Seite:Luther Das Newe Testament Deutzsch 297.jpg

	Martin Luther: Das Newe Testament Deutzsch

Die Epistel S. Pauli Zu den Galatern.

[Das Erst Capitel.]^[1]

¹ Paulus ein Apostel: nicht von menschen: sondern durch Jhesum Christ vnd Got den vater, der yhn aufferweckt

hatt von den todten, ² vnd alle bruder die bey myr sind.

Den gemeynen ynn Galatia.

³ Gnade sey mit euch vnd frid von Gott dem vater, vnnd vnserm hern Jhesu Christ,Sihe, wie er alle wort richtet, widder die eygen gerechtickeyt. ⁴ der sich fur vnser sund geben hat, das er vns erredtet von diser gegenwertigen argen welt, nach dem willen Gottis vnsers vaters, ⁵ wilchem sey preyß von ewickeyt zu ewickeyt Amen.

⁶ Mich wundert, das yhr euch so bald abwenden lasset, von dem, der euch beruffen hatt durch die gnad Christi, auff eyn ander Euangelion, ⁷ so doch keyn anders ist, on das ettliche sind, die euch verwirren, vnnd wollen das Euangelion Christi verkeren. ⁸ Aber, so auch wyr, odder eyn engel vom hymel, euch wurde predigen, anders denn das wyr euch prediget haben, das sey verflucht, ⁹ Wie wir ytzt gesagt haben, so sagen wyr auch abermal, ßo yemandt euch prediget, anders denn das yhr empfangen habt, das sey verflucht. ¹⁰ Predige ich denn ytzt menschen odder Gott^[2] zu dienst? odder gedenck ich den menschen gefellig zu seyn? Wenn ich den menschen noch gefellig were, so were ich Christis knecht nicht.

¹¹ Jch thu euch aber kund, lieben bruder, das, das Euangelion, das von myr gepredigt ist, nicht menschlich ist, ¹² Denn ich habs nicht von eynem menschen empfangen, noch gelernet, sondern durch die offinbarung Jhesu Christi. ¹³ Denn yhr habt yhe wol gehoret meynen wandel weyland ym Judenthum, wie ich vbir die maß die gemeyne Gottis verfolgete, vnnd verstoret sie, ¹⁴ vnnd nam tzu ym Judenthum vber viele meyns gleychen, vnter meyner Nation, vnd eyffert mehr denn alle ander vmb der veter gesetz.

¹⁵ Da es aber Gotte wolgefiel, der mich von meyner mutter leybe hat außgesondert, vnd beruffen durch seyne gnade, ¹⁶ das er seynen son offinbaret ynn myr, das ich yhn durchs Euangelion verkundigen solt vnter den heyden, also bald, fur ich zu, vnd besprach mich nicht daruber mit fleysch vnd blut, ¹⁷ kam auch nicht gen Jerusalem, zu denen, die fur myr Apostel waren, sondern zoch hyn ynn Arabiam, vnd kam widderumb gen Damascon, ¹⁸ Darnach vber drey iar, kam ich gen Jerusalem, zu schawen Petron, vnd bleyb funfftzehen tage bey

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 291. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_297.jpg&oldid=- (Version vom 10.4.2021)

1. Die Kapitelüberschrift fehlt hier in den ersten Auflagen.
2. Gott fehlt hier im Text von 22¹, wird aber in der Correctur ergänzt.