W. [Weiterer Sohn Leopolds III.]
DEr acht sun Sant Lewpolds marggrafen in österreich der verschied auch aus diser welt in seiner kinthait / vn[d] ligt begraben zuo Closternewburg neben seines vatern begrebnuß.
X. [Leopold V. der Tugendreiche]
LEwpold genant der tugentreich[1] / ain frumer kriste[n]licher streitperer fürst / ward gena[n]t ain vater des la[n]des herr Heinrichen gena[n]t Jochsamergot des ersten hertzogen zuo österreich erstgeborner sun / fieng an zuo regieren das hertzogtumb österreich / ze hand nach hertzog Heinrichen seines vatern tod / Als ma[n] zalt M.c. vn[d] lxxvij iar Er wz der ander hertzog zuo österreich / er wz ain liebhaber aller gaistlicher leüt / Er wz auch in gegenwürd / da pabst Alexander der drit / vn[d] keyser Fridrich der erst zuo Venedig mitainander veraint warden / vn[d] er zoch mit dem bemelten kayser Fridrich vnd hern Philippen künig von Franckreich[2] / hern Reicharden künig vo[n] Engeland vnd andern fürsten vnd hern in dz gelobt land über mer vmb kristenlichen gelaube[n] willen Als man zalt nach cristi gepurd M.c. vn[d] lxxxix iar / vnd er erstrytt da selbs mit vergiesung seines pluotes das new wapen von österreich ain weissenn strich durch ain rote feldung / das im dan der obgemelt kayser Fridrich da selbser vo[n] seiner Ritterlichen tate wegen gabe vnnd bestete / Er ist auch vormalen in dem gelobten lande gewesen Als man zalt nach cristi gepurd M.c. vn[d] lxxxj iar / vnder der regieru[n]g pabst Clementen des dritten / vnd pracht dan zemal mit im dar aus ain spann des heiligen kreütz / ainer manlichen span lang der selbig span auf heütigen tag in dem Closter des heiligen kreützes gezaigt wirt Vnd als man zalt nach cristi gepurd M.c. vn[d] lxxxxij iar / ward der obgemelt Reichart künig von Engeland zuo wien gefangen vmb die schmach die er dem egemelten Lewpolden hertzog zuo österreich in dem gelobten land beweiset hett mit vnderdrucken des paner vo[n] österreich vn[d] die Englischen muosten die schüt vmb wien vmb die newstat hainburg vn[d] vmb ens mache[n] / Er muosset auch dar zuo zuo seiner erledigung herr Heinriche[n] dem vj Römischen kayser geben .c.m. guldin / vnd hertzog Lewpolden .l.tausent guldin / der obgenant hertzog Lewpold hat auch erweyttert die stat Wien vn[d] den burgern da selbs vil guotes beweiset / der selb hertzog Lewpold vonn österreich hat auch herren Sobeslawen hertzogen vo[n] Behem der österreich manig mal beschediget hat / das land merhern vmb olmuntz vnd brün / verhöret weit vnd prait er hat auch seinem veter hertzog Fridrichen vo[n] Behem herren Wladislawen hertzogen zuo Behem sun der durch den bemelten herren Sobslaen künig zuo Behem aus behem vertriben ward geholffen / das er da selbs zuo Behem wider eingesetzt warde / der benant hertzog Lewpold vn[d] sein bruoder genant hertzog heinrich von medling d[er] elter warden zuo ritter nach cristi gepurd M.c. vn[d] lxxiiij iar / zuo den pfingsten / vnd an dem selbigen tag ward hertzog Lewpolden vermahelt fraw Helena herren Geysa des andern künig ze Hungern tochter Bela des dritten künig ze hungern swester[3] / die im da[n] in der kinthait v[er]sprochen ward vn[d] hertzog Lewpold het mit der bestimbte[n] frau helena zwen sün / fridriche[n] vn[d] lewpolde[n] vn[d] ain tochter gena[n]t küngu[n]d / die ward vermehelt hern Ottacker dem jüngern hertzogen
- ↑ Leopold V. (1157–1194)
- ↑ Philipp II. (1165–1223)
- ↑ Helena, Tochter König Gézas II. und Schwester Königs Béla III.
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 21. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_21.jpg&oldid=- (Version vom 1.8.2018)
