Seite:Duerer Underweysung der Messung 050.jpg

	Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen

Die geraden linien / die gegen einander abgeschnytten werden / die sind dreyerley art / die zweyerley geschlecht macht man durch zal / die ersten durch ein gerade zal der wurtzel ist /2/ die ander durch ein vngerade zal der wurtzel ist /3/ Darnach halten sich die linien einer so^elchen maß gegen einander die man durch die zal nit mag auß sprechen / dise drey ding verstee also / Zum ersten setz vier linien neben einander / vnd brauch dich in der abteilung der geraden zal / die erst lini halt .2. die ander .4. die drit /8/ die viert /16/ Aber die vngeraden andern vier linien / die erst helt .3. die ander /9/ die dryt /27/ die viert /81/ Also mag man die gerad vnd vngerad zal in bederley geschlecht der linien meern oder myndern vnnd nit alweg doppel gegen einander brauchen / wie das ein ytlicher der ein wenig rechnen kan leichtlich versteen wirdt / Man mag auch mit einer einfachen zal durch die linien steigenn / Aber wie man die linien die man durch die zal nit teylen kan / teylen soll / ist in der negsten fordern figur angetzeigt / vnd die zweey geschlecht der geraden vnd vngeraden zall in linien zu^o brauchen / hab jch vnden aufgeryssen^[1] / der mu^egen sich auch die Steinmetzen gebrauchen in den außzu^egen / Auch mag man dise linien lenger vndersich hynab zyehen auf ein zwerch lini so halten sie sich aber anderst dann vor / gegen einander.

49

Item wenn du zwu^e lini hast ein lange vnd ein kurtze / vnd wilt ein drytte vnd ku^ertzeste darzu^o finden die jn vergleichlich sey / Also wie sich die zwu^o fu^ergegeben linien / die ku^ertzer gegen der lengeren helt / das sich auch die new erfunden vnd mynst gegen der mittlern auch also halt / dem thu^e also / Stoß die zwu^o linien die lang vnd kurtz / nach der leng vber zwerch an eynander / vnd heb bey der langen an vnd betzeichen jr beder leng /a/b/c/ Darnach nym die leng der ku^ertzern lini /b/c/ vnd setz sie mit dem punckten /b/ in den punckten /a/ vnd neig sie mit dem punckten /c/ woll nyder gegen der zwerch lini /a/b/c/

1. Vorlage: anfgeryssen

Empfohlene Zitierweise:
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 50. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_050.jpg&oldid=- (Version vom 31.7.2018)