1294. September 20. Münzvertrag zwischen dem Erzbischofe Erich von Magdeburg und den Gebrüdern Busso und Walter von Barby über die Münzen zu Magdeburg und Zerbst.
In deme namen des vaderes unde des sůnes unde des heylegen geistes amen. Wie Eric von der gnaden Godes erzebiscop tů Magdeburch, Albrech1 die důmprovest, Bernart die deken unde dat capitel gemeine des godeshuses tu Magdeburch bekennen openliken an disseme ieghenwardigen breve, dat wie gededincget hebben mit den edelen luden heren Bussen unde heren Wolthere von Barbeye dem1 bruderen umme unse muntye tů Magdebůrch unde umme ere muntye tů Cerwist alsogedanewis, dat sie henne von disseme daghe sie noch ere erven tů euer ewicheit, diewile unse godeshus steit unde die stat tů Cerwist, nene penninge slan ne scholen uppe unse yseren, noch wie uppe ere, unde sie moghen slan swelkerleye penninge sie willen sunder Meydebursche penninge. Ere penninge die scholen gan in al unseme lande sunder allerleye vare geistlik unde werlik na erme werde, ofte man wol allerleye penninge vorbode. Hirumme ne scal ere muntmester von Cerwist nene penninge slan, hie ne hebbe tůvoren unseme muntmestere vorwisset twelf punt tůme slage Meydeburscher penninge, unde scal ok liden enen hudere, swen eme unse muntmester sat, sunder wederrede in sineme brode unde bi unses muntmesteres lone: die ne scal nich mer berwaren1, wan dat hie nene penninge ne sla uppe unse yseren. Uppe en openbar unde en ewich orkunde disser sake so hebbe wie dissen bref gegeven unde besegelet mit unseme ingesegele unde mit unses capiteles ingesegele. Die tughe disser dinghe sint: her Godeke von Hessen die sancmester, her Hinric von Wederden die scolmester, her Albrech1 von Keteliz, her Bůrchart von Blanckenbůrch die kemerere, her Hinric von Barbeye; unse dienstmanne unde unse riddere her Heyne von Alsleve, her Hannes burcgreve von Loubůrch, her Henning von Bardeleve, her Thile von Scerenbeke; unse burghere her Wesseke Keseling, Betheman Hose, Hannes von Honsten; heren Bussen unde heren Woltheres man Wolter von Sticboye, Henning schultechte, Henning muntmester, Michel die voget. Disse bref die is gegheven unde disse dincg die sint geschin an deme iare von Godes gebort over dusent iar tweyhunder iar in dhem verdhenundeneghentheghisten iare, an deme heyligen avende sente Matheus des apostolen.
Otto von Heinemann (Hrsg.): Codex diplomaticus Anhaltinus. Band 2. , Dessau 1875, Seite 546. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_2_546.jpg&oldid=- (Version vom 31.7.2018)
