Wikisource

Seite:Briefwechsel Hildebrand Veckinchusen 174.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.
Wilhelm Stieda (Hrsg.): Briefwechsel Hildebrand Veckinchusen

van Brugge herwardes unde ok so hope ik, dat gy, off Got wel, binnen kort na pinxsten[1] hir wesen solen, wante Zyvert meint hir binnen kort na pinxsten to wesene, Got geve mit leve. Item wy en hebben noch sunderlinge neine tidinghe ut Lyfflande, anders dan alse do gy van hir reden unde ok so en sin hir noch neine Lyfflantsche scheppe ghekomen. Hirmede blivet ghesunt. Ghescreven des vridaghes vor der crucewecken anno 17.

Tijdeman Brekelvelde.


155. Gerwin Marschede (in Danzig) an Hildebrand Veckinchusen in Brügge. – 1417 Mai 20.

Rev. St.-A. Adr.: An den erbaren man Hildebrant Veckinchuesen to Bruegge littera detur. In dorso von der Hand des Empfängers: 1417, op pinxtendach[1].

Vrentlike grote vorgescreven an mynen leven vruent. Hildebrant Veckinchusen weten sole gi juwen breyff des dingestages vor paschen[2] hebbe ik wol vorstan, dar gi my inne scryven, dat ik juewe dink myt der hast vorkopen unde wedder to der hant senden sal, des ik leyder neine macht en hebbe; anders so wolde ik et alzo gerne doen alzo gi et gerne segen, dat wet Got. Hir en stat neine laken to vorkopen umme reyde gelt, men en wolde er dan tomale groten kop geven, wante men sorget sik vor orloge. Dat wolk es arm unde wel nicht kopen. Do Breslouewer wellen neine Aresche noch laken kopen. Juwe Aresche unde lange van Tynen stan al unvorkoft; er enbegert noch ter tyt neimant; se beyden vor de Aresche 5½ mark unde nein reyde gelt. Ik was to Maryenborch op meydage[3] unde hadde 3 gude terlink laken, der vorkofte ik nicht mer van den 8 halve laken to borge; unde ik solde dar gehat hebben 550 mark, dar wort my 1 ₰ nicht van den 40 mark. Dat es doch de beste jarmarket in dessen lande, hirumme moge gi merken, welke losinge dat wy hir hebben. Unde ik hebbe jue gescreven, dat gi my neine laken droften senden, alzo scryve ik jue noch; en sendet my neine laken mer, wante gi en mogen nein provit doen. Got geve, dat gi jo neine laken mer gekoft hebben; de vigen sint noch by der helfte unvorkoft; de rosinen sint al unvorkoft; de rys es by der helfte vorkoft unde den rys moet neimant van hir varen to Palerlande wart, darumme es he alzo neddervellych geworden; de komel es al unvorkoft, es en begert neimant. Item so sende ik jue to Lubeke wart an Tydeman Brekelvelde in Hinryk Cerentine 2 scheppunt 5½ lyspunt 2 markpunt wasses. Dat scheppunt stet 51½ mark unde ik wil em noch jo wet mer senden; wat ik em nue senden kan, dat eme umme en trent pingesten[1] komen mach, dat wil ik doen, dat ander gelt moet he to Lubeke opnemen. Dyt hebbe ik em gescreven. Hir es tomale queade betalinge unde tomale queade kopenscop, hir kan neimant to gelde komen, alze gi ok lychte van anderen luden wol vorstan mogen.

Johan Biler es my noch de 215½ mark schuldych; van den Lentselschen

  1. ↑ a b c 30. Mai.
  2. ↑ 6. April.
  3. ↑ 1. Mai.
Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 174. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_174.jpg&oldid=- (Version vom 31.7.2018)
Von „https://de.wikisource.org/w/index.php?title=Seite:Briefwechsel_Hildebrand_Veckinchusen_174.jpg&oldid=3224528“