Seite:Luther Das Newe Testament Deutzsch 436.jpg

	Martin Luther: Das Newe Testament Deutzsch

Das Achtzehend Capitel.

[XVIII.]¹ Vnnd darnach sahe ich eynen andern engel nydder steygen vom hymel, der hatte eyne grosse macht, vnd die erde wartt erleucht von seyner klarheyt, ² vnd schrey aus macht mit lautter stym, vnd sprach, Sie ist gefallen, sie ist gefallen, Babylon die grosse, vnd eyn behaussung der teuffel worden, vnd eyn beheltnis aller vnreyner geyster, vnnd eyn beheltnis aller vnreyner feyndseliger vogel, ³ Denn von dem weyn des zorns yhrer hurerey, haben alle heyden truncken, vnd die konige auff erden haben mit yhr hurerey trieben, vnnd yhre kauffleutt sind reich worden von der krafft yhrer geylheyt.

⁴ Vnd ich horet eyn andere stym vom hymel, die sprach, gehet aus von yhr mein volck, das yhr nicht teylhafftig werdet yhrer sunden, auff das yhr nit empfahet etwas von yhrer plagen, ⁵ denn yhre sunde haben gefolget bis ynn den hymel, vnd der herr hatt an yhren freuel gedacht, ⁶ betzalet sie, wie sie euch betzalet hat, vnnd machts yhr zwifelltig nach yhren wercken, vnnd mit wilchem kilch sie euch eyngeschenckt hat schenckt yhr zwifelltig eyn, ⁷ wie viel sie sich herlich gemacht vnd geyll gewesen ist, so viel schenckt yhr quall vnnd leyd eyn, Denn sie spricht ynn yhrem hertzen, ich sitze eyne konigin, vnnd werde keyn wittwe seyn, vnd leyd werd ich nicht sehen, ⁸ darumb werden yhre plage auff eynen tag komen, der todt, leyd vnd hunger, vnd mit fewr wirt sie verbrand werden, denn starck ist Gott der herr, der sie richten wirt.

⁹ Vnd es werden sie beweynen vnd sich vber sie beklagen, die konige auff erden, die mit yhr gehuret vnnd lust getrieben haben, wenn sie sehen werden den rauch yhres brands, ¹⁰ von ferne stehend vmb der furcht willen yhrer quall, vnd sprechen, weh, weh, die grosse stad Babilon, die starcke stadt, auff eyne stund ist deyn gericht komen, ¹¹ vnd die kauffleutt auff erden werden weynen vnd leyde tragen bey sich selbs, das yhr wahr niemant mehr kauffen wirt, ¹² die wahr des gollts vnnd sylbers vnd eddel gesteyns vnnd die perlen, vnd seyden vnd purpur vnd scharlachen vnd allerley Thinen holltz vnd allerley gefesß von Elffenbeyn, vnd allerley gefesß von dem kostlichsten holltz, vnd von ertz vnd von eyssen ¹³ vnd Cynamet vnd thimian vnd salben vnd weyrach vnd weyn vnd ole, vnd semelln vnd weytzen, vnd viech vnd schaff vnd pferd vnd wagen vnd leychnam vnd seelen der menschen.

¹⁴ Vnnd das obis der lust deyner seele ist von dyr gewichen, vnd alles was vollig vnd klar war, ist von dyr gewichen, vnd du wirst solchs nit mehr finden, ¹⁵ Die kauffleutt solcher wahr, die von yhr sind reich worden, werden von ferne stehen vmb der furcht willen yhr quall, weynen vnnd leyde tragen ¹⁶ vnd sagen, weh, weh, die grosse stadt, die bekleydet war mit seyden vnd purpur vnd scharlacken, vnd vberguldet war mit gollt vnd eddel gesteyn vnd perlen, ¹⁷ denn ynn eyner stund ist verwustet solcher reychtumb.

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 430. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_436.jpg&oldid=- (Version vom 6.10.2016)