|
Wilhelm Stieda (Hrsg.): Briefwechsel Hildebrand Veckinchusen |
|
|
305. Tideman Brekelvelde in Lübeck an Hildebrand Veckinchusen in Brügge. – 1421 Dezbr. 12.
- Rev. St.-A. Orig. Pap. Adr.: Hildebrande Veckinchuss to Prugge littera detur.
Vruntlike grote unde wes ik gudes vormach tovorne screven. Wetet Hildebrant, gude vrunt, dat ik juwe breve vuste al wol vornomen hebbe unde wy hebben Herman Platenslegher den breff ghedan, lik alse gy uns screven, Evert Mollien und my; unde wy nemen Zyverde juwen broder darmede over. Unde Herman dede uns dallink ene scryft van den vyghen, de welle wy ju met deme ersten lopere senden. Ok hevet uns Herman ghesecht, wo he ju unde Bertramen tosamene enen breff ghescreven hebbe, dar hedde he ju alle dinc inne screven. Den breff sendet he ju by desseme ghesellen, dar is Herman Platenslegher wol mede bekant bet dan ik. Aldus so sende ik ju dat breveken in Sunnenschins breve. Item, Hildebrant, ik sande Arnt Ryke erghisteren juwen bref by Bernde Besthorst unde ick hebbe eme screven, dat he my en antworde screve.
Item, my hevet wunder, dat gy my scriven, dat ik van Hinrik Brinkmanne entfangen sole 2 ℔ gr., alse 14 m. 4 sl., wante ik hebbet ju wol er ghescreven dat he nicht 1 gr. vor den ghesellen utgheven en wolde, wante he en hedde nein ghelt van siner wegen unde de gheselle, deme gy de 2 ℔ gr. ghedan hebben, de was to somer hir unde ik sprak ene, ok sprak ene Bilevelt, he seghede uns schone, he wolde uns dat ghelt gerne gheven, men leve Hildebrant, he en hadde 1 pfennig nicht, wat sal he dan gheven, ik vruchte, dat ju dar nicht van werden en sole.
Item, Lammeshovet hevet de sube men dat ghelt en hevet he noch nicht utghegeven, et dunket eme quat kop sin, darumme en wel he et nicht dreghen. Ik en wet ju anders nicht to scriven dan blivet ghesunt. Ghescreven op sunte Lucien avent anno 21.
306. Hildebrand Veckinchusen in Brügge an seine Frau Margarethe Veckinchusen in Lübeck. – 1421 Dezbr. 13.
- Rev. St.-A. Orig. mit den Resten des Sekrets. Adr.: An
Margreten Veckinchusen in Lubeke lyttera detur.
In den namen uns heren. Leyve wyf, dy gheleve to weten, dat ick binen 10 weken nu breyf van dy hat hebbe, des my to male sere verwundert, woy du dat menest. Scryf my doch, woy du dat menst, unde scryf my ok woyt met dy es unde ok met Trudeken unde met allen unsen kinderen unde vrenden.
Item, wan ick wet wat unsen swagher Evert Moelike sal werden van Tydeman Brekelvelde unde ok van den karallen unde ok van den fyghen, so mach ick weten wes emen einbreken sal, dar wyl ick na sin, dat heyt hebbe, wellet God. Item so est my leyf, dat her Hinrych Rapesulver dat hus vorpandet es; do wol, duncket dy gud wesen, so sende emen myn rode
: Briefwechsel Hildebrand Veckinchusen. Leipzig: S. Hirzel, 1921, Seite 82. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_326.jpg&oldid=- (Version vom 31.7.2018)
