dem c / Darnach nym polus hoehin / der statt / darinnen du das horologium machen wilt / wie du hernach in einer tafeln finden würdst / die selbigen polus hoehin zel inn den quadranten von dem b gegen dem c / vnd wo sich die zal endet / doselbst mach ein pünctlein d / vnd zeychen die zwen puncten a d mit einer geraden linien des polus hoehe / genant Axis mundi / die stangen daran die kugel der Welt vmbgeht / Darnach zeüch aber ein auffrechte linien von der lini a b biß in das pünctlein d / wie du oben gelernt hast / ein gerecht creütz durch ein puncten ausserhalb der linien gegeben zuo schreiben / vnd in den selben puncten vff die lini a b setz ein e / vnd das ist die lini Verticalis oder Maur lini gnant auß diser linien / werden die horologia Verticalia / das ist / die stund oder vhr an die auffgerichten mauren gemacht / Darnach zeüch widrumb die vierden linien von dem e biß an die lini a d in gleicher maß wie vorgesagt / vnd den puncten zeychen mit f auff der linien a d / das ist die lini equinoctialis / oder vergleichers / etc. Vnd die erst lini a e / ist horizontalis / darauß die vhren oder stund in plano dem erdtreich gleich gemacht werden.
Diß Rectificatorium oder Triangel soll auß messz / kupffer / oder hertem holtz gemacht werden / vnd hinden am bley gewicht / gerad nach der linien verticalis haben / auch vnden gerad nach der lini horizontalis / sol ein nadel oder zünglein eines compassz eyngesetzt sein / dasselbig zünglein nach des polus hoehe / vnd abwendung der maur / des quadranten vnd Rectificatoriums exemplar findestu in nachfolgenden figuren.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 8. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_08.jpg&oldid=- (Version vom 31.7.2018)
