Seite:Luther Das Newe Testament Deutzsch 417.jpg

	Martin Luther: Das Newe Testament Deutzsch

[IX.] ¹³ Vnnd der sechste Engel posaunet, vnnd ich horet eyne stym aus den vier ecken des gulden Altars fur Gott, ¹⁴ die sprach zu dem sechsten Engel, der die posaune hatte, loße auff die vier Engel gepunden an dem grossen wasser strom Euphrates, ¹⁵ vnd es wurden die vier Engel los, die bereyt waren auff eyn stund vnnd auff eyn tag vnd auff eyn monden vnd auff eyn iar, das sie todten das dritte teyl der menschen, ¹⁶ Vnd die zall der reutterischen krieger war viel tausent mal tausent, vnd ich horet yhre zall, ¹⁷ vnd also sahe ich die roß ym gesicht vnd die drauff sassen, das sie hatten fewrige vnd gele vnd schwefelische pantzer, vnd die hewbt der rosß, wie die hewbt der lewen, vnd aus yhrem mund gieng fewr vnd rauch vnd schwefel, ¹⁸ von disen dreyen wart ertodtet das dritte teyll der menschen, von dem fewr vnd rauch vnd schwefel der aus yhrem mund gieng, ¹⁹ denn yhre macht war ynn yhrem mund, vnd yhre schwentze waren den schlangen gleych vnd hatten hewbter, vnd mit den selbigen thetten sie schaden.

²⁰ Vnd die andern menschen, die nit todtet wurden von disen plagen, noch pusse thaten fur die werck yhrer hende, das sie nicht anbeten die teuffel vnd guldene, sylberne, eehern, steynern vnd hultzern gotzen, wilche widder sehen noch horen noch wandelln kunden, ²¹ Die auch nicht pusset haben yhre morde, noch yhre zeuberey, noch yhr hurerey noch yhre dieberey.

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 411. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_417.jpg&oldid=- (Version vom 1.8.2018)