|
Diverse: Codex diplomaticus Anhaltinus/Band 3 |
|
|
Halberstat thü unrechte unde mit ghewalt et cetera. Hir antwerdet her Johannes von Creendorp thü, he hebbe dat hüs thü Snetlinghe unde dat dartho hord, von deme goddeshuse und von deme biscope tho Halberstat ,unde he wel des min rechte were wesen und wel me weren, dar he me tho rechte weren scal.' Scedelude uses herren greven Berndes spreket: ,Man scal useme herren greven Bernde dat hus Snetlinghe und Bürneker dorch recht weder antwerden, nadememale dat dat sin rechte eyghen is et cetera,' Scedelude uses herren von Halberstat spreket: ,Went use herre von Hal- berstat spricht, it si sin eyghen unde wille her Johans rechte were wesen, dar he it tho rechte dün scal et cetera.' Hir spreke wy tho also en overman: Went her Johan von Creendorp spricht, he hebbe dat hus thü Snetlinge unde dat dartho hord, von un- seme herren deme biscope unde deme goddeshuse tho Halberstat, unde unse herre von Halberstat sprick, it sie sin unde sines goddeshuses eyghen, unde wille hern Johans rechte were wesen, dar he it thü rechte dün scal, dat man hern Johan dorch recht sitten scal laten in den weren, wente me usem herren von Halberstat de eyghentliken were breke, also recht is.
Ok spricht use herre greve Bernt von Anhalt dat sculthichdum an, de montye, de toln, dat marcketrecht tho Aschersleve, he hebbet in leenesgheweren. Hir ant- wardet use herre von. Halberstat thü, dat gut si sin erveleen von deme rike und hebbet in nutte unde in gelde unde in ervenweren. Scedelude uses herren greven Berndes spreket: ,Use herre greve Bernt scal sines leenes were mit sines enes hant behalden op den heyligen et cetera.' Scedelude uses herren von Halberstat spreket: ,Went greve Otto von Anehalt dat gut von uses herren vorvaren tho Halberstat hadde tho leene, do he do starph, hedde he enen sone hat, so hedde dat gut unde die were op one ervet.' Hir spreke wy tho also en everman: War twene sik en gut segket tho leene, welc orer dat gilt hevet in nütte unde in gelde unde in hebbenden weren, dat man den sitten scal laten in den weren, want man ome de were des güdes vor sineme herren breke, also recht is.
Ock sprickt use herre greve Bernt von Anehalt, he hebbe den tins tho Aschers- leve op deme scühove, op deme weygenberghe unde in der Nygenstat in sinen rechten leenesgheweren et cetera. Dar antwardet use herre von Halberstat tho, dat gut si sin unde sines goddeshuses eyghen und hebbe den tins in sinen hebbenden weren unde in nutte unde in gelde et cetera. Scedelude uses herren greven Berndes spreket: ,Use herre greve Bernt scal sines leene ghewere mit sines enes hant behalden op den heylighen et cetera.' Scedelude uses herren von Halberstat spreket, dat sik greve Bernt daran noghen scal lathen, nademmale dat use herre dat in sinen hebbenden weren hed et cetera. Hir spreke wy tho also en overman: Swy sik en gut thüseghet tho leene unde en ander seghet, it si sin eyghen, die, die dar seghet, it si sin eyghen, die is des nare tho behaldene, also recht is, danne yenne, de daran en leen sprick.4 Seghet aver under den twen orer en sek dat gut tho leene von deme anderen, de scal ome Staden, dat siner manne recht is.
Echt sprickt use herre greve Bernt, he hebbe in sineme lande clostere, pristere, de von ome belenet sin und in sineme lande sitten et cetera. Hir antwardet use herre von Halberstat tho: ,Clostere unde pappen, dar greve Bernt umme sculdighet, dat is geystlik gut et cetera.' Scedelude uses herren greven Berndes spreket: ,Hevet die biscop unses herren greven Berndes clostere unde pappen tho unrechte bescattet oder
Diverse: Codex diplomaticus Anhaltinus/Band 3. Dessau: Emil Barth, 1877, Seite 343. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_3_343.jpg&oldid=- (Version vom 31.7.2018)
