Seite:Hugo Martina 1856 0623.png

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Hugo von Langenstein: Martina

Und sinv ovgen senkit

An dirre valschen welte minne

War tuot der sines herzen sinne

65

Wan div wird balde hie verzert

Mit dem schatten si hin vert

So wirt dez geistes schowen

In dez himelriches owen

An dem gotlichen bilde

70

Dez die engel nie bevilde

Got wil och sin den oren

In dez himelriches koren

Ein volkomen sveziv harpfe

Gar frovdenriche niht scharpfe

75

Uon dirre suozen harpfen clanc

Muoz alles truren werden cranc

Aid swaz kvmbers ist erlitten

Alhie nach menschen sitten

Daz wirt alda gesuozet

80

Mit einem clange gebuozet

Der von der harpfen hillet

Von dem so wirt gestillet

Elliv swere liplichiv not

Die man dem libe ie gebot

247d,85

Alsus der himelsche wirt

Dez geistes oren frode birt

Sit vns hie frovde bringet

Daz doch betrogen singet

Sin harpfe vz krankem holze

90

So sprechent swaz der stolze

Kvnstericher himel fidelere

Vns danne richer frovden bære

Mit harpfen vnd mit gigen

Die niemer svn geswigen

95

In dem himelschen sal

Der och da ist ane zal

In so rehtem svozem done

Uor der engel fursten trone

Der wil och ein balsem smac

100

Der ie fur alle wurzen wac

Danne dez geistes nasen sin

So rehte suozeclich so fin

Daz aller swere wirt vergezzin

So ie dem libe wart gemezzin

105

Sit man den balsem hohe wiget

Dez alhie div welt pfliget

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 623. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0623.png&oldid=- (Version vom 18.8.2016)