Von zu trincken vnd yber weinen

Editionsrichtlinien:

• Als Grundlage dienen die Wikisource:Editionsrichtlinien.
• Die Wiedergabe folgt in der Schreibweise (u/v usw.) und hinsichtlich der Groß- und Kleinschreibung der Vorlage. Allerdings wird zwischen Lang- und Rund-s nicht unterschieden.
• Übergeschriebene Buchstaben werden mit <sup> hochgestellt, also zum Beispiel u^o.
• Abkürzungen sind aufgelöst.

Von zu^o trincken vnd yber weinen

VErmerckt vnnder Anndern Vier grosse ybel. so dem meschlichen leib Kommen auß über weinen

Das erst übel Ist zersto^erung der Conplexion^[1] vnd der leber des menschen an jren gu^oten geschicklikeit vnd würckung Warm wein vnmeslich vnnd über flüssiklich getruncken. als sonnderlich jn zu^otrincken geschicht. myndert der leber jr natürlich hytz. damit sy deyen sol. vnd er verleürt da pey seyn krafft. gu^ut geblu^et zemachen vnd last an seiner stat vil schedlich feichtigkeit. darauß darnach die Wassersucht kumbt Oder ertzündt dye leber so vast vnd benymbt ir die zymlich veichtung. da von nachmals dem menschen der aussatz. oder verlierung seiner synne kumbt

Das Annder ist zerrüttung des hyrns von stetter auffriechung. übersichsteigung der tempf von dem wein jn das haubt da durch das hyren jn hytzigen menschen erhytzt wirt. vnd geschickt zu^o vnsynnigkeyt vnnd tobsucht Aber jn kalten menschen die kelte meret. vnd schickt zu^o der fallenden sucht. entsetzung der vernunft. vnd zu^o dem schlag

Das dritt übel ist die Adersucht. als kram. lem. zitternn. vnd der gleichen Wann der wein vnbeschaydenlich getruncken. wirt zu^o zeitten jn dem magen zu^o essich. das dann dem geeder gar groß schaden ist Macht auch vntayg. wesserigkeyt. dar durch die adern matt werden. merks wol

Das vierdt ist der gech tod. so durch den schlaff vnd durch das schnarchen die weg des atems werdent verschopt vnd verschlossen. dar durch der mensch ersto^eckt wirt.

Damit aber du blindter vnuernüfftiger vnd vichischer zu^otrinker. ja vnuernüfftiger dasi das vich. noch pas begreiffen. fassen. vnd behalten mügest. dise obgeschribne. vnd anndre merckliche grosse schwere übel so dir zu^o trincken vnnd überweinen an sel. leib. ere. vnnd gu^ot. vnnd hin wider umb was nützbarkeyt vnnd hayls. Messigkeyt. jn essen vnnd sonnderlich jn trincken. bringen vnnd machen ist. so merck mit vleys vnd schreib jn dein hertz. dise nachuolgende gegeneinannder gesetzte. A. B. C. oder Alphabeth

Zuo trincken macht. Arm hyt vnnd doert Basser süchtig am leib weibischer geperd Contract an den glidern Dryes vnnd peyl am leib Ellend erenlos bey allen weisen leüten Flüssig an dem leib   Mercks wol Gelsucht gechling sterben Hayloß heslich Jrrig jn allen guotten dingen Kindisch kelbrisch kleffig sich pald zeuerreden Lesterlich liger hefftig Müelich zuo vnkeüsch Nerrisch vnnd vichisch Onlewntig on achtberlich bey got vnd der welt Podagra plindt Quellig leüchtuertig vntzchütiger wort Rumorisch vnnd geschraijg Steltzen der zungen schnüpfig schleffrig Treg vnnd faul zuo allen guoten dingen Vergessen gottes vnnd sein selbs Xpi vnnd aller heyligen belaidigung  yechung aller khaym Zerbrechung goetlicher gepot vnd ordnung Türmisch vnnd gantz temisch jm kopf

Messigkeyt macht Allt achtberlich bey got vnnd der welt Bolgeschickt am leib jn geperden vnd allen dingen Czuoterig vnnd resch Deygkeyt der natur Erenreich enn gelisch Fürsichtig vnnd weiß jn thuon vnnd lassen Gerecht geistlich guot gedechtnus Heyslich heylig jn worten vnnd wercken Junck vnnd wol gestalt Keysch vnnd züchtig Lewntig loeblich Mandlich vnnd bestendig Nutzlich jme selbs vnnd anndern Obligig gottes gepoten vnd guoter tugent Parmhertzig jn almuosen Quemlich vnnd zimlich froelich Ratsam reich Starck vnnd gesundt an leib vnnd sel Todes betrachtung Vernünfftig Xpi lieb habung über alle ding  yechung zuo peichten sein sünd Zornig wider zuo trincken füllerey vnd alle laster Mercks wol

     Beschlieslich Auß angetzaigten nützberkeit der messigkeyt vnd treflichen grossen übeln vnd scheden so den menschen auß vnmessigkeyt sonderlich jn über weinen kornen. sol sich pillich ein yedlich frum Christen mensch sich seiner vernunfft gebrauchen. von dem vngeho^ern. vngeschickten. vnd vichischen laster des zu^o trinckens daß do wider got. wider alle vernunfft. vnnd gu^ot syten ist. abtziechen. abstrayffen. vnnd ennthalten. Vnnd mit der hilff gottes. vnnd seiner lieben heyligen. wider alle po^ese naiglikeyt zu^o so teüfflischem vnd verflu^ochten laster mendlich streben vnnd streyten Hierumb O Christenlicher mensch bit got vnnd sein heyligen. das sy dich wo^ellen genedigklich behüeten vor dem ersten ABC. vnnd füdern zu^o dem anndern. etc.

Spil weib vnnd wein. Pringen manigen vmb das sein

---

1. complexio = Körperzustand