Floret ibi Candor, pollet gravitate Senatus,
Digna manent justos praemia, poena malos.
Est coelum clemens, sunt hic viridantia prata,
Temperat affines aura salubris agros.
Vitibus, en! colles, et frugibus arva redundant,
Arboreos foetus hortus amoenus habet.
Est propriae linguae Dialectus amabilis illic,
Exprimit hac suaves culta puella sonos.
Pisces & cancros cumulatim Ripa salina
Exhibet, et varias proxima sylva feras.
Triticeam, ecce! tibi praebet mola docta farinam,
Conveniens stomacho fit cibus inde tuo.
Undae Schwalbachiae gratique acidique saporis
Hic constant pretio, ut vina falerna, suo.
En! oculis spectanda venit domus inclyra, muris,
Fossis, aggeribus sat bene cincta suis.
Quid loquar exstructas, non parvis sumtibus, aedes,
Quarum Regina est Curia celsa domus?
Quin etiam antiquos muros & Rudera cernis,
Quaeque vetustatis sunt documenta piae.
Miraclum si vis naturae cernere rarum,
Fons fervescentes ejacularur aquas.
Urbem tres extra fontes praedulcia praebent
Pabula, quae ventri grataque sunt stomacho.
Scissuram studiis fecit Bellona superba,
Heu! quam difficile est vindice Marte premi.
Gottfried Anton Schenck: Geschicht-Beschreibung der Stadt Wißbaden. Franckfurt am Mayn: Johann Benjamin Andreä, 1758, Seite 466. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Schenck_Wiesbaden_466.jpg&oldid=- (Version vom 1.8.2018)
