Schwedischen in Zwickaw gelegnen Reutern / außgeplündert.
Anno 1642. sambleten sich allhie / vnd der Orthen / die Keyserischen / dem von Königsmarck zu begegnen.
Setzet Adelarius Erichius, nahend dem Wasser Orla / ausserhalb Thüringen / vnd vber der Sala / gegen dem Voigtland; Herr Friederich Hortleder aber / von den Vrsachen deß Teutschen Kriegs / lib. 5. cap. 22. fol. 1207. der ersten Edition, vnder die Stätte / so Churfürst Johann Friederich zu Sachsen / Anno 1545. in Thüringen gehabt; so im nächsten Teutschen Krieg / viel erlitten haben solle. Einer sagt / habe vorhin viel Tuchmacher allhie gehabt / als es noch Coburgisch gewesen / jetzt aber seye dieses Stättlein[WS 1] Altenburgisch / vnnd liege ein Meyl wegs von Neustat an der Orla.
Eine bekante Statt / im Meißnischen Craisse / an der Elb / 2. Meylen oberhalb Dresden gelegen / vnd dem Herren Churfürsten zu Sachsen / zusambt der Landvogtey / gehörig. Ist vor diesem deß Stiffts Meissen gewesen / von welchem Sie an Böheim / vnnd dann an Meissen kommen ist. Besiehe Dresserum, von den Bischoffen zu Meissen part. 4. Isag. Hist. Es schreibet Lorentz Peccenstein part. 2. Theatri Saxon. fol. 10. daß das Schloß allhie nach der Höhe gerichtet / vnnd noch Anno 1340. der Cron Böheimb zuständig gewesen / aber Anno 1408. wider an Meissen kommen: werde noch in ziemblichem Bauwesen erhalten. Vnd von der Statt Pirna sagt Er part. 3. Theatri fol. 56. daß sie ein weil beym Bistumb Meissen / vnd Böhmisch Lehen; aber Anno 1237. Marggraff Heinrichen dem Erleuchten / vnterworffen gewesen; hernach wider an Böheimb kommen / vnnd darbey biß auffs Jahr 1384. geblieben / biß sie vom Marggraff Wilhelmen dem Einäugigen wider an Meissen gebracht worden. Der berühmbte / vnnd vnverschambte Ablaßkrämer / D. Iohan. Teccelius, oder Detzel / ist von hier bürtig gewesen. Es hat einen herrlich schönen weissen Steinbruch allda / so weit geführet wird. Vnd daher kompt es / daß so viel Schlösser / vnnd schöne Gebäw / in Meissen zu sehen. Er Peccenstein meldet auch / daß Anno 1429. Die Hussiten allhie vbel gehauset. Hergegen stehet in der geschriebenen Thüringischen Chronic / daß die Böhmen Anno 1430. Pirn belagert / aber nicht haben gewinnen können: Gleiches sagt auch Boregk / daß in Anno 1429. Sie der Statt Pirna / so von Natur fest / vnd das Schloß Sonnenstein daselbst / so besetzt / vnnd wol befestigt war / nichts angewinnen kunten. Als Anno 1639. die Schwedisch-Bannerischen vor die Statt Pirna / vmb die mitten deß Aprilis / kommen / war sie mit doppelter Mawer / einem Wall / vnd entzwischen mit einem Wassergraben / auff alte Manier / die von keiner rechten Fortifications Kunst gewust / oder wissen wollen / versehen. In werender Belagerung / ist die Elb- vnd Kuttelgassen in Brand gerathen / vnd haben die Schwedischen den 23. (al. 24.) Aprilis / Nachmittag vmb 2. Vhr / die Statt mit Sturm einbekommen / zwey Fähnlein darinnen erobert / was sie im Gewähr befunden / nidergemacht / viel in die Elb gejagt / die Statt geplündert / vnd die Arme Burgers Leuthe vbel tractiret. Der Commendant hat sich mit theils Volck auffs Schloß allhie / Sonnenstein genant / gemacht / daß man ihme nichts anhaben mögen; sondern Er hat noch darzu einen Außfall gethan / die Schwedische beschädiget / vnnd ihnen ein Werck nidergerissen. Es seynd in wenig
Anmerkungen (Wikisource)
- ↑ Vorlage: Sättlein
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 285. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_285.jpg&oldid=- (Version vom 15.9.2022)
_285.jpg&oldid=-){kind=link}
_285.jpg&oldid=4107745){kind=link}