Seite:Hugo Martina 1856 0232.png

	Hugo von Langenstein: Martina

Solt ich dvr die lazen

Den himelslichen zimberman

Der so wislichen kan

Uz erde menschen machen

100

Nv prvefe an disen sachin

Sin gewalt kvnste rich

Kein mensche den andern ist gelich

Daz machtv schowen hiute

Daz dekein antliute

105

Dem andern sich gelichit

Min herze niht entwichit

Von im einen halben fuoz

Mir ist allir vorhte bvoz

Da von ich erwerben mvoz

110

Sinen vaterlichen gruoz

Dv maht mit dinen witzen

Valschen vnde spitzen

93,1

Min herze niht geneigen

Daz ich dem tievil veigen

Mitt oppfir hie iht bringe

Ald an in helfe dinge

5

Der im selbe niht mohte

Gehelfen als ez tohte

Daz dv valscher spehe

Mit dinen ogen sehe

Wie din got wart geschant

10

Vor dinen ovgen alzehant

Der warheit ein exempel

Wie wart din richer tempel

Da nider gevellet

Da vnder vngezellet

15

Heiden wart erdrvcket

In die helle gezvcket

Daz alliz offenlich geschach

Wie der tievil da veriach

Siner missetete

20

Und der bosen rete

Wie er die liute verkerte

In vnselde merte

Und ir vngelucke

Vil menger bosen tucke

25

Diz kan doch niht veruahin

Daz dv wellest versmahen

Dine gotte die tievil sint

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 232. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0232.png&oldid=- (Version vom 18.8.2016)