Denn sie mangeln des lebendigen brodts der seelen / vnd sehen das frey fleischlich wesen der Türcken / vnd müssen sich wol also zu yhn gesellen / Wie kan man aber mechtiger Christum verstören / denn mit diesen? zweyen stücken / nemlich mit gewalt vnd list / Mit gewalt der predigt vnd dem wort weren / Mit list böse ferlich Exempel teglich fur augen stellen vnd zu sich reitzen / Auff das wir nu vnsern Herrn Christum / sein wort vnd glauben nicht verlieren / müssen wir widder den Türcken nicht anders bitten denn als widder andere feinde vnser seligkeit / vnd alles guten / gleich als widder den Teüffel selbs.
Vnd hie solt man dem volck nu anzeigen / alle das wüst leben vnd wesen / das der Türck füret / auff das sie die not zum gebet / deste bas fülen / zwar mich hat offt verdrossen vnd verdreust noch / das widder vnser grossen herrn / noch hoch gelerten den vleis gethan haben / das man doch eigentlich vnd gewis hett erfaren mügen / der Türcken wesen ynn beyderley stenden / geistlich vnd weltlich / vnd ist vns doch so gar nahe komen / Denn man sagt / das sie auch Stifft vnd Klöster haben / Es haben ettlich gar vngeschwungen lügen von den Türcken ertichtet / vns Deüdschen widder sie zu reitzen / Aber es durfft der lügen nichts / Es ist der warheit allzu viel da / Jch wil / meinen lieben Christen / so viel ich der gewissen warheit weis / ettlich stück erzelen / damit sie deste bas bewegt / vnd gereitzt werden / vleissig vnd mit ernst zu beten / widder den feind Christi yhres herrn.
Jch habe des Mahometes Alkoran etlich stück / welchs auff deudsch mocht / predigt oder lere buch heissen / wie
Martin Luther: Vom kriege widder die Türcken. , Wittenberg 1529, Seite 22. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Vom_kriege_widder_die_T%C3%BCrcken0022.jpg&oldid=- (Version vom 9.3.2019)
