

Der wnden note krames

Der sele vnd dem libe

An manne vnd an wibe

200d,85

Als het der genade gunst

Diu gotis wirde vnde kvnst

Sele vnde libe gegebin

Genade vnde frolich lebin

Nach dem svn iemer strebin

90

Daz merkint alle ebin

VON DER IUNGESTEN VRSTENDE DER WELTE

Daz div vrstende volbraht

Werde als ez ist gedaht

Darzvo sint vier sache

Die ich iv kvnt mache

95

Ane die vier sache niht

Mac geschehin so man giht

An dekeinen dingen

Die man wil vollebringen

Wan muoz iemer einen han

100

Der daz dinc machen kan

Och svnt ir rehte wissan daz

Der muoz och haben etwaz

Uon etslicher hande materie

In dirre welte wilden serie

105

Darvz er machte sinen dinc

Zvo sinem rehte vollebrinc

Diz sint die ersten sache zwo

Umbe die dritten stetez so

Waz man och machen welle

110

Und wie man daz gestelle

Div vierde sache vnverirt

So daz dinc gemachet wirt

201,1

Warzvo ez sol vnd nvtze si

Dem ist diu vierde sache bi

An die vier sache vz erlesin

Mac keiner slahte dinc wesin

5

Die sint och alle volkomen

An der vrstende genomen

Div erste sache ane spot

Daz ist er scheppfer vnde got

Der elliv dinc von nihte

10

Geschuof vnd gar berihte

Er ist gar an allen wanc

Guoter dinge sache vnd anevanc

Der miltest vnd der herste

Dirre vier sachen div erste

15

Swen nv daz wol gezeme

Daz er die ander sache verneme

Div ist daz puluer vnd der stovp

Daz dez starken fiures rovp

Uz alden liuten machte

20

Do ez si gar verswachte

Vz dem der scheppfer milde

Geschuof dez ersten mensche bilde

Uz dez rippe im ein wip

Von den aller menschen lip

25

Ist gesamet vnd gewurzet

Dez si du rede gekvrzet

Wan der vil cranke genesche

Daz puluer vnd div esche

201b,29

Daz von den liuten ist worden

30

Erstat nach rehten orden

Als ich iv die warheit

Rehte han da vor geseit

Vnd ist der andern sache spil

Niht me ich von ir sagen wil

35

Div dritte sache ist alsus

Div zvo fuogunge vnd der flus

So sele vnde lip tuot

Uon ir hohen scheppfer guot

Der si zesamen wider fuget

40

Der dritten sache ez genuoget

Die vierden sache hœrit

Div lip vnd sele stœrit

Si storit leit den guoten

Die sich vor sunden huoten

45

Die sunder si gar betruobit

So sich da reht da vbet

Wan da aller menschen kint

Jegliches sinen lon nint

Als ez hie gedienet hat

50

Daz bloze reht da fiur gat

Der dicke diz bedahte

Waz daz nvtzis brahte

Ir wizsent daz von rehte wol

Swer einen man beclagen sol

55

Daz man im drie tage git

Mit ladunge vf gerihtis zit

201c,57

Ob er sich e niht slihte

Daz man im danne rihte

Wer ieman als vngemeze

60

Der von hofart vberseze

Ane reht die drie tage

Die man im gen der clage

Der were vor in allen

Der buoze da gevallen

65

Und verlur och lihte sinv reht

Er were herre oder kneht

Diz ist hie der rehte sitte

Vnd volget der welte mitte

Noh furbaz wirt behende

70

Daz gerihte nach der vrstende

Also svnt ir wol wissen

Uf die warheit geflissen

Alte vnd och iunge

Daz drier hande ladunge

75

Vor dem gottis gerihte kvmit

Swie luzil ez do frumit

Div erst ladunge die wir heten

Geschach mit den propheten

Gotis wissagen vil reine

80

Alder welte hie gemeine

Die gotis rat wol prvoften

Uz sinem munde siv ruoften

Sin vaterlichen svozen lere

Der was vil vnd och mere

201d,85

Der wart doch vnerbolget

Und luzil hie gevolget

Die lere menger brichet

Als got selbir sprichet

Ich han iv vil geruofet

90

Vnd zvo iv her gewuofet

Daz hant ir versprochen

Und minen rat gebrochen

Div ander ladunge geschach

Hie mit cristes vngemach

95

Der ane sivnde truosen

Slivf vz dez vatters buosen

In der megde wamme

Div sin muoter vnd sin amme

Nach menschlicher forme wart

100

Vnd was doch maget vnverschart

Nach der frömden gebiurte

Da von der tievil niht spiurte

Der gotheit fuozstaffen

Und kvnde niht erkaffen

105

Der hohen gotheit figure

Von der menschlichen nature

Im was vnkvnt der selden lune

Div von der gotlichen fortune

Geschach aller menschen kvnne

110

Waz er vns selden gunne

Daz bedenkint ane muede

Do er vns selber luede

202,1

Nv merkint alle ane spote

Gottis svn was selber bote

Man solte si wol bekerin

Und och den boten eren

5

Der sich selbin niht wolde

Eren als er solde

Er luode vns zallen orten

Mit sinen svozin worten

Mit sinem guotem rate

10

Fruo vnd darzvo spate

Sin laden was vnverborgen

Mit menschlichen sorgen

Im wart ein hertis bottenbrot

Daz was der scherpfer veste tot

15

Den ie mensche enpfienc

An dem cruce der botte gehienc

Mit vngezalter swere

Swie vil er guoter mere

Hie der welte kvnte

20

Vnd menic herze enzvnte

Daz an minne was erkaltet

Und in svnden was eraltet

Als wir noch dicke schovwen

An mannen vnd an frowen

25

Die mit svnden sint verhovwen

In der welte tiuschen owen

Der vil hohen himel frie

Gab so svoze arzenie

202b,29

Von svnden mengen siechin

30

Die weder gan noch criechin

Uon ir svnden mohten

In den siv waren verflohten

Da wider die iudeschen fiuhse

Dem werden arzat die biuhse

35

Doch an daz hovbit sluogen

Mit vil mengen vnfuogen

Die er mahte gesunde

Uon menger sivnden wunde

Die erten in svz zelone

40

Mit einer ruhen crone

Und svz mit smehin cleide

Vnd mit vngezaltem leide

Der ich nv wil geswigen

Sinen menschlichen stigen

45

Spreiten siv vil dicke

Mit valschin mengen stricke

Wider ir e gebotten

Darzvo sinen reinen botten

Die er selbe in hie erwelte

50

Und sich och darzvo zelte

Daz die reinen versmahten

Sine ladunge volbrahten

Vnd ander prediere guot

Die och truogen reinen muot

55

Und och vil hoher lerer

Daz doch menic verkerer

202c,57

Wissentlichen vber horte

Und von sinem herzen storte

Div dritte ladunge hel

60

Ist geswinde vnde snel

Daz ist div gar grimme

Div vil iamerlich stimme

Als ich iv seite da vorne

Daz ist daz gottis herhorne

65

Daz die toten vf wecket

Und die svnder erschrecket

Mit cristis hohir victoria

Div ladunge heizit peremptoria

Peremptoria ist zetiute

70

Daz merkint vil liebin lute

Ein ladunge die nieman mac

Furbaz me dekeinen tac

Mit rehte vbir sitzin

Uon dekeinen witzin

75

Nach dez leres Richartes wort

Het allis geriht drivalt ort

Wan ez ist alsvs geleit

In drier hande vnderscheit

Wan daz erst geriht alleine

80

Ist vnd heizit gemeine

Daz div cristenheit haltet

Und nach gewonheit waltet

Da si man die lute twinge

Vnd mit gerihte bringe

202d,85

Daz si svz niht tætin

Ob siv niht geriht hetin

Man rihtet aber hie nah sage

Unde nach der liute clage

Vnd nach ir mundis vrteile

90

Div dvr miete dicke ist veile

Und wiget hie die schulde

Den vbilen mit vngedulde

Darnach vnd ir missetat

Daz geriht verschuldit hat

95

Den vbilen vbil den guoten guot

Diz gerihte div welte tuot

Vnd ist niht volkomen

Man hat dicke wol vernomen

Daz der vil schuldic hie

100

Unschuldic von gerihte gie

Vnd daz der niht genas

Der doch gar vnschuldic was

Nieman mac der liute sin

Rehte wissent wider in

105

Wan eht got dem ist kvnt

Aller herzin sinne grunt

Daz ander geteilit ist

Dez och an der iungsten frist

Ein ieglich mensch enpfindit

110

So im daz lebin verswindet

Wan so wirt vrteil gegebin

Uber sin menschliches lebin

203,1

Wie er daz habe gefuoret

Darnach daz reht ruoret

Wirt im sin lon gemezzin

Dez wirt da niht vergezzin

5

Swie er danne het verschult

Der wirt nach rehte im gefult

Doch so nemint eines war

Im wirt der lon niht gar

An der stat da gewegen

10

Dez er eweclich sol pflegen

Div sele da den lon nimet

Als ir danne wol gezimet

Er si eht svoze oder sur

Der wirt ein nach gebur

15

Der sele vnd och ein erbe

Der iemer si verderbe

Ald in gantze frovde setze

Der welte kvmbers si ergetze

Der lip muoz furbaz biten

20

Untz nach den iungsten ziten

Daz von ist daz gerihte niht wol

Willekomen als ez sol

So wirt daz dritte gerihte

Uollekomen nach der slihte

25

So wirt vor gottes ovgen

Offenlichen sten niht tovgen

Vnd och da rede zegebinne

Uon allem vnsirn lebinne

203b,29

Wie wir daz gehalten haben

30

Frowen man tohtern knaben

Ez si alt oder iung

Daz muoz allis einen sprung

Hie von dirre welte nemen

Als im danne sol gezemen

35

Mit vollekomenem lone

An libe an sele schone

Uf der froden anger

Da allis truren wart swanger

Vf ganzir selden beiac

40

Da tusint iar als ein tac

Sint der gester hin schiet

Uor got vnd der engel diet

Alder aber da wider

Zvo dem tievil hin nider

45

In die verfluochten helle

In dez iamers gevelle

Da man iemer mere truret

Da der welte suoze suret

Vnd eweclichen bittirt

50

Da lip vnd sele zittert

Uor dem helle bracken

Die si sam tracken

Iemer ane erbermede naget

Und da vahint vnd iaget

55

Daz er lœsen veige wilt

Mit dem wirt todes da gespilt

203c,57

Doch het der tot niht enden

Und mac och niht verswenden

Den geist den lip der ewic ist

60

Vnd doch stirbet alle frist

Nach des lerers Richartes vernunste

Und nach siner kvnste

Die man doch vaste priset

Sin wir nv wol bewiset

65

Dez gerihtes vnder beiden

Meisterlichen wol bescheiden

Nv huoten vns vor leiden

Daz wir da an iht weiden

Nv horint furbaz als e

70

Uon dem iungsten gerihte me

Daz ist so egebere

So grimme so swere

Vmb vns alzeringe

Mit vil sorgen getwinge

75

Ob vns der rihter strenge

Mit der engel gedrenge

Der da vil gewaltic sitzit

Uor dem der svnder switzit

Wan im kan nieman geligen

80

Noch dem rehte gebiegen

Mit dekeinen valschen mieten

Die wir doch hie verbieten

Siv sint och da verbotten

Uor den vngezalten rotten

203d,85

So siht man och da vnden

Uon noten michel wunder

Div helle stat da offen

Mit iamer vnd versloffen

Da siht man alzemale

90

Die vngezalten quale

Div niemer da verswindit

Vnd nivwe marter vindit

Div helle fiures gluoget

Daz fiure die hitze brvoget

95

Der tievil vnlieplich zannet

Uon nides hazze ergrannet

Der grundelosen helle grunt

Machet mengen svnder wunt

So betruobit och inwendic da

100

Div wider bizsit contientia

Daz ist der heizin gewissen

Div sich hie svnden flissen

Div haltet endelosen sturn

Vnd ist der lebinde wurn

105

Den daz alter niht verslizit

Und steteclichen bizit

Er naget mit sivnden smerzen

Den svndern in ir herzen

Vnd muodet niht von arbeit

110

Als ysaias het geseit

Uz wendic div welt brinnet

Dez michil not gewinnet

204,1

Der sunder in sinem sinne

Vz wendic vnd och inne

Ist er mit not verletzit

Dez er niemer wirt ergetzit

5

Svz wirt sin frovde geswant

So stant zvo der rehten hant

Die vngezalten grozin sunde

Die ir willen hie ane griunde

Vf der erde hant gemestet

10

Der clage da niht restet

Uil liute siv da ruofent

Vf den svnder siv wuofent

Mit vientlichir weige

Und mit hellem geschreige

15

An den siv ir ovgen weident

Vnd siv zegotte verleident

So stant mit grozin striten

Zvo den winstern siten

Div tievillichen bilde

20

Der geberde ist vnmilde

Daz muoz von schulden sweren

Ane genade ist ir gebæren

Dez die svnder erschrickent

Wan siv die anblickent

25

Mit stetir ovgen weide

Dez het ir trost da beide

Uerzwivelt vnd verruochet

Der lebinde tot siv suochet

204b,29

Mit siner scharpfen sniden

30

Ir sterbindes lebin niht vermiden

Och sint die armen tumbe

Bestellet da alumbe

Mit engelslicher ritterschaft

Die siv do mit gottis craft

35

Hin zvo der helle tribent

Da siv an ende belibent

Und da in beslozzin

Zvo dem tievil vnverdrozzin

Der heilige gottis senat

40

Der an siner porte stat

Mit dem himelschen conuende

Da vf dem iungsten sende

Stetint dez rihters vrteile

Den svndern ze vnheile

45

Der svnder svntlich laster

Wirt noch beweret vaster

Mit der wernden schanden schubeln

Wan den guoten zvo den vbeln

Wirt offen aller svnden mein

50

Den ir herzin so vnrein

Mit svnden hant gebrvwen

In valsche mit vntruwen

Der wirt erkant in allen

Daz dur spot mit schallen

55

Siv furbaz gelestirt wurden

Wan von ir svnden burden

204c,57

Wirt in so swer der lip

Beidiv man vnd och wip

Daz siv niht mugen gan

60

Koch dekeine craft han

Da von si ane zwivel

Uon mengen starken tivel

Werdent in die helle cruft

Getragent in den svre luft

65

Suz sint die armen geritten

Zv der helle ane bitten

Uf mengem verfluochtem tiere

Geswinde vnd och schiere

Wa och vf der erde

70

Daz strenge gerihte werde

Daz sunt ir wissen vber al

Ze iosaphat in dem tal

Uon zweier hande sache

Der ich iv mit gemache

75

Harte wol beswise

Div stat sol nach prise

Alder welte gemein wesin

Suz ist Jerusalem vz gelesin

Und och diu gegen da bi

80

Daz ez ein mitel teil si

Da wir hie mit gemeinschaft

Nv inne wesin wonhaft

Vnd von der mittelunge

Svn alte vnde ivnge

204d,85

Ze iosaphat rede ergebin

Wie siv hant geriht er lebin

Div ander sache ist zehant

Daz diu stat vnd daz lant

Der welte si gemeine gar

90

Und von ir kantnisse offenbar

Als och div selbe stat ist

Wan der suoze ihesus crist

Uns da inne loste

Von der helle roste

95

Mit sinem blute reine

Da von ist si alleine

Alder welte genantlich

Und och von reht erkantlich

Crist rihtet och alleine niht

100

Mit gotlichim gewalte so man giht

Svnder in menschlich figure

Vnd nach menschin nature

Wan von rehtis gerihtis ordenheit

Ist an im da div vnderscheit

105

Er rihtit als got mit gewalte

Und mit gotlicher drivalte

Vnd als ein mensche mit gebot

Dem ez der vatter vnde got

Nach ordens reht bovolhen hat

110

Als diu schrift vns wizzen lat

Div mit warheit alle zit

Der warheit vrkvnde git

205,1

Do crist der reine gotis barn

Het vf erde was gevarn

In menschelichim muoder

Als ein menschelicher brvoder

5

Und als ein mensche solde

Vnd als der hie wolde

Liden menschelichen gewalt

Der wart an im menicvalt

Geriht vnd vrteil wart gegeben

10

Uber sin menschliches leben

Als iv dicke ist gesaget

Siner not niht verdaget

Die er leit vil vnverzaget

Div doch selten wart geclaget

15

Als er kam mit armekeit

Mit einer cranken forme becleit

Als kvmit er nv besunder

Mit wunderlichim wunder

In siner magen crefte

20

Mit der himils ritterschefte

Und mit der engel massenige

Der eine vnd die drie

Mit drin benenmeden einer

Ewic wiser vnd reiner

25

Der den hohin himel floz

Dv durnen vnd du blicschoz

Geschuof vnd daz ertgeruste

Vnd der megde bruste

205b,29

Dur vns menschelichin sovc

30

Vnd si demuotlichin bovc

Scheppfet vnder die creatiure

Die der zimberman vil gehiure

Nach im selbin hat gebartet

Div doch adellichin geartet

35

Hat mit svnden clamme

Uon dem ediln stamme

Abdem er wart gezwiget

Dem aller engel kvnne niget

Vnd alliv wisheit hat genigen

40

Wie sint dez zwiger gedigen

Da ist ir lüzil komen

Uf der rehten fruhte fromen

Verwustet vnd vermiezit

Als wol ir wisen kiezit

45

Dir der vil reine gute

Mit sinem tiurem bluote

Hat gebuwen vnd getunget

Uf kvnftic fruht geiunget

Der kvmit mit himelscher presse

50

Daz er nach fuoge messe

Sines zinses tiure fruhte

Mit gewalteclicher zuhte

Enpfahte von alder welt

Von sines bluotes erbe gelt

55

Daz er vil vnverdrozzin

Dar vmbe hat gegozin

205c,57

Und so ture gekovfet

Mit dem tode bestrovfet

Wart der hohen tugende flins

60

Da von vordert er den zins

Mit reht von aller menschen kint

Div vor im da gesament sint

Da von kvmit er mit craft

Und gotlicher herschaft

65

Daz ist daz in die rehten spehint

Vnd von sinen genaden sehint

In siner gotlichen nature

Und in menschelicher figure

Von siner tugende gebot

70

Geweren menschen vnde got

In ganzir genaden svon

Dez mugen doch niht da getuon

Die svnder von ir missetat

So ir muot begangen hat

75

In ist alda verborgen

Uf kvnftiges sorgen

Der claren gotheit svozis bilde

Daz sol in wesen wilde

Dvr zweier hande gebresten groz

80

Die ich iv mache rehte bloz

Div erste ist blodekeit

So menschlich nature treit

Div mag got gesehin niht

An siner hohen genaden pfliht

205d,85

Wan nie mensche got gesach

Als och got selbe sprach

Du ander sache ist och swere

Wan och die andern svndere

Hant niht gedienit mit schulde

90

Die genade vnd die hulde

Daz ir ovgen darzvo tügen

Daz siv got gesehin mugen

Got schowen mit merkint eben

In daz ganze ewic lebin

95

Da frovde in wunnen iemer taget

Als sant Johans hat gesaget

Da von ist mit warheit kvnt

Da ihesus crist der selben stunt

Gutlich senfte vnd linde

100

Sinem erwelten ingesinde

Sich von genaden erovget

Da wider er sich erzovget

Daz ist och wol kündic

Dem armen volke vil sündic

105

An der gesihte egberlich

Uon ir sünden vil gewerlich

Diz ist och wol zetiute

An dem israhelschen liute

Daz got mit friheite

110

Hie dur die wuste leite

Der milde vnd der guote

Gap in ein wolken zehuote

206,1

Dez tages für die hitze

Der svnnen vnd ir glitze

Daz ez in bære schatten

Die genade die iuden hatten

5

Uon dem wolkin in der wuoste

Daz si wol trosten muoste

Daz selbe liehte wolken clar

Was dez nahtes och fur war

Den iuden ein brinnendes fiure

10

Daz in die vinster machte tiure

Und daz siv gesehin wol

Diz ist bezeichenunge vol

Der tac betiutet die guoten

Die sich vor svnden huoten

15

Vnd die sunder diu naht

Mit der ir herzin sint bedaht

Der tac ist den rehten lieb

Der naht frowet sich der dieb

Daz er den luten guot verstele

20

Und in div naht dez verhele

Swer vbel tuot der schiuhit

Den tac vnde fluhit

Suz die sunder schiehint

Den tac vnde fliehint

25

Suz sunt die sunder schowen

In ir sunden da verhowen

Cristes reine menscheit offen

Dur daz ir herzin troffen

206b,29

Werden alda zemale

30

Mit der scharpfen vorhte strale

Die hie dicke hant gewankit

Und im selten ie gedankit

Siner menschlichen marter

So hie sin lip vil zarter

35

Dur vns hat enpfangen

Vnd mengen kvmber langen

Si svn vf werndes schricken

Sine menscheit an blicken

Sin gotheit sol ir ovgen

40

Alda beliben tovgen

Daz siv iht frovde enpfahen

Kein trost sol in genahen

Die guoten svn da ane spot

In schowen mensche vnde got

45

Suz schinet crist den guoten guot

Daz er in iemer sanfte tuot

Den vbilen vbil an der zit

Diz spil suz vngeteilit lit

Alsus was daz wolken glanz

50

Dez tages luter vnde ganz

Alhie dem ivdenschin gedigen

Der sunnen hitze an gesigen

Und och ein fure dez nahtes

Lieht vnd vil geslahtes

55

Crist lat da ane smeichen

Aller siner wunden zeichen

206c,57

Die sunder offenlichen sehin

Und den grozin kvmber spehin

Den er nach menschlichen sitten

60

Dur die welt hat erlitten

Vnd siner marter waffen

Daz siv die svnder straffen

Die geiseln vnd die crone

Darzvo daz cruce frone

65

An daz er willeclichen gienc

Und den tot drvm enpfienc

Daz sper daz an den ziten

Dranc dur sine siten

Dar zvo die scharpfe nagel

70

Daz si der svnder steter hagel

An ir froweden iemer wesin

Dar an steteclichen lesin

In vngezalten grozen sünde

In der vinstirn helle gründe

75

Crist sitzit als er ist gewon

Mit allen sinen heiligon

Enbor als im wol gezimet

Da man sin vrteil vernimet

Die svnder aber da wider

80

Hie vf der erde nider

Die si och hant geminnet

Und gar nach ir gesinnet

Fur die himelschen huoben

Dez sol ir frovde truoben

206d,85

Und die svndigen buoben

Hin in die helle gruoben

DAZ IUNGESTE GERIHTE.

Crist vahit daz geriht an

Billich wan er weiz vnd kan

Ir aller schulde vnd missetat

90

So ir lip begangen hat

In dem aller wisheit schatz

Und aller kvnste wiser satz

Sint verborgen vnd beslozzin

Dez och menger hat genozzin

95

Und si demuoteclichen suchte

Der siner genade hie geruohte

Er ist der genaden vbergulde

Vnd wan er och ane schulde

Ist der svnden allen

100

Und der svnden gallen

So er do och der svnden knehte

Rihtet nach ir rehte

Die menge sünde hant gefrumt

Der man da an ein ende kunt

105

So ist er ane sünden masen

Dez wir die warheit lasen

Vnd ist der svnde nie gevie

Noch missetat vf erde hie

Noch dekeiner svnden gelust

110

Noch valsch nach akust

Wart nie in sinem mvnde

Funden an dekeiner stunde

207,1

Div selbin zwei als ez och sol

Gezimet einem rihter wol

Ein rihter sol dez rehte pflegen

So lit der itwiz vnder wegen

5

Och werdint da viner schar

An dem gerihte svnderbar

Wan ir svmeliche da vor got

Werdent gerihtet vnd verdampnot

Der meintetic svnden haz

10

Mit etslichim guote gemischet was

Als die verworhten tovbin

Die doch hie den gelovbin

Hatten mit der vergiht

Und doch der werke pflagen niht

15

Div zvo dem gelovben hœrint

Die liute sich selbin torint

Die dem gelovbin bi gestant

Vnd doch der werke niht en hant

Sint an ein ander beidv tot

20

Und ane nutz ir beider not

So werdent da etsliche

Vor got da offenliche

Gerihtet vnd da behalten

Uon gotte niht verschalten

25

Die och hie waren guot

Mit rehtem gelovben behuot

Vnd waren doch da bi

Tegelicher svnden niht fri

207b,29

Die werdent och alda geriht

30

Von gotte doch gescheiden niht

Sumelich kein gerihte enpfahent

Wan daz die armen gahent

Uon dan verdampnot ane trost

Vnd werdent och niht erlost

35

Mit dem helle valande

Dort von dem steten brande

Daz sint die in ir iaren

Ane rehten gelovben waren

Daz sint die ane gerihte sint

40

Iemir me der helle kint

So sint etsliche gerihtis ane

Uor got vf dem plane

Vnd helfent rihten vnde geben

Urteil vber der vbilen leben

45

Vnd stetent dez rihters wort

Und sin vrteil gar vnerworht

Daz sint die reinen gottes trut

Der lebin hie vberlutet

Was mit svnden vber mischet

50

Und mit tugenden erfrischet

Vnd reines willen vollekomen

Hie vf der sele fromen

Und willeclicher armuote

Pflagen in der minne bluote

55

Als sant Matheus iach

Wie ihesus crist selbir sprach

207c,57

Ir die mir vnerbolget

Hie habint nach gevolget

Die sunt mit guoten witzin

60

Uf zwelf stuolen sitzin

Vnd rihten hie nach rehte

Uon israel div zwelf geslehte

Die sint alsus zetiute

Alle volkomen liute

65

Die von der welte trettent

Vnd sich willeclichen wettent

In sin senftis minne ioch

Daz den tumben ist ein bloch

Die der welte suozin gift

70

Hie minnent für der himel stift

Als ich iv da vor han

Uon vier scharn kvnt getan

So merkint daz die alle sunt

Gerihtet werdent an der stunt

75

Mit dem gerihte der gelte

Als siv in dirre welte

Ir lebin hant gestellet

Als wirt in lon gezellet

Die aber den gelobin verbaren

80

Vnd niht cristes burger waren

In der gotis erwelten stat

Da cristes volk ist in gesat

Die werdent als ez ist geschriben

Reht als vient vertriben

207d,85

Ane dez vrteilis frage

Wan si mit rehter plage

Waren hie vrteilit

Zvo dem tievil geseilet

Und waren der helle kneht

90

Da von ist diu vrteil sleht

Aber div vbeln cristen

Die den gelovbin wol wisten

Vnd doch vnrehte lebten

Und wider got hie strebten

95

Die werdent da zeleste

Als burger niht als geste

Nach vrteile gerihtet

Vnd als daz reht pflihtet

Gepinet vnd gekestegot

100

Nach dez vrteilis gebot

Ir svnt abir diz wissen

Nach der warheit geflissen

Daz da diz selbe geriht

Doch niht darumbe geschiht

105

Daz man von nivwen da enbere

Alle dinc vnd div ervere

Ob si sin vbil vnde guot

Als hie div welt tuot

Dez ist dekein not

110

Wan daz lebin alder tot

Wirt dem menschen da beschert

So div sele hinnan vert

208,1

Wan daz der guoten selekeit

Mit offenunge werde bereit

Daz man da schowe ir selde

Und ir tugenden gemelde

5

Vnd daz ir frovde so groz

Da in allen werde bloz

So ist den vbiln deste wirs

Fur war svnt ir gelovben mirs

Und daz da vnversloffen

10

Daz reht vrteil werde offen

Daz och da vor in allen

Den svndern ist gevallen

Daz man die warheit da lese

Daz ir verdampnust reht wese

VON DER WELTE NIVWERVNGE.

15

Nv merkint furbaz also

Der vrteil werdent zwo

Der werden da dv eine

Zvo den guten algemeine

Div vil minnecliche hillet

20

Vnd den kvmber stillet

Horint vmbe den hohen botten

Er sprichet ir gesegenotten

Koment her min erwelten

Zefrovden vngezelten

25

In mines vater riche

Daz iv vil liebliche

Mit frovden ist bereitet

Vnd ivwer lange beitet

208b,29

So wirt div ander vrteil

30

Gegebin mit grozem meile

Uber alder welte kinde

Dez lebinden todis ingesinde

Dez rehten rihteres stimme

Hillet der sunder grimme

35

Gant verfluochten in daz fiure

Daz mit eweclicher stiure

Dem tievil gemachet ist

Vnd dez genozin ane frist

Svz wirt der vngeliche segen

40

Den zwein scharn da gewegen

Daz geriht sus ende nimet

Nach dem als ez gezimet

Und het ein solich ende

Von dirre welt ellende

45

Und wirt so gar behende

Zehimel oder in die brende

Darnach wirt div nvwerunge

Als iv da vor min zvnge

Ein teil och het geruoret

50

Div doch niht volle fuoret

Wirt vf diser erde

Die wile der svnder vnwerde

In der welt ist beliben

Er muooze e werden vertriben

55

In die helle vnd gestozin

Zvo sinen eit genozin

208c,57

Den div helle ist gegebin

Ze heinstur ir ewic lebin

Merkint wol mit triuwen

60

Wie sich div welt sol nivwen

Als daz vil vngehure

Starc vnd michil fiure

Diu elementen het bereit

Zvo einer nivwen stetekeit

65

Wan disv welt vil wilde

Und ir geschepphede bilde

Wirt mit fiure verbrennet

Daz ez nieman wol erkenet

Und als si was verswachet

70

Als wirt si schone gemachet

Mit nivwem clarem glanze

Doch ander gescheppfede ganze

Daz geschiht dur sache dri

Div svnt ir verstan da bi

75

Die ersten sache ich truoge

Reht als ez was gefuoge

Wan div elementen wurden

Hie entreinet von der burden

Der svntlichen missetat

80

So der mensche begangen hat

Da mit siv wurden enteret

Div noch dicke wirt gemeret

Als ich och billich daz div welt

Mit vil lobelichim gelt

208d,85

Wert ir nivwit vnd geschonit

Mit nvwerunge gekronit

Dem menschen zvo einer wirde

Daz mit guoter begirde

Sinen scheppfer het gelobit

90

Dez lob och von schulden obet

Die ander sache ist also meine

Daz die creature hie alleine

Wurden geeret mit lone

Die hie dem menschen so schone

95

Mit arbeit gedienit hant

Als ir selbe wol verstant

Div erde git nach prise

Dem menschen mengen spise

Und menger slahte fruhte

100

So han wir mit genuhte

Von dem wazzir vnsir tranc

Steteclichen ane wanc

Och han wir von dem fiure

Gesiht vnd och lieht zesture

105

So sin wir an dem aten

Uon dem liufte hie beraten

Ane den nieman mac geleben

Diz het den liuten got gegeben

Och horint von der dritten

110

Sache hie mit sitten

Wan div welt ist geschaffen

Nach der warheit der pfaffen

209,1

Dur daz hie der mensche spehe

Und als in einem spiegel sehe

Got an der creature

Vnd och an ir figure

Mit der inren erkantnisse

Uf dem wilden erde geruste

Wan got in siner nature pfliht

Mac der mensche erkennen niht

Er ist so gar vz genomen

10

An clarheit vnde volkomen

Daz ist och ane lovgen

So daz fleischlich ovgen

Hie niht mugen geschowen

Noch in dez himels owen

15

Der geiste ogen sehint in so

Daz sele vnd lip wesent fro

Die mit der minne schulde

Hant erworben gotis hulde

Och mugen ane schricken

20

Dez libes ovgen an blicken

Sine claren menscheit

Div den tot dur vns leit

Da von wirt ganziv wunne

Dem menschelichen kvnne

25

Daz in iemer stete sihet

Als vns div warheit vergihet

Geweren menschen vnde got

Mit svnder frovde ane spot

209b,29

Wan ander creature menicvalt

30

Erkennet man die hohen drivalt

Den vatter svn den heiligen geist

In drier benemede volleist

Ist er ein werer got erkant

Doch ist dem vatter vz benant

35

In lobelichem suozin done

Der gewalt siner einer persone

Und dem svn div wisheit

Mit bezeichenlicher vnderscheit

Dem heiligen geiste div guote

40

In der waren minne bluote

Disiv drivalt vnderschidunge

Mugen alte vnd och iunge

Bescheidenlich wol kiesen

An der creature ane verliesen

45

Von dez vatters vz erlesin

Het elliv creature ir wesin

Swaz si ist an dirre frist

Svz vns kvnt sin gewalt ist

Und mac vns alle sterken

50

Da bi svn wir och merken

Dez svnes wisheit elliv zit

Div ander creature lit

Wie vnd war nach div ist

Hie gebildet alle frist

55

Alder wie si geschaffen si

Da kiesint dez svnes wisheit bi

209c,57

Dez heiligen geistis guote gar

Svnt ir merkin svnderbar

Ane dez gelovbin vrdrvtzes

60

Waz ander creature nvtzes

Si vnd och wesin muge

Alder warzvo si och tuge

Dar an kiesint ir alle wol

Dez heiligen geistis guote vol

65

Svz ist div heilige drivalde

An der creature menicvalde

Vns ein spiegel worden

Hie an der welte orden

Da bi wir erkennen mvn

70

Den vatter den geist den svn

Mit menger wize stiegel

Reht als in einem spiegel

Doch wirt daz selbe spiegel glas

Der creatiur ir luhtit baz

75

Und so vil me gereinet

Als div warheit meinet

Daz man noch baz erkennen kan

Der creature zimberman

Der sich selbe zesehinne bot

80

Doch ist dez da dekein not

Als man da niht anders mohte

Got erkennen als ez wol tohte

Als wir ieze leider sin

Vnwizzenhaft der clarheit schin

209d,85

Sunder ez geschiht alda

Daz man noch grozen frovden sa

Mit dez libes ovgen neme

Div libe vnd sele wol gezeme

Daz si von gotlicher craft

90

Sich da fröwen samenthaft

Div sele sich da fröwet svnder

An der gotheit wunder

Da si sich beschowet inne

So vil vnd si die minne

95

Hie zegote het getragen

In ir liblichen tagen

Dez libes frovde ist och breit

An der reinen gottes menscheit

Die er da vnverborgen

100

Schowet vnd ane sorgen

Er het och froden sture

An der geschonten creature

Frowent si sich gemeine

Lip vnd sel da alleine

105

Vnd ist frovde ane zal

In dem himels sal

Wan der totlich val

Sol si miden vber al

Horint furbaz als e

110

Uon der nivwerunge me

Die himelschen vmbecreize

Die mit vil witen reize

210,1

Die welt hie vmbe vahint

Mit den die sternen gahint

Vnd mit in vmbe swenkint

Sich steigent vnd senkit

5

Als wir wol sehen dicke

Mit der liehten svnnen blicke

Und noch schowen gerne

Die himelschen creize vnd sterne

Werdent niht verswachet

10

Noch vinster gemachet

Noch mit truobe gemischet

Ir clarheit niht erlischet

Als diu ander element

Uon den ir vernomen hent

15

Siv sint so gar gehœhit

Dem regen vnd nebil enpflohit

Den gebresten siv doch hant

Daz siv niemer gestille stant

Vnd da von werdent siv ernivwent

20

Daz siv ir lofen niht ruwet

Und sint der reinunge erlazin

Als wir den andern mazin

Wan siv selbe reine sint

Uon der reinen megde kint

25

Div nvwerunge an in geschiht

In zwei wiz so man giht

Daz ir lovfen da geste

Vnd niht furbaz vmbe ge

210b,29

Vnd daz och ir clarer prehin

30

Werde vil grozir da gesehin

So ist diu ander wize

Daz in loblichem prise

Div vil liehtv svnne

Mit ir vil claren wunne

35

Stat an ir vfrunse stille

Als ez ist gottes wille

Da wider stat der mane

Ob alles gebresten ane

An der svnnen vnder ganc

40

Svz stat si iemer anewanc

Als si geschuof von erste

Der hohste vnd der herste

Dur zwo sache geschiht diz

Dez svnt ir rehte sin gewiz

45

Wan daz oder gottes zimber

Daz och niemer wirdet timber

Geschuof got an allen vrdrvtz

Dem menschen dur zwivalten nvtz

Daz div erde von in fruht bere

50

Wurde vnde fruht gebere

Swaz wir ie fruht hetten

Daz kan von den planeten

Swaz och fruhte verdirbet

Aldiv erde nvtzis erwirbet

55

Daz ist der planeten schult

Unde wirt mit in erfult

210c,57

So danne mensche hinnan vert

Und der fruhte niht me zert

So gestat himel vnd daz gestirne

60

Die warheit ich erkirne

Der ander nutz den wir nemen

Sol vns och also gezemen

Da vnser froden nature

Sich frowe an der creature

65

Die got also geschonet hat

Daz man groze frovde enpfat

Und an ir erkennet got

Sinen gewalt vnd sin gebot

Da von wert ir schin iemer

70

Vnd sol irloschin niemer

Div creature svz frovde birt

Wan ir lieb gemeret wirt

Doch so merkint furbaz

Uon den element daz

75

Wan div erde wir betalle

Lvter als ein luter cristalle

Vnd wirt ebin vnde plan

Als ich vor geseit han

So wirt der luft vil truter

80

Dvrsihtic vnde luter

Und het niht vinsternisse

Die wir nv han vil gewisse

Die wolken gar verendit

Div vns nv liehtes pfendit

210d,85

Wan sol niht me bevinden

Der starken kvlen winden

Unde svren rifen

Svn da vil gar zerslifen

Noch vallet furbaz kein sne

90

Der hie nv selwet gruonen cle

Beidv towe vnd och regen

Sint och danne gelegen

Wan ist och fri vor hagel

Der hie sleht den iamers hagel

95

Dez dunren vorhteclicher doz

Der dicke frovde machet bloz

Sol niemer me geschellen

Noch den liuten vorhte vf wellen

Div vngehiuren blic schoz

100

Die hie och der er floz

Gewalteclich zerkliebint

Und sich der welte vnliebint

Der sol alda zestunden

Niht werden me befunden

105

Och svnt ir wizzin fur war

Fur vnd wazzir wirt gar clar

Ir gescheppfede zergat doch

Die siv da her hetten noch

Ir wesen belibet iemer stete

110

Abir ir nvtz vnd ir gerihte

Hant furbaz me dekeine craft

Wie doch menschilich geschaft

211,1

Ir nutzis aller meiste lebt

Wan div erde vf wazzer swebt

Und wirt von wazzer fruhtic

Vnd von der fuhte genuhtic

5

So ist uns kvnt div witze

Daz mit dez fures hitze

Hie fruht muoz genesen

Wolt aber dez zevil wesen

Gar zeheiz oder gar zekalt

10

So wurde elliv fruht gevalt

Da von ir beider maze muoz

Uns den schaden machen buoz

Sweders da vber wege

Vnde niht der maze pflege

15

So were verlorn der fruhte trost

Die alle liute tuot erlost

Da von wirt in beiden

Div vbir maze da gescheiden

Uber die rede sprichet sus

20

Der guote sant Basilius

Swaz daz wazzir kelti hat

Div si mit yse schowen lat

Vnd hie seret mengen man

Div wirt gescheiden gar von dan

25

Swaz och daz fiure hitze pfliget

Div allen dingen angesiget

Div mengen hat gemuget

Und noch die liute bruoget

211b,29

Div zwei werdent volkomen

30

Uon den elementen genomen

Vnd fliezint in die helle sutten

Den svndern den siv hie butten

Ir dienst ir nutz zallen zitten

Uf diser erde vil witen

35

Vnd hant si vnverdrozzin

An allen danc hie genozzin

Die muozint si vnsvoze

Gelten mit swerer buoze

Und gent in sus die letze

40

Daz si ir marter wetze

So belibet och mit stetekeit

Dem wazzir sin clariv luterkeit

Dem fiure sin lihten schine

Vnd werdent schoner vnd fine

45

Swaz div viner elemente

An ir hant vnedeler rente

Div kerint alle danne wider

Zvo den svndern hin nider

Alsam der erde swere

50

Und ir dunkil vinsterbere

Daz zvo dez luftes truobsal

Tvot och zvo der helle val

Vnde sin vnfletic schimel

Och muoz erde vnde himel

55

Danne beidiv zergan

Daz svnt ir also verstan

211c,57

Ir geschepphede sich verkeret

Ir edilkeit wirt gemeret

Und belibet stete ir wesin

60

Als die pfaffen hant gelesin

Swer nv welle wol genesin

Der nemen den kern von der vesin

Nv han ich iv gemachen kvnt

Die zit die iungsten stunt

65

Wie der welte frovde welzit

Und wie si wirt versmelzit

Von dez fiures starken brvnst

Uon dez endecristes vfrunst

Biz daz div welt ende nimet

70

Waz da entzwüschent not gezimet

Wie gar ez wirt vernihtet

Daz han ich gar getihtet

Mit vil grozim ruoche

Ab conpendio dem buoche

75

Theologice veritatis

Dez sunt ir rehte sin gewis

Daz ist zetiute geseit

Du gotlichiv warheit

Div sich och nie verbarc

80

Diz buoch ein sach vnd ein sarc

Ist alder waren schrifte

Ein heil ein heilic hant gifte

Div niemer wirt geswachit

Ab dem diz ist gemachet

211d,85

Daz man bezerunge neme

An dirre lere swem ez gezeme

Und daz man och alle tage

Gottis gerihte in vorhte trage

Wir svn nach rehter maze

90

Wider kerin an die straze

Da wir daz mere e liezin

Und lat ivch niht verdriezin

Daz ich von dem mere gie

Min muot mich dez niht verlie

95

Ich muoze iv machen kvndic

Wie div welt so sundic

Ir rehten lon enpfahit

So si von hinnan gahit

Swaz ich dar an gesundit han

100

Dez wil ich zebuoze stan

Und iv dez wol ergetzen

Minen sin furbaz wetzen

Den doch min muot e truoc

Vf daz lob der megde cluoc

105

Martina tugenden gimme

Die do der keiser grimme

Alexander niht enkvnde

Uber winden dekeiner stunde

Daz der gar verfluochte

110

In mengewis versuochte

Mit menger scharpfen marter

Der ir suzir lip vil zarter

211,1

Vbir die maze vil enpfie

Und daz allis niht vervie

Sin zarten noch sich drowen

Do wolt er mit dem lowen

5

Die maget han verderbit

Vnd ir gehugede ersterbit

Do wart von gottis guote

Dem lovwen senftes gemuote

Gegebin ander friste

10

Uon dem süezin ihesu criste

Daz er die maget erte

Vnd sin hertekeit verkerte

Do daz niht entovgete

Swaz er kvmbers ovgete

15

Do hiez er si vf henken

Und wolde alda verkrenken

Ir magtlichen korpel

Er hiez da sine dorpel

Mit krapfen zerren ir lip

20

Die reinen maget niht ein wip

Biz daz man ir gebeine

Groz vnd och cleine

Vnverborgenlichen koz

In ir kvschim libe bloz

25

Als ich da vor iv seite

Die vnzallichen arbeite

Daz leit si mit gedulde

Umbe ir herren hulde

212b,29

Och wart alda den schalken

30

Ir lip vil wol zerwalken

Wan die gar schampten

Offenlichen da erlampten

An armen vnd an henden

Do si in karken gebenden

35

Die reinen maget cluogen

An ane erbermede sluogen

Do diz allis niht entohte

Und der keiser niht mohte

Die maget vber winden

40

Noch ir muot gelinden

Do hiez der vngehiure

Machen ein groz fiure

Daz man si da verbrande

Vnd aller frovden pfande

45

Dez waren siv gehorsame

Dine schurpfer ane schame

Und sahin sinen ernst wol

Der was arges willen vol

Die buoben mit vnselden stolz

50

Brahten fure vnde holz

Ein michil fiure siv bliezin

Siv wolden niht verliezin

Ir herren hulde vnde trost

Da von wart ein michel rost

55

Gemachet vor dem keiser

Der was von zorne heiser

212c,57

Sin muot der was so wesse

Reht als ein smides esse

Daz starke fiure gluote

60

Sin tobendiv flamme wuote

Dez doch vil cleine erschrac

Div vil kivsche wan si wac

Daz wort vnd och die lere

Da ihesus crist der herre

65

Lerte sine liebin iunger

Die billich trugen hunger

Nach siner worte samen

Die vns den tot vernamen

Den vnser vordern verschulten

70

Den wir sit ture gulten

Swie wir sin ture enbissen

Ir svnt daz alle wissen

Jhesus crist sprach ane wan

Ir svnt gen den niht vorhten han

75

Die hie den lip tœtent

Und todis kvmber nœtent

Doch der sele niht geschaden

Noch dekein not vf si geladen

Ir svnt fuhten den dez craft

80

Mac lip vnd sele samenthaft

In die hele hin senden

Vnd ewiclich da lenden

Den vorhte och diu vil reine

Martina valschis eine

212d,85

Der lip vnd sele ersterben

Mac vnd gar verderben

Uf den stunt ir gedinge

Vnd da von wac si ringe

Den keiser alexandern

90

Und swaz ir was der andern

Die ir libe truogen haz

Dvr daz div reine cristen was

Der tot ist schier ergangen

Dez libes vnd enpfangen

95

Swer hie den tot kvset

Vnd den lip hie verliuset

Dur got vnd diz cruce leben

Den wirt lebin dort gegeben

Bi der engel kvschen kvnne

100

Da frovde in ganzir wunne

Grvonet vnde bluoget

Dar och vil menger ruoget

Mit dez gelovbin ruoder

Und lat dez libes muoder

105

Darumbe hie verschroten

Daz er sich also toten

En lebindes opfer bringe gotte

In der waren minne gebotte

Diz tet och div vil guote

110

Mit willeclichem muote

Gap si ir lip vil kivschin

Vil mengen sweren biuschin

213,1

Als ich da vor han gesaget

Und was och nv vnverzaget

Gen dez grimmen fures brvnste

Daz mit dez tievils kvnste

5

Also sere was enbrant

Da von der keiser alzehant

Gebot dez tievils kinden

Hende vnd füeze binden

Der megde also vaste

10

Der lip so schone glaste

Uon der kivschekeite varwe

Wan da mitte was er garwe

Gemalet vnd geverwet

Mit reiner minne gegerwet

15

Daz an im kein maze schein

Als daz wisze helfen bein

Gein dem horne schinet

Als was ir lip gefinet

Mit tugenden vnde gezieret

20

Mit selden gekvrtieret

Vnd mit dez gelovbin bluomel

Ein gespil vnd ein muomel

Der kivschin gottes engel

Dez stetin geluckis stengel

25

Gewahzin vz ir herzin

Mit süezir minne smerzin

Was ir kvschir wille wunt

Uon ir gemahel alle stunt

213b,29

Ich meine der engel prinze

30

Reht alsam diu minze

Fur die nezil smecket

Als was ir gar verdeckit

Der welte valsche süeze

Darnach menger sine füeze

35

Dicke het verstozin

Da von er kvmber grozin

Hie vnd och dort lidet

Swer niht die suze midet

Div selbe süeze was vil sure

40

Martinun von nature

Mit dez himels honicwaben

Wolte si ir sele labin

Beidiv trenken vnde spisen

Nv horint von der wisen

45

Dv wart alda zestunden

Alse si was gebunden

In der starkin fiures flammen

In der geneiste gluogenden wammen

Geworfen an alle milde

50

Da wart daz gotis bilde

Gereinet vnd gar luter

Als ir gemahel vil truter

Si iemer haben wolde

Als man hie tuot dem golde

55

Daz man lange wil behalten

Dvr rehte liebi lazen alten

213c,57

Wan daz machet hie gar

Alles vnflates rehte bar

Und darzvo allis rostes

60

Vnd ist dez hosten kostes

Under allem gesmide hie

Do hie div erde och enpfie

Sin edilkeit vil dicke frumet

So ez zvo sinem rehte kvmet

65

Als edil sin eigen hat

Swie dicke mans darnach zerlat

So wirt sin niemer minder

Nv merkint gotis kinder

Wie crist die goldis bovgen

70

Offenlich vnd tovgen

Wolte luter machen

Mit menger hande sachin

Und aller slahte marter

Da mit ir lip so zarter

75

Wart gelutert vnd versuochit

Der keiser da mit verfluochit

Und nv mit dem fiure

Wan div reine ture

Horte in sinem trisol

80

Der da ist aller froden fol

Da wil er si och iemer

Behalten vnde niemer

Komen vz siner arke

Da von ir lobis barke

213d,85

Iemer in der welte swebt

Ir lip erstarb ir lob daz lebt

Iemer me an endis drvn

Bi ir gemahel gotis sun

Dez wir vns wol trosten mun

90

Sin wir hie mit dienste frun

DIV .X. MARTER

Nv horint von der claren

Wie was der gebaren

In den brinnenden geneisten

Da wolte ir da inne leisten

95

Ganze truwe der vil werde

Der da himel vnd erde

Geschuof mit einem worte

Der vernam hie vnd horte

Der reinen megde gebet

100

Daz si in dem fure tet

Wan div edel gimme

Sprach mit luter stimme

Herre ane svnden schimel

Der abdem hohin himel

105

Her nider vf die erde sach

Der welte not vnd vngemach

Daz dv selbe nemest war

Ob ieman hie svnderbar

Dinv gebot reht erkande

110

Und dich diner genaden mande

Vnd din hohin hulde suochte

Und din erbermede geruochte

214,1

Vnd dine gotlichen guote

Suochte mit demuote

Hilf mir nv diner dirne

Schepfer aller gestirne

5

Div mit demuot ruofte

Hin zvo dir vnde wuofet

Wan div rehte gerehtekeit

Hast mit diner gotheit

Uon himel her gewartet

10

Als dir ist an gartet

Div warheit vf gegangen ist

Uon der erde vf dirre frist

Daz was do crist wart gebor

Uon dem rosen ane dorn

15

Daz was div vil reine maget

Div mit kivsche hat eriaget

Der himel ein hurnen

Den man e sach zvrnen

Gen aller der welte

20

Der ze erbe vnd zegelte

Der tot was gevallen

Mit der bittern gallen

Uon der selbin megde hie

Div süeze warheit vf gie

25

Div was von erde komen

Uon der wir alle sin genomen

In menschelichim samen

Von even vnd von adamen

214b,29

Swaz crankeit div erde pfliget

30

Der hat div maget an gesiget

Uon iesse der vil edil stam

Von der got die menscheit nam

Div warheit was enpfangen

Uon ir vnd vf gegangen

35

Als div maget Martina

Mit luter stimme seite da

Daz siv ez alle wol horten

Die den gelovben storten

Si sprach keiser sage mir

40

Dez ich frage dast min gir

Dv bist dez gelovben gift

Ist dir iht kvnt div heilic schrift

Div mich hat vnder wiset

Und lip vnd sele spiset

45

Die mir got tuot kvnt

Hie dur sines botten munt

Daz man willeclich svl tragen

Allen kvmber in disen tagen

Als angest vnd och versmehte

50

Swa mich daz dur ehte

Hvnger frost vnde durst

In dirre welte iamers hurst

Vnd aller hande wize

Div hie den lip slize

55

Dar an vesteclichen stan

Unde och dar vnder han

214c,57

Den aller hosten gelovbin

Und dez niht lan berovbin

Der hie alle frode birt

60

Mit dem crist erkennet wirt

Got aller cristen zvoversiht

Ane den guotes niht geschiht

Der mit geloben wirt erkant

Ein got der mit gerehter hant

65

Kan gewegen den rehten lon

Ich meine die rehte schon

An ruofent sinen hohen namen

So werden vnd so lobesamen

Wan div vil süeze minne

70

Wahsit mit hohin gewinne

Div hie erfullit die gebot

Diu gemenicvaltet sint von got

Wan so man got ie lieber hat

So sin gebot ie naher gat

75

Svz wirt div minne beslozzin

Div da wahset vnverdrozzin

Und wirt gemenicvaltet

So man so gar behaltet

Gottis gebot clein vnd groz

80

Svz wirt div ware minne bloz

Mit der man got hie nahet

Swer och die marter enpfahet

Dvr got der wirt gekrœnet

Lip vnd sele geschœnet

214d,85

Da von sol die kvrzen not

Und disen liplichen tot

Nieman hie erschricken

So ture vmbe ein wicken

Gen der steten frovde dort

90

Die der lebinde himel hort

Nach gediendem lone teilet

Als si hie ist geveilet

Und mit dienste erarnet

Dez sint alle hie gewarnet

95

Wan snidet vnde mæget

Als man hie hat gesæget

Wan mac mit mengen sinnen

Dem tode hie entrinnen

Dez libez tot ich meine

100

Dez groze vnde cleine

Getrunken hant den winkovf

Owe daz ich sin ie gesovf

Den ich svz muoz gelten

Div zit kvmit vil selten

105

Div mich hie niht erkrenke

So ich den tot reht bedenke

Ich wene anderen luten si

Och div selbe gewonheit bi

Swaz dv welt hie gesüezit

110

Daz wirt alsus gebüezit

Ir honic muoz ersuren

An dem ende ie mit truren

215,1

Owe swem nv daz gezimet

Daz er hie willeclichen nimet

Diz honec gifte maz

Daz der welte gemalet vaz

5

Mit vntruwen butit

Mit valsche si hie triutit

Ir tovbis ingesinde

Den si hie vil swinde

Oget einen wolfzan

10

Dez sich menger niht versan

Der sich hie lie erlovfen

Bi ir vnd gar bestrovfen

Dez himilriches eren

Daz er niht wolde keren

15

Uon der welte witen pfaden

Wan die bereiten sich mit schanden

Die strazin die man üebit vil

Die hant deste witer zil

Noch ich kvnnen niht vermiesen

20

Als wir nv alle kiesen

Vnd mugen niht verwahsen

Wan beier vnde sahsen

Üebint si vnd vil der diet

Den ir tumber muot geriet

25

Daz siv hie der welte lebent

Vnde willeclichen strebent

Mit kvmber in der sünden siln

Dvr vppekeit ir lip viln

215b,29

Uon der welte niht enpfliehen

30

Vnde steteclichen ziehen

Der svnden vnd der schanden pfluoc

Darzvo mennent siv genvoc

Der vil suzen svnden gart

Hat nach geruwet si die vart

35

Und truret ir gemuote

So man fur die fühzin huote

Mvoz dur rechenunge

Beidv alt vnd iunge

Da wirt der gruoz gar zeherte

40

An dem iungsten geverte

Da lip vnd sele scheiden

Muoz mit tusent leiden

Sich an dem tievil weiden

Mit vorhten vnder beiden

45

Von der welt witen straze

Die man üebit in der maze

Die man niht verwahsen lat

Wan si zvo der helle gat

Div maget sere schuhte

50

Martina div da luhte

In dez starken fiures hitze

Uol hohir gotlichir witze

Der himel towic rose

Vnd hate vil svze kose

55

In dez fures brvnste

Si hat gotes gunste

215c,57

Vnd redte seldeclichen wort

Als ir vor hant gehort

Die der keiser vngerne horte

60

Sine frovde ez zerstorte

Und gab im leides die fulle

Reht als ein wites zvlle

Div vast ist vber laden

Mit kofschatz vffen schaden

65

Also was sin vbir muot

Beidv scharf vnd vnguot

Mit leide besunken

Sin frode was verhunken

In duhte er were geschant

70

Daz in div maget vber want

An gelimpfe was er œde

Daz in ein frowe blœde

Gehonde als vndankis

Ein froweli so crankis

75

Sinen keiserlichen gewalt

Hatte gehœnit menicvalt

Dem div rich elliv wan

Vnd div lant vndertan

Der was nv da ane were

80

Im was ein maget ein here

Worden mit gottis helfe

Dem erbe helle welfe

Si gab im weder vor noch nach

Vt tet sinen frovden schach

215d,85

Und darnach schach mat

Sorgen vnd vnselden sat

Er wande die maget ersterben

Vnd an dem lip verderben

Und tet im selben vil wirs

90

An sinem libe gelobint mirs

Als ich iv nv bescheide

Swaz er der megde leide

Bot vnd och smerzin

Daz gie ir niht zeherzin

95

Wan div vil starke minne

Hat ir kvschen sinne

Ze ihesu crist also gemant

Daz ir lip niht enpfant

Swaz man ir marter bot

100

Wan diz lebin vnd dirre tot

Was ir wol in einer ahte

Ir reine sele div betrahte

Daz crist dur si ir litten

Hat nach menschelichen sitten

105

Sinen sweiz bluot war

Sin antlut so trunken gar

Dez todis herze cloppfen

Den cleinsten bluotes troppfen

Die er vnzallich rerte

110

Swer den zegelte kerte

Der mohte von alder welte

Doch nach rehtem gelte

216,1

Niht vergolten werden

Uon aller creature vf erden

Da von wac div reine

Die marter alle cleine

5

Der minne fiur daz in ir bran

Erlaste diz fiur vz nan

In daz si geworfen was

Luter als ein spiegel glas

Was ir sel ir lip ir muot

10

Uor aller missetat behuot

Da von daz irdesche fiur niht

Mohte han dekeine pfliht

An ir libe mit siner craft

Noch werden an ir sigehaft

15

Ir lip der was so luter

So kvsche so rehte truter

Daz diz fur niht entohte

Daz ez siv brennen mohte

Wan ez ir tugende erkande

20

Abir libe ez doch brande

Gar elliv div gebende

Da mit ir füeze ir hende

Waren vor gebunden

Div wurden sa zestunden

25

Gebrant von ir libe

Daz ich fur wunder schribe

Wan div himelsche tocke

An suggenie vnd an rocke

216b,29

Von fiure mazen enpfienc

30

Swie ez doch vmbe gienc

Ir reiden löcke golt var

Wurden fiures nie gewar

Noch so vil so fures smac

An ir cleide niht enlac

35

Doch hat ir lip zarter

Erwegen sich der marter

Nv waz tet der himel degen

Er sante einen grozen regen

Der megde da zetroste

40

In dez starken fiures roste

Da mitte vil geswinde

Starke susenden winde

Mit schallendem doze

So vngehure so groze

45

Die in daz fiure waten

Und ez also zerblaten

Daz ez den helle dieben

Begunde sere stieben

Vmbe ir hobt vnd ovgen

50

Daz fure ane lovgen

Und wurden vber fruoget

Mit dem fiure so verbruoget

Ob wir ez nv sagen svn

Daz siv ez doch wol mugen

55

Fur ein ganzes mal zellen

Siv wellen ald enwellen

216c,57

Siv wurden alda vf dem hove

Von dem himelschen bischofe

Gewihet zvo den brenden

60

Daz was ane wenden

Div wihe was in e korn

E in blatten wurden geschorn

Div wihe was in e geschehin

E siv hatten sich dez versehin

65

Siv waren vngewarnet

Und hatten wol erarnet

Swaz in zelone da gezoch

Der keiser kvme och enpfloch

Dem geviel niht daz spil

70

In duhte dez schimpfes zevil

Als noch die liute tuont

Swaz vmbe daz fiure stuont

Der vngetoften heiden

Die wurden da gescheiden

75

Von dirre welte lebinne

Gehis vnd vergebinne

In wart der geist enzvckit

Also frisch gedrvckit

Und also svnden warme

80

Vnder dez tievil arme

Der sol si iemer truten

Und sinen schimpf buten

Wan im wart ein groz geschoch

Geschenkit in sin helle loch

216d,85

Da in frode wirt gewilt

Wan siv wurden vber spilt

Uf der welte breite hæle

Dez spils div frovde væle

Si hant gevelet aller selde

90

Vnd der himelschen gemelde

Der helle wirt vnselden veste

Enpfie die ellende geste

In sin verfluchten habe

Im bran sin spis niht abe

95

Er kam sin ane schaden hin

Got welle daz im der gewin

An cristen luten iht erge

In sinem grundelosen se

Bi dem iamerlichen schre

100

Dez wil ich wünschen iemer me

DIZ IST DEZ TIEVELS GRVOZE

Owe dem herze gruoze

Der also reht vnsvoze

Uon dem helle wirte hillet

Der lip vnd sele villet

105

Horint wie der wirt giht

So er den gast an siht

Er sprichit mit grozim gruze

Wilkomen her ze minem huse

Mir vnd alle der helle diet

110

Die got von frovden schiet

Waz hat dich her getragen

Daz solt dv mir sagen

217,1

Waz ist dir gezeiget

Daz din lip hie veiget

Ist dir guotes iht gesaget

Daz alhie die wille iaget

5

Der hat dich gar betrogen

Und werlichen dir gelogen

Hie ist vinster vnd tunkel

Hie luhtet dekein karfunkel

Weder sunne noch der mane

10

Wan ist hie liehtes ane

Dez sich ieman fröwen muge

Alder iht zetroste tuge

Hortest dv bi dinen tagen

Dekein tugent ie gesagen

15

Uon mir vnd den minen

Wan schelten vnde grinen

Sit aber dv dez geruochest

Und mine herberge suochest

Dez muoste doch geniezin

20

Heize schenken vnde giezin

Her min altes luter tranc

Daz sol er haben wol zedanc

Suz heizit er im schenkin

Vnd ane durst trenken

25

Nv hœrint och da bi

Wie diz luter tranc si

Ez ist bech vnde swebil

Daz da ruchet dur den gebil

217b,29

Div salbe div da inne swebit

30

Div och steteclichen lebit

Als ich mich kan versinnen

Daz sint crotten vnde spinnen

So ruofet danne vil vaste

Der wirt zvo dem gaste

35

Wie im sin tranc gevalle

Und sprichit sa mit schalle

Behaget iv dis tranc wol

Gebresten ez iv niemer sol

Der gast muoz sich rimpfen

40

Daz wissent ane schimpfen

Vnd swer sin iht getrinkent

Wan ez von alter stinket

Da von ez luzil frovde birt

Zvo dem gaste sprichit der wirt

45

Waz frovden wandestu hie vinden

Bi vns erbe helle kinden

Ich gap doch nie guote ræte

Weder fruo noch spate

Ich was in dem himelriche

50

Den schonen engeln geliche

Da moht ich niht beliben

Mit frovden da vertriben

Minv endelosen iar

Also schone ich was fur war

55

Als bin ich nv entscheppfet

Daz ez die geste ercleppfet

217c,57

So vngestalt so vngehiure

Fur alle gottes creature

Also clar ich fur si was

60

Da von trage ich steten haz

Aller menschen kvnne

Und ierre si der wunne

Die ich iemer han verlorn

Die hant ir willeclich verkorn

65

Her gast dur einen armen sleck

Iv ist trost vnd och steck

Geworfen abe vnd aller rat

Der zehimelriche gat

Ez mac anders niht gesin

70

Wol her in die cluse min

Kerint her vil snelle

In min verfluochten zelle

Da ir ivch selten frowent

Da ir an ende dowent

75

Der valschen welte kvrz gemach

Owe ach vnd aber ach

Daz ist der seiten clanc

Der da donet ane danc

Die not nieman kan gesagen

80

Daz weinen noch daz clagen

Daz da in iamer bluoget

Wie daz fure da bruoget

Daz da niht endes pfliget

Der lebinde tot hat da gesiget

217d,85

Alsus kan der helle voget

Mit sinen gesten hin gezoget

Die daz fiur verbrande

Und im zehuse sande

Daz die maget solde

90

Verbrennen als ez wolde

Der keiser vnd ez was gedaht

Daz wart da niht volle braht

Ez wart geriht vil anders

Danne alexanders

95

Muot hatte begunnen

Er wolde daz verbunnen

Div reine maget were

Darumbe was mit swere

Sin herze so besezzin

100

Daz er gar vergezzin

Hatte aller siner witze

Im was von zornes hitze

Sin craft vber mennet

Vnd vil wirser gebrennet

105

Danne der megde bilde

Daz got mit sinem schilde

Uor dem fure dahte

Wan diu vil geslahte

Stuont in sinem kampfe

110

In dez fures tampfe

Doch an allen schaden

Der keiser der was vberladen

218,1

Mit vil vngefuoger not

Daz er da niht den tot

Der megde mohte getuon

Er hatte harte cleinen ruon

5

Mit dem fiure erstorbin

Dez was sin trost verdorbin

Er tovber danne tovber

Er wande daz mit zovber

Daz wunder were da gewesin

10

Daz dv maget was genesin

Er ahte niht da vnder

Der gotlichen wunder

Div got mit wunderunge

Lie sehin alte vnd iunge

15

Die woltens niht gelovbin

Und mohten doch die toben

Da wider niht gemachen

Mit ir zovberlichen sachen

Ir zoberliste waren tovb

20

Und ir selden doch ein rovb

Der keiser sere trurte

Sin frode im ersurte

Daz in ein maget schante

Sweles ende er wante

25

Vnd im sin ere wuoste

Daz er entwichen muoste

Einem cranken wibe

Sines geluckis schibe

218b,29

Gie im alles entwerhes

30

Wan sines herzin verhes

Wart im rant versnitten

Sines gewaltes enmitten

Div selderiche fortune

Und ir geluckis lune

35

Hat an im gewelzit

Sine frovde gar gesmelzit

Div im nach wane gegebin

Waren vnd in liebe lebin

Div wurden im gekvrzit

40

Wan si hatten niht gewurzit

In dez rehten gelovbin grunde

Im selbin er erbunde

Dez cristenlichen tovfes

Und dez vil turen kovfes

45

Den ihesus crist verpfante

Do er dem vatter sante

An dem cruce sinen geist

Mit der gehorsami volleist

Fur alder welte schulde

50

In siner marter gedulde

Die er so schone erfulde

Mit der minne vber gulde

Diz was im allis ein spot

Wan er minde mengen got

55

Die von himilrich verstozin

Wurden mit schanden grozin

218c,57

Mit sunden der verscharte

Was ander nideren parte

Der da an allis sumen

60

Engellant muze rumen

Wan ez waren allis crieger

Lugener vnd trieger

Mit vbir muote verirte

Wan dem himelschen wirte

65

Wolten si geliche wegen

So stiez si der werde degen

In daz grundelose abgründe

Ortheber der ersten sünde

Da svn si wesin och iemer

70

Zehulden komen niemer

Den volgete och der keiser

Und wolde ein eigen reiser

Sin der vertribener diet

Die got von allen froden schiet

75

Vnd wolde niht gelobin han

Swaz gott wunders hat getan

Und wart von zorne wuotic

Von nides hitze brvotic

Uon rehter bitterkeit ergrein

80

Als der hunt vmbe daz bein

Do daz fur niht vervienc

Vnd swaz er liste begienc

Do hiez er offenbære

Der kivschen megde clare

218d,85

Ir valwes har vz brechen

Er begunde also sprechen

Swaz si zobirs pflæge

Daz daz allis læge

In ir hare daz si truoc

90

Martina maget cluoc

Horint wie der verfluochte

So fromde wege suochte

Er was in mengen sorgen

Do er wande verborgen

95

In der megde hare ligen

Zovber wie was im verzigen

Sinne vnd bescheidenheit

Sin torscher muot was so breit

Daz er niht wol en mohte

100

Erkennen was im tohte

Siner witze was er erblant

Dez hiez er da zehant

Der reinen gotis tockel

Ir golt reiden lockel

105

Zerren vz ir swarten

Der minneclichen zarten

Da mit si got gezieret

Hatte vnd geflorieret

Dvr den wiplichen pris

110

Wan daz kvsche himel ris

Was da mit gebluomet

Ir hobit mit geruomet

219,1

Wan daz was vmbedaht

Als der reinen was geslaht

Dur ir kvsche ein schappel

Dar vf daz was sinwel

5

Als megden ist irlovbit

Schappel vf blozis hovbit

Lilien wis vnd rosen rot

Als ez daz reht ie gebot

Die rosen tiutet ir bluot

10

Daz div reine kivsche guot

Dur den rehten glovben goz

Uon der och clariv milch floz

Dv vnd die lilien blanc

Tiutent den kvschin gedanc

15

Den ir herze niht verlie

Dez ir hovbit bloz enpfie

Uon reht den zwivalten cranz

Von rosen vnde lilien glanz

Gedenkint wie der verworhte

20

Alexander ane vorhte

Der megde hobit honde

Daz got so ture cronde

Dem wart da vz gebrochen

Daz har vnd vf gelochen

25

Gelicher wiz dem flahs

Noh gelpfer vil danne wahs

Wan der turtel tiubel

Ir reiden hares triubel

219b,29

Gedrungen vnd gewunden

30

Nach megde sitte gebunden

Der wart si berovbit da

Div edil maget Martina

Und lasterlich berovfet

Do si der keiser bestrovfet

35

Vnd er si do an sach

Ir hobit ane hares tach

Er sprach mit schinpf worten

Daz siv ez alle wol horten

Martina wie iz nv gevarn

40

Din gewalt muoz wesen arn

Mich dunkit diner irrekeit

Si ein strick nv hie geleit

Daz zvo diner govgel fuor

Nach der din tumbes herze swuor

45

Dir ist din zober nv benomen

Dv bist zvo dinem meister komen

Die valschen liste sint gelegen

So dv lange hast gepflegen

Din zober hat nv ende

50

Daz dv mit missewende

Lange hast getriben her

Dir gat din schibe nv entwer

Die dv vil vngefuoge

Da her gar ebin sluge

55

Ich solte in minen tagen

Och mine schiben han geslagen

219c,57

Ez were nv vil lange zit

Wan din zovberlicher strit

Hant mengen hie besweret

60

Und an den froden erveret

Wir sin der koverunge

Beidiv alt vnd iunge

Fro vnd vmbe dinen val

Daz din zoberige smal

65

Worden ist da bi din leit

Gewahsin vnde worden breit

Da von bekere dinen sin

Uf hoher selden gewin

Mit rehten truwen ane spot

70

Zvo dem helfe richen got

Dyan der helfe waltet

Vnd alle die behaltet

Die im dienent ane wanc

Der lebin selic vnde lanc

75

Uf der erde wahsen sol

Vnd harnach froden vol

Den soltu frowe suochen

Mit demuot vnde ruochen

Siner helfe alle stunt

80

Div dir ane zwivil kvnt

Sin gute ist och ane grunt

Und sin gewalt gar ane bunt

Do sprach div hoh geborne

Div kivsche div beschorne

219d,85

Ane herzin cloppfen

Swie siv anden zoppfen

Berobit ir gezierde was

Daz clare luter spiegel glas

Ich wil mit warheit gehin

90

Wan mohte sich ersehin

In ir kivsche spiegel han

Beide frovwen vnde man

Swer dez wolte nemen war

Wie rehte luter vnde clar

95

Si waz vnd ane wandel

Reht alsam der mandel

Bluome groze frovde birt

Wan er och der erde wirt

Der nach dem winder bluoget

100

Kein bluot in vbir fruoget

Sus bluote div vil here

Mit tugenden vnd mit lere

Und sprach zvo dem keiser sus

Der hohe botte Paulus

105

In siner schrift hatte gesaget

Ob ein frowe oder ein maget

Schones har vf ir hovbit hat

Daz ir daz vil wol an stat

Vnd vf ir lip gegestet

110

Darzvo ir frovde gevestet

Und mit gezieret daz wip

Vnd vz gesvndert wibes lip

220,1

Nv hastu abe gehovwen

Die gezierde der frowen

Die got hie gab der welte

Ze froderichem gelte

5

Vnd ist sin hant getat genant

Daz si geschuof sin selbis hant

Do er machte adamen

Ane menschlichen samen

Vz der blosen erde

10

Und sazte in vil werde

In dez wunsches paradyse

Vnd machte im nach prise

Ein wip vz sinem rippe

Div was im nach sippe

15

Ein lip vnd zwo selen doch

Als ez ist gewonlich noch

Der hohe got vil milde

Geschvof daz menschelich bilde

Nach im mit siner hende

20

Vnd frite in ane gebende

Er gab im frien muot

Zetuonde vbil vnde guot

Ein obz er in da verbot

Unde sprach daz si den tot

25

Darumbe da enpfiengen

Ob si ez vber giengen

Vnd siv daz obz azin

Sinez gebotes vergazin

220b,29

Da von der mensche reine

30

Ir gottis hant getat alleine

Und anders nieman mere

Nach der warheit lere

Swaz nv ist ander geschaft

Div wart von siner vorhte craft

35

Himel wazzir vnd elliv dinc

Div erde vnd ir vmbe rinc

Er sprach nv si do was ez

Uon siner magencrefte mez

Svz wurden alle creature

40

Ane dez menschen figure

Der wart nach im geschaffen

Nach warheit der pfaffen

Da von sprach div liebe

Zvo dem helle diebe

45

Als si vor mit im rette

Daz er abgehowen hette

Ir har vnde daz geschass

Daz got selbe hatte gemachet

Nv wil ich dir daz sagen

50

In dinen hobit tagen

So nimet got din riche

Uon dir gewaltecliche

Alhie bi dinem lebinne

Daz merke dv vil ebine

55

Daz schrotet er hie von dir

Als dv daz hare tete mir

220c,57

Diz wirstu ansehinde

Vnd offenlich veriehinde

Den hohin gottes gewalt

60

Und sin frode menicvalt

Div wunder vz gesundert

Als er hie hat gewundert

An aller creature hie

So ie lebinden geist enpfie

65

Din lebin wirt dir vnmere

Uon der grozin swere

Div dich hinder grifet

Dez din trost zerslifet

Elliv selde von dir scheidet

70

Mit schanden din lip becleidet

Und mit laster hie gefazzit

Dez dich verfluochten hazzit

Elliv creature gottes

Von dem rehte sines gebottes

75

Dez lebinden todis biten

Bi dinen lebinden ziten

Der din bitet vnd dv sin

Uf eweclicher swere pin

Din kvnftecliches laster taget

80

Diz si kvnftic dir gesaget

Der keiser so hohgeborne

Wart von grozim zorne

Uil truric vnde leidic

Sin muot der was so freidic

220d,85

Daz er der megde willen

Mit nivte kvnde stillen

Darzvo div wisagunge

So im der megde zvnge

Vil gewerlich da kvnte

90

Sin herze och in zvnte

Und wisse was er solde

Tvon alder wolde

Im was so vbil gelungen

An der megde iungen

95

Daz er was so ertovbit

Rehter sinne berovbit

Vnde volgete also hin

Dem tievil vffen vngewin

So er die maget so schone

100

An sach so wart er hone

Und sin varwe verwandelt

Si hatte in gehandelt

Vbil mit gotes warheit

Dez si hat so vil geseit

105

Unde tuot noch mengem we

Dem man der warheit me

Saget vnder sinv ovgen

Daz er niht mac gelovgen

Danne im wol stande

110

Die er doch e erkande

Vnd hœrint si doch vngerne

Der sitte ist hiure vnd was verne

221,1

Suz tet keiser allexander

Wil warheit wol erkander

Die er doch vngerne horte

Und sine frode storte

5

Als im div kivsche frige

Martina gotis amige

Gesaget hatte da vor

Gewiset vffen leides spor

Er wolde niht me liden

10

Von der megde bliden

So herteclichen strafen

Div in mit warheit trafen

Er was ein so veiger man

Unde hiez die maget gan

15

Balde in den tempel

Div was ein rein exempel

Vnd ein bilder der tugenden

Gewesin ie von ivgenden

Si truoc der tugende hæze

20

Div wan ir wol gemæze

In der tugende zelte

Sleich si mit turem gelte

Frodenriche was ir ganc

In der tugende zeltes swanc

25

Zvht was ir zeltes zovn

Dez si tugende mengen sovn

Nach zinsis reht brahte

Ir herren als ers gedahte

221b,29

Dem himelschen erzbischove

30

Selde riche hin ze hove

Der ir sele vnd lib wihte

Mit dez gelovbin bihte

Div scham gab ir geleite

Div si zehove reite

35

Div minne furte si für

In den tempil mit hoher kvr

Dar gie si ane verdriezin

Der keiser hiez besliezin

Die tur nach ir vil vaste

40

Vf siner schanden laste

Wan in der tievil maste

Uf der svnden baste

Och was nach tievils spote

In dem tempel ein abgote

45

Daz was zeus genant

Fur einen hohen got erkant

An den siv wol gelovbten

Der sinne die berobten

Daz ich wol sprechen mac

50

Sit daz si naht vnde tac

Mit flize an betten die

Die siv selbe machten hie

Vnd von in waren gegozzin

Daz siv den dienent vnverdrozzin

55

Vnd die fur gotte bitten

Die si selbe hant gesnitten

221c,57

Er ist dez gelovbin ein getwerc

Swer hie siner hende werc

An bettet fur einen got

60

Der brichit der natur gebot

Diu ist da mit geswachit

Daz er selbe hat gemachit

Und daz fur ein got hat

Wel lasterlichiv missetat

65

Also wan div helle kint

Mit sehinden ogen blint

Und wolden och betwingen

Mit martlichen dingen

Die reinen maget stete

70

Daz si alsam och tete

Dez was ir niht zemuote

Da von wart diu guote

Beslozzin da mit flize

In dem tempel da mit itwize

75

Alexander der helle rigel

Druhte da sin insigel

An die tür mit siner hant

Daz ez were ein sicher bant

Uon sinem hohin gewalde

80

Vnd kerte da vil balde

Wider vf sinen palast

Ganzir frode im da gebrast

Er was so gar entrihtet

Uon der megde vnd vernihtet

221d,85

Abir da wider steteclich

So was si froden riche

Den tac vnde och die naht

Ir lip vnd ir herze vaht

Svnder müede in gottis lobe

90

Dez twanc si der minne klobe

Mit dem si beclemmet was

In dem tempel si da las

Criste ir reines gebet

Daz si vnverdrozzin tet

95

Der keiser eine gewonheit

Hatte die er do vermeit

Er vnd die ewarten

Dekeinen tac sparten

Wan daz siv sament giengen

100

In den tempel vnd begiengen

Ir liebin gotte hohgezit

Mit willen enwiderstrit

Div gewonheit was gelegen

Do von der megde wegen

105

Und eines daz ez och storte

Offenlichen man da horte

Suzir stimme ein wunder

Die da clungen besunder

Uon der engel samenunge

110

Der honec süeziv zvnge

So frolich done erclanchte

So riche frode schanchte

222,1

Diu lip vnd sele loste

Mit liplichim vntroste

Svz was div kvsche maget

Minneclichen vmbe haget

5

Mit engelscher mazsenige

Und himel kvmpanige

Vor hinnan vnd enneben

Die engelschen scharn streben

In selderichim geiegde

10

Ze troste dirre megde

Svz was div guote reine

Niene minder eine

Danne da si eine was

Als ich iv bescheide daz

15

Ir lip was alleine da

Div hoh enborne Martina

In dem tempel nieman me

Als ir wol vernament e

Ir lip da eine solde

20

Wesin als man wolde

Der was da vmbe stellit

Als ich han gezellit

Mit engelscher presse

Die da mit frovden messe

25

Vmbe si da trungen

Der stimme suoze erclungen

Die pflagen da ir libes

Der megde niht dez wibes

222b,29

Do was ir kvschis herze

30

Mit frovden sunder smerze

Bi ir gemahel criste

Swie sin doch nie vermiste

Hie der lip der ez doch truoc

Also stoltz vnd also cluoc

35

Was daz herze so kivsche

Daz ez solich getiusche

Hie mit dem libe treip

Daz ez hie vnd dort beleip

Div doch dekeine sunde treit

40

Diz was solich behendekeit

Prvfent wel ein govglere

Der megde herze were

Nv hie nv da nv hin nv her

Fuor daz herze vmbe entwer

45

Mit frodericher vnstete

Div doch niht svnden hete

Vf der wehsellicher straze

Zwischen zwein honen ein fraze

Wirt vil dicke hie erzogen

50

Hore ich sagen vngelogen

Wie sol ez danne im ergan

Wil ez solhe fuore han

Und ein bedenthalber sin

Vf die rehten truwe min

55

Daz horte ich ie verkeren

Den luten an den eren

222c,57

Wil ez dez libes pflegen

Unde doch den himel degen

Dort dur nieman lazin

60

So sol mans billich mazin

Daz ein bedinthalbir si

Die waren ie der eren fri

Daz kivsche herze snelle

Flovc vz der megde zelle

65

Zvo dez hohsten throne

Dem himel kvnge frone

Da sach daz herze wilde

An dem gotlichem bilde

Wunders also vollekomen

70

Me danne ez ie vernomen

Hatte vf der erde

Uon dem kvnge werde

Ez kvnde niht erglosin

Div rehte grundelosin

75

Wunder div ez spehte

An dem kvnge rehte

Sin craft niht entohte

Da von ez sprechin mohte

Mit der kvneginne von saba

80

Div ze salamone da

Ze hierusalem kan gevarn

Div wunder so groz enbarn

Div si selbe horte sagen

Und sine wisheit bi den tagen

222d,85

Du lie vil gar beschowen

Kvnic salamon die frovwen

Do si div rehte da gesach

Der nam si wunder vnde sprach

Kvnic swaz mir wisheit

90

Uon dir vnd wunders ist geseit

Daz ist wider dem eine niht

So nv miner ovgen gesiht

Mit rehter warheit hat gesehin

Ich muoz von schulden iehin

95

Daz sich die wol frowen mun

Die dich stete sehin svn

Unde sint die selic gar

Die dinv wort offenbar

Horint vnd die wisheit din

100

Die mun fro vnd selic sin

Wan siv der wisheit schrin

An dir schowent volle schin

Svz mohte daz herze wol

Der megde wunderunge vol

105

Sin vor gottes throne

Dem himilschen salamone

Uon dem elliv tugende fluzit

Vnd div rehtiv wisheit dvzit

Nieman kan gekvnden

110

Sine wisheit ane grunden

So man ie me gedenkit

So man ie me gekrenkit

223,1

Uon siner hohin wisheit wirt

Der sinne craft ie me verirt

Da von daz herze so geswinde

Was bedenthalbin ingesinde

5

Dez libes hie dez kvnges dort

Schowende sinen himel hort

Svz was ez ane mvoze

Und doch vil wol zefuoze

Doch so reit ez noch engie

10

Weder doch noch hie

Ez flovc ane gevider

Beide hin vnde wider

Unde was vil sneller gar

Danne valke oder adelar

15

Da von was mit cluoger pfliht

Div kivsche maget eine niht

Swie si eine was verlan

In dem tempil als ich han

Iv da vor bewiset

20

Ir lip was wol gepriset

Mit der engel storie

Die ir der himel frie

Sante zespilgesellen

Dez was da ane zellen

25

Die alexander hatte erhœret

Dez sin herze wart ertœrit

Und vil valschlichen fro

Zvo den sinen sprach er so

223b,29

Die mit im dar kamen

30

Und der engel sanc vernamen

Ach sprach er svnder spot

Wel ein helfericher got

Ist der hoh gelobte zeus

Er het die gotte alle alsus

35

Gesaminot an dirre stuut

Daz er Martinun mache kvnt

Genedeclich den rehten wec

Und den selderichen stec

Dez si leider hat vermischet

40

Vnd den gelovbin entwischet

Den si solde hie behalten

Mit im vesteclichen alten

Uon dem si braht ir tumpheit

Als ich ir dicke han geseit

45

Nv wil div sin hohin güete

Zeus ir vil tumb gemüete

Zerehter warheit keren

Den rehten gelobin leren

Vnd gebot bi siner hulde

50

Daz man da rehte erfulde

Ein richers opfir mit begirde

Nach der hohen gotte wirde

Dez dritten tages zetiute

Daz danne alles daz liute

55

Zvo dem tempel keme

Und da ein vil geneme

223c,57

Opfer den gotten bringen

Vf ir hohen genaden gedingen

Daz opfer daz da werden solt

60

Was weder silber noch golt

Er solte niht wesin anders

Nach keiser alexanders

Gebotte wan von pfarren

Sin herze was verwarren

65

Mit der gotte trutschaft

Er wande selde vnde craft

Uon der gotte helfe nemen

Den so vil als einem bremen

Niht rehter crefte was gegeben

70

Wan in was selbe daz lebin

Uerzigen vnd aller kvnste

Bescheidenheite vnd vernunste

Wan vf ir grozen vngewinne

Wonten die tievil da inne

75

Und gaben dar vz velschiv wort

Div ir selden taten mort

Wan der keiser vmbescheiden

Wolte alda die heiden

Dez opfirs vnder wisen

80

Und wie siv solden prisen

Der gotte wirde vnd erde

Dez wolder in div lere

Mit dem oppfir bieten

Als im die tievil rieten

223d,85

Den elliv selde was verzigen

Nv was daz romsche gedigen

Komen zvo dem tempel gar

Mit menger vngetovfter schar

Daz opfir volle füeren

90

Und ir vngelovbin rüeren

Do si mit loblicher kvr

Getaten vf dez tempils tur

Do sahin siv die werden maget

Von der ich diche han gesaget

95

Uf einem stuole sitzin

Vol gotlicher witzin

Fri vor sunden banden

Und was da vmbestanden

Mit himelschen gesten

100

Die sahin si da glesten

Daz von ir claren wunne

Aller menschen kvnne

Niht wol gesagen kvnde

Die da an der selben stunde

105

Bi der megde waren

Und ir ganze frovde baren

Ir libes siv vil schone pflagen

Vor svntlichen lagen

Nv trahtent vmbe die veigen

110

Die niht kvnde hie geneigen

So menic groz zeichen

Noch ir sinne erweichen

224,1

Wan daz siv alle gahten

Fur sich vnd versmahten

Den der si hatte geschaffen

Wie waren den torschen affen

5

Ir sinne daz vermiesit

Als ir wol selbe kiesit

Ir witze so verbramet

Mit valschir fruht gesamet

Als ein altis geriute

10

Uf der svnden hiute

Von dem tievil geluodert

Mit hofart gemuodert

Daz si so gar vergazin

Der wege vnd der strazin

15

Die vns mit grozer herte

Der ellende gast berte

Nach menschelichen sitten

Mit demuotigen schritten

Der von himelrich flovc

20

Und der megde brustel sovc

Swaz in der hatte geweget

Mit siner lere vnd gesteget

Daz was ir sinnen verwaset

Verdornet vnd vergraset

25

Siv hatten einen ratgeben

Der im selbin frœden leben

Uerworhte mit siner hofart

Da von er gestozin wart

224b,29

Uon dem schonen engellande

30

In die helle mit schande

Der gap in lere vnde rat

Da mit er si verwiset hat

Siv sahin mit den ovgen

Daz was ane logen

35

Die liehten engel fine

In so glanzim schine

Daz sus niht mohten liden

Ir ovgen rnuozten siv miden

In wart och alda zehant

40

Ein so suzir smac erkant

Der in nie davor kvnt

Worden was dekeiner stunt

Och was vor in allen

Daz abgot da gevallen

45

Zeus vnd gar zervallen

Uon der megde schallen

Zevs der got vil toube

Wart da zeinem stoube

Im was sin meisten do komen

50

Und vf siner schanden fromen

Ez was vor got verfluochit

Frevillichem heime gesuochit

Vnd lasterlich zerstuckit

Sin hofart nider gedruckit

55

Im was sin kallen gesweiget

Sin rehter voget erzeiget

224c,57

Der im daz kischen buozte

Vnd in so herte gruozte

Daz was sin rehter vngewin

60

Diz sach div romsche mengin

Und wart doch lüzil bezzir

Vil scherpfer vnd vil wezzir

Wart der keiser vnde wirs

Fur war vnd gelovbint mirs

65

Daz wunder er so hohe wac

Daz sin herze do erschrac

Swie herte sin gemüete was

In svnde der verhertet adamas

Doch was sin groze swere

70

Daz div maget seldenbere

Gehohit was da vnder

Von dem merclichen wunder

Daz got offenlichen tet

Alda dur der megde bet

75

Ir lob vnd och ir ere breit

Mitten dur sin herze sneit

Sin froude was verhowen

Daz man der kivschen frowen

Ere sach vf tringen

80

Ir lob so hohe swingen

Als ein liehtis morgen rot

Daz der sunnen kvnft enbot

Wan alle creature

Enpfahit froden stiure

224d,85

Von der liehten svnnen hie

Div ie nach orden vf gie

Daz si doch nie tac verlie

Als sis von gote do enpfie

DIV EINLIFTE MARTER.

Sam waz mit glanzem lobe

90

Martinvn lob getrungen obe

Daz ez den keiser leides twanc

Do ez fur daz sine dranc

Sin frodenriches morgen

Gie zuo mit grozen sorgen

95

Sin lob gie an den abent

Dez im die lute gabint

Grozen spot vnde schinpf

Er waz dez volkis vngelinpf

Dez in sere betragte

100

Die maget er da fragte

In siner grozin swere

Wart zeus komen were

Sin got dez er hie enpflac

Mit dienste naht vnde tac

105

Unde menge wirde groz

Wan der was da rehte bloz

Worden zeiner äschin

Sin hofart da geweschin

Div maget so hohir geburte

110

Dem keiser dez antwurte

Zeus vf den dv dich last

Den dv zeinem gotte hast

225,1

Dez argen valschiv zvnge

Hat gegebin rechenunge

An dirre selbin friste

Minem herren ihesu criste

5

Uon dem valschen got appollen

Der sin ere gab zezollen

Vnd div valsche guttinne

Div sich och der gewinne

Nieman geruomen darf

10

Ir sünde si da niderwarf

Wie die wurden geschendet

Ir selden gar gepfendet

Dez wart zeus gefraget

Uon criste vmbe traget

15

Do seite er niht die warheit

Div im was och ie verseit

Wan er was aller luge

Uol vnde valschir truge

Do gab er in vf vngewin

20

Den helleschen engiln hin

Die hant in gar zerbrochen

Vnd got an im gerochen

Als an appollen vnd artemiden

Den wart daz selben och gegen

25

Und an den wirt bereitet

Der in vnlange beitet

Siv müezen balde gelten

In wirt geborget selten

225b,29

Ir werk aller rede ergebin

30

Eweclich zepfande strebin

Alsam soltu din riche

Nv verenden lasterliche

Daz dv dir selbin hast erkorn

Vf iemir eweclichen zorn

35

Ich muoz iv machen kvndic

Wie die gotte sundic

Uon erst wurden funden

Hie vor in alten stunden

Wie der sitte ane vienc

40

Der so stark für sich gienc

Ez was in alten ziten sus

Ein kvnic geheizin Belus

Der starb als vns noch der sitte

Gewonlichen volget mitte

45

Der einen liebin svn liez

Ninus der selbe hiez

Dem nach dem vatter wart so we

Daz er wende vnde schre

Uon grozir liebi sachen

50

Hiez er mit flize machen

Ein bilde nach sinem vatter

So groze liebi hatter

So sin herze iht betwanc

Leides so was ie sin ganc

55

Hin zvo dez vatters bilde

Da wart sin swere milde

225c,57

Sin herze sa begunde iehin

Daz er den vatter hatte gesehin

Uon dem bilde enpfie er trost

60

Daz er leides wart erlost

Der sitte wahsen began

Daz beidiv frowen vnde man

Dez selbin sittes pflagen

Gein frunden vnde magen

65

So in die sturbin

Die mit im lieblich wurben

Daz sie den bilde machten

Hie mitte siv verswachten

Der rehten nature minne

70

Die bescheidenheit der sinne

Swer einen list da erdahte

Und den da fur brahte

Der was dez listes got genant

Wan er in von erste vant

75

Svz gie der sitte alumbe

Biz daz lute so tumbe

Sich da mit verworhten

Daz siv got niht vorhten

Do der tievel daz ersach

80

Daz die lute also swach

Waren do fuor er sa

In die bilde hie vnd da

Und gab och antwurte vil

Dar vz den luten lange zil

225d,85

Vnd wart ir gar gewaltic

Wan daz liute was einvaltic

Und waren der rede fro

Die vz bilden hullen do

Vnd wanden alle sunder spot

90

Ieglich bilde were ein got

Da von ir och so vil was

Der armen gotte helfe laz

Der wart so vil zerstorit

Als ir wol hant gehorit

95

Uon der megde kinde

Vnd von sinem gesinde

Sine botten lobsamen

Die mit sinem hohen namen

Div abgot zerstorten

100

Swa den die tievil horten

Die muosen an allis sumen

Die abgot balde rumen

Swelher stunde alle frist

Der suze name ihesus crist

105

Uon den sinen genemet wart

Da wart der tievil verschart

Sin gewalt vnd sin craft

Vnd elliv sin meisterschaft

Sam tet och disiv maget

110

Von der ich vil han gesaget

Martina gottes dirne

Von tugenden was si virne

226,1

Wan si driv abgot valte

Und storte si mit gewalte

Appollen artemiden vnd zeum

Den wart ir selden drvm

5

Von der maget abgehowen

Daz muoze der keiser schowen

Da von so wart er beide

Mit zorne vnd mit leide

Also gar vaste bedruckit

10

Daz dem armen wart gezvckit

Swaz er frovden solde haben

Div wart in leide begraben

Sin herze was besovfet

Und anderest getovfet

15

In vngezalten sorgen

In den er muose worgen

Sin frovde begunde sorgen

Svften vnd langes worgen

Was siner kvrzwile gelt

20

Swaz im frovden ie div welt

Mit ir losem valsche bot

Daz wart mit iamers lot

So volleclichen widerwegen

Im wart der welte abent segen

25

In der sünden naht gebotten

Uon sinen valschen abgotten

Mit den ez was verteilit

Mit dem fluoche geseilit

226b,29

Vnd mit der svnden brittel

30

Siner selden wart ein tittel

Geschriben vnd ein ende

Mit der gotlichen hende

Der veige hatte verruochit

Swaz er ie versuochit

35

An der megde hatte hie

Daz ez allis wider gie

Mit schaden ie zeleste

Zvo sines herzen veste

Im waren fromde geste

40

Under tugenden die beste

Der keiser hiez von zorne

Die maget hoh geborne

Fur die stat füeren

Den endes strit rüeren

45

Ir kivschin lip den erlovpten

Hiez er alda enthovbten

Mit einem scharpfen swerte

Dez och div reine gerte

Wan div vil kivsche guote

50

Mit herzin vnd mit muote

Sich frowen da begunden

Der seldenrichen stunden

Daz si solde keren

Mit hohis siges eren

55

Uon dirre welte prisvn

Zvo ir gemehel gottes svn

226c,57

Daz si och frolichin tet

Und sprach zegot ir gebet

Herre got ich sage dir

60

Genade mit ganzer gir

Mit steter truwe volleist

Vatter svn heilic geist

Dv der da gevestet hat

Mit vnzallicher genaden rat

65

Der heiligen kore dort

In diner hohen himel hort

Daz si niht mvn gevallen me

Als siv wilent taten e

Do der tievil Lvcifer

70

Mit der hoferte ger

Wolde gotte gelichen

Do muoze er entwichen

Als ir wol hant vernomen

Niemer sol er wider komen

75

Ich lobe den namen grozen

Dem nemen kan genozen

Der vorteclichen hillet

Wan er der sunder villet

Darzvo frolich wan er git

80

Den guten frovde elliv zit

Den dv hast erzovget

Genedeclichen vnd erovget

Den dich an bettent

Vz dinem willen niht entrettent

226d,85

Vnder den vient vngenemen

Tvnklen vnde wider zemen

Gewalteclichen hast veriaget

Dine hulde im veriaget

Sine menicvalten vntriuwe

90

Sine meintat gen vns nivwe

Die er steteclichen tihtet

Hastu herre gar vernihtet

Och hat der gediende haz

Div verfluochten truge vaz

95

Gemachet zvo einem stovbe

Der abgotte vil tovbe

Und mich die dirnen dine

Mit dem vz erwelten schine

Dines gelovbin hie erliuhtet

100

Mit diner genade mich erfiuhtet

Dv herre der och geruohte

Daz er sinen kneht versuohte

Jobin mit dem argen tivel

Den dv an allen zwifel

105

Funde getriuwen vnd reht

Als einen gedultigen kneht

Dez din munt vrkvnde gab

Siner vollekomener gedulde vrhab

Dv scheppfer aller dinge

110

Und ane misselinge

Der mit genedeclicher pfliht

Tobiam pfante der gesiht

227,1

Da mitte dv in woltest

Uersuochin als dv soltest

Vnd dur die zvoversiht so groz

Die er zvo dir hatte so bloz

5

Wart im sin lieht hie wider

Daz er gesach schone sider

Liehter himelscher karfunkil

Der die vinster also tunkil

Da mit div welt was bedaht

10

Gar an gesiht vnd aller maht

Mit dinem liehte erluhtit hast

Daz dv vns armen schowen last

Daz was der edil sigstein

Der von der megde wamme schein

15

Der allen fluoch hinder stiez

Den vns adames val liez

Dv himel scheppfer werde

Der dv dinc div von der erde

Waren komen verswachtost

20

Und wider ze erde machtost

Daz waren die hoferten

Die sich diner genaden werten

Die wurden wider och zeniute

Nach der warheit zetiute

25

Vnd och div himelschen dinc

Dv da von hatten vrsprinc

Hieze in himilriche wesen

Daz waren die vz erlesen

227b,29

Die dich fur dise welt

30

Minten vnd ir crankis gelt

Dv herre meister vnd iunger

Dvr vns litte grozen hunger

Und dur vns herre harter

Enpfie so groze marter

35

Vnd an dem cruce ersturbe

In der helle du erwurbe

Die din hatten hie gebitten

Mit vil demuoten sitten

Din scharpfer tot vil bitter

40

Loste vns von todis zitter

Und machte vns vntœdemic

Vnde gab vns steten sic

Dur disiv vnde andriv wunder

So bitte ich dich besunder

45

Daz dv mich ruochest helfen

Uon al den helle welfen

Vnd daz ich werde gezellet

Zvo den die hie erwellet

Hat din vmbefunden guote

50

In diner hohen wisheit fluote

Div allen sinnen ist vngrundic

Dir sint elliv herzen kvndic

Dez la mich nv geniezin

Geruoche mir entsliezin

55

Diner lebinden froden arke

Uon ivda der lovwe starke

227c,57

Der vns sunder erkichte

Uon dez lebinden todis geschihte

Mit siner luten sigestimme

60

Vnd in dez todis grimme

Den er mit sinem tode sluoc

Den aller menschen kvnne truoc

Uil suzir zarter ihesu criste

Dez helfe ich nie vermiste

65

Dez helfe mich erloset hat

Von menger hande vbiltat

Die mine viende dicke

Mit menger svnden stricke

Miner sele hant gespreitet

70

Die si verwiset vnd verleitet

Uon dir herre solten han

Daz hastu vatter wider tan

Geweres lieht der warheit

Daz aller warheit lieht treit

75

Din lieht die valschen pinet

Din lieht die guoten finet

Din lieht die welt richet

Swer von dir herre entwichit

Der ist allis liehtis ane

80

Und muoz och gan noch wane

Vnd struchen in die gruobe

Zvo den argen helle buoben

Jhesu crist behalte mich

Wan ich gedinge gar an dich

227d,85

Der welte richeit dich versmahet

Din craft nieman dich enpfahet

Wan der mit rehter demuot

Suchit die helfe guot

Dv wigest harte cleine

90

Die fursten algemeine

Der herzin hie so hohe stant

Und in gewaltes troste gant

Din gewalt si iemer widert

Demuot hofart hat genidert

95

Elliv hofart ist gelogen

Ir schuoler mit ir betrogen

Si sint bede gar verkeret

Der da lernet vnd der da leret

Hohiv demuot den demuotigen

100

Het din demuot niht verzigen

Geweriu demuot niht versmahe

Min gebet vnd enpfahe

Minen geist in dinen schirn

Wan dv selbe gebe mirn

105

Nv la dir herre och gezemen

Daz dv inruches wider nemen

Gip och alexander dem keiser

Den erborner helle reiser

Als er an diner dirnen hie

110

Uerschuldet hat div weist wol wie

Sin hertes vngelovbic herze

Der verlornen ruowe smerze

228,1

Muoze iemer mere letzin

Vnde vffen kvmber wetzin

Sinen stein herten geisten

Als dv herre vil wol weist

5

Geruche herten furbaz

Als den vil herten adamas

Daz die heiden hie so wilde

An im nemen ein bilde

Die dinen gotlichen gewalt

10

Hant versmahet menicvalt

Den siv doch sahin wundern

Und mich och von in svndern

Mit menger hande zeichen

Div doch niht erweichen

15

Kvnden ir herzin flinse

Mit rehtes gelovbin zinse

Der megde rede niht geschach

Dur keines fluochis vngemach

Noch in dekeinem zorne

20

Gein dem keiser hoh geborne

Wan daz div süeze maget

Im hatte vor gewisaget

Waz gottis geriht solde

Tvon ob er niht wolde

25

Wenden sinen gelovbin

Uon dem abgotten tovbin

Swer dez gelovbin hie enbirt

Vnde dem der tovf niht wirt

228b,29

Der ist der helle iemer eigen

30

Daz horte er dicke zeigen

Die maget daz was sin spot

Da von so bat si got

Daz er mit im tete

Als er verschuldit hete

35

Mit ir gebette si ruorte

Daz got daz volle fuorte

Daz er zerehte solde tvon

Wan alexander die svon

Hatte wider got gebrochin

40

Daz het daz reht gerochin

Wan er wolde niht genesen

Der helle iemir eigen wesen

Diz bat si vollefüeren crist

Der aller dinge rihter ist

45

An dem milde niht gebrist

Swer si suochit in dirre frist

Noch bat si furbaz mere

Crist dur siner marter ere

Daz er enpfie ir marter

50

So hie ir lip vil zarter

Dur in hatte enpfangen

Und swaz alhie begangen

An ir kivschen libe were

Daz vas ern seldebere

55

Vnd ein wirdic opfir

Were vnd ane koppfir

228c,57

Wan nieman mac gereht sin

Uor dem rehten antlüte din

Dv wellest in danne meinen

60

Selbe vnd och reinen

Kvnic aller kvnicriche

La mich genedecliche

Zvo dir von hinnan scheiden

Vnd la mich niht verleiden

65

Mine menicvalten sunde

Die ich mit riuwe kvnde

Hilf mir von disem ellende

In dine milten süezen hende

Inpfilhe ich mine sele

70

Dir loser mit vns got emanuele

In ganzis gelobin volleist

Dir vater sun vnd trost geist

Mit diner warheit amen

Und sprach zvo den die kamen

75

Mit ir dar doch vffen schaden

Vnd dez libes li entladen

Tvont daz iv gebotten si

Sprach div maget sorgen fri

Wan si hatte sich bewart

80

Wol vf dez libes hinvart

Ez mohte niht wesen anders

Nach willen keisers alexanders

Als sin zorn hatte erlovbit

Wart sante Martina berovbit

228d,85

Ir hovbtes mit einem swerte

Dez si von herzin och gerte

Daz si erloset wurde

Uon dirre welte burde

Vnd fuor als ich iv sagen wil

90

So mir nv kvmit daz zil

Horint wie ez alda ergie

Do ir lip den tot enpfie

Und ir sele daz lebin

Dem niemer ende wirt gegebin

95

Von himel ein stimme floz

Svoze minnecliche groz

Die der himel weibil ruofte

Der ie die warheit prvofte

Mit der martina wart geladet

100

Zvo der himel wirde gepfadet

Der gast were vngeneme

Uon warheit widerzeme

Den der milde wirt suz luode

Were er ioch niht muode

105

Er keme in liehten veste

Er pfliget so wol der geste

Zeguote ez im niht gedige

Der solher bette im verzige

Er duhte mich ein rehter tore

110

Butte er im niht sin ore

Nv ladet er vns alle zit

Und sine botten enwiderstrit

229,1

Vnd siht man vns doch fliehin

Sin herberge vnde schiehin

Und smehelich gebaren

Gen der herberge so claren

5

Dirre milde wirt dem gaste

Dem himel ruofte so vaste

Martina martir vnde maget

Div so rehte vnverzaget

Dur minen namen het gestritten

10

Mit so manlichen sitten

Kvm her zvo miner wirtschaft

Div in miner magencraft

Minen erwelten ist bereitet

Div din liebu tohter beitet

15

Kvm her gemahel vnde brvt

Kvm her vzerweltes trut

Kvm her min turtel tube

Ich bin der minne trube

Und wil dir gebin spise

20

In dem himelschen paradise

Vnd da nemen dinen solt

Da dv dich iemer frowen solt

Ei dinen altvattern schone

Mit iemer wernder crone

25

Do disiu stimme ende nam

Div von himelriche kam

Da geschach da sunderlich

Ein zeichen harte wunderlich

229b,29

Da mitte gotte erzeigte

30

Wie ir tot die alle veigte

Die dar an hatten schulde

Daz den gottes hulde

Wart mit rehte verseit

Dvr zweiger hande schulde breit

35

Div eine siv waren heiden

Mit reht von got gescheiden

Div ander der megde tot

Den ir swert ir libe bot

Den si doch nie verschulte

40

Und si vnschuldic dulte

Der schurpfer endis tac

Den in da ir schulde wac

Wan siv vielin tot nider

Unde lobten doch sider

45

Mit dem lebinden tode

In dem grundelosen helle sode

Vnd wart alsus errochin

Martina als ich han gesprochen

Nv daz ergangen was alsus

50

Do kam der babest ricorius

Der hohe romsche bischof

Mit im der pfafliche hof

Und swaz pfaffen namen truoc

Der was da vil vnd genuoc

55

Vnd namen da den lichamen

Der da in gotis namen

229c,57

Mit dem tode was versnitten

Den truogen siv mit sitten

Mit lobe vnd mil sange

60

Mit menges engils clange

Die loblichem suozim sungen

Dem todem libe iungen

Dez si och lebinde pflagen

Uor allen svntlichen lagen

65

Dem waren siv nv abir bi

Die hohin engel sunden fri

Si was gewesin ir swestir

Mit kivschir forme vestir

Ein maget ein engel ein frovwe

70

Rose in himelschim tovwe

Si hielt engelschin orden

Vnd was ein engel worden

An libe vnd och an muote

Da von ir billichen huote

75

Ir brvoderlicher convent

Die si zvo einer swester hent

Nv maget swester engel brvoder

Mit solher tugende luoder

Der kvschen lilien ein stengel

80

Da von ir die hohin engel

Pflagen mit ganzim flize

Dez kivschin libes lilien wize

Div tugenderichiv tote martina

Wart von dem babste alda

229d,85

Und von aller der pfafheit

Mit sange wirdeclich geleit

Zerome an ein solhe stat

Div intiuschen niht namen hat

Doch was ez ein schoner garte

90

Dar in div reine zarte

Bestattet in gottis namen

Mit ir kvschin lichamen

Der flecke ist da wol erkant

Der wunderlich garte genant

95

Und was wol nach prise

Schone als ein paradise

Svz wart der lip bestattet

Div sele zehimel gesattet

Nach allir ir begirde

100

Vnzallicher frode mit wirde

Als ich harnach berihte

Ir grozin frode mit getihte

Wan diz was ein nihte

Wie si dort got erkichte

105

Nach der megde hin vart

Der keiser och gerihtet wart

Uon dem rehten rihtere

Daz reht was im zeswere

Wan an dem selbin tage

110

Alexander mit grozer clage

Wart verwendet an dem herzin

Mit vngezalten grozen smerzin

230,1

Wan er da sa zestunt

Reht als ein tobender hunt

Mit vnsinne gar besezzin

Begunde der veige ezzin

5

Sin selbis fleisch mit geluste

In vil tobender akvste

Svz lac der hunt wuotende

Unsinnic vnd bluotende

Vnd az da sich selbe

10

Uon vntugenden der schelbe

Von sunden gar entschickit

Und meintat vnderspickit

Suz lac der hunt vnd kovwe

Sin bluotic fleisch also rovwe

15

Doch wart ez wol gebraten

Die ez mit willen taten

Daz waren die er ie erte

Und och sin herze kerte

An si mit ganzir liebe

20

Die verfluochten helle diebe

Die er mit dienste meinde

Als er och wol bescheinde

Die bitten sin zemale

Vf iemer wernde quale

25

Diz was ein vor gewerbe

E daz er in sin erbe

Der rehten helle keme

Und da nach schulden neme

230b,29

Sinen eweclichen steten lon

30

Disiv marter als ein bon

Was gen genem kvmber

Doch so leit er hie vil tumber

Uil vngefuoge swere wize

Wan er az mit flize

35

Sin fleisch vnd och mit willen

In kvnde nieman gestillen

Wan er was ane gebende

Und kowe sin selbis hende

Reht als ein hunt ein bein

40

Von svnden was er vnrein

Die verzwivelunge er trouc

Da von er sich selben nuoc

Wan sin herze was so bitter

Mit suften vnd mit zitter

45

Er vil liute wuofte

Uerzwivillich er ruofte

Herre herre der cristen got

Ich weiz daz ich din gebot

Han vil gewaltecliche

50

Vbir gangen vnd frevilliche

Unde och ze menger frist

Gewalteclich ihesu crist

Gedurehtit dinen namen

Vientlichen ane schamen

55

Und geswechit swa ich kvnde

Mit werken vnd mit munde

230c,57

Gevalschit vnd gespottet sin

Darzvo die reinen dirnen din

Ane schulde hie geseret

60

Offenlichen vnd enteret

Martinam die ich schante

Und och ir libes pfante

Ald swaz darzvo tohte

Da mit ich si mohte

65

An libe an guote swachin

Ir ere minder machin

Dez hatte ich grozen fliz

Nv hatte din gewaltic riz

Vil ebin vnd vil slehte

70

Gelonit mir nach rehte

Als ich hie verschuldit han

Dv hest reht mir getan

Alsvz veriach sin zvnge

Doch in verzwivelunge

75

Da von och der svnden fraz

Enpfie dekeinen applaz

Sich selbin er anruorte

Sinen lip er gar zerfuorte

Und zarte har vnde hut

80

Div im e wan gewesen trut

Div wurden do zerbrochin

Martina da gerochin

An keiser alexander

Sine svnde erkander

230d,85

In sinen svnden erstarb er

Unde fuor als er erwarb

Im hatte diu maget

Martina gewisaget

Daz er schantlich verdurbe

90

Vnd in sinen svnden sturbe

Uon himel kam ein stimme

Div im alleine grimme

Vnd och vorhteclichen hal

Div kvnte siner froden val

95

Uar hin alexander keiser

Verfluochter helle reiser

In der helle eitoven

In dez herzen fiures schroven

In die steten vinster dicke

100

Und die eweclichen stricke

Zvo den dv iemer bist geborn

Din svndic lebin hie erkorn

Vnd kamen groze ertbiben

Die eine wile da beliben

105

Da von daz volk sere erschrac

Div wunder man hohe wac

Uon der luten stimme doz

Kan dem volke vorhte groz

Div ir herzin do erschrachte

110

Vnd si zegotte wachte

Die ir alten gelovbin

Erkanden flach vnd tovbin

231,1

Und wurden von dem wunder

Gen gotte so munder

Daz siv bezerunge gehiezin

Criste vnde liezin

5

Ir blinden alten blintheit

Die ich dicke han geseit

Die leite vil liute da nider

Vnde kerte och sa wider

Dez selbin tages mit rehter zal

10

Uz rome der stat vbir al

Zwei tusent vnd driv hvndert

Swer sich nv dez wundert

Der pfliget steter sinne

Wan dur die gottis minne

15

Ist ez harte mugelich

Daz man die welt trugelich

Lazin sit man si lazen muoz

Uil svre wirt ir endes gruoz

Siv liezin doch vil vngeliche

20

Martina div tugenderiche

Vnd alexander der heiden

Wan der was hin gescheiden

Zvo der helle crufte

Bi dem herten lufte

25

Da wart er enpfangen

Uf steten kvmber langen

Da sol er och iemer leben

Fiur vnd lieht het er vergeben

231b,29

Bi dem selben todis toppel

30

Mit mengem helle turkoppel

Da sol er daz toppel spil

Iemer triben ane zil

Daz er die alten frovde smelze

Kürsin vnde fuhzbelze

35

Ist im da dekein not

Die man im hie dicke bot

Im ist vberic da heiz

Er switzit da den tot sweiz

Dez wirt im da niemer buoz

40

Er het dez leiden tievils gruoz

An der megde hie erworben

Lip vnd sele erstorben

In dez tievils gebende

In die brinnenden brende

45

Da in vnselde schende

Hie mitte si ein ende

Reht nach dez buochis sage

Wart nach dem ahtoden tage

Als sante Martina hie

50

Ir iungsten marter enpfie

Claudius ze keiser gesat

An keiser alexanders stat

Wan der het vil vermessen

Daz helle rich nv bessen

55

Da wider enpfie do schone

Claudius die romschen crone

231c,57

Mit vil gemeinen rate

Uon dem romschen senate

Sante Martinvn marter

60

Der kivschin megde zarter

Wart hie volle füeret

Als ich vor han gerüeret

In dem manode ianuario

Daz ist mit warheit also

65

So der hohe tac gelit

Und div seldenrichiv zit

Daz nach menschen sitten

Jhesus crist wart gesnitten

Vnd die alten e erfulde

70

Fur vnsir vnkivschen schulde

Goz er do sin erstes bluot

Da von ist heilic vnde guot

Der tac vnd och geheret

Daz vns div schrift leret

75

An dem ist mit bescheidenheit

Sante Martinvn tac geleit

Der tac ist mit hoher kür

Dez iares anevanc vnd ein tür

Mit dem man vil offenbar

80

Gat in daz kvnftic iar

Dez sich die liute geilsent

Und och ein ander heilsent

Mit gabe menger hande

Hie vnd in mengen lande

231d,85

Siv wunschent heilis enwiderstrit

Ein ander och dez tages zit

Und swenn niht geheilset wirt

Den dunkit er si gar verirt

An dez iares ane vanc

90

Dur dez kvnftigen iares ganc

Svz wonet der gemeine sitte

Kinden unde liuten mitte

Dirre frodericher tac

Die nieman volle loben mac

95

Der sante Martinvn ist benant

Ist wol der cristenheit erkant

An dem ir reiner lip erstarb

Und er ewig lebin erwarb

Er was ir marter ende

100

Von disem armen ellende

Und vie ein iar mit frovden an

Daz sit nie ende gewan

Noch niemer ende genimet

Als ir von rehte gezimet

105

Da dv naht ist veriaget

Da frode in wunne taget

Da dv svnne niht vnder gat

Div himel vnd erde erliuhtet hat

Ir wart eines tages gegeben

110

Dez libes tot der sele lebin

Der selbe tac git offenbare

Ende vnd anevanc dem iare

232,1

Swer nv gelucke welle nahen

Und ein selic iar enpfahen

Darzvo aller selden teil

Libes vnd der sele heil

5

Der ere als ich iv sage

Sante Martinun an dem tage

Mit gebette vnd mit almuosen

Daz sol er in dem buosen

Den armen geben vnd ir schoz

10

So machet si in svnden bloz

Und git im ein selic zit

Daz im daz iar alles lit

In selden vnd geluckis gunst

Der tac ende vnd vfrunst

15

Sol er mit heile flizen

Fri vor swachen itwizen

Wan sante Martina div reine

Mit grozir marter niht cleine

Die rehten heinmuot enpfie

20

Diz arme ellende si lie

Wan dirre selbe tac

Ir so groze selde wac

Er was ir kvmbers aner

Und steter froden anevanc

25

Als ist er och iar

Ende vnd anevanc fur war

Svz han ich iv bewiset

Vmbe den tac wol gepriset

232b,29

Der von sant Martinvn riset

30

Und vns mit heile spiset

Wie Martina div magt zart

Zehimilrich enpfangen wart

Dez kan ich leider niht gesagen

Min kvnst muoz dez verzagen

35

Doch bin ich guotes milte

Keiner arbeit mich bevilte

Wan ich dinge vf ir trost

Der mich dicke hat erlost

Wan kvnstehalbe were ich tovbe

40

Ich sage als ich wol gelovbe

Wie si enpfangen wurde

Und wie ir kvmbers burde

Von ir gemahel wart geringet

Crist an den si hat gedinget

45

Wan dez himels ingesinde

Mit der werden megde kinde

Wolde sich da gar erwegen

Und kamen minneclich engegen

Mit dem svozin himel wirte

50

Der sin geste nie verirte

Swen der hohe wirt eret

Dem wirt och billich gemeret

Frode von dem gesinde sin

Daz wart och da wol schin

55

Mit gruoze siv do bekamen

Mit mengem ediln samen

232c,57

Sante martinun der maget

Der gottes stimme vnverzaget

An ir ende frolich ruofte

60

Als ich da vor och prvofte

Der vil edil himel frie

Mit aller siner massenie

Gab der megde sinen gruoz

Der tet ir aller swere buoz

65

Den ir lip hatte erlitten

Swie vil er was versnitten

Dez wart da gar vergezzin

Frode wart ir vber mezzin

Uon der kvneginne von himel

70

Diu von keiner svnden schimel

Vf erde mazen hie enpfie

Ir svnder zvht an ir begie

Gottis vnd der svnder muoter

Crist ir svn vil guoter

75

Was ir kint vnd ir vatter

Sin richis vatter erbe hatter

Mit ir gar vngeteilet

Ir trost den svnder heilet

Aller slahte svnden wunden

80

Alle svnde niht enkvnden

Ir hohen güete vber wegen

Der mit ruwe wirt gepflegen

Div bot eine gebluomten crone

Sante Martinvn da zelone

232d,85

Ein schone bluogendes himel ris

Dvr den megtlichen pris

Lilien wis vnd rosen rot

Svz was vergolten ir bitter tot

Die ere nieman kan erziln

90

Die cristes muoter ir gespiln

Sante Martinun hat erzeiget

Uber menschen sin es reiget

Darnach die gotes botten

Als div minne het gebotten

95

Vil lieblichen zvo drvngen

Ez mohten alle zvngen

Die ere niht geruomen

Noch volleclich gebluomen

Die siv der rnegde butten

100

Div vz der welte sünden sutten

Was mit zwenzic marter komen

Als ir vor hant wol vernomen

Si wart also enpfangen

Daz siv niemer dar belangen

105

Zvo der welte frovde wider

Zvo vns armen her nider

Darnach der megde schar

Kamen zvo gedrvngen gar

Ir trut gespiln alle

110

Mit sange vnd frovden schalle

Wunneclichen gar geschœnet

Mit zwivalter crone gekrœnet

233,1

Div da heizit aureola

Da mitte was Martina

Gekronit schone svnderliche

Div crone ist lobeliche

5

Mit zwivaltem glanze

Zvo dem liehten kranze

Sint die megde gewihet

Die crone man niht verzihet

Der reinen megde presse

10

Den wirt mit vollem messe

Ir kvschi alda vergolten

Die si alhie beholten

Mit kvmberlichem striten

Wan si an allen siten

15

Bestanden wan mit flize

Mit menger herten itwize

Uor vnd hinnan vnde neben

Siv hielten engelschliches leben

Wider dez fleischis nature

20

Ein vngetruwer nach gebure

Ist daz fleisch der sele gar

Dez wir dicke werden gewar

Daz hant die megde vber fohten

Dez ist aureola geflohten

25

Schon vf ir kvschis hovbet

Div crone nieman ist erlovbet

Wan megden vnd der bihter her

Die den tievil bestunden mit wer

233b,29

Darzvo den marteren guot

30

Die hie guzzin ir turis bluot

Den drin wirt div crone wert

Als ir marter hie gegert

Alsus die megde here

Vil vngezalter hoher ere

35

Butten mit grozem gruoze

Martinvn ir gespiln so suoze

Darnach kamen die marterere

Die an menger swere

Hant genomen signunfte

40

Die ilten zvo der lieben kvnfte

Martinvn der megde hoh

Div mit in manlich zoh

In dem ioch der marter

Daz truoc ir lip so zarter

45

Gar vntz an daz ende

An alle missewende

Der butten ir schar genoze

Wirde vnd ere so groze

Die nieman kvnde erzellen

50

Wan siv waren ir kampf gesellen

Und trugen sament cristes schilt

Da vnder halten siv gespilt

Mit ernste dez todis spil

Gar vntz an dez lebins zil

55

Siv hiezin von rehte ir brvoder

Wan ir zarten libes muoder

233c,57

Waren och dur crist verschroten

Und mit ir bluote rosen roten

Nach criste ir wat geverwet

60

Ir kivschir lip dur in gegerwet

Mit vngezalten grozen streichen

Gedulteclich ane smeichen

Si hiez och wol ir swester

Wan ir muot^[1] so rehte vester

65

Truoc mit in cristes wafen

Gelicher wis den schafen

---

1. korrigiert, im Druck mnot

Mit gedult siv sturben

Aureolam si samt erwurben

Mit menger herten svren reise

70

In dirre welte wilden freise

Martina himelschiv tocke

Cristes rotten wapen rocke

Uon rehte billichen treit

Mit cristes martereren cleit

75

Die butten ir eren vngezalt

Me danne lovbis habe der walt

Darnach mit froden craft

Der bihter rehte geselleschaft

Gen Martinvn begunden zogen

80

Mit ganzer liebi vmbetrogen

Vnd enpfiengen ir swester do

Mit vngezalten eren ho

Wan Martina div maget fin

Was och ein rein predierin

233d,85

Gottis wort si willeclichen lerte

Zvo dem gelovbin si kerte

Harte vil der tumben heiden

Ze grozen frovden von leiden

Und kvnte den reinen tovf

90

Vmbe dez himilriches kovf

Und an einen got gelovbin

Lazen div abgot vil tovbin

Gvter lere si nie verdroz

Da von was si ir werc genoz

95

Vnd trugen der predige ampt

Mit ein ander alle sampt

Da von die bihter so guote

Mit minneclichen muote

Enpfiengen sant Martinvn wol

100

Als ein brvoder sin swester sol

Gemeinlichen siv do truogen

Als wir da vor gewuogen

Die liehten crone vil tiuren

Avreolam die vil gehiuren

105

Dez sint siv fro von schulden

Daz siv sint in gotis hulden

Vnd sin gebot erfulden

Mit dem gelovben vbergulden

VON DER EDELEN KRONE AUREOLA

Avreola der vil tiure kranz

110

Uon liehtem himel golde glanz

Wie der ist von svnder rehte

Daz horent gotis dirnen vnd knehte

234,1

Aureola ist svnderlich

Ein geistlich frovde wunderlich

Der trost dem gemuote git

Iemer me an endis zit

5

Vnd kvnt von svnder werken grozen

Die hie nieman mac genozen

Div man mit stetem sinne

Hie tuot dur gotis minne

Daz svnt ir abir wissen

10

Nach der warheit geflissen

Als ein ieglich mensche dort

Sich horit in dez himels hort

Der gemeinen crone die ez hat

Hie erworben mit guoter tat

15

Uon der frovden vber fluz

Enpfahit der lip gezierde suz

Div muote vnd och herzin

Git frode an allen smerzin

Gelicher wis von aureola

20

Kvnt svnder frode och alda

Div ander frovde vbir fluzit

Vnd frode mit frovden beguzit

Da von wirt dv frovde schin

Svnderbar an dem libe fin

25

Der wirt da von erglestet

Und svnderlichen da gegestet

Doch wizzent zallen stunden

Daz div mal der wunden

234b,29

So hie gottes marterere

30

Enpfiengen mit grozer swere

Willeclich dur ihesum crist

In ein svnder gezierde ist

Und da mit gegestit sint

Vor der reinen megde kint

35

Div wunden mal mvn doch niht

Heizen aureola so man giht

Wan der marterere ist doch vil

Die doch hie ir lebins zil

Ane wunden hant genomen

40

Mit swerer marter vollekomen

Die hie von hunger sturben

Und in kerkeren verdurben

In wazzir vil ertrenkit

Vnd ane wunden verkrenkit

45

Die doch tragent zelone

Aureolam die svnder crone

Drier hande liuten wirt gegeben

Umbe ir svnder hohes leben

Aureola div crone cluoc

50

Dvr ir svnder tugende fuoc

Dvr etwie menge sache

Die ich iv kvnt mache

Die ersten sache ist tiute

Ez vbint drier hande liute

55

Hie die aller hohsten tugent

Mit gotis helfe vnde mugent

231c,57

Wan ez ist daz hohste werc

Mit vestem muote ane geberc

Der gotis lere vnd warheit

60

Den luten prediget vnde seit

Mit vnverzagtem muote

In dez gelovbin huote

Der ander loblich wec

Und ein seldericher stec

65

Der magtlicher kvsche waltet

Vnd die begirlichen haltet

Gar svnder missewende

Unz vf dez libes ende

Daz dritte loblich dinc

70

Gar aller tugende vrsprinc

Vnd ist ein so hohe wirde

Der mit ganzir begirde

Die marter hie enpfahent

Willeclichen dar zvo gahent

75

Darzvo inrehten gelovbin

Und dez niht lan berovbin

Da von si iv allen kvnt

Mit der warheit alle stunt

Daz den predigeren gar

80

Und darzvo der megde schar

Vnd martereren vnverirt

Avreola div crone wirt

Och wissent ane twale

Daz zvo dem anderen male

234d,85

Disv crone wirt erkant

Die aureola ich han genant

Uon den vienden die wir mvn

Vberwinden vnd och svn

Daz ist der tievil vnd sin rat

90

Der vns vil geschaden hat

Der ander vient ist div welt

Und ir trugeliches gelt

Der dritte vient vnser lip

Ich meine man vnde wip

95

Mit den sin wir bestanden

Steteclich in allen landen

Uon der crone merkent baz

Zedem dritten male daz

Wie si noch baz erovget

100

Wirt vnd och gezouget

Ir hohen adel vnd ir kvnft

Uon drier hande signvnft

Der man mit kvmber pfliget

Doch mit gote an gesiget

105

Die vns och twingent harter

Mit drier hande marter

Div erste marter ist erkorn

Und von nature angeborn

Div ander marter div wir han

110

Div wirt vns hie angetan

Div dritte marter der wir pflegen

In frömedem herzin ist gelegen

235,1

Vnde tuot doch vil we

Uon der ersten merkent me

Div vns geborn ist

Die vbir windet hie div magt

5

Mit vestem muote vnverzagt

Als vns fürwar ist gesagt

Daz ist dez fleischis gelust

Vnd sine bœsen akvst

Daz wirt mit manlichen sitten

10

Uon den megden vberstritten

Div ander als ich han geseit

Div vns hie wirt angeleit

Div ist herte vnd bitter

Die vbir windent gotis ritter

15

Mit vnverzagten muote

Vnd mit ir rotem bluote

Daz die marterere hant gegozzen

In der minne vnverdrozzen

Div dritte marter div hie lit

20

In frömden elliv zit

Div wirt och vbir wunden

Alhie ze mengen stunden

Mit der bihter guoten rate

Beidiv frvo vnd och spate

25

Und mit guoten predigon

Die liute von svnden ledigon

Vnd von der helle gründen

Und von allen sünden

235b,29

Horint abir furbaz mere

30

Uon der richen crone here

Wie man si bescheiden sol

Zvo dem vierden male wol

Wie wir alhie gelichen

Dem svosen tugende richen

35

Nv vnd och zaller friste

Dem getruwen ihesu criste

Dem wir vf diser erden

Alsus gelich mvn werden

Mit aureola dem kranze

40

An liehtem svnder glanze

Wan crist der vil geherte

Die rehten warheit lerte

Und gab der welte vrkvnde

Gewerer vnd nivwer svnde

45

Vnd was ein marterere groz

Dar an wart nie sin genoz

Er enpfie mit gedulde

Den tot für vnser schulde

Er was och ane getiusche

50

Uil reine luter vnd kivsche

Ein magt ane svnden masen

Dez wir die warheit lazen

Zim fünften male vernement

Wie och altiu dinc gezement

55

Zerehter ebin maze

Div ich iv wissen laze

235c,57

Div got selbe machen hiez

Und vns zebin mazen liez

Div man bezeichenlichen also

60

Vindet in dem buoche exodo

Die ich iv wissen laze

In der rehten maze

Drv dinc hatten aureolam

Als do von gottes lere zam

65

Daz was der alter da der rovch

Mit der tymiane vnd wirovch

Gerovchet wart zegotes lobe

Dem stuont aureola do obe

In dem heren gotis tempel

70

Daz ist vns ein exempel

Und stunt vf der arke

Div betiute do vil starke

Sine steten friuntschaft

Vnd steter gedinge craft

75

Dez do ganze vrkvnde bot

Aronis rvote vnd daz himel brot

Die in der selben arke lagen

Und gotis gedinge pflagen

Och was aureola vf dem tische

80

Da div heiligen brot so frische

Vf lagen nach gotis gebot

Div im wurden do geopferot

Und was also da gemessen

Daz siv nieman getorste essen

235d,85

Wan die gotes ewarten

Die die heilikeit bewarten

Aureolam die ersten

Uf dem alter aller hersten

Div betiutet vns vil gewere

90

Aureolam die hohen marterere

Die do ir lip versmahten

Mit willen zopfer brahten

Vf dem alter der marter

In warer minne vngesparter

95

Div ander betiutet vns gemeine

Die aureolam der megde reine

Div och vf der arke lac

Dv der gotes gedinge pflac

Wan div was mit luterm golde

100

Als got selber hiez vnd wolde

Gemachet vz vnd inne

Also merkent in ivwirm sinne

Daz der vil luter magtvom

Und sin werdeclicher rvom

105

Der megde lip vnd gemuote

Zierten mit richer hoher bluote

So betutet vns och die dritte

Vf dem tische nach gotis sitte

Avreolam die prediere here

110

Die gotis wort vnd lere

Den luten selclichen sagent

Uon in menge svnde iagent

236,1

Als vf dem tische spise lit

Div lipnar den luten git

Sam wirt div cristenheit gespiset

Als div heilic schrif vns wiset

5

Daz niht der mensche mac geleben

Dez brotes so hie wirt gegeben

Svnder an allem gotes wort

Daz hie dicke wirt gehort

Da von wirt div svnder crone

10

Uon erst dem martereren zelone

Avreola div frovden riche

Wan die tragent vollekomenliche

Dez liplichen todis signunft

Unde hant sin scharpfen kvnft

15

Vnd sinen gewalt vberwunden

Mit mengen liplichen wunden

Die si doch niht enbunden

Ubir winden an keinen stunden

Der signunft volkomenheit

20

Von dem ich nv han geseit

Dez svnt ir vrkvnde han

An zwein dingen vnd verstan

Zemerst an der marter grozi

Und an ir scharpfen vngenozi

25

Wan vnder aller marter hie

Die man an dem lip enpfie

So het doch dez todes gebende

Beidiv anevanc vnd ende

236b,29

Wan der marter anevanc

30

Und ir bitter aneganc

Tvont dem libe michels wirs

Furwar nv gelovbint mirs

Der anevanc ist swerer vil

Danne si dez endis zil

35

Dez anevanges vorhte

le den grosten kvmber worhte

Da von ie der marter tot

Och lobelichen sich hie bot

Als ich iv da vor seite

40

Div ander sache der arbeite

So der marter signunft hat

Dar an ze merken wol stat

Dvr wen man och hie enpfahe

Die marter vnd zvo der gahe

45

So ist der marter sache crist

Der och dvr vns gemartert ist

Wan daz ist ane lovgen

Uor den gotlichen ovgen

Ist nieman ein marterere

50

Von marterlicher swere

Wan der mit reinem sinne

Si enpfahet dvr gotis minne

Wan menger wirt erhenkit

Und in wazzir gesenkit

55

Der het och verschuldet wol

Daz er also sterben sol

236c,57

Der anevanc was sin schulde

Die sin tot also erfulde

Der marter wirt gelonet niht

60

Wan div dur got niht geschiht

Der marter wille enpfahet lon

Und aureolam die cron

Wan als div warheit kündet

Ane willen nieman sündet

65

Guoter wille die sele heilet

Boser wille si gar verteilet

Div ander avreola sol gar

Werder och der megde schar

Dvr den svnderbæren strit

70

Den ir flec mit stete git

Gen den man ane biegen

Mvoz haben stetes criegen

Dem hant siv angesiget

Dez ir schar frolich pfliget

75

Avreola dez svnder cranzis

Gar vngezaltes eren glanzis

Swie doch mit vbilen ziten

Die reinen witwen striten

Gen dez fleischis argen ræten

80

Vnd sinen schalchaften tæten

Swie siv betwingen hie er lip

Doch so sint siv iemer wip

Da wider so behant mit wer

Der signunft der megde her

236d,85

Der einest vber wunden wirt

Der ist ganzis lobis gar verirt

Sin hohis lob wirt niemer weich

Der dem vient nie entweich

Wan sol in billich rvmen

90

Sin lob mit eren bluomen

Doch so wissent sicherliche

Daz aureola div frodenriche

Allein den megden wirt gegeben

Die also gefuorent hant ir leben

95

An muote vnd och an liben

So daz si stete wolden beliben

Kvsche reine megde iemer

Und criste daz gebrechen niemer

Swie doch von kvmbers burde

100

Etswenne der wille verkrenkit wurde

Wan do daz fleisch doch alleine

Beleip vmbe wollen vnd reine

Und der crankeit wider kamen

Vnd den reinen willen wider namen

105

Dar an och stete funden

Untz an dez todis stunden

Wan swie der wille was verschart

Wan do der lip funden wart

An dem ende wol behuot

110

Und reine lip vnde muot

Wat der magtvom dez herzen

Mac wol mit rvwe smerzen

237,1

Werden wider gemachet

Wirt abir der lip geswachet

Und daz fleisch mit vollen

Mit willem hie bewollen

5

Daz mac mit keinen dingen

Der mensche wider bringen

Ist abir etlichiu ein maget

Vnd dez muotes doch verzaget

Daz si niht iemer welle wesen

10

Crist ein maget vz erlesen

Und doch maget hinnan vert

Der wirt och endelich beschert

Ein groziv svnder frovde dort

Swie si den magtlichen hort

15

Doch ane willen hie behielt

Und stetes muotes niht enwielt

Doch dur dez libes reinekeit

So hat si svnder ere breit

Gelicher wis frowent sich div kint

20

Div dur got gemartert sint

Div herodes hiez tœten

Vnd wande crist nœten

Div frowent sich von minnen

Daz siv sint gevarn von hinnen

25

Unteilhaft aller svnde

Vnd daz in was vnkvnde

Dez fleischis schedelich gelust

Und dirre welte akvst

237b,29

Swie siv doch der svnde statten

30

Vf diser erde niht enhatten

Wan si der scharpfe tot vant

E daz in svnde wurde erkant

Und ist ir svnder frovde groz

Daz siv hie waren svnden bloz

35

Ez mac ein magt ir kivsche

Verliesin doch ane getiusche

Der ir magtuom volkomen

Ubir ir willen wirt benomen

Div het darumbe niht verkorn

40

Die crone aureolam noch verlorn

Wan ir daz svntlich vngemach

An ir wille gar geschach

Da von sprach sante Lvcie

Div maget svnden frie

45

Mit vnverzagtem muote also

Zvo dem rihter pascasio

Swie dv mich heizist villen

Vnd mich vbir minen willen

Mines magtuomes pfenden

50

So mahtu doch niht erwenden

Min lon werde gezwivaltet

Uon criste der sin waltet

Zvo der crone so er git

Mir vmbe disen kvrzin strit

55

Daz svnt ir niht da fur han

Vnd in dem sinne verstan

237c,57

Daz ir gezwivaltet wurde da

Div reine crone aureola

Svnder ir lon wart zwivalt

60

Ir magtuom den ersten galt

Div ander vmbe daz vnreht

Daz si dez argen tievils kneht

Hiez toden ane schulde

Daz die zwen lone erfulde

65

Doch wissent daz dez lonis

Wirt hundert valtic mit genvht

Der den megden wirt gewegen

Uon dem rehten himel degen

Da von daz an allen haz

70

Hie ir leben himelsche was

Doch wirt den witwen lones vil

Die reine belibent an ir zil

Die svn sich vbin merkent wie

An sehz wercken der erbermede hie

75

Uon den sehz werken wirt och schon

Den witwen sehzicvalter lon

So wirt och den e liuten

Als ich iv wil betiuten

Lon dez siv genuogen sol

80

Drizic valt wirt ir lonis zol

Wan in des och genuoget

Daz den cristen allen fuoget

Dez sol sich nieman lan berovben

Er sol vesteclich wol gelovben

237d,85

Den vatter svn heiligen geist

Bi drier benemede volleist

An anevanc ein got almehtic

Schepfer himel erde vil vmbetrehtic

Ein got ein scheppfer ein gewalt

90

Got loser mensche ivnc vnd alt

Uon dem gelovben der drivalt wirt

Den e liuten gar vnverirt

Drizicvaltic lon niht me

Den die rehte haltent die e

95

Als si het gesetzit got

Mit dem blvomen der zehen gebot

Dez wir alle schuldic sin

Wan der waren minne sin

Div aller tugende ist ein schrin

100

Und guter dinge ein fuogerin

Als ich vor gekvndet habe

Uon der frovden honec wabe

Ich meine avreolam die dritten

Div wirt nach rehten sitten

105

Den reinen gotes prediæren

Als ich iv allen wil bewæren

Den man vnzallich ere wiget

Wan si hant volleclich gesiget

An dem tievil mit strite

110

In disem kvrzen wankel zite

Und hant den tievil vnverzagt

Niht allein von in veriagt

238,1

Svnder och von menger diet

Die ir rat von gote schiet

Die ir lere wider brahte

Uon dez tievils swerer ahte

5

Vnd hant in och sicherliche

Getriben von sim eigen riche

Dez menschen herze ich meine

So daz der tievil vil vnreine

Gemachet so heizit ez wol sin

10

Wan got wil danne niht darin

Div also waren verswachet

Div hant vil reine gemachet

Die bihter mit suozir lere

Dez wirt aureola div here

15

Mit vollekomener vrteile

Deweder leitschaft zeheile

Wan sol och da für haben niht

Als etlicher meister giht

Daz aureola div crone fine

20

Mit svnder frovderichem schine

Niht wan den prelaten werde

Den hie vf diser erde

Muozlich zebredigon ist

Als ir wol horent alle frist

25

Svnder allen den daz ampt

Mvozlich ist vnd vnverschampt

Und die ez och von rehte

Svn üeben als gottes knehte

238b,29

Nieman von sines amptes wegen

30

Sol diser svnder crone pflegen

Wan der si och alsus ervihtet

Als ich hie han getihtet

Wan der hoh botte paulus

Hat gekvndet vns alsus

35

Daz nieman werde gekronet dort

Wan der hie vntz an daz ort

Hat mit reht gar gestriten

Gedulteclich mit vesten sitten

Mit dem gelobin hie geritten

40

Dvr dez tievils lant enmitten

Als sant Martina dv selic

Der kivsche reiner lip vnmeilic

Treit aureolam in drier wis

Zemerst dur megtlichen pris

45

Wan ir lip ir sele was luter

Als crist ir gemahel vil truter

Bewarte an ir schonen libe

Daz ich fur grozis wunder schribe

Do man der reinen frowen

50

Ir lip hatte verhowen

Zehant von ir libe blanc

Clare milch fur bluot dranc

Daz frömde zeichen vil tiure

Git vrkvnde daz div vil gehure

55

Avreolam von rehte treit

Umbe ir erwelt kivschekeit

238c,57

Zim andern male vmbe daz

Daz si volkomenliche was

Ein martererin hoh vnd guote

60

Beidv mit libe vnd mit muote

Div groste von der ich ie vernam

Daz sprich ich wol ane scham

Ane Mariam der megde spiegel

Div ist der genaden stiegel

65

Und ein brvgge zegotte

Ob aller himelscher rotte

Swebt ir er mit lobe

Ir lip was der tugende klobe

Der den engel kvnec vie

70

Den die witen himel nie

Dort begrifen mohten

Der het sich geflohten

Menschlich in ir kivschen wamme

Sin muoter vnd och sin amme

75

Was si nach menschlicher art

Ir magtum doch vnverschart

Dv gat aller marter vor

Wan do ir liebis kint enbor

Hienc an dez cruces aste

80

Dez wunden mit swerem laste

Ir vil kivschis herze spielten

Mit lebinder marter wielten

Div ist vor allen vz genomen

Vns armen vf genaden fromen

238d,85

Als ich e da vor sprach

Zwenzic marter vngemach

Het sant Martina erlitten