Die fast gantz vß / an ettlich enden
Die karwuoch duot sie kum abwenden
Wann man die hültzen tafflen lüt
So vocht man dann den ruwen an
Das man well morndes wider dran
Dem narren seyl me hengen noch
Die gewychten fladen vnß nit schmecken
Das houbt das duot man bald entdecken
Es mag gar licht eyn wynd har fegen
Er duot den frowen die sturtz ab wegen
Die frowen went sich vngern decken
Reytzen do mitt die mann vnd knaben
Die narrenkapp sie lieber haben
Das man die oren dar vß streck
Do mit so mag ich wol beschliessen
Wie wol ettlich hant drab verdriessen
Das / wo man suocht alleyn fastnacht
Das nyemer druß würt recht andacht
Loßt er vnß dick biß jn den gott
Die narrenkapp hat angst vnd nott
Vnd mag nit so vil ruowen han
Das sie doch blib die fasten stan
Sebastian Brant: Doctor Brants Narrenschiff, Basel 1499, Seite 158v. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Narrenschiff_(Brant)_1499_0316.jpg&oldid=- (Version vom 18.8.2016)