Seite:Hugo Martina 1856 0291.png

	Hugo von Langenstein: Martina

115d,29

Hatte geheiligot

30

Mit siner hant gesegenot

Owe mir armen manne

Waz sol ich sprechin danne

Sit mich in svnden dorn

Het min muoter geborn

35

Ich sprich muoter vnverswigen

Wez hestu mich gezigen

Daz dv mit crankem gelte

Mich brehte zvo der welte

Einen svn der arbeit

40

Unde grozir bitterkeit

We daz ich niht starb

In minem neste verdarb

In dem tode niht besovf

Do ich vil armer slovf

45

Uon der wamme miner muoter

Dem tode hie zefuoter

Vnd e ich frœden bloze

Keme zvo der schoze

Und vf mine verlust

50

Keme zvo der muoter brvst

Geborn vil vnwize

Ze einer steter spise

Dem eweclichin fiure

Da frœde ist iemer tiure

55

Von dez tievils stiure

Der ist so vngehiure

115c,57

Wolte got wer ich erslagen

Als ich iv wil sagen

In min selbis neste

60

In der nature gebreste

E ich vil vngeneme

Uon der muoter keme

Daz si doch von vrhab

Mir were ein ewic grab

65

Als ich her vnvernomen

Nie von muoter were komen

Zvo dem grabe der erde

Mit iamir mit vnwerde

Disiv rede alsus geschach

70

Dvr daz süntlich vngemach

Daz dem menschin ist gegebin

So ez enpfahit daz lebin

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 291. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0291.png&oldid=- (Version vom 18.8.2016)