Froͤidenricher svͤsser meîe
[252v]
Froͤidenricher svͤsser meîe·
dv solt willekomen sin·
schoͤne blv̊men maniger leie·
bringet vns din liehter schin·
ia hastv die werlt vil gar geschoͤnet·
fri gefroͤnet· vogellin·
Da bi hoͤrt man svͤsse singen·
die vil lieben nahtegal·
in dem walde lute erklingen·
ir vil wunneklichen schal·
da hat si den svmer wol gehuset·
verkluset stêt ir sal·
[253r] Ob wir hie bi trurig weren·
wie gezême vns ivngen das·
bi so wunneklichen meren·
zimt vns froͤide michels bas·
ia svln wir den lúten froͤide machen·
gar verswachen· argen has·