Ein Fürstlich Hauß / sampt einem Ampt / in Thüringen / an das Ampt Reinhartsbrunn stossend / vnd gegen Eisenach gelegen / dahin das Stättlein Waltershausen gehörig / so eine starcke Meyl von Gotha / am Enselberg / vnnd beede nicht weit vom Wasser Hörsel liegen thun. Es ist Tennenberg / Schloß / vnnd Ampt / etwan dem obgedachten Closter Reinhartsbrunn / vnnd / vmbs Jahr 1483. auch den Graven zu Gleichen / versetzt gewesen; so aber die Landgraven allwegen wider gelöst haben. Anno 1545. gehörte dieses Ampt Churfürst Johann Friederichen: Folgender Zeit ward es nach Eysenach gerechnet: aber / nach Abgang selbiger Lini / bekam es der vor wenig Jahren verstorbene Hertzog Albrecht von Sachsen / Weymarischer Lini. Wird jetzt vielleicht Hertzog Ernsten / nacher Gotha / gehören.
Werden von Lorentz Peccenstein part. 3. Theat. Saxon. p. 35. zwey Berg Stättlein in Meissen genant. Vnd liegt Thum nahend den Berg-Stättlein Geyer vnd Stolberg.
Dieses Nahmens seyn zween Ort nahend beysammen in Thüringen gelegen / deren / zum Vnderschied / der eine Burg-Tonna; der Ander aber Gräffin Tonna / genant wird; darzwischen die Herrschafft Tonna lieget; vnnd beede nahe bey Langen-Saltza / vnd der Vnstrut / seyn. Zu Burg Tonna ist ein Commenthurey deß Teutschen Ordens / vnnd ein Dorff / so aber nach Gräven Tonna / wie berichtet wird / gehöret.
Anno 1558. den 17. vnnd 18. Maii / ist vmb Burck-Thonna / deß Nachts / ein grausame Witterung gewesen / daß bey 46. Menschen seynd ertruncken / vnd / vnder andern / auch ein Kindbetterin / deren Kind in einer Mulden auff dem Wasser hinweg geflossen / vnnd auff einem Apffelbaum stehend blieben / vnnd hat man dieses Kind den dritten Tag hernach lebend gefunden; wie Johann Bange in der Thüringischen Chronick / p. 175. b. berichtet. Jetztgedachtes Gräffin Tonna ist ein Stättlein / vnnd Schloß / bey etwan einer viertheil Meyl von Burg-Tonna / 3. Meylen von Erfurt / vnnd 2. Meylen von Gotha / gelegen / allda die Graven von Gleichen in dem Schloß / so seine Gräben / vnd Auffziechbrucken hat / vor diesem Hoff gehalten haben. Nach ihrem Absterben / hat die Herrschafft Tonna / Herr Christian Schenck / vnnd Freyherr zu Tautenberg / Frawen Prießnitz / vnnd Nidern-Treba / vberkommen; welcher aber Anno 1640. auch ohne Leibs vnd LebensErben / vnd der letzte seines Stammens / vnnd Nahmens / mit Todt abgangen; vnd haben darauff die Hertzogen zu Sachsen Weymar besagtes Tonna / als ein Fürstlich Weymarisch Lehen / eingenommen. Anno 1375. zog Landgraff Friederich in Thüringen vor Tonna / vnd verderbte dem Graven von Gleichen alle seine Dörffer / vnd Gerichte. Anno 1631. im Junio / ist das Stättlein Gräffin Tonna / sampt dem Schloß / so der Gräfflichen Gleichischen Wittib Leibgeding war / von den Tillyschen gantz außgeplündert worden; wie in tom. 2. Theatri Europaei fol. 387. b. stehet; darfür von dem Buchsetzer vnrecht Gräven Thoren gemacht
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 339. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_339.jpg&oldid=- (Version vom 14.9.2022)
_339.jpg&oldid=-){kind=link}
_339.jpg&oldid=4103957){kind=link}