Kemnitium im 1. Theyl deß Königlichen Schwedischen in Teutschlandt geführten Kriegs / von dieser Schlacht / vnnd deß Königs Tode: da er auch am 467. Blat saget / daß von dem obgedachten Generalen vnnd Feldmarschallen Pappenheimb geschrieben werde / daß er vber 100. Narben von Wunden / so er von seinem Feind empfangen / am Leib getragen habe. Es hat das vbrige / so damalen vom Brand / durch den Friedländer anbefohlen / vberblieben / folgends / als sich im Christ Monat Anno 1640. Schweden allhie befunden / zum theil auch herhalten müssen. Was zu andern Zeiten da geschehen seyn mag / davon haben wir keinen eygentlichen Bericht.
Ein Stättlein (so das Thal Manßfeld genandt wird /) vnd ansehenlich Schloß / davon diese gantze Graffschafft den Nahmen hat. Liegt bey der alten Wippra / ein Meyl von Eißleben / zwo Meylen von Sangerhausen / vnnd 2. von Aschersleben; das Schloß / vnd Gräfflich Stammenhauß aber (darzu ein Ampt gehörig ist) in der Höhe / daß man es von fernen sehen kan / vnnd welches Anno 1547. wider renovirt / erweitert / herrlich / vnd fest / erbawen worden. Den Nahmen wollen theils gar vom Manno, deß Tuisconis Sohn / theils von dem Wörtlein Mann / vnd Feld / vielleicht wegen einer Schlacht / in welcher man da Mannlich gefochten / herführen. Siehe Casp. Ens in delic. apodem. p. 248. vnnd Dresserum, in seinem Stätt-Buch / am 435. Blat; da er auch sagt / daß diese Statt / in Ober Sachsen / an dem Hartzwald / vnd gleichsamb in den Wurtzeln deß Bergs Meliboci gelegen seye; von dannen vmbs Jahr Christi 789. Keyser Carl der Grosse die Wendische Wiltzen vertrieben habe; vnd daß der Anfang / Kupffer auff den Manßfeldischen Feldern zu graben / im Jahr 1200. gemacht worden. Anno 1630. bekam deß Ertzbischoffs zu Magdeburg Obrist Lieutenant / Niclas Bock / das Hauß Manßfeld / mit List / in dem er etliche Säcke mit geschnittenem Stroh außfüllen lassen / vnd selbige / als wann es Geträyde vom Closter Manßfeld kommende / auff Wagen gelegt / vnder die Säcke aber theils Soldaten versteckt. Es eroberten aber noch dieses 30. Jahr die Keyserischen das Schloß wider / wie auch Querfurt. Anno 31. den 24. Novembris / ward Manßfeld den Schweden mit Accord vberlassen. Anno 1639. den 8. April. hat sich das Schloß allhie / wider mit Beding / an die Schweden ergeben; weilen die Besatzung darin Mangel an Pulver hatte. Muß daher folgen / daß sie es zuvor verlohren gehabt. Anno 1641. ist solches von den Keyserischen vmbsingelt: aber Anno 1642. den 3. Martii vom Schwedischen General Major Königsmarck entsetzt worden.
Eine Statt in Meissen / vnd desselben Ertzbürgischen Craiß / nahend Annaberg / auß Böheimb zu / vnnd hoch gelegen. Ist ein newe Statt / vmb das Jahr Christi 1519. (20. oder 21.) von Hertzog Heinrichen in Sachsen zu erbawen angefangen. Liegt gar lustig / vnd auff einem fruchtbaren Boden / der alles trägt / dessen der Mensch / zu Auffenthalt deß Lebens / von Nöthen hat / ausser Wein. Es gibt auch da auff den ebenen / vnnd geschlachten Hügeln / Gärten / vnnd anders; vnnd auff den Bergen allerhand Vieh / sonderlich viel Schaf. Auß dem Böhmer Wald bringet man viel Wildprät. Die Gassen der Statt seynd alle gar sauber / wie auch die Häuser selbsten; welche formblich gebawet seyn. Hat ein gar schöne Kirchen /
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 236. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_236.jpg&oldid=- (Version vom 4.3.2022)
_236.jpg&oldid=-){kind=link}
_236.jpg&oldid=3960191){kind=link}