/ vnd die bestimbt fraw Gerdraut starb im andern iar nach dem als sy verheirat ward / vnd het kain erben mit hertzog Heinrichen irem gemahel / wan sy gestorben ist vnd wo sy begraben ligt setzen die croniken nicht.
Theodora ain vernünftige weise fürstin ain müemel hern manuels kay[ser] ze kriechen die warde durch den bemelte[n] hern Manuel iren vater v[er]heirat in kriechen als ma[n] zalt nach cristi gepurd M.c.xlix iar hern Heinrichen genant Jochsamergot hertzogen zuo Pairn vn[d] marggrafen in österreich in gegenwürd herren Conrats Römischen künigs hertzogen zuo Swaben vnd zuo Francken des bena[n]ten hertzog Heinrichs bruoder muoterhalben / auch in beywesen vil ander fürsten vnd herren gaistlicher vnd weltlicher / fraw Theodora hette mit hertzog Heinrichen irem gemahel zwen sün Lewpolden den Tuge[n]treichen / vnd Heinrichen den eltern von medling von den in der tafel der fürsten gemelt ist / vnd ain tochter genant Agnes künigin zuo hungern / von der hernach volget / hertzog heinrich übergab Pairn in fraw Theodore[n] gewalt / herzog Heinrich von Praunsweig vn[d] warde hertzog zuo österreich gemacht als vor gemelt ist vn[d] fraw Theodora starb als ma[n] zalt nach cristi gepurd M.c. vn[d] lxxxij. iar nach hertzog heinrichen irem gemahel / vnd ligt bey im begraben zuo Wien zuo den schotten im closter vor dem kor.
AGnes ain ersame frume fürstin ain tochter hertzog hainrichs vo[n] österreich genant Jochsamergot vnd fraw Theodoren seiner gemahel / die bestimbt fraw Agnes warde durch iren vater hertzog Heinrichen vermahelt hern Steffan dem dritten vnd kkain künig ze hungern / ain sun herre[n] Geysa des andern künigs ze hungern / fraw Agnes hette kain kind mit künig Steffan iren gemahel / künig Steffan ligt begrabe[n] zuo Stuolweissenburg / aber fraw Agnes ligt begraben zuo Wien zuo den Schotten bey vater vnd muoter.
Maria ain adeliche wolgestalte fürstin ain tochter hern boleslaen herzogs zuo Behem ain sun hern Vratislaen künigs zuo behem / die besti[m]bt fraw maria ward v[er]heyrat durch hern Sobeslaen iren vater hern Lewpolden dem iüngern vnd milten hertzogen zuo Pairn vn[d] marggrafen in österreich ain sun sant Lewpolds / die benant fraw maria hette nit kinder mitt herzog Lewpolden irem gemahel Wan sy gestorben ist vnd wa sy begraben ligt / setzen die croniken nicht Aber hertzog Lewpold ligt zum heiligen kreütz im closter im capitel begraben.
HElena ain erbere tugenthafte fürstin ain tochter herren Geysa des anderen künigs zuo hungern vnd ain swester hern Bela des dritten auch künigs ze hungern / ain sun des obgemelten künigs / die warde durch den benanten künig Geysa iren vater verheirat hern Levpolden dem tugentreichen hertzogen zuo österreich vnnd zuo Steir Als man zalt nach cristi gepurd M.c. vnd lxxiiij iar die im dan in ir kinthait versprochen warde / die bestimbt fraw Helena hette mit dem bena[n]ten hertzog Lewpolden irem gemahel zwen sün Fridrichen den cristenlichen vn[d] Lewpolden den ernreichen von den in der tafel der fürsten gemelt wirt / vn[d] ain tochter genant küngund / von der hernach volget / fraw Helena starb als man zalt nach cristi gepurd M.c. vnd xcix iar / nach hertzog Lewpolden irem eelichen gemahel / Vnd ir begrebnuß setzen die Croniken nicht.
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 41. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_41.jpg&oldid=- (Version vom 1.8.2018)
