mich kan niht wan din eines trost getrœsten.
ich bin den besten obe dc wirt zem bœsten
wirt mir von dir niht herzeclicher trv͛wen segen.
min lip min leben min selde gar.
hat so din liep in banden dc ich dir niht mac
entwenken steter minne.
vnd also steter dc man ie din liep
din leit din swere vur dc mine wac.
nv la mich frowe varn mit dinen hvlden
mir were ein iar ein tac bi dir von schvlden
nv mac ez eht hie niht mer gesin wol vf ez ist tac.
swenne ich die vreiden richen sihe
iedoch dar vnder twinget mich
ein leit des ich dvr not vergihe.
ist si schone vnd ist si gv̊t.
deste wirs tv̊t mir versagen.
wers alt arm vnd vngemv̊t
so mohte ich si wol verclagen.
dc ich ir gerne dienen wil.
verdvlde mir ein sv̊ze maget
daz ich ir teilte vor ein spil.
wider spreche si danne teil
niht so solder stete sin.
niemer wird ich doch ir schimphes geil
dv͛ so hat geschimphet mich.
hohen[1] mv̊z ir werder lip. an selden sten.
dv͛ so werdecliche mich
kan getroͤsten dc min trvren mv̊z zergen.
- ↑ Lies hohe.
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 173. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_173.png&oldid=- (Version vom 7.1.2019)