48. Sivert Veckinhusen in Köln an Hildebrand Veckinhusen in Brügge. – 1411 Jan. 9.
- Rev. St.-A. Orig. Pap. Adr.: An Hyldebrand Veckynchusen Brugge littera detur.
Broderlyke leyve vorscreven wetet dat my Tomas Veckinhusen, unse vedder, screven hevet, dat hey 900 myn 4 marc op sunte Johannes dach hebben wel unde Johannes Bockel hevet my screven, ofte wy dat gelt to Lubeke utgeven wellen, dat sole wy eme scryven, so welle hey dat to Lubeke bestellen, weme wy dat geven solen.
Item hevet my Johannes Hoesteyn screven, woe hey met Tüten sproken hebbe umme dey selscap, dat Hoesteyn dar mede in leggen wolde. 100 marc Ryges ofte mer und vorstaen dey selscap in Lyflande bet dan sey aldus lange vorstaen es. Tüte hevet my ok hyrvan screven, dat et eme mede gudduncket. Duncket ju dyt gud, so byddet ju Hoesteyn, dat gy eme lenen also vele dat hey den verden ₰ an der selscap hebbe und bewern darmede in dey selscap und senden eme al to Revele an kostelen Yperschen und an Tomaschen und an guder godynge, to Darpte, dat dey 300 marc noch 2 jar in der selscap mogen blyven. Wat ju in al dessen saken gudduncket, dat sette ic al in ju des besten und ju gudduncken van over to Lubeke und in Lyflande to scryven met den eyrsten. Item also gy scryven, dat gy 80 ℔ gr. opnomen hebben to Lubeke ward, dat hope ic sole wol betalt werden. Ic hebbe Johannes van Mynden screven ju rekenscap to scryven van al juwen dyngen hey hevet van deme gelde, dat ju mede angeven, my nicht toscreven. Ok hevet hey ju 275 marc van wegen toscreven. Hyrna moge gy ju rychten met allen dyngen. Eft dat gy wat op en overkopen, so nemet den dach also gy lengest kunnen, wand hey es to dene Sunde ward togen. Slyper hevet orveyde daen, kunde dey selscap icht mer vordern op dey van Kolnen dat Slyper und der selscap mer vor dessen hoemoet scheyn mochte, dar dencket op, des were uns allen wol noet sal desse selscap ut dessen quaden … komen. Dyt wel ic ok to Lubeke ward scryven.
Item my kan neyn eynde van Lubeke werden ofte sey my myn gud volgen wellen laten ofte nicht. Hedde ic dat antworde so mochte ic myn dync darna ansetten met borger hyr to werden. Ic vruochte wol dat welle to Lubeke lancsam weder gud werden, men ic wolde, dat ic dat myne van Lubeke hedde und dar nummer solde wonen. Got voge al dync to den besten.
Item ic moet in der myssen 800 gulden hebben, dey sy ic schuldych al wat dat kostet schycket al dync also dat wy ut den schulden kommen und dar nicht weder inkomen also drade.
Item hedde wy gelt so were grot gelt to wynnen to Breslowe ward mer dan in manygen jarn gy ghewand. Ander lude wynen dar grot gud, nu men dor Prusen nicht en mach, wey kan dat al utreyden.
Item my duncket Slyper wel der selscap gud nicht gernen mer vorstaen doch dyt latet by ju blyven. Kunde wy men to rekenscap komen,
Briefwechsel Hildebrand Veckinchusen, Seite 61. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_061.jpg&oldid=- (Version vom 31.7.2018)
