Seite:Hugo Martina 1856 0305.png

	Hugo von Langenstein: Martina

Swenne vns armen niht regent

Sin genade vnd vns towet

Und vns armen beschowet

95

Daz lieht siner ovgen

So ist daz ane lovgen

Vnsir selde si verendit

Und vnsir wisheit geschendit

Gar verdorbin vnsir craft

100

Vnd intorheit gehaft

Unsir sinne enthaft

Dez hore eine bischaft

Swenne diz arme lebin

Wirt dem menschin gebin

105

In dirre welte stede

So ist ane wider rede

In dez iamers wuof

Sin erstiu stimme ane ruof

A ist ez ain knabe

110

Als ich gelesin habe

Der tohter stimme ein E

Waz welt ir nv me

121,1

A nach adame hillet

Daz vns mit iamer villet

Und daz e nach even gar

Daz ist zetiute rehte bar

5

Daz wir ach vnde we

Daz vil iamerlich geschre

Mit erbe svn besitzin

Vmbe vnsir nar erswitzin

E daz eva geviele

10

In dez fluochis giele

Und mit dem wurde gebant

Do was div reine genant

Ein mannin nach mannis namen

Den si truoc wol ane schamen

15

Sit nach dem valle

Uon der sunden galle

Wart si eua genenmet

Der erre name gehenmet

Darzvo ir gotis zorn

20

Grozin kvmber hat erkorn

Daz keinem wibe wirdet buoz

Daz si mit nœten muoz

Her bringen ir geburt

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 305. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0305.png&oldid=- (Version vom 18.8.2016)