gelde met den eyrsten und ramet des besten al umme. Desser manebreyve syn 2; in deme eynen steyt Godert van Stuommele nicht ghenomet. Beydet over my. Grotet alle vrunt. Ghescreven 8 dage na sunte Mertyne 1410 jar.
45. Sivert Veckinhusen in Köln an Hildebrand Veckinhusen in Brügge. – 1410 Novbr. 24.
- Rev. St.-A.
Broderlyke leyve vorscreven juwe breyve hebbe ic wol vornomen und ok dey breyve ut Lyflande, dey breyve wern gud, hedde wy dat werk vor dey laken, my duncket in Lyflande wel unse dync nicht vordgaen lyk andern luden. Wes schult dat es, deme vorgeve et Got, ic sende ju dey breyve weder, ic wel ok al dync to Lyflande ward scryven und to Lubeke ward, also ic best kan und hebbet ok alreyde daen overlanc, men my duncket my scryven hulppet nicht vele, my doet neyman recht to Lubeke sunderlynges. Hans van Mynden moget my also vele, dat hey unse gelt underhelt und also groten schaden doet, ic hebbes ummer nicht vordeynt; nemet dat gelt op also ic ju vele screven hebbe, des en latet nicht, dat sol wol betalt werden, dar twyvelt nicht ane, ic wel met den 80 ℔ gr. togern also ic lengest kan. Hedde ic hyr 200 gulden, kunde gy my dey senden, dat ander solde wol staende blyven wand in dey myssen, dey moet ic ummer hebben und kan der nicht opnemen, al soldet my vele schaden. Ic meyne Bylevelt sendet ju dat gelt al ofte, dat steyt al to Homborch Hans van Mynden, doet my mer unghelykes dan ic vordeynt hebbe, ic hebbe eme al dync ghescreven uterlyken also ic best kunde, woldet wat helppen, my es ok van al mynen hertten leyf, dat gy myt alles weme neyn hat weten und gy met den olderluden und allen guden luden wol eyns syn. Got beholdet ju und uns lange. Ic hadde angest vor som luden, dey ju unghelyk und ungunst tovogeden. Got beware uns allen an eren und gude, des behove wy wol to bydden nademe also dey werlt nu steyt.
Item Got geve ju und myner suster Greteken vele luckes und leyves met juwer jungen dochter also vele also ic sulven gernen neme und es my leyf, maket ju vrolyc und holdet ju wol, dat sal, ef Got wel, al gud werden, ic hope Lyseke welle ok dat slechte meren op den somer, God gevet, und voget al umme to den besten to ewycheyt. Und also gy scryven, hyr borger to werden in der vasten, dat es myn wyllen, dat gy hyr komen tegen dey vasten und beysent hyr und bynnen desser tyt mach my ok eyn gans eynde van Lubeke komen und doen dan vrunde rade. Got geve dat beste al umme to raken.
Item leyve broder my duncket gud, dat gy neynen schaden sparn und betalt ummer al schult myt eren und vruntscap al wat dat kostet, my es leyt, dat gy und wy al umme in desse grote sorge komen syn met schuolden, Got betert al umme; were ic eyns ut desser noet, wy wolden uns
Briefwechsel Hildebrand Veckinchusen, Seite 59. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_059.jpg&oldid=- (Version vom 31.7.2018)
