ain erb der obbestimbten künigreich warde enthaubt in der stat Nappels von herren karolo grafen von Prouentz[1] / vnd nach mal künig zuo nappels vnd Sicilien / ain bruoder sant ludwigs künigs zuo Frankreich / von wegen der egemelten künigreich seiner vaterlichen erblande / Er wz der lest hertzog zuo Swaben / vnd verschied on erben / seines alters bey xviij iaren / vnd ligt begraben zuo Nappels zuo den weissen brüedern / Nach hertzog Fridrichs von Swaben des elteren der obbestimbten fraw Agnesen gemah tod / ward fraw agnes durch ire[n] bruoder kayser heynrichen den fünften zu[m] ander mal verheirat sant Lewpolden marggrafen in österreich / vnd fraw Agnes hett mit sant Lewpolden irem gemahel xviij kinder vij sün vnd x töchter der sibne in der iugent verschaiden sein zwen sün vn[d] v töchter / vnd xj wurden gefürdert zuo fürstlicher wirdikait / vj sün vnd v töchtern / Albrecht Heinrich Lewpold Ernst Ott vnd Conrat / Berchta Agnes Gerdraut Elspeth vnd Jeyth / von den in der tafel der fürsten weitter gemelt wirt / vn[d] die xviij kinder waren geswistergit mit herren Fridrichen dem iüngern hertzogen zuo Swaben / vnd herren Conratten Römischen künig herzogen zuo francken / muoterhalben / die drey obgemelte[n] kayser Heinrichen / fraw Agnesen Een / vater vnd prüeder haben gestifft vnnd notdürftigclich begabet drew Clöster in Swaben gelegen hirsaw / Reichenpach vnnd Zwifalten[2] / alle drew sant benedicten orden / vnd die benanten kayser heinrich ligen all drey begraben zuo Speir im tuomb / hertzog Fridrich von Swaben der elter fraw Agnesen erster gemahel / hat gestifft zway Clöster in Swaben gelegen Lorch sant benedicten orden / da hertzog fridrich vnd sein geslecht ir begebnus haben / dz ander Closter genant madelperg dar inn weis münich des orden von premo[n]strat[3] / fraw Agnes ist gewesen ain mitstifterin baid[er] Clöster zuo Closternewburg den selben bayden sy vil guotes beweiset hat / sant Lewpold marggraff in österreich / ir gemahel starb als man zalt M.c. vn[d] xxxvj iar / Aber fraw Agnes starb etliche iar nach sant Lewpolde[n] irem gemahel / vnd ligt bey im alhie zuo Closternewburg im capitel begreben / fraw Agnes verließ hinder ir x kinder / fünf sün von den in der tafel der fürsten gemelt wirt / vnd fünf töchter von den hernach volget.
N Ain schöne raine iunckfraw ain tochter sa[n]t Lewpolds marggrafen in österreich / vnd fraw Agnesen sein gemahel / die starb in irer iugent vn[d] ligt begraben zuo Closternewburg im Capitel neben Sant Lewpolde[n] ires vatern begrebnuß.
N Ain zarte seüberliche iunckfraw ain tochter sant Lowpolds marggrafen in österreich vnd fraw Agnesen seiner gemahel die v[er]schyed aus diser welt auch in irer iugent / vn[d] ward gar ersamlich bestattet zuo der erden / zuo Closternewburg neben sant Lewpolden ires vater begrebnuß.
N Ain adeliche züchtige iunckfraw ain tochter Sant Lewpolds marggrafen in österreich vn[d] fraw Agnesen seiner gemahel die hat abgeleibt auch in irer plüenden iugent / vnd ist begraben zü Closternewburg neben sant Lewpolden ires vater begrebnuß.
N Ain gemaytte[4] wolgestalte iunckfraw ain tochter sant Lewpolde[n] marggrafen in österreich vnd fraw Agnesen seiner gemahel / die ist tod in ir iugent vn[d] ist begraben zuo Closternewburg im capitel neben sant Lewpolds
- ↑ Karl von Anjou
- ↑ Hirsau, Reichenbach und Zwiefalten
- ↑ Lorch und Adelberg
- ↑ vgl. Grimm: gemeit 3) c), d)
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 38. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_38.jpg&oldid=- (Version vom 1.8.2018)