1272. Juni 9. Magdeburg. Erzbischof Konrad II von Magdeburg übereignet in Gegenwart des Grafen Siegfried I von Anhalt das bisher von den Gebrüdern Erich, Friedrich und Ludolf von Esbeck zu Lehen getragene Patronatsrecht der Kirche in Wilsleben, zu deren Dotation auch Güter in Kokte gehören, dem Marienkloster zu Magdeburg.
Conradus Dei gratia sancte Magdeburgensis ecclesie archiepiscopus omnibus in perpetuum. Quoniam humana natura semper ad dissentiendum prompta et quodammodo labilis ad delicta, nos ea, que vel coram nobis fiunt rationabiliter vel aguntur, ne oblivionis caligine vel fermento calumpnie vicientur, in publicam scripti reducimus notionem. Noverint igitur universi, quod strenui milites, videlicet Ericus, Fredericus et Ludolphus fratres dicti de Esbecke, volentes benefacere ecclesie beate Marie virginis in Magdebůrch, nobis humiliter supplicarunt, quatenus, cum ecclesiam ville in Welsleve, in qua ius patronatus et temporalia a nobis habuerunt in feodo iure hereditario, in manibus nostris parati essent eatenus resignare, ut eam in proprietatem dicte ecclesie beate virginis donaremus, nos attendentes dictorum militum pium esse propositum et salutiferum, ipsorum precibus inclinati et facta prius ab eis resignatione sepe dicte ecclesie et collegio sancte Marie virginis, quam et quidem speciali amplectimur caritate, de approbatione nostri capituli et consensu dictam ecclesiam in Welsleve, quam ad ius patronatus et temporalia, iure proprio damus et tradimus in perpetuum ad habendum, tenendum, possidendum et de ea deinde faciendum, quidquid facere possunt in aliis ecclesiis suis, in quibus patronatum habere cum temporalibus dinoscuntur, proviso quod bona dotalia illius parrochye non distrahantur, iura archidyaconi non diminuantur et honesta hospitalitas et consueta inibi conservetur. Sunt autem bona dotalia, que habet ecclesia memorata, tres mansi liberi in villa Welsleve siti et quartus mansus censualis in villa Lutstorp solvens v solidos et v pullos in festo Mauricii annuatim - colonus etiam sive cultor illius mansi lito est ecclesie supradicte -, item in eadem villa Welsleve quinque aree ad dotem pertinentes, pratum et salices prato astantes; item iuxta pratum predictum iugerum unum est situm et a latere terminantes alie salices in longinquo, item in villa Kokedhe dimidium iugerum eidem ecclesie asscriptum. Huic etiam donationi et traditioni nos Walterus Dei gratia decanus totumque maioris ecclesie capitulum interfuisse recognoscimus et etiam consensisse. In cuius rei testimonium nostrum et capituli nostri sigilla hiis litteris duximus appendenda. Testes huius sunt: illustris comes Sifridus de Anhalt, Ricbertus de Drinleve1, Bruno2 de Eisleve, Georgius canonicus ecclesie sancte Marie frater predictorum militum de Esbeke, et quam plures alii fide digni. Actum Magdeburch, anno Domini moccolxxijo 3, quinto Idus Junii, pontificatus nostri anno vj.
Otto von Heinemann (Hrsg.): Codex diplomaticus Anhaltinus. Band 2. , Dessau 1875, Seite 292. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_2_292.jpg&oldid=- (Version vom 31.7.2018)
