weiß innen hatte / welcher einen Bauren / der in dem Wasser zu Leuchtenberg gehörig gefischt / gehangen hatte. Vnd solches Kala ward ihme / sampt Leuchtenburg / von den Graven von Schwartzburg versetzt. Vnd kame auch Leuchtenburg damals an die Landgraven in Thüringen. Anno 1632. ward Kala gantz außgeplündert von einer Friedländischen Parthey.
Ein Stättlein / in der Gülden Aw / beym Fluß Helm / in Thüringen gelegen / vnd / sampt seinem Ampt / den Graven von Schwartzburg gehörig. Soll / vor Zeiten / eygene Herren gehabt haben / von denen solcher Orth an die Graven von Hohenstein kommen / etc. Anno 1369. in dem Krieg dieser Graven von Hoenstein / mit der Statt Nordhausen / hat Kelbra auch schaden gelitten / vnd geschach / vor dem Stättlein ein Streit. Anno 1646. ist allhie ein Gesundbrunnen entstanden: hergegen auch / in diesem Jahr / den 23. Julii / 150. Pferdt Keyserische / vber das Aichsfeld / hieher gangen / so das Viehe allhie weggetrieben / vnd / als ihnen in 40. Burger auß Kelbra nachgeeilet / vmb ihr Viehe zu erretten / seyn selbige / von den Keyserlichen vmbringt / vnd bey 30. Burger nider geschossen worden; wie in Tom. 5. Th. Europ. fol. 1156. seq. zu lesen.
Ein Stättlein vnder dz Ampt Wittenberg gehörig / vnd eine Meyl von solcher Statt / auff der Strassen von Leipzig dahin / gelegen: allda / weil es noch wol gestanden / wenig zu sehrn gewest. Andreas Carlstadius hat es etwas bekant gemacht: vnd newlich die Schweden / die es Anno 1637. außgeplündert vnd abgebrant haben. Besiehe die Meißnische Klagschrifft.
Ein Stättlein in Thüringen / an einem vnbenambsten Wasser / so in die Wippra fält / vnd nahend Weissensee / gelegen. Hat vorhin / da es noch ein Dorff gewesen / als ein Pfandschilling vom Landgraven / Graff Herman von Beichlingen gehört / kam aber / wegen deß Graven verbrechen / Anno 1359. wider an den Landgraven. Der Zeit ist es Chur-Sächsisch; wiewol solches abgebrant jetzt ist. Anno 1569. den 8. Junii / ist im Gasthofe allhie / ein groß Fewer auffgangen / vnnd seyn. 31. Häuser / vnd die besten Höffe am Marckt / abgebronnen. Anno 1582. seynd vber hundert Häuser / ohne Ställ / vnnd Schewern / zu Kindelbrücken / sampt der Kirchen / Rahthauß / Schul / Pfarr / Glockenthurn / mit 5. Glocken / vnnd der Seigerglocken / innerhalb drey Stunden / im Fewer vergangen / drey Menschen todt funden / sehr viel Pferdt / Schwein / Hüner / vnd Aenten / verbrandt. Das Fewer ist den 16. Junii an 3. Orten / in vnderschiedlichen Scheuren / auff einmal angangen.
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 203. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_203.jpg&oldid=- (Version vom 15.9.2022)
_203.jpg&oldid=-){kind=link}
_203.jpg&oldid=4108038){kind=link}