Seite:Volapuek-Almanach fuer 1888.pdf/77

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.
Liste.png Sigmund Spielmann: Volapük-Almanach für 1888

Netahüm nugänik,
fa Bánfi, G.[1]

Fatäne aiblibolöd
Nugänel! fiedik;
At binom ola kled kälöl
E füdo sep olik.

Vo! nesemöp binos ple ol
In tal legletik plad;
Is lifolöz, deilolöz
In läb, in neläbad.

At binom glun, kö vem ofen
Ebludoms fats olik.
Leni kel etanom yelmil
Bal nemis gletälik.

Is efegoms plo lom milits
Jamepik Arpada
E slafayoki eblekom
Lam nämik Hunyada.

O lib sanik! Is äpolon
Stänis ola bludik;
Gudiküns obas äfaloms
Du komip lonedik.

E zenodü möd neläba,
Pos plumöd dikodas.
Do pelunöl, ab no nosik
Lifom at net obas.

O vol gletik, fatän netas,
Ole un lüvokom:
„Uf lifi, ud deili süf
Milyelik lebegom!“

Leno mögik, das so mödiks
Vanliko äbludoms,
Das ädeiloms plo fatä
Sufo fiediks sons.

Vo! ne mögik binos, das näm,
Kapäl e sanik vil
Dem fugavet äseifom
Vanliko in deil.

Nog kömomöz, ed okömom
I gudikum timag,
Keli lebegoms lelado,
Lips menas tum mil, ag!

Ud okömom, if kömomöz,
Deil gletobidik,
Kelüp la fun neta kinän
Dlenom dlenis bludik.

Sepi tän, kel sävom neti,
Nets züstanoms dolo;
E logs balionas menas
Pofuloms dleniko.

Aiblibolöd fiedik
Fatäne, nugänel!
Kel oli konsefom e füd
Tegom in godafel.

Vo! nesemöp, binos ple ol
In tal legletik plad;
Is lifolöz, deilolöz,
In läb, in neläbad!



  1. Ungarische Nationalhymne: Dem Vaterland, o Ungar halt, die Treue unbefleckt etc.
Empfohlene Zitierweise:
Sigmund Spielmann: Volapük-Almanach für 1888. Leipzig: , 1888, Seite 78/79. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Volapuek-Almanach_fuer_1888.pdf/77&oldid=- (Version vom 1.8.2018)