man zalt nach cristi gepurd M vnd xxv iar / vnd als künig Conrat Heinrichen den iüngling seinen erwelten sun zuo Römischem künig nach im gesetzt het / Zoch der benant künig Conrat in welsche land zuo dem der bena[n]t hertzog ernst durch hilf seiner muoter fraw Gysela kam vn[d] dem künig versprach beystand zuo tuon / vnd mit im zuo ziehen / dar nach als der egemelt Conrat die kayserlich wirde zuo Rom empfangen het vnd über das gepirg aus welschen lannden zoche / vande er den benanten ernsten hertzogen zuo Swaben im widerwertig aus rat graf Bernhards / den selben Ernsten er dan in die acht tet / vn[d] verpot im wasser vnd land / da durch der benant hertzog bezwungen ward sich zuoenthalte[n] in den welden / in den er durch die getrewen des kayserß erslagen ward[1] / vnd nach seiner ableibung gefiel dz hertzogtuomb zuo Swaben auf herman seine[n] bruoder[2].
I. [Hermann IV., Herzog von Schwaben]
HErman[3] hertzog ernsts von Swaben des eltern ander sun / ward hertzog zuo Swaben zuo hand nach seine[m] bruoder hertzog ernsten dem iüngeren / vnd der benant herman zoch mit Conratten dem Römischen künig seinem Steüffater vnd mit fraw Gysela seiner muoter vn[d] vil ander fürsten vnd herren gen welschen landen / vn[d] an dem widerzug aus vergiftung des luftes starb der bena[n]t hertzog herman vn[d] auch junckfraw künigund sein steüfswester / die Heinrichen dem swartze[n] Rö[mischen] künig wermahelt wz[4] / es sturben auch an der selben widerfart Cono hertzog zuo francken vn[d] vil ander fürsten vn[d] herren / vnd des bemelten hertzog Hermans leychnam ward von welschen landen in ainem wagen in sein hertzogtuomb Swaben gefürt / vnd da selbs begraben an leiberben.
K. [Leopold II. der Schöne]
LEwpold genant der schön[5] / hertzog Ernsts des strengen hertzogen zuo Swaben vn[d] marggraff in österreich erster sun / der fünft marggraff in österreich / fieng an zuo regieren die marggrafschaft österreich Nach cristi gepurd M lxxv iar ze hand nach seines vatern tod vn[d] regiert die marich österreich löblich vn[d] wol xxi iar / vnd er was gar ain schöner fürst von leyb vnd gestalt / darumb er genant ward der schön Lewpold / het ain streit mit Vratislawen künig zuo Behem[6] / vnd mit Conraten marggrafen zuo merhern[7] / des bemelten künigs bruoder vn[d] mit den Pairn[8] / vnd nam vo[n] im großen schaden an seiner ritterschaft vnd dienstleüte[n] nahent bey meilperg[9] / er widersetzet sich auch kayser Heinrichen / dem vierden seinem swager mit hilf des seligen altmans pischofen ze Passaw[10] / vnd vil ander fuorsten vnd herren mit im / Er hat auch gestritten mit den hungern / auch mit seinem bruoder Albrechten / dem leichtfertigen zuo meilperg da selbs groß mord vn[d] pluotuergiessen durch die bemelten baid brüder auff baiden tailen geschach / Der bemelt marggraff Lewpold hatt lehen empfangen von seinem bruoder Albrechten mit xij panern / vnnd hielt sein fürstlichs geseß auf dem gsloß Gars[11] / vn[d] der egemelt marggraf Lewpold / setzet münich sant Benedicten orden / an der korherren stat gen Melkh / vnd hette zuo gemahel fraw Ita[12] kayser Heinrichs des dritten tochter / vn[d] marggraf Lewpold starb vor seinem gemahel fraw Ita / Als man zalt nach cristi gepurd M vnd xcvj iar / vnnd ligt begraben zuo melkh / bay seinnem vater hertzog Ernsten dem strengen / Vnnd die bestimbt fraw Ita Nach abgang marggraff Lewpolde[n] ires gemahels zoch zuo dem heiligen grab / mit hern Thiemo erzpischoff
- ↑ 1030 auf Burg Falkenstein im Schwarzwald
- ↑ siehe „I“
- ↑ Hermann IV., Herzog von Schwaben (um 1015–1038)
- ↑ siehe Anmerkung oben
- ↑ Leopold II. „der Schöne“, Markgraf von Österreich (1050–1095)
- ↑ Vratislav II. (um 1035–1092), König von Böhmen
- ↑ Konrad I. (um 1035–1092), Herzog von Böhmen, Herzog von Mähren
- ↑ Bayern
- ↑ Schlacht bei Mailberg am 12. Mai 1082
- ↑ Altmann von Passau (um 1015–1091)
- ↑ Gars am Kamp
- ↑ Ida/Itha von Cham (um 1050–um 1100/1101), Tochter des Grafen Rapoto IV. von Cham, nach anderen Quellen Ida von Ratelnberg, Tochter des Grafen Udalrich von Formbach-Ratelnberg oder von Tiemo II. von Formbach-Ratelnberg
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 14. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_14.jpg&oldid=- (Version vom 1.8.2018)
