Seite:Hugo Martina 1856 0399.png

	Hugo von Langenstein: Martina

Vnd ir fursteclichen gewalt

Der bœsen geiste vngezalt

35

Die siv mit swerer bekorunge

Hant vber alt vnd iunge

Zenihte hat gemachet

Gar vnd gar veswachet

Den alle engel kvnne

40

In vnzallichir wunne

In vorteclicher minne

Mit eintrehtem sinne

Lobent vnde an bettent

Uz sinem willen niht entrettent

45

Vnd geordint och darzvo

Daz siv spate vnd och fruo

Dir alleine ere bieten

Dines antlütes sich nieten

Dez wisheit hie gesvndert

50

Het wunderlich gewundert

Diz ich selbe wol lerne

Mit so mengem sterne

Den himel also witen

So gar an allen siten

55

Gezierit vnd gebluomet

Daz dine wisheit ruomet

158c,57

Dar abe div sunne schinet

Div aldie welt finet

Siv frowet alle creatiure

60

Mit ir edilen lihtis stiure

Der dez manen vmbesweif

In einem lovfe gar begreif

Mit wandellichem glaste

Der luhtit nahtis vaste

65

Als din wisheit het beschert

Vz sinem ringe er niht vert

Nach orden der zeichen strazen

Als dv im hest gelazen

Den daz wite abgründe

70

Und aller wunder bünde

Furtet vnd och niget

Gein dinem gewalte ez swiget

In dinem gebotte ez allis stat

Daz lebin vnde sinne hat

75

Wan der mensche alleine

Herter danne die steine

Uz dinen wegen steppfet

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 399. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0399.png&oldid=- (Version vom 18.8.2016)