Seite:Hugo Martina 1856 0349.png

	Hugo von Langenstein: Martina

40

Daz siv ez alle horten

Lobende got zestunde

Mit herzin mit munde

Ir muot zegotis lobe stuont

Alse die getriuwen tuont

45

Mit warer minne pflihte

Ir sinne si do rihte

Zegote si mit ir bette

Fri vor svnden lete

Si sprach liebir herre

50

Ich mane dich vil verre

Diner gotlichin guote

Daz si mich behuote

Als den ovgapphil der gesiht

Dem niemer leit hie geschiht

55

Wan kein lit ist so zart

Elliv zit so wol bewart

138c,57

Der mensche het dekein lit

Daz doch baz si befrit

Da von bat div tiure

60

Div reine div gehiure

Den himelschen degen

Ir alse dez ovgen pflegen

Div gute mere batten

Daz er vnder den schatten

65

Siner vetechen si tete verborgen

Von dirre welte sorgen

Ich vil armiv dirne cranc

Sage genade vnde danc

Diner hohen trinitat

70

Div min herze erluhtet hat

An dinem rehten gelovbin

Und daz ich div tovbin

Abgot han versmahet

Zvo dir ich han gegahet

75

Da von ich dich bitte

Nach vaterlichim sitte

Dur dinen namen hoh gelobt

Der iemer allen namen obt

Dez stimme mit vorhten

80

Hillet den verworhten

Dez tievils ingesinde

Dez rehten gelobin bilinde

Nv kam mir zetroste

Der ie die sinen loste

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 349. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0349.png&oldid=- (Version vom 18.8.2016)