Seite:Luther Das Newe Testament Deutzsch 356.jpg

	Martin Luther: Das Newe Testament Deutzsch

⁵ Desselben gleychen yhre iungerer seyd vnterthan den Elltisten, Allesampt seyt vnternander vnterthan, vnd beweyset darynn die demut, Denn Gott widderstehet den hoffertigen, aber den nydrigen gibt er gnade. ⁶ So nydriget euch nu vnter die gewelltige hand Gottis, das er euch erhohe zu seyner zeyt. ⁷ Alle ewre sorge werfft auff yhn, denn er sorget fur euch.

⁸ Seyt nuchtern vnnd wachet, denn ewer widdersacher der teuffel geht vmbher, wie eyn brulender lewe, vnd sucht wilchen er verschlinde, ⁹ dem widderstehet fest ym glawben, vnd wisset, das yhr volfuret dasselb leyden, das yhr sampt ewr bruderschafft ynn der wellt habt.

¹⁰ Der Got aber aller gnade, der euch beruffen hat zu seyner ewigen herlickeyt ynn Christo Jhesu, der selbige wirt euch, die yhr eyn kleyne zeyt leydet, vollbereyten, stercken, krefftigen, grunden, ¹¹ Dem selbigen sey preyß vnd macht von ewickeyt zu ewickeyt, Amen.

¹² Durch ewern trewen bruder Siluanon (als ich achte) hab ich euch eyn wenig geschrieben, zu ermanen vnnd zu betzeugen, das das die rechte gnade Gottis ist, darynnen yhr steht. ¹³ Es grusset euch, die versamlet ist zu Babylonia, vnd meyn son Marcus. ¹⁴ Grusset euch vnternander mit dem kuß der liebe, Fride sey mit allen die ynn Christo Jhesu sind, AMEN.

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 350. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_356.jpg&oldid=- (Version vom 26.9.2016)