mer ist swer ir ze rehte gert.
ob ich an mir selbem vunde
dc ich hohes mv̊tes mich gern vnder wunde.
sone vund ich niht den nivnden der mirs gvnde.
leiden trost von schvlden geben.
truwe vnd ere virret beiden
nieman kan geleben. (so)
alten sitten ivngen lv͛ten.
swer dv͛ beidv͛ nv wil mit den andern trvten.
der wirt gar ze spote kan ers niht verkivͤten.
wisen vf der selden vart.
so kvnde ich ir leben geprisen
prisen wir ir tǒben art.
dc mac wol ir tv̊gent gerv͛wen.
do man alte sach dvr zvht die ivngen blvwen.
do stvndez an eren baz vnd och an trvwen.
keren sich die valschen dran.
die niht gerne[1] wan valscher (Bl. 17a) eren.
eren craft nieman gewan.
wan der eine der des varte.
daz er so mit truwe vnd och mit zvhte gebarte.
dc er si niemer aner betagitet noch och beiarte. (so)
werben anders danne also.
est ze ivngest niht wan sterben.
sterben alse lihte vro.
so dc wir die tage verswenden
ane vrevde vnd doch mit sorgen niht verenden.
wc sol truren vur dc nieman kan irwenden.
- ↑ Lies gern.
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 171. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_171.png&oldid=- (Version vom 7.1.2019)