got leit an si vil starken vlis.
nv wirt si leidor kranc
da von der schopher ist vnschuldich. ob sin hant getat
mit willen swachet sit er wnnencliche si gebildet hat.
Si wrkut an allen it wis.
sin wiser vurgedank.
do nam si von ir selber abe alsam tet lucifer
der was gotes wnderwerk sit wart enschophet er
dur sine schulde wart er ein swacer[1] tifel vs eime engele sin
bestrafe ich den do von mag got niht bescholten sin.
das wunencliche lob das siner vroiden sal bestecket wol.
doch wisset das si gar ze vil
vnnvzer bome treit.
e das ze himel vs ir werde ein mvskatris bekant.
e wirt vil menig bilsen ast der (Bl. 44b) tiefen hellen vs ir gesant.
ir ist ein vngeliche spil
von zwiin vur geleit.
si kan des argen wnder vnd des gv̊ten wenig phlegen
des mag ir tv̊gen[2] ir missetat vil kvme wider wegen.
ein hag der alze manigen dorn vnd luzzel rosen vf sich ladet.
des fruhten hilfet niht so vol so fil sin crazen schadet.
So solte man si strafen doch dur das si mengen bresten hat.
si lidet alter vnd frost.
durst hunger siechtagen.
ir selbes schult ir hat gebrvͤuet werendes vngemach.
Das in den aphel eva beis das schv̊f das si noch schriet ach.
si mv̊s mir dur ir schnode kost.
den wisen missehagen.
ir angebornre (so) wandel den si von adam treit.
der machet das irloschen kan. das lieht der werdekeit.
nu sprechet ob si niht ze schelten wol von waren schulden si.
Sit nieman ane bresten lebt ist[3] ioch svnden frj.
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 349. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_349.png&oldid=- (Version vom 7.1.2019)
