|
Wilhelm Stieda (Hrsg.): Briefwechsel Hildebrand Veckinchusen |
|
|
huse; des wasses es my ok noch nicht gheworden. Dat was es op desse tyt wert 40 ℔ gr. unde den schaden wyl ic, of God wyl, ok hebben.
Item dat vyffte punt, dat my schelt, dat es dey cronne, dey se op erem hovede hadde, do ic Greteken, dey nu myn wyf es, trouwe, dey hort er to unde ok som ander dynch, dat er hort, also dat ju myn wyf wol sal to kennen gheven myt scryfte also des tyt es, ofte God wyl. Dey cronne rekenne ic myt demme, dat Greteke tachteringh sin, tohope 30 ℔ gr.
Dyt eint 5 punte, dey ic esschen sy, dey maken tohope in al sunder den schaden van des wasse, des ic dus lange unboren hebbe – 236 ℔ 2 sl. 6 gr.
Item so gheleyve ju to wetende. In den tyden, do myn here starf, do hadde ick hir int lant also dat myn vrouwe wol in scryfte hevet 352 ℔ 4 sl. 3 gr. unde 42 tymmer lasten. Hirop so gheleyve ju to wetende, dat ic myner vrouwen sent ghesant hebbe op dyt ghelt also myne breve wol vorclaren, 212 ℔ 15 sl. gr. Aldus so solde er einbreeken van desser summa gheldes sunder lasten 139 ℔ 8 sl. 10 gr. Dyt ghelt sla ic af an den ghelde, dat sey my sint, aldus so einbreket my dat my myn vrouwe schuldych es hirvan 96 ℔ 13 sl. 8 gr. Des so behelt sey 42 timmer lasten by my, dey stan in schulden unde hebben golden 8 ℔ myn 21 gr. Darein teghen sy ic tachter van prundelingen ein dels gheldes. Ick bydde ju beyden, dat gy myner vrouwen segghen, dat sey my dey 96 ℔ 13 sl. 8 gr. schycke efte dat sey my scryven, wor ic dat nemen sol. Wante ic meynne dat to hebben leyver myt vrentschapen dan anders unde ok so wel ick, dat sey my so velle ere vor deme rade don, also sey my schande dan hebben sunder twyvel. Ic welt aldus nicht lyden laten, dat segghet myner vrouwen vrylyken unde mynem swagher. Dunket ein, dat ic es nicht beter einwete, holden sey my vor ghek ofte sot, sey solen my so nicht holden also sey noch begynnen, dat segget ein vrylyken.
Int jar 1412, 27 setember, do gy Evert swagher hir by my weren, do antworde my Tydeke Swarte von juwer weghen 35 ℔ gr., dey myner vrouwen solden tohoren.
Hirto antworde my Renolt Swarte ton ersten 2000 14 timmer scones werkes, dat 1000 golt 10 ℔ 15 sl., darnest antworde hey my 1000 amugen, dat golt 10 ℔ 12 sl. gr. Darnest antworde hey my 2½ quartyr troeniss, dey gulden al 5 ℔ 2 sl. 8 gr. Darnest antworde hey my 33 marten, dat stuck golt 15 gr. Aldus so es my worden von werke unde ghelde tohope 79 ℔ 17 sl. 5 gr. Hir op dat werk quam to ungelde 9 sl. 8 gr.
Item so sante ic myner vrouwen op dyt ghelt op Schonen in Hallewater by Heynneman van den Bornne 2 terling Tomasche laken, dar was inne myt den slachdoken 28 Tomasche laken. Desse 2 terlinge stonden myt unghelde tohope 61 ℔ 6 sl. 4 gr. Aldus so einbreket myner vrouwen hir an 18 ℔ 11 sl. 1 gr. Dyt ghelt sla ick af an den 96 ℔ 13 sl. 8 gr. Aldus so blyvet my myn vrouwe dan noch schuldych op desse tyt 78 ℔ 2 sl. 7 gr. Evert, vadder, desse rekenschap van dessen lesten gelde unde gevet myner vrouwen over in scryfte, also hirinne screven stet, op dat sey alle dinch wetten mach. Unde ok so lesset myner vrouwen dessen breyf vore,
: Briefwechsel Hildebrand Veckinchusen. Leipzig: S. Hirzel, 1921, Seite 41. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_112.jpg&oldid=- (Version vom 31.7.2018)
