Sol der[1] gv̊te
der gemv̊te
machet
dc mir lachet
herze vnd al die sinne swenne man si vor mir nennet.
E ich den kvmber
den ich tvmber
dvlde
dvr ir hvlde
lieze lieber het ich rome vnd engellant verbrennet.
Vnd liege ich dc(H. 2, 172a)
so mv̊ze ir haz
der ich nie vergaz
min leit vertragen.
so wurde cranc
al min gesanc.
ir vil werden danc
mv̊z ich beiagen.
Des wurden tvsent herzen lebende ane swere
swie min frowe ir versagen wider mich verbere.
so weiz ich doch des kvneges niht der mir gelicher danne were.
Waz hilfet si dc riche gv̊t.
die niht wibes minne minnent
vnd des niemer niht beginnent
dc man nenmet hohen mv̊t.
Min hobschen zimpt den frowen niht swes herze vnsanfte wol getv̊t.[2]
vil meneger sv̊chet dvr dc iar
des er doch niht vinden wolde
sere man si hazzen solde
die den wiben sagent vnwar
swie cleine ez mir doch vrome dc ich in nie gelǒc alse vmbe ein har.
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 199. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_199.png&oldid=- (Version vom 7.1.2019)
