[Bl. 57a] Item dis hort eim büchssenmeister zu. Er sol got vor augen han wann so er mit der buchsen vnd pulver vmbgett So hat er synen grossen feynt vor ym Also muß er alwegen dryfeltige sorge han Er solle sich bescheidentlich halten mit dem er wandelt vnd sol wol gehertzt sin wan man hort gern trost von Im vnd sol wissen die ordenung geyn graben katzen mauren schyrmen vnd sich auch hüten vor dem geroch wan es ist venyn vnd sol warm mylch essen die ist yme nütz Hüt dich vor essig und essen daz kalt vnd füycht sy vnd vor altem gesaltzem fleisch vnd vor gewortzter spysen.
Item wurt dir ein burg befoln zu bestellen Da du dich versiechst das man dich beligen wil So sich vor allen dingen das du Lütt habest den du glauben machst.
Darnach bestelle din were also vff den thornnen kemnaten die muren vnd die graben mit den frommen Lüden Also das menlich wiß wo er hin sol Ob sich ein geschrey erhübe das ein yeglicher an sin were lieff vnd sich da finden ließ.
Auch wiß das dir fromme gebüren vnd arbeiten knecht gar nütz sint zu tarryssen vnd graben zu machen Ob du den vyenden en gegen graben soltest vnd dar vmb soltu ir nitt verschmehen Ouch soltu sere by yn sin vnd sich zu das sie sich icht vil rümen on dynn wissen wann sie sint krancker wißheit Darumbe soltu bewarn das sie nicht zweitrachtig vnder Innen werden.
Darnach bestell din schützen an einen der sich des dinges wol verstet Vnd der sol die schützen vnder wisen was sie thunde oder laissen sollen wann du kanst an allen enden nicht gesin dar vmb bedarfftu frommer Lüde wol vnd sich auch sebe zu vnd biß den Luden früntlich mit worten vnd wercken vnd enlaiße dich nit herzürnnen so blibestu by sinnen Vnd die Lüde die bliben auch eins mit dir Vnd sint dir willich war zu du ir bedarfft.
Wann du Nu Lüde genuch hast gutter Lude werck Lüde vnd arbeiten knecht büchssenmeister schützenmeister schmyde zymmer-Lütt vnd auch steynmetzen Donoch bestell din were mit den büchssen donoch also du siechst das sych die veynt gegen dir stellen Vnd donoch mustu riechten mit dyenen büchssen vnd mit dynere were Vnd was du tust das thu mitt Radt diner fründe so werden sie dir nit wider setzich Vnd mit allem fliß so beware Das keyn
Mittelalterliches Hausbuch. Bilderhandschrift des 15. Jahrhunderts. Frankfurt am Main 1887, Seite 35 (Edition von Bl. 57a). Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Mittelalterliches_Hausbuch_1887_35.jpg&oldid=- (Version vom 18.8.2016)
