Seite:Luther Das Newe Testament Deutzsch 441.jpg

	Martin Luther: Das Newe Testament Deutzsch

Das Zwentzigst Capitel.

[XX.]¹ Vnd ich sahe eynen Engel vom hymel steygen, der hatte den schlussel zum abgrund vnd eyne grosse keten ynn seyner hand, ² vnnd er greyff den drachen die allte schlange, welche ist der teuffel vnd der Satanas, vnnd band yhn tausent iar, ³ vnnd warff ynn den abgrund, vnd band yhn, vnd versieglet oben drauff, das er nicht mehr verfuren sollt die heyden, bis das vollendet wurden tausent iar, vnd darnach mus er los werden eyn kleyne zeyt.

⁴ Vnd ich sahe stuele, vnd sie satzten sich drauff, vnd yhn ward geben das vrteyl, vnd die seelen der enthewpter vmb des zeugnis Jhesu vnd vmb das wort Gottis willen, vnnd die nit anbettet hatten das thier, noch seyn bild, vnnd nicht genomen hatten seyn maltzeychen an yhre styrn vnnd auff yhre hand, diße lebten vnnd regnierten mit Christo tausent iar, ⁵ Die andern todten aber wurden nicht widder lebendig, bis das tausent iar vollendet wurden, Dis ist die erste aufferstehung, ⁶ Selig ist der vnd heylig, der teyl hatt an der ersten aufferstehung, vber solche hatt der ander todt keyne macht, Sondern sie werden priester Gottis vnd Christi seyn vnd mit yhm regniern tausent iar.

⁷ Vnd wenn tausent iar vollendet sind, wirt der Satanas los werden aus seynem gefencknis, ⁸ vnd wirt aus gehen zu verfuren die heyden ynn den vier ortten der erden, den Gog vnd Magog, sie zuuersamlen ynn eynen streyt, wilcher zal ist, wie der sand am meer, ⁹ Vnnd sie tratten auff die breytte der erden, vnd vmbringeten das heerlager der heyligen vnnd die geliebte stad, vnnd es fiel das fewr von Gott aus dem hymel vnd vertzeret sie, ¹⁰ Vnd der teuffel der sie verfuret, wart geworffen ynn den fewrigen teich vnd schwefel, da das thier vnnd der falsche prophet war, vnd wurden gequellet tag vnd nacht von ewickeyt zu ewickeyt.

¹¹ Vnd ich sahe eynen grossen weyssen stuel, vnd den der drauff sasß, fur wilchs angesicht floch die erden vnd der hymel, vnnd yhn ward keyne stett erfunden, ¹² vnd ich sahe die todten beyde gros vnd kleyn stehen fur Gott, vnd die bucher wurden auffgethan, vnd eyn ander buch wart auffthan, wilchs ist des lebens, vnnd die todten wurden gericht nach der schryfft ynn den buchern, nach yhren wercken, ¹³ vnd das meer gab die todten die drynnen waren, vnnd der tod vnnd die helle gaben die todten die drynnen waren, vnd sie wurden gericht eyn iglicher nach seynen wercken, ¹⁴ vnd der tod vnd die helle wurden geworffen ynn den fewrigen teych, Dis ist der ander tod, ¹⁵ Vnd so yemand nit ward erfunden^[1] geschrieben ynn dem buch des lebens, der wart geworffen ynn den fewrigen teich.

---

1. Druckfehler im Original: erfuuden. Hier nach WA.DB korrigiert.

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 435. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_441.jpg&oldid=- (Version vom 6.10.2016)