Seite:Hugo Martina 1856 0215.png

	Hugo von Langenstein: Martina

10

Mit sele mit herzin

Rvoften siv vil verre

Alder welte herre

Milter vater ihesu crist

Den wir vntz an dirre frist

15

Leider niht erkanden

Noch zeherrin nanden

Wir han da her geirret

Unwizzentlich verwirret

In dem dienste der apgote

20

Leistende ir gebotte

Vnd wan in vndertænic

Ie gar wider spænic

Der cristenlichin lere

Untz vns div vil here

25

Selden richiv frowe

Der rehten warheit schovwe

Wislichin hat gepfadet

Zvo dir vatir geladet

86b,29

Der himil erde vnde lvft

30

Div abgrunde der helle cruft

Die svsenden winde

So snel so geswinde

Vnd die sternen vngezalt

Beide hitze vnde kalt

35

Beide blvomen vnde sne

Mer wazzir vnde se

Svmir vnde winter

Alle sprache sinter

Kvnt von allen tieren

40

Dv kanst och erzwieren

Allir sinne wanken

An worten an gedanken

Din sin doch vngrundic

Dv bist vns worden kvndic

45

Dvr die wisen predierin

Unsir svnden ledierin

Martinvn din gemahel

Dvr die die selden richer stahil

Div abgote der tumben diet

50

Mit dinem gewalte verschriet

Dvr ir falsch gelovbin

Ze bvlvir vnd zestovbin

Si den gewalt gemachete

Der si gar verswachete

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 215. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0215.png&oldid=- (Version vom 18.8.2016)