andern Gefangenen / hinderlassen / ohne was auff dem Platz nidergemacht worden; vnder welchen gleichfals 2. Rittmeister gewesen seyn: wie im 5. Theyl Theat. Europaei fol. 49. stehet / vnnd am 217. 2. Blat solches mit wenigern Worten widerholet wird.
Ein Marcktfleck / oder / wie solchen Orth theyls nennen / ein Stättlein / vnd Ampt / an der Vnstrut / bey 3. Meylen von Erfurt / in Thüringen gelegen / vnd selbiger Statt gehörig. Dresserus, in seinem Stättbuch / vnnd Beschreibung Erfurt / p. 238. nennet diesen Orth auch ein Stättlein / vnd Lateinisch Simeriam, vnd sagt / daß die Statt Erfurt solches vmbs Jar 1342. an statt Vergeltung der Vnkosten / so sie / in dem Krieg / welchen Landgraff Friederich der Ernste in Thüringen / mit den zweyen Graven von Weymar / vnd Schwartzburg / geführt / auffgewendet / bekommen habe. Hergegen stehet in der offt angezogenen Thüringischen geschriebenen Chronic Adami Ursini, daß Graff Heinrich von Schwartzburg / im Jahr 1418. der Statt Erfurt zu kauffen geben / die Dörffer / Grossen-Sommern / vnnd Schallenburg / vnnd die Mühlin zu Wenigen (oder Kleinen) Sommern / etc. mit Halßgericht / vnd aller Zugehörde; so Fuldisch Lehen. Es hatte vor dem nächsten Krieg zu Grossen-Sommern ein schöne Mühlin / dahin man viel Früchte zu mahlen gebracht / die newlich noch verderbt gewest seyn solle. Anno 1623. als Hertzog Friederichs zu Sachsen Altenburg Völcker abgedanckt worden / haben dieselben den 21. Jener diesen Ort geplündert / vnnd vbel allda gehauset. Meteranus sagt zwar nur / daß sie das Landhause geplündert hetten.
Ein Stättlein an dem Fluß Dober / zwischen Calau / vnd Finsterwalde / in Nider-Laußnitz gelegen / so / wie auch Barrut / oder Barhut / den Graven von Solms; wie Melchias Nehel / in Exegesi Lusatiae p. 284. schreibet / gehörig. Anno 1641. lagen die Schwedisch-Stalhansische allhie. Anno 1642. bemächtigten sich die Schwedisch-Königsmärckischen dieses Stättleins / vnnd besetzten das Schloß mit Volck / im Aprilen; darüber das Stättlein in Brand gerahten. Es ist aber noch in diesem Jahr dieser Orth / durch Accord / an die Chur-Sächsische vbergangen. Obgemeltes Stättlein Barrut liegt auch in Nider-Laußnitz / an dem Wasser Goila / so nahend dabey in die Spree fält / vnd bey den Märckischen Gräntzen. In einer Relation stehet / daß Anno 1620. der Churfürst von Sachsen Gräditz / oder Grätzen / das Schloß / so auff einem Paß nach Görlitz gelegen / vnd Barut / in Laußnitz / erobert habe.
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 326. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_326.jpg&oldid=- (Version vom 1.8.2018)
_326.jpg&oldid=-){kind=link}
_326.jpg&oldid=3393575){kind=link}