ires vater begrebnuß.
N Ain frume auserwelte iunckfraw ain tochter Lewpolds marggraffen in österreich vnd fraw Agnesen seiner gemahel / die gab auf iren gaist in ir iuge[n]t Vnd ward begraben zuo Closternewburg im capitel neben sant Lewpolds ires vater begrebnuß.
BErchta ain ersame frume fürstin ain tochter san[n]t Lewpolds marggrafen in österreich / vnd fraw Agnesen seiner gemahel / die ward verheyrat durch sant Lewpolde[n] iren vater herren heinrichen burggraffen zuo Regenspurg / Ob aber die bestimbt fraw Berchta mit dem bena[n]ten heren heinrichen burggrafen zuo Regenspurg irem gemahel kinder gehebt hab oder nitt / vindt ma[n] in der Regenspurgerischen Croniken.
AGnes ain gerade adeliche fürstin ain tochter sa[n]t Lewpolds marggrafen in österreich vnd fraw agnesen seiner gemahel / die verheyrat Sant Lewpold ir vater hern Boleslaen hertzogen zuo Polan Ob aber die bestimbt fraw agnes mit hertzog Boleslaen irem gemahel kinder gehabt hab od[er] nit / wan sy abgeleibt hat vn[d] wo sy begraben ligt / ist in der polonischen croniken clarlichen beschriben.
GErdraut ain weise andechtige fürstin ain tochter sa[n]t Lewpolds marggrafen in österreich vn[d] fraw agnesen seiner gemahel / die ward verheyrat durch iren vater sant Lewpolden herrn Vladislaen hertzogen zuo Behem der hernach von kayser Fridrichen dem ersten von wegen seiner Ritterlichen tatten / die er dem bemelten kayser Fridrichen vor Mayland vnd an andern enden beweiset hat / gemacht ward erster künig zuo behem / vnd Behem zuo ainem künigreich / die bestimbt fraw Gerdraut hette mit hern Vladislaen irem gemahel drey sün / hertzog fridrichen hertzogen zuo Behem / hern Primislaen künig zuo Behem / vn[d] hern Albrechten ertzpischof zuo Saltzburg kunig vladisla vnd fraw Gerdraut sein gemahel ligen begraben zuo Behem in dem Closter Syon irer gestifft.
ELspeth ain milte güetige fürstin ain tochter sant Lewpolds marggrafen in österreich vnd fraw Agnesen seiner gemahel / die ward durch sa[n]t Lewpolden iren vatter vermahelt / dem edlen vn[d] mechtigen hern herman landgrafen in Saxsen Ob aber die obbestimbt fraw Elspeth mit Landgraf Herman von Saxsen irem gemahel kinder gehabt hab oder nit / Auch wen sy gestorben ist / vn[d] wo sy begrabe[n] ligt / ist in der Sexischen cronick begriffe[n].
JEyth ain seüberliche zierliche fürstin ain tochter sant Lewpolds marggrafen in österreich / vn[d] fraw Agnesen seiner gemahel / die ward durch sant Lewpolden iren vater verheyrat / dem edlen herren Regemgero marggrafen vo[n] Montferer gelegen in Lamparte[n] / Ob die bestimbt fraw ieyth mit marggrafen Regemgero von montferer irem gemahel kinder gehabt hab oder nit / vindt man in den lampartischen croniken.
N Ain ernreiche frume fürstin ain swester hern Bela des plinde[n] künigs zuo hungern ain müemel hern Geysa des andern / auch künigs ze hunger des bemelten künigs Bela sun / Die bestimbt fraw .N. ward durch iren bruoder denn benanten künig Bela wermahelt herren Albrechten dem andechtigen marggrafen in österreich sant Lewpolds erstgeporner sun / fraw .N.
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 39. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_39.jpg&oldid=- (Version vom 1.8.2018)
