dc beste gelt der froiden min
dc lit an ir vnd aller miner selden wan.
swenne ich den virlivse so han ich niht.
vnd enrv̊che och fvr den selben tac. wc mir geschiht.
ich mv̊z wol sorgen vmbe ir leben
stirbet si so bin ich (Bl. 2a) tot.
hat si mir anders niht gegeben.
so erkenne ich doch nv senede not.
div erzeige sich als ez an minem heile si.
die ensv̊che ich niender anderswa.
an ir gibot so wil ich niemer werden fri.
dc si dc sprechent von verlorner arbeit.
sol dc der miner einiv sin. dc ist mir leit.
ich enwande niht do ich ez began.
ich engelebte noch an ir lieben tac.
ist mir da misselvngen an.
doch gab ich ez wol alse ez da lac.
sin wip versv̊chen. noch gezihen dest min rat
von der er sich niht scheiden wil.
vnd er der waren schvlden doch keine hat.
Swer wil alder welte lvge an ein ende komen.
der hat im ane not ein vil herceliches leit genomen.
wan sol boͤser rede gedagen.
frage och nieman lange des dc er vngerne hore sagen.
von der ich hohe solte tragen den mv̊t.
io wirb ich niht mit kvndecheit.
noch dvr versv̊chen alsam vil meneger tv̊t.
ich enwart nie rehte vro. wan so ich si sach.
so gie von herzen gar swc min mvnt wider si gesprach.
- ↑ Oben drüber steht von anderer Hand Ge.
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 86. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_086.png&oldid=- (Version vom 7.1.2019)
